བོད་མིའི་ཚོང་ལས་བདེ་ཚོགས་ཀྱི་སྐབས་བཅུ་དྲུག་པའི་ཚོགས་ཆེན་འཚོགས་སོང་།

བོད་མིའི་ཚོང་ལས་བདེ་ཚོགས་ཀྱི་ཚོགས་ཆེན་ཐེངས་བཅུ་དྲུག་པ་དེ་བཞུགས་སྒར་དྷ་སའི་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ་ཉིན་གཅིག་རིང་འཚོགས་སོང་།

དེ་རིང་སྔ་དྲོ་ཆུ་ཚོད་ ༡༠།༣༠ སྟེང་དྷ་ས་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ། བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་ཐེངས་བཅུ་དྲུག་པའི་མཛད་སྒོ་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་སྐུ་ཚབ་ནང་སྲིད་དྲུང་ཆེ་དཔལ་ལྡན་དོན་གྲུབ་མཆོག དེ་བཞིན། བོད་མིའི་ཚོང་ལས་བདེ་ཚོགས་ཀྱི་འགན་འཛིན་བཀྲ་ཤིས་དབང་འདུས་ལགས་ཀྱི་གཙོས་རྒྱ་གར་གྱི་ས་གནས་འདྲ་མིན་ནས་ཕེབས་པའི་ཚོང་ལས་དོན་གཉེར་ཅན་དང་གཞུང་འབྲེལ་མིན་པའི་ཚོགས་སྡེ་ཁག་གི་འཐུས་མི་དང་གསར་འགོད་པ་བཅས་འཛོམས་འདུག

མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། བོད་མིའི་ཚོང་ལས་བདེ་ཚོགས་ཀྱི་གཏན་འཇགས་ཚོགས་མི་ ༡༤ ལ་ངོས་འཛིན་ལག་ཁྱེར་ཕུལ་སོང་བ་དང་། སྐབས་དེར། བོད་མིའི་ཚོང་ལས་བདེ་ཚོགས་ཀྱི་འགན་འཛིན་བཀྲ་ཤིས་དབང་འདུས་ལགས་ཀྱིས་ཚོགས་ཆེན་དབུ་འབྱེད་ཀྱི་གཏམ་བཤད་གནང་སྐབས། བོད་མིའི་ཚོང་ལས་བདེ་ཚོགས་དེ། ཕྱི་ལོ་ ༢༠༠༥ ལོར་ཐོག་མར་དབུ་ཚུགས་པ་ནས་ད་བར་ལོ་ངོ་ ༡༧ རིང་གི་གནས་སྟངས་སྤྱི་དང་། དམིགས་བསལ་ཕྱི་ལོ་ ༢༠༢༡ ལོ་མཇུག་ཏུ་བཀྲ་ཤིས་དབང་འདུས་ལགས་ཚོགས་པའི་ཚོགས་གཙོར་བསྐོ་གཞག་བྱུང་བ་ནས་ལས་གཞི་མང་དག་ཅིག་སྤེལ་ཡོད་པ་གསལ་བཤད་གནང་བ་དང་སྦྲགས། ཐེངས་འདིའི་ཚོགས་ཆེན་ཐོག་ཉེ་ལམ་༧གོང་ས་མཆོག་ལ་མཚན་སྨོད་ཞུས་པའི་གནད་དོན་གྱི་ཐད་གདུང་སེམས་མཉམ་སྐྱེད་དང་མ་འོངས་འགོག་སྲུང་བྱེད་ཐབས།  ཚོང་ཁང་དང་ཟ་ཁང་སོགས་ཀྱི་སྒོ་བྱང་སྟེང་བོད་ཡིག་གང་མང་བཀོལ་ཐབས། ཉེ་སྔོན་གྲོས་ཚོགས་ནང་བོད་མིའི་དང་བླངས་དཔྱ་དངུལ་སྤར་སྣོན་བྱས་པ་དང་འབྲེལ་ནས། བོད་མིའི་ཚོང་ལས་བདེ་ཚོགས་ཀྱིས། གཞུང་ལ་ཞལ་འདེབས་ཕུལ་འབུལ་བཞིན་པ་དེ་ཧིན་སྒོར་ལྔ་བརྒྱ་ནས་ཉིས་སྟོང་ཡས་མས་བར་སྤར་རྒྱུ་ཡིན་པ་བཅས་ཀྱི་གྲོས་ཆོད་འཇོག་རྒྱུ་ཡིན་སྐོར་སོགས་བརྗོད་སོང་།

སྐབས་དེར་སྐུ་མགྲོན་གཙོ་བོ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ཕྱི་རྒྱལ་ཡུལ་གྲུ་ཁག་ཏུ་འདྲ་མཉམ་གྱི་ཁོར་ཡུག་ཙམ་ཡོད་པ་ལས། ཚོང་ལས་ཐོག་ཡར་རྒྱས་འགྲོ་བཞིན་པའི་རྒྱ་གར་ནང་གོ་སྐབས་མང་བ་དང་། བོད་མི་ཚོས་ཚོང་བརྒྱབ་སྟེ་མི་སྒེར་ནས་ཁྱིམ་ཚང་དང་། ཁྱིམ་ཚང་ནས་ཚོགས་སྡེ། དེ་ནས་མི་རིགས། ཆོས་དང་རིག་གཞུང་། ཆབ་སྲིད་སོགས་ཀྱི་མདུན་ལམ་འཚོལ་ཐབས་གནང་རྒྱུ་གལ་ཆེན་ཡིན་སྐོར་གསུངས་སོང་ལ། དམིགས་བསལ་སྐུ་མགྲོན་ནང་སྲིད་དྲུང་ཆེ་དཔལ་ལྡན་དོན་གྲུབ་མཆོག་གིས། ལོ་ངོ་བཅུ་བདུན་གྱི་སྔོན་ལ་བཙུགས་པའི་ཚོགས་པ་དེ་ད་ལྟ་ཚགས་ཚུད་པོ་དགོས་ཀྱི་ཡོད་ཀྱང་། ད་ལྟའང་གཤོག་པ་སྐྱེས་ཙམ་ལས་མེད་པས། འབྱུང་འགྱུར་ལོ་ལྔ་དྲུག་ནང་ཚོང་ལས་བདེ་ཚོགས་ཀྱི་ལས་དོན་ཡར་རྒྱས་གོང་འཕེལ་ཡོང་བའི་རེ་བ་རྒྱག་གི་ཡོད་པ་དང་། ནང་སྲིད་ལས་ཁུངས་ཀྱི་དམིགས་ཡུལ་ནི་བོད་མིའི་ཚོང་ལས་དང་དཔལ་འབྱོར། སྤྱི་ཚོགས་ཀྱི་གནས་བབ་སོགས་ཡར་རྒྱས་གཏོང་རྒྱུ་དེ་ཡིན་པས། ནང་སྲིད་ལས་ཁུངས་དང་ཚོང་ལས་བདེ་ཚོགས་གཉིས་ཕན་ཚུན་གཅིག་ཕན་གཅིག་གྲོགས་ཀྱིས། ༧གོང་ས་བཀའ་དགོངས་འོག བོད་པའི་སྤྱི་ཚོགས་ཀྱི་བདེ་དོན་དང་བདེ་རྩ། བརྟན་བརླིང་སོགས་ཀྱི་ཐད་ཞོར་འདེགས་གནང་ཐུབ་པའི་རེ་བ་དང་སྨོན་འདུན་ཡོད་སྐོར་གསུངས་སོང་།

དེ་རིང་ཉིན་རྒྱབ་ཏུ་ལོ་འཁོར་གཉིས་ཀྱི་རྩིས་ཕྲ་རྒྱས་འབུལ་དང་ཚོང་ལས་ཐོག་ཆེད་ལས་མི་སྣའི་གསུང་བཤད། ད་དུང་འབྱུང་འགྱུར་ལས་དོན་བསྒྲུབ་ཕྱོགས་སོགས་ཀྱི་ཐོག་བགྲོ་གླེང་གནང་གི་འདུག་ལ། སང་ཞོགས་ཚོགས་བཅར་བ་ཡོངས་ལ་༧གོང་ས་རྒྱལ་བ་རིན་པོ་ཆེ་མཆོག་གིས་མཇལ་ཁ་གནང་གཏན་ཁེལ་ཡོད་འདུག

གསར་འགོད་པ། སྐལ་བཟང་སྦྱིན་པ།