ཨོ་གླིང་སིཌ་ནི་རུ་མགོའི་སྐྲ་བྲེགས་ནས་ཞི་བའི་ངོ་རྒོལ་ལས་འགུལ་སྤེལ།

ཉེ་སྔོན་༧གོང་ས་རྒྱལ་བ་རིན་པོ་ཆེ་མཆོག་ལ་གཞི་མེད་མཚན་སྨོད་ཞུས་པར་ངོ་རྒོལ་ཆེད་ཨོ་གླིང་སིཌ་ནི་གྲོང་ཁྱེར་ནང་མི་གྲངས་ ༥༠༠ ལྷག་གིས་ས་གནས་ཀྱི་རྒྱ་ནག་གཞུང་ཚབ་ཁང་བར་ཞི་བའི་གོམ་བགྲོད་བྱས་པ་དང་ལས་འགུལ་བ་ ༨ ཀྱིས་མགོ་སྐྲ་བྲེགས་ཏེ་སེམས་གཏིང་གི་ན་ཟུག་དང་བདེན་པ་དག་སྐྱེལ་མཚོན་པར་བྱས་ཡོད་འདུག

 ཁ་སང་ཕྱི་ཚེས་ ༨ ཉིན་སིཌ་ནི་བོད་རིགས་མཐུན་ཚོགས་ཀྱི་གོ་སྒྲིག་འོག གསར་ཁང་དང་སྤྱི་ཚོགས་བརྒྱུད་ལམ་ཁག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་གཞི་མེད་མཚན་སྨོད་ཞུས་པར་ངོ་རྒོལ་ཆེད། སིཌ་ནི་ཡི་མ་ཌན (Martin) ནས་རྒྱ་ནག་གཞུང་ཚབ་ཁང་གི་མདུན་ཐང་བར་དུ་ཞི་བའི་གོམ་བགྲོད་ཀྱི་ལས་འགུལ་སྤེལ་ཡོད་ཅིང་།  ལས་འགུལ་དེའི་ནང་བོད་དོན་ལྷན་ཁང་གི་འགན་འཛིན་ལྕམ་ཛོ་ཡེ་བྷེ་ཌི་ཧྥོ་ཌི་(Zoe Bedford) ལགས་དང་། བོད་མི་མང་སྤྱི་ཟུར་གདོང་འདུས་སྐྱིད་འཛོམས་ལགས་གཙོས། ཌེ་ཝེ་དང་། རི་སྔོན་པོ། གནས་མཁར་གསར། ནོར་ར། ཁེམ་བྷེལ་ཊོན་སོགས་ནས་བོད་མི་ལྔ་བརྒྱ་ལྷག་གིས་མཉམ་ཞུགས་གནང་ཡོད་འདུག 

 དེའི་ཐད་སུཌ་ནི་བོད་རིགས་མཐུན་ཚོགས་ཀྱི་ཚོགས་གཙོ་ཆོས་འཛིན་ལགས་ཀྱིས་འདི་གའི་གསར་འགོད་པར། ཁ་སང་ཨོ་གླིང་གི་ས་གནས་མི་འདྲ་བ་ཁག་མང་པོ་ཞིག་ནས་བོད་མི་གྲངས་ ༥༠༠ ལྷག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨོད་ཞུས་བར་ངོ་རྒོལ་ཆེད། ཞི་བའི་གོམ་བགྲོད་ཀྱི་ངོ་རྒོལ་ལས་འགུལ་ནང་མཉམ་ཞུགས་གནང་ཡོད་ཅིང་།  སྐབས་དེར་ལས་འགུལ་ནང་མཉམ་ཞུགས་གནང་མཁན་བོད་མི་རྒན་གཞོན་བར་གསུམ་གྲངས་ ༨ ཀྱིས་ཆུང་ནས་སྐྱེས་བའི་སྐྲ་ལོ་བྲེགས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨོད་དང་སྙོན་འཛུགས་བྱས་པར་ངོ་རྒོལ་བྱས་ཡོད། སྤྱིར་བོད་ཀྱི་གོམས་གཤིས་དང་ལུགས་སྲོལ་གྱི་ཁྲོད་དུའང་སྐྱེས་པ་དང་སྐྱེས་མ་དག་གིས་སོ་སོའི་མི་ཚེའི་ཁྲོད་དྭང་ལེན་དཀའ་བའི་གནས་ཚུལ་བྱུང་སྐབས། རང་གི་སྐྲ་བྲེག་པའི་གོམས་གཤིས་ཡོད་སྐོར་དང་། ཁ་སང་གི་ལས་འགུལ་དེ་བརྒྱུད་ནས་དེ་སྔ་གསར་ཁང་ཁག་ཅིག་གིས་ཁུངས་མེད་ལུངས་མེད་ཀྱི་གནས་ཚུལ་རྫུན་མ་སྤེལ་ཡོད་པ་ཐེར་འདོན་བྱས་ནས། ཨོ་གླིང་གི་མི་སེར་དང་ལས་ཁུངས་ཁག་གི་གནད་ཡོད་མི་སྣ་རྣམས་ལ་གནས་ཚུལ་གསལ་བཤད་བྱས་ཡོད་ལ། ས་གནས་མང་ཚོགས་དང་ཚོགས་པ་སྒྲིག་འཛུགས་ཁག་མང་པོ་ཞིག་གིས་ཀྱང་བོད་མིའི་འཚེ་མེད་ཞི་བའི་ལས་འགུལ་དང་དྲང་བདེན་ལ་རྒྱབ་སྐྱོར་ཡོད་པའི་རྣམ་འགྱུར་ཤུགས་ཆེན་བསྟན་ཡོད་སྐོར་སོགས་བརྗོད་བྱུང་། 

 ཡང་ཁོང་གིས། ཉེ་ལམ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བརྩེ་བ་ཆེན་པོས་གནང་བའི་མཛད་པ་ཞིག་དང་འབྲེལ་ནས། རྒྱ་ནག་གཞུང་གཙོས་རྒྱ་གཞུང་དང་ངན་པ་ལག་འབྲེལ་བྱེད་མཁན་གྱི་མི་སྣ་ཁག་ཅིག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཕྲིན་མེད་པ་བཟོ་ཐབས་སླད། བརྙན་བཅད་གཏུབ་བྱས་ནས་དྲ་ལམ་དུ་དྲིལ་བསྒྲགས་ཤུགས་ཆེན་བྱས་ནས། སྤྱི་ཚོགས་དྲ་ལམ་ཁག་གི་མི་སྣ་ཁག་ཅིག་གིས་ཀྱང་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨོད་ཞུས་ཡོད་སྟབས། ཞི་བདེ་དང་། དྲང་བདེན། འཚེ་བ་མེད་པར་དགའ་མོས་བྱེད་མཁན་གྱི་མི་ཁྲི་སྟོང་མང་པོ་ཞིག་གི་སེམས་ལ་རྨས་ཁ་བཟོས་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ནི་བོད་མི་རིགས་ཀྱི་ལས་དབང་གི་དར་རྒུད་ལ་འབྲེལ་བ་དམ་ཟབ་ཡོད་པས། ཁོང་ལ་མཚན་སྨོད་ཞུས་པ་ནི་བོད་མི་རྣམས་ཀྱི་སེམས་སུ་ཤོངས་ཐབས་བྲལ་བ་ཞིག་ཏུ་གྱུར་ཡོད། གནད་དོན་དེ་དང་འབྲེལ་ནས་ཧི་མ་ལ་ཡའི་རི་རྒྱུད་པ་གཙོས་བོད་མི་རྣམས་ཀྱིས་ངོ་རྒོལ་ལས་འགུལ་སྤེལ་ཡོད་ཅིང་། དེ་སྔ་ཕྱི་ཟླ་ ༤ ཚེས ༡༡ ཉིན་ལའང་ཨོ་གླིང་དུ་སྟོད་གོས་དཀར་པོའི་ལས་འགུལ་སྤེལ་ཡོད་པ་དང་། སྐབས་དེར་བོད་མི་གཅིག་སྟོང་ལྷག་གིས་མཉམ་ཞུགས་བྱས་ཡོད་སྐོར་སོགས་བརྗོད་བྱུང་།

སུཌ་ཎི་བོད་རིགས་མཐུན་ཚོགས་ཀྱི་མགོའི་སྐྲ་གཏུབས་ཏེ་བདེན་པ་དག་སྐྱེལ་བྱས་པའི་བསྒྲགས་གཏམ་ནང་། ཞི་བདེའི་རླབས་ཆེན་གྱི་དབུ་ཁྲིད་༧གོང་ས་ཏཱ་ལའི་བླ་མ་མཆོག་ནས་མཛད་པའི་བརྙན་པར་གཏུབས་ཏེ་༧གོང་ས་ཏཱ་ལའི་བླ་མ་མཆོག་ལ་མཚན་སྨད་ཀྱི་དཀྲོག་གཏམ་བཟོས་པ་དང་། དེ་དག་ལ་ཞིབ་འཇུག་གང་ཡང་མེད་པར་རྒྱལ་སྤྱིའི་ཐོག་གང་བྱུང་བེད་སྤྱོད་ལོག་པར་བྱེད་མཁན་བྱུང་བར་ང་ཚོ་ནང་པའི་རྗེས་འཇུག་པ་དང་། བོད་མི་ཡོངས། ཞི་བར་དགའ་བའི་མི་སྡེའི་སྤྱི་ཚོགས་དཀྲུགས་པ་མ་ཟད། ང་ཚོའི་སེམས་ཁམས་ལ་གནོད་འཚེ་ཚད་མེད་བཟོས་པ་བཟོད་ཐབས་བྲལ་བར་བརྟེན། ང་ཚོས་མེས་པོའི་སྲོལ་རྒྱུན་ལྟར་དེ་རིང་ཆུང་བྱིས་པའི་དུས་ནས་བསགས་པའི་མགོ་བོའི་སྐྲ་གཏུབས་ཏེ་༧གོང་ས་མཆོག་ལ་འགྱུར་མེད་དད་གུས་ཀྱི་ལྷ་ཕྱག་དང་། མེས་པོའི་སྲོལ་བཟང་ལྟར་ཞི་བ་དང་། དྲང་བདེན། ལྷག་བསམ་དཀར་པོའི་སྒོ་ནས་ང་ཚོའི་སེམས་ནང་གི་ན་ཟུག་དང་བདེན་པ་དག་སྐྱེལ་མཚོན་པར་བྱེད་བཞིན་ཡོད། ༧གོང་ས་མཆོག་ལ་མཚན་སྨོད་ཞུ་ཐབས་དང་། ང་ཚོའི་རིག་གཞུང་ལ་གུས་བརྩི་མེད་པར་ངོ་རྒོལ་མཐའ་གཅིག་ཏུ་ཡོད། འཇིག་རྟེན་ཡོངས་ཀྱིས་བདེན་པའི་དཔང་པོ་གནང་རོགས། ༧གོང་ས་མཆོག་སྐུ་ཉིད་ནི་ང་ཚོ་ནང་པ་སངས་རྒྱས་དང་བོད་མི་ཡོངས་ཀྱི་བླ་སྲོག་ཡིན། བདེན་པ་རྒྱལ་གྱུར་ཅིག བདེན་པ་རྒྱལ་གྱུར་ཅིག ཞི་བདེ་རྒྱལ་གྱུར་ཅིག ཅེས་འཁོད་འདུག 

 གསར་འགོད་པ། དཔལ་ལྡན།