བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཌན་མག་གྲོས་ཚོགས་འཐུས་མི་དང་སྲིད་བློན་ཟུར་པ། བོད་དོན་རྒྱབ་སྐྱོར་ཚོགས་པ་བཅས་ཀྱི་གནད་ཡོད་མི་སྣ་ཁག་ཅིག་ལ་མཇལ་འཕྲད་གནང་སྟེ་བོད་དོན་ངོ་སྤྲོད་གནང་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཡུ་རོབ་རྒྱལ་ཁབ་བཞིའི་ནང་དུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༣ ཉིན་གྱི་སྔ་དྲོར་ཌན་མག་གི་རྒྱལ་ས་ཀོ་པན་ཧེ་གྷན་གྱི་གྲོས་ཚོགས་ཁང་དུ། སྲིད་སྐྱོང་མཆོག་གིས་ཌན་མག་མི་མང་སྲིད་དོན་ཚོགས་པའི་(Danish People’s Party) ཚོགས་གཙོ་དང་གྲོས་ཚོགས་འཐུས་མི་སྐུ་ཞབས་མོར་ཌེན་(Morten Messerschmidt )་ལགས་དང་། གྲོས་ཚོགས་འཐུས་མི་གདམ་ཀ་སྲིད་དོན་ཚོགས་པའི་(The Alternative)ཕྱི་སྲིད་ལས་དོན་གྱི་མགྲིན་ཚབ་པ་དང་། གྲོས་ཚོགས་ཕྱི་སྲིད་ལས་དོན་ཚོགས་ཆུང་གི་ཚོགས་མི་ལྕམ་སྐུ་སཱ་སི་ཁཱ་ཧྤེ་སི་(Sascha Faxe)ལགས་དང་མཇལ་འཕྲད་གནང་འདུག
ཉིན་རྒྱབ་སྲིད་སྐྱོང་མཆོག་ནས་ཌན་མག་སྲིད་བློན་ཟུར་པ་དང་ནུབ་ཆིངས་མནའ་བྲེལ་ཚོགས་པའི་(NATO)་དྲུང་ཆེ་ཟུར་པ་ཨན་ཌེར་སི་(Anders Fogh Rasmussen) མཆོག་དང་། དམངས་གཙོ་མཐུན་སྒྲིལ་ཚོགས་པའི་(Alliance for Democracy)་འགན་འཛིན་སྐུ་ཞབས་ཇོ་ནཱ་སི་(Jonas Parello-Plesner)ལགས་བཅས་ལ་མཇལ་འཕྲད་གནང་ཡོད་པ་མ་ཟད། ཉིན་དེའི་དགོང་མོར་ཌན་མག་བོད་དོན་རྒྱབ་སྐྱོར་ཚོགས་པ་དང་། ཌན་མག་རྒྱལ་སྤྱིའི་ཉེས་ཡངས་ཚོགས་པ་གཉིས་ཀྱི་གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་དོན་གསུང་བཤད་གནང་འདུག སྐབས་དེར་སྲིད་སྐྱོང་མཆོག་ནས་བོད་ནང་རྒྱ་ནག་གཞུང་གིས་གདུག་རྩུབ་མནར་གཅོད་མཚམས་མ་ཆད་བར་གཏོང་བཞིན་ཡོད་པའི་བོད་མིའི་དཀའ་ངལ་དང་། རང་ལུས་མེར་སྲེག་གནང་མཁན་སོགས་ཀྱིས་རང་དབང་ཆེད་དུ་རྒྱལ་སྤྱིའི་སྤྱི་ཚོགས་ལ་རེ་འབོད་གནང་ཡོད་ཀྱང་། ད་དུང་བོད་ནང་དུ་འགྱུར་བ་ཅུང་ཙམ་ཡང་ཐེབས་མེད་པ་མ་ཟད། བོད་ཀྱི་སྐད་ཡིག་དང་རིག་གཞུང་རྩ་མེད་དུ་འགྲོ་ཉེན་ཆེ་བའི་གནས་སྟངས་ཐད། རྒྱལ་སྤྱིའི་སྤྱི་ཚོགས་ཀྱིས་མཉམ་འབྲེལ་ཐོག་ནས་རྒྱ་ནག་ལ་གདོང་ལེན་བྱེད་གལ་ཆེ་བའི་སྐོར་གསུངས་འདུག
ཕྱི་ཚེས་ ༢ ཉིན་སྲིད་སྐྱོང་སྤེན་པ་ཚེ་རིང་མཆོག་ཌན་མག་གི་རྒྱལ་ས་ཀོ་པེན་ཧེ་གྷན་དུ་ཕེབས་འབྱོར་བྱུང་སྐབས། བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་པ་འགྱུར་མེད་ལགས་དང་། ཌེན་མག་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨན་ (Anders H. Andersen)ལགས། ཌེན་མག་བོད་ཀྱི་ཤེས་རིག་ལྷན་ཚོགས་ (Danish Tibetan Cultural Society) ཀྱི་ཚོགས་གཙོ་སྐུ་ཞབས་གྷ་རེ་ཐེ་སཱོར་ཝེག་(Grethe Sorvig) ལགས། ཌེན་མག་བོད་རང་བཙན་སློབ་ཕྲུག་ཚོགས་པའི་ཚོགས་མི་ཁི་ལུ་ཌི་ཡ་(Claudia )ལགས། ཌི་ནཱ་(Tina)ལགས་བཅས་ཀྱིས་ཕེབས་བསུ་ཞུས་ཡོད་ཅིང་། ཉིན་རྒྱབ་སྲིད་སྐྱོང་མཆོག་གིས་བོད་ཀྱི་བདེ་དོན་ཐེབས་རྩ་གསར་འཛུགས་གནང་མཁན་ལྭ་ཁ་རིན་པོ་ཆེ་མཆོག་ལ་མཇལ་ཁ་ཞུས་ཡོད་པ་དང་། ཀོ་པེན་ཧེ་གྷན་ཁུལ་གྱི་བོད་རིགས་མང་ཚོགས་དང་གཞོན་སྐྱེས་རྣམས་ལ་བོད་དོན་གསུང་བཤད་གནང་ཡོད་འདུག སྐབས་དེར་སྲིད་སྐྱོང་མཆོག་ནས་ད་ལྟའི་བཀའ་ཤག་གི་སྲིད་ཇུས་འཛིན་ཕྱོགས་དང་། དབུ་མའི་ལམ་གྱི་སྲིད་ཇུས་ལངས་ཕྱོགས་བརྟན་པོ་བཟུང་ནས་བོད་དོན་བདེན་མཐའ་སེལ་དགོས་པའི་སྐོར་གསུངས་འདུག
དེ་བཞིན་ཕྱི་ཚེས་ ༢ ཉིན་ནོར་ཝེ་གྲོས་ཚོགས་ཚོགས་ཁང་དུ། སྲིད་སྐྱོང་མཆོག་གིས་ནོར་ཝེ་ལྗང་ཁུ་སྲིད་དོན་ཚོགས་པའི་(Norwegian Green Party)་གྲོས་ཚོགས་འཐུས་མི་དང་། གྲོས་ཚོགས་ཚོང་དོན་ཚོགས་ཆུང་། བཟོ་གྲྭའི་ཚོགས་ཆུང་གི་ཚོགས་མི་སྐུ་ཞབས་རཱ་སུ་མུ་སི་ཧཱན་སོན་(Rasmus Hansson)་ལགས་དང་། ནོར་ཝེ་གུ་ཡངས་སྲིད་དོན་ཚོགས་པའི་(Liberal Party)་གྲོས་ཚོགས་འཐུས་མི་དང་། གྲོས་ཚོགས་ཁོར་ཡུག་དང་ནུས་སྟོབས་ཚོགས་ཆུང་གི་ཚོགས་མི་བཅས་ཡིན་པ་སྐུ་ཞབས་ཨོ་ལཱ་ཨེལ་ཝེ་སུ་ཊུན་ (Ola Elvestuen)ལགས་དང་། རྙིང་ཞེན་སྲིད་དོན་ཚོགས་པའི་(Conservative Party)གྲོས་ཚོགས་འཐུས་མི། གྲོས་ཚོགས་ཕྱི་སྲིད་ལས་དོན་ཚོགས་ཆུང་། བདེ་སྲུང་ཚོགས་ཆུང་གི་ཚོགས་མི་བཅས་ཡིན་པ་ལྕམ་ཨིན་ཇེར་ཌི་(Ingjerd Schou)་ལགས་བཅས་ལ་མཇལ་འཕྲད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས་རྒྱ་གཞུང་གིས་བོད་ནང་གི་བྱིས་པ་རྣམས་བཙན་གྱིས་མི་སེར་སྤེལ་བའི་གཏན་འཇགས་སློབ་གྲྭར་བཅུག་ནས་རྒྱ་བསྒྱུར་སློབ་གསོ་སྤེལ་བཞིན་པའི་ཛ་དྲག་གནས་སྟངས་སྐོར་གསུང་བཤད་གནང་ཡོད་པ་མ་ཟད། གྲོས་ཚོགས་འཐུས་མི་རྣམས་བཞུགས་སྒར་དུ་ཕེབས་པར་མགྲོན་འབོད་ཀྱང་གནང་ཡོད་འདུག
ཉིན་དེའི་ཉིན་རྒྱབ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་ནོར་ཝེ་རྒྱལ་ས་ཨོ་སེ་ལོ་ཁུལ་གྱི་ས་གནས་བོད་རིགས་མང་ཚོགས་ལ་ཐུག་འཕྲད་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་བཀའ་ཤག་གི་སྲིད་ཇུས་ལངས་ཕྱོགས་དང་། བོད་ནང་གི་ཛ་དྲག་ཆེ་བའི་དཀའ་ངལ། ཉེ་ཆར་༧གོང་ས་མཆོག་ལ་གཞི་མེད་མཚན་སྨོད་ཞུས་པའི་གནས་སྟངས་ཐོག་གསུང་བཤད་ཀྱང་གནང་ཡོད་འདུག
གསར་འགོད་པ། བྱམས་པ་ཚེ་རིང་།
