བོད་ནང་གི་གཞོན་སྐྱེས་མང་པོ་གླུ་གཞས་སྒྱུ་རྩལ་གྱི་ལམ་དུ་ཞུགས་པར་དགའ་མོས་བྱེད་ཀྱི་ཡོད་ཀྱང་ཉེ་སྔོན་རྒྱ་ནག་གཞུང་གིས་བོད་ཁུལ་གྱི་གླུ་བ་གླུ་མ་ཁག་ཅིག་གི་གླུ་ཚིག་རྩོམ་པ་པོ་སུ་ཡིན་དང་ནང་དོན་ཅི་ཡིན་སོགས་ལ་ཞིབ་བཤེར་བྱེད་བཞིན་ཡོད་འདུག
རྒྱ་ནག་གཞུང་གི་བཙན་གནོན་ཐེབས་པའི་བོད་ཀྱི་གླུ་བ་འགའ།
རྒྱ་ནག་གཞུང་གིས་བོད་ནང་གི་གནད་ཡོད་མི་སྣ་དང་རྩོམ་པ་པོ། ཤེས་ཡོན་པ་སོགས་ལ་གསང་བའི་ཉུལ་ཞིབ་དང་ཉེས་མིང་སྣ་ཚོགས་གཡོགས་ནས་འབུར་འཇོམས་བཏང་དང་གཏོང་མུས་ཡིན་པ་ལྟར། ཉེ་སྔོན་རྒྱ་ནག་གཞུང་གིས་དཀར་མཛེས་ཁུལ་སེར་ཤུལ་རྫོང་དང་མཚོ་སྔོན་ཞིང་ཆེན་གྱི་ས་གནས་ཁག་ཅིག་ནང་། གླུ་བ་གླུ་མ་རྣམས་ཀྱི་གླུ་ཚིག་སོགས་ལ་ཞིབ་འཇུག་བྱས་ཏེ། གླུ་ཚིག་འབྲི་མཁན་སུ་ཡིན་སོགས་འདྲི་རྩད་བྱེད་ཀྱི་ཡོད་པ་མ་ཟད། ཁོང་ཚོའི་སྐད་འཕྲིན་སོགས་ཀྱི་ནང་སྔོག་བཤེར་བྱེད་ཀྱི་ཡོད་འདུག
འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར། ཟླ་འདིའི་ཟླ་མགོ་ནས་བཟུང་སེར་ཤུལ་རྫོང་ཁོངས་ཀྱི་གླུ་བ་གླུ་མ་ཚོའི་གླུ་ཚིག་རྩོམ་མཁན་སུ་ཡིན་འདྲི་རྩད་ཀྱི་ཡོད་པ་མ་ཟད། དོགས་གཞི་ཅན་གྱི་གླུ་བ་གླུ་མ་དང་གླུ་ཚིག་འབྲི་མཁན་ལ་ཉེན་བརྡ་དང་སྦྲགས་ལྟ་རྟོག་བྱེད་བཞིན་ཡོད་སྐོར་དང་། བོད་མཚོ་སྔོན་ཞིང་ཆེན་གྱི་ས་ཁུལ་ཁག་ཅིག་ནང་དུའང་དམ་དྲག་གི་སྲིད་ཇུས་དེ་ལག་བསྟར་བྱེད་བཞིན་ཡོད་སྐོར་བརྗོད་བྱུང་།
ཡང་ཁོང་གིས། སྤྱིར་དེང་སྐབས་བོད་ནང་གི་ན་གཞོན་ཚོ་གླུ་ལེན་འདོད་ཧ་ཅང་ཆེན་པོ་ཡོད་པ་མ་ཟད། ན་གཞོན་མང་པོ་ཞིག་གིས་གླུ་ལེན་གྱིན་ཡོད་སྟབས། རྒྱ་ནག་གཞུང་གིས་བོད་ནང་གི་ན་གཞོན་ཚོས་ལ་རྒྱ་དང་ཆིག་སྒྲིལ་སྐོར་གྱི་གླུ་ལེན་པར་དམ་དྲག་ཤུགས་ཆེན་བྱེད་ཀྱི་ཡོད་ཀྱང་། མཛའ་གླུ་དང་རྒྱ་སྐད་དང་བོད་སྐད་འདྲེས་མའི་གླུ་ལེན་པར་དམ་དྲག་གང་ཡང་བྱེད་ཀྱི་མེད་སྐོར་འགྲེལ་བརྗོད་གནང་བྱུང་།
རྒྱ་ནག་གཞུང་གིས་བོད་ནང་གི་གླུ་གཞས་སྒྱུ་རྩལ་བ་ཚོར་སྟངས་འཛིན་དང་བཙན་གནོན་ཅི་ཙམ་བྱེད་ཀྱི་ཡོད་མེད་ཁ་གསལ་ཤོས་ཤིག་ནི། བོད་ཀྱི་ལོ་གཅིག་གི་དུས་སྟོན་ཆེ་ཤོས་ལོ་སར་དགོང་ཚོགས་ཁག་གི་ཐོག་ལོ་རེ་བཞིན་རྒྱ་སྐད་རྒྱ་གླུ་གཏོང་བཞིན་ཇེ་མང་དུ་འགྲོ་བཞིན་ཡོད་པ་མ་ཟད། བོད་གླུ་དང་བཞད་གར་ཕལ་ཆེ་བའི་བརྗོད་བྱ་རྣམས་རྒྱ་ནག་དམར་ཤོག་གཞུང་དང་དམག་དཔུང་ལ་བསྟོད་བསྔགས་དང་། བོད་ཁུལ་ཡར་རྒྱས་ཤུགས་ཆེན་སོང་ཡོད་ཚུལ། དམར་ཤོག་གཞུང་གི་བཀའ་དྲིན་ནམ་ཡང་བརྗེད་མི་རུང་བ་སོགས་ཀྱི་བརྗོད་བྱ་ཧ་ཅང་ཇེ་མང་དུ་ཕྱིན་ཏེ། མདོ་དབུས་ཁམས་གསུམ་གྱི་ལོ་སར་དགོང་ཚོགས་ཆེན་མོའི་ཐོག་བོད་རང་གི་སྐད་ཡིག་རིག་གཞུང་གོང་སྤེལ་དང་། རིགས་ཞེན་གྱི་གླུ་གཞས་གཏོང་མཁན་ཧ་ཅང་དཀོན་དུ་ཕྱིན་ཡོད་པ་རེད།
རྒྱ་ནག་གཞུང་གིས་ཆིག་སྒྲིལ་དང་རྩ་བའི་བླ་མར་བསྟོད་གླུ་ལེན་མཁན་གྱི་བོད་ཀྱི་གླུ་བ་གླུ་མ་རྣམས་གང་བྱུང་འཛིན་བཟུང་བཙོན་འཇུག་བྱས་ཏེ་དཀའ་ངལ་མང་པོ་འཕྲད་ཀྱི་ཡོད་ལ། འདས་ལོར་བོད་ཀྱི་གླུ་བ་ཚེ་དབང་ནོར་བུ་ལགས་ཀྱིས་རྒྱ་ནག་གཞུང་གི་བཙན་གནོན་སྲིད་ཇུས་ལ་ངོ་རྒོལ་བྱས་ཏེ་རང་ལུས་མེ་བསྲེགས་གནང་ཡོད་པ་རེད། དེ་བཞིན་འདས་ལོའི་ཕྱི་ཟླ་ ༡༠ ཚེས་ ༡༣ ཉིན་བོད་མགོ་ལོག་ཁུལ་གྱི་གླུ་བ་བདེ་རབ་ལགས་དང་ཁོང་གི་གཞས་ཚིག་རྩོམ་པ་པོ་སོགས་བོད་མི་ན་གཞོན་ལྔ་འཛིན་བཟུང་བྱས་ཏེ་འདྲི་རྩད་ཡུན་རིང་བྱས་རྗེས་གཞན་རྣམས་ཀློད་གྲོལ་བཏང་ཡོད་ཀྱང་། ད་ལྟའང་གཞས་ཚིག་རྩོམ་པ་པོ་དང་རམ་དཀྲོལ་བ་ན་གཞོན་དེའི་གནས་སྟངས་གང་ཡང་གོ་ཐོས་མེད་པ་རེད། དེ་བཞིན། ཕྱི་ལོ ༢༠༢༠ ལོའི་ཕྱི་ཟླ་ ༦ པའི་ནང་བོད་ནག་ཆུ་འབྲི་རུ་རྫོང་ནས་ཡིན་པའི་ན་གཞོན་གླུ་བ་ལྷུན་གྲུབ་གྲགས་པའི་གླུ་དབྱངས་ཤིག་དང་འབྲེལ་ཏེ། རྒྱ་ནག་གཞུང་ལ་སྐྱོན་བརྗོད་བྱས་པའི་ནག་ཉེས་འོག་དུས་ཡུན་ལོ་ ༦ བཙོན་འཇུག་ཁྲིམས་ཐག་བཅད། ཡང་ལོ་དེའི་ཕྱི་ཟླ་ ༧ ནང་༧གོང་ས་རྒྱལ་བ་རིན་པོ་ཆེ་མཆོག་ལ་ཆེ་བསྟོད་གླུ་ཚིག་བྲིས་པར་རྒྱལ་ཁབ་མགོ་རྟིང་སློག་ཐབས་དང་རྒྱལ་ཁབ་ཀྱི་གསང་བ་ཕྱི་ལ་བསྒྲགས་པའི་ཉེས་མིང་གླུ་ཚིག་རྩོམ་པ་པོ་མཁའ་འགྲོ་ཚེ་བརྟན་ལོ་ ༧ དང་གླུ་བ་ཚེ་རྒོ་ལ་ལོ་གཉིས ༣ གྱི་ཁྲིམས་ཐག་བཅད་ཡོད་པ་རེད། དེ་བཞིན་བོད་ནང་གི་གླུ་བ་པདྨ་རིག་འཛིན་དང་། ཨ་མཚོག་ཕུལ་བྱུང་། ཆོས་མགོན་སོགས་གླུ་བ་གླུ་མ་མང་པོ་ཞིག་སྔ་གཞུག་ཏུ་འཛིན་བཟུང་བཙོན་འཇུག་བྱས་ཡོད་པའི་གནས་ཚུལ་ཐོན་ཡོད་པ་རེད།
