མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པ་ཚོས། རྒྱ་ནག་གིས་བོད་མི་རྣམས་དང་བླངས་ལས་བསྒྱུར་ཞེས་པའི་ལས་གཞི་ཞིག་གི་ནང་བཅུག་སྟེ་ཆབ་སྲིད་སློབ་གསོ་སྤྲོད་ཀྱིན་ཡོད་པའི་བློ་འཚབ་བསྟན་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཐོའི་ལྷན་ཚོགས་ཀྱིས་རྒྱ་ནག་གིས་བོད་ནང་ལག་བསྟར་བྱེད་བཞིན་པའི་སྲིད་ཇུས་ཁག་གི་ཐོག་བློ་འཚབ་ཡོད་པའི་གསར་འགོད་བསྒྲགས་གཏམ་ཞིག་སྤེལ་བའི་ནང་། ཕྱི་ལོ་ ༢༠༡༥ ཙམ་ནས་རྒྱ་གཞུང་གིས་དང་བླངས་ལས་བསྒྱུར་དང་ལག་ཤེས་སྦྱོང་བརྡར་ཟེར་བའི་ལས་གཞིའི་འོག་ནས་བོད་མི་སྟོང་ཕྲག་མང་པོ་ཡོང་འབབ་ཞན་པའི་ལས་རིགས་ཀྱི་ནང་དུ་བཅུག་སྟེ། འཆར་གཞི་དང་གོ་རིམ་ལྡན་པའི་ངང་ནས་བོད་མི་རྣམས་བོད་ཀྱི་ཆོས་དང་རིག་གཞུང་། སྐད་ཡིག་སོགས་དང་ཁ་བྲལ་དུ་གཏོང་གི་ཡོད་པ་མ་ཟད། བོད་མིའི་ནང་སེམས་ཀྱི་འདུ་ཤེས་དང་ལྟ་བ་སོགས་ལ་འགྱུར་བཅོས་གཏོང་ཐབས་དང་། དམར་ཤོག་གི་ཆབ་སྲིད་སློབ་གསོ་སྤྲོད་ཀྱིན་ཡོད་སྐོར་སོགས་བརྗོད་འདུག
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གསལ་བསྒྲགས་ནང་། རྒྱ་ནག་གཞུང་གིས་བོད་མི་རྣམས་ལ་འདོད་མོས་ཡོད་མེད་ལ་མ་ལྟོས་པར་ལག་ཤེས་སྦྱོང་བརྡར་ཁང་ནས་ཆེད་འཛུགས་བྱས་པའི་དམག་སྒར་ནང་བཞིན་གྱི་ཁོར་ཡུག་ཞིག་ཏུ་བཅུག་ནས། བོད་མི་རྣམས་ལ་ལག་ཤེས་སྦྱོང་བརྡར་སྤྲོད་ཀྱི་ཡོད་མདོག་གིས། དོན་དུ་བོད་མི་ཚོ་གདོང་མ་ནས་ཡོད་པའི་ཞིང་འབྲོག་གི་འཚོ་བ་ནས་ཕྱིར་འདོན་ཐབས་བྱེད་པ་དང་། ཡོང་འབབ་དམའ་ཞིང་དམག་སྒར་རིང་བཞིན་གྱི་ཁོར་ཡུག་ཏུ་ཞུགས་པ་ནས་བཟུང་བོད་མི་ཚོས་བོད་ཀྱི་སྐད་ཡིག་རིག་གཞུང་དང་ཆོས་ལུགས་བཅས་འབྲེལ་བའི་བྱེད་སྒོའི་རིགས་སྤེལ་མི་ཆོག་པའི་སྒྲིག་ཁྲིམས་ཡོད་ཁར། རྒྱལ་ཚོགས་ཀྱི་ཆེད་མཁས་པས། རྒྱ་གཞུང་གིས་བོད་མི་རྣམས་ལ་བཙན་གྱིས་ཁོར་ཡུག་དེ་དག་གི་ནང་ངལ་རྩོལ་བྱེད་དུ་འཇུག་གི་ཡོད་པ་དང་། ལས་གཞི་དེ་ནི་ཐད་ཀར་བོད་མི་རྣམས་ལ་དམིགས་པ་ཞིག་ཡིན་སྟབས། རྒྱ་ནག་རྒྱལ་སྤྱིའི་འགྲོ་བ་མིའི་ཐོབ་ཐང་གི་མི་རིགས་དབྱེ་འབྱེད་ཀྱི་ཁྲིམས་དང་འགལ་བའི་བློ་འཚབ་ཡོད་སྐོར་སོགས་བརྗོད་འདུག
ལས་གཞི་དེ་ནི་བོད་མིའི་ལག་ཤེས་གོང་མཐོར་དམིགས་མེད་པར་མི་རིགས་ཤིག་ལ་རང་རང་གི་སྐད་ཡིག་དང་ཡུལ་སྲོལ་གོམས་གཤིས་སོགས་སྤྱོད་པའི་རང་དབང་སྤྲོད་ཀྱི་མེད་ཅིང་། དམིགས་བསལ་རྒྱ་བསྒྱུར་སློབ་གསོ་སྤྲོད་ཀྱི་ཡོད་སྟབས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་པས། རྒྱ་ནག་གཞུང་གིས། བོ་མི་རྣམས་ལག་ཤེས་སྦྱོང་བརྡར་ཁང་ནས་དང་བླངས་ལས་བསྒྱུར་ལས་གཞིའི་ཁྲོད་འཇུག་དོན་ཅི་ཡིན་པ་དང་། བོད་མི་རྣམས་ཀྱི་ཉིན་རེའི་བྱེད་སྒོ་ཁག་ལ་སྟངས་འཛིན་བྱེད་དོན་ཅི་ཡིན་སོགས་ཀྱི་སྐོར་ལ་གསལ་བཤད་དགོས་པ་མ་ཟད། རྒྱ་ནག་གིས་བོད་ཀྱི་སྐད་ཡིག་དང་ཆོས་དང་རིག་གཞུང་། ངོ་བོ་སོགས་ལ་བརྩི་བཀུར་བྱེད་དགོས་པ་དང་། དམིགས་བསལ་ལས་གཞི་དེའི་ཁྲོད་རྒྱལ་སྤྱིའི་ཁྲིམས་སྒྲིག་ལས་བརྒལ་བའི་བཙན་དབང་ངལ་རྩོལ་དང་མི་ཚོང་སོགས་རྒྱག་གི་མེད་པ་གསལ་འདོན་དགོས་པའི་སྐུལ་མ་བཏང་འདུག
གསར་འགོད་པ། སྐལ་བཟང་སྦྱིན་པ།
