མཆོད་རྟེན་ཆེན་པོ་ཞིག་འགྱེལ་བའི་རྨི་ལམ།

ཀླུ་སྨྱོན་ཧེ་རུ་ཀའམ་དོ་སྤྲུལ་ཆོས་དབྱིངས་ཡེ་ཤེས།

སྐར་མ་རབ་རིབ་མར་མེ་དང་།།

སྒྱུ་མ་ཟིལ་བ་ཆུ་བུར་དང་།།

རྨི་ལམ་གློག་དང་སྤྲིན་ལྟ་བུར།།

འདུས་བྱས་ཐམས་ཅད་དེ་ལྟར་བལྟ།།

–གོང་གསལ་ཚིག་བཅད་འདི་ནི་སངས་རྒྱས་ཀྱིས་གསུངས་ཤིང་། པདྨ་ཚེ་བརྟན་གྱི་གློག་བརྙན་ཁག་གི་ནང་དུ་ལན་མང་མཐོང་རྒྱུ་ཡོད།

མདང་ནུབ་མཚན་དཀྱིལ་ཙམ་ལ་རྨི་ལམ་ཞིག་བཏང་བྱུང་། དེ་ནི་ཁོ་བོ་རི་ལྡེབས་ཤིག་ཏུ་འབྱོར་བ་ན། དེར་བལ་ཡུལ་མཆོད་རྟེན་བྱ་རུང་ཁ་ཤོར་དང་བོང་ཚད་མཉམ་པའི་མཆོད་རྟེན་ཆེན་པོ་ཞིག་གི་རྩེ་མོ་ནས་ལྟོ་བ་བར་དུ་ཞིག་ཚར་འདུག་ཅིང་། ཅང་མ་འགོར་བར་མཆོད་རྟེན་དེའི་ལྷག་ལུས་སྨད་ཆ་ཚང་མ་ཡང་ཞིག་འཐོར་དུ་གྱུར་ནས་ལྡིར་སྒྲ་དང་ས་རྡུལ་དམར་པོ་ཞིག་དང་ལྷན་དུ་གཤམ་གྱི་ལུང་གཤོང་དུ་ཉིལ་སོང་ལ། དེར་མཐུད་ནས་ཁོ་བོ་ཡང་སེམས་པ་དངངས་སྐྲག་དང་བཅས་གཉིད་ལས་སད་བྱུང་། ཚོད་དཔག་ལྟར་ན་སྐབས་དེར་ནམ་སྨད་ཆུ་ཚོད་བཞི་བ་ཙམ་ལ་བསླེབས་ཡོད་ཚོད་རེད།

ཁོ་བོས་ལོ་མང་སྔོན་བླ་མ་མི་ཕམ་ཚང་གི་སྒྱུ་མ་བེའུ་བུམ་ལས་རྨི་ལམ་སྐོར་གྱི་ཉམས་ལེན་ཞིག་བྱས་པའི་རྗེས་སུ། དོན་དག་བཟང་པོ་ཅི་འབྱུང་མི་ཐིགས་ཀྱང་། གལ་སྲིད་དོན་དག་ངན་པ་ཞིག་འབྱུང་རྒྱུ་ཡིན་ན་དེ་ཧ་ལམ་བརྒྱ་ལམ་དགུ་བཅུ་ཙམ་རྨི་ལམ་ནང་སྔོན་བརྡ་བཏང་ཡོང་གིན་འདུག་ཅིང་། བལ་ཡུལ་དུ་ས་ཡོམ་ཆེན་པོ་མ་བྱུང་བའི་སྔོན་ཏག་ཏག་ལ་ཡང་ཁོ་བོའི་རྨི་ལམ་ནང་མཆོད་རྟེན་བྱ་རུང་ཁ་ཤོར་གྱི་སྐེད་པ་ཡན་ཆད་ཞིག་རྡིབས་སུ་གྱུར་ཡོད་པ་ཞིག་རྨིས་མྱོང་ཞིང་། དེ་ནས་ཅང་མ་འགོར་བར་ས་ཡོམ་ཆེན་པོ་དེས་མཆོད་རྟེན་ལ་གས་སྐྱོན་ཆེན་པོ་ཞིག་བཏང་བ་དང་། དེ་ནས་ཞིག་གསོའི་ཆེད་དུ་མཆོད་རྟེན་སྐེད་པ་བར་དུ་བཤིགས་ཡོད་པའི་འདྲ་པར་ཞིག་མཇལ་བ་སེམས་ལ་དྲན་པས། རང་དབང་མེད་པར་ད་ཡང་རང་རེའི་སྐུ་གསུང་ཐུགས་རྟེན་རྩ་ཆེན་པོ་ཞིག་འཇིག་རྒྱུ་ཡིན་པ་འམ། ཡང་ན་སྐྱེས་ཆེན་དམ་པ་རེ་ཞིང་ཁམས་གཞན་དུ་གཤེགས་རྒྱུ་ཨེ་ཡིན་ནམ་སྙམ་པའི་དོགས་འཇིགས་འདྲེས་མ་ཞིག་སྐྱེས་ཏེ། ཉལ་སའི་ནང་ནས་ལུས་སྟོད་ཡར་དགྱེ་སྟེ་ཤེས་རབ་སྙིང་པོ་ཚར་གཅིག་བཏོན་པའི་རྗེས་སུ་ཟློག་པ་ལན་གསུམ་བརྒྱབ་པ་ཡིན།

ཞོགས་པར་གཉིས་ལས་སད་དེ་ཁ་པར་ཁ་ཕྱེས་པ་ན། སྐད་འཕྲིན་ནང་བོད་ཀྱི་གློག་བརྙན་འཁྲབ་ཁྲིད་པ་དང་རྩོམ་པ་པོ་གྲགས་ཅན་པདྨ་ཚེ་བརྟན་ལགས་ལྷ་སར་སྐུ་གྲོངས་པའི་སྐོར་གྱི་གནས་ཚུལ་ཧ་ཅང་མི་སྙན་པ་ཞིག་ས་སྤུར་རྡོ་སྤུར་བྱེད་བཞིན་པ་མཐོང་བས། ཨ་ཁ་ཁ། མདང་གི་རྨི་ལམ་དེས་དེ་རིང་གི་ལྟས་ངན་འདི་བསྟན་འདུག་ཨང་བསམས་ཏེ་སེམས་སྐྱོ་བ་ལ་ཚད་མེད་པ་ཞིག་བྱུང་ཞིང་། ཁོ་བོ་སློབ་ཆུང་དུ་ཡོད་དུས་དགེ་རྒན་བཀའ་དྲིན་ཅན་བསོད་ནམས་རྒྱལ་མཆོག་གིས། ན་བ་བྱིའུ་ཆུང་རྡོ་ཕོག་འདྲ། ཞེས་པ་ཞིག་གསུངས་པ་ཡང་སེམས་སུ་འཁོར་ཡོང་།

ཕལ་ཆེར་ལོ་ངོ་སུམ་ཅུར་ཉེ་བའི་སྔོན་དུ་ཁོ་བོ་ཕ་ཡུལ་དུ་ཡོད་དུས། ངེད་ཅག་མང་རྫོང་དུ་སྒྱུ་རྩལ་པ་སྨན་བླ་སྐྱབས་དང་ཞི་བདེ་ཉི་མ། སྒྲུང་རྩོམ་པ་སྟག་འབུམ་རྒྱལ་དང་སྙན་ངག་པ་བྱ་གཞུང་གཡང་བྷ་སོགས་ཅུང་གྲགས་ཆེ་ཞིང་། ཁྲི་ཀ་རྫོང་དུ་པདྨ་ཚེ་བརྟན་དང་ལྷ་རྒྱལ་ཚེ་རིང་སོགས་སྙན་གྲགས་གཞི་ནས་རྒྱས་རྒྱུ་རེད། སྐབས་དེར་པདྨ་ཚེ་བརྟན་གྱིས་སྒྲུང་ཐུང་དེ་འདྲ་འབྲི་བཞིན་འདུག་ལ། ཁོ་བོ་ཡང་དེ་སྐབས་སྒྲུང་ཐུང་དང་སྙན་ངག་འབྲི་ཞོར་དང་དེ་དག་བོད་ཁུལ་གྱི་གཞུང་སྒེར་གྱི་དུས་དེབ་དང་ཚགས་པར་སོ་སོར་སྤེལ་བཞིན་ཡོད་པའི་རྩོམ་པ་པོ་ལས་དང་པོ་བ་ཞིག་ཡིན་པས། རང་དང་ལས་རིགས་གཅིག་པ་འམ་དགའ་ཕྱོགས་གཅིག་པའི་མི་རྣམས་ལ་དོ་སྣང་ཤུགས་ཆེ་ཙམ་བྱེད་བཞིན་ཡོད་པ་འདྲ། ཁོས་བརྩམས་ཏེ་སྦྲང་ཆར་སྟེང་སྤེལ་བའི་སྒྲུང་ཐུང་་་གངས་་་ཞེས་པ་དེས་ཁོ་བོའི་ཡིད་དབང་འཕྲོགས་མྱོང་།

མཁའ་དབྱིངས་སུ་ཉི་འོད་དྲོ་འཇམ་ཞིག་འཕྲོ་ཞིང་། མེ་ཏོག་སྣ་ཚོགས་ཀྱི་དྲི་ཞིམ་དགོན་པའི་གླིང་བར་ཀུན་ཏུ་ཁྱབ་པའི་དབྱར་ཟླ་དྲུག་པའི་ཉིན་ཞིག ང་དང་ཕུ་བོ་ཞིང་གཤེགས་ལྡོང་ཕྲག་ཡེ་ཤེས་བཟང་པོ། ནུ་བོ་སྐལ་ལྡན་རྒྱ་མཚོ་གསུམ་གྱིས་འཐེན་ཐུག་སླ་ང་གང་བསྐོལ་ཏེ་གྲྭ་ཤག་གི་ར་སྐོར་དཀྱིལ་དུ་བཞག་ཅིང་། ཕུ་བོས་གོམས་སྲོལ་ལྟར་སྟོད་འགག་ཕུད་ནས་སྟོད་རྗེན་དུ་འཐེན་ཐུག་འཐུང་བཞིན་པའི་སྐབས་སུ། ཁོ་བོའི་སེམས་སུ་སྒྲུང་རྩོམ་ཞིག་གི་བློས་བསླངས་ཤར་བས། དེ་མ་ཐག་ཏུ་ཤག་ཏུ་བརྒྱུགས་ནས་འབྲི་དེབ་ཅིག་དང་སྨྱུ་གུ་ཞིག་བླངས་ཡོང་སྟེ། འཐེན་ཐུག་འཐུང་ཞོར་<<ཁ་བ་ནག་པོ>>་ཞེས་པའི་སྒྱུ་འཕྲུལ་དངོས་ཡོད་རིང་ལུགས་ཀྱི་སྒྲུང་ཐུང་ཞིག་བྲིས་པ་ཡིན་ལ། དེ་ནས་གཟའ་འཁོར་གཅིག་གི་རྗེས་སུ་སྒྲུང་ཐུང་དེ་མཚོ་ནུབ་ཁུལ་རྩོམ་རིག་སྒྱུ་རྩལ་ལྷན་ཚོགས་ཀྱིས་འགྲེམ་སྤེལ་བྱེད་བཞིན་པའི་རྩོམ་རིག་དུས་དེབ་གྲགས་ཆེན་<<གངས་རྒྱན་མེ་ཏོག>>་ཅེས་པའི་རྩོམ་སྒྲིག་ཁང་ལ་བསྐུར་པ་དང་། དེ་ནས་གཟའ་འཁོར་འགའ་འགོར་རྗེས་ཁོ་བོས་ཕ་ས་ཕ་མ་ཕུ་ནུ་སློབ་དཔོན་སོགས་ལ་གྱེས་ཕྱག་ཕུལ་ཏེ་རི་བོ་ཧི་མ་ལ་ཡ་བརྒལ་ནས་ཕྱི་ཕྱོགས་སུ་བསྐྱོད་པ་ཡིན།

དེ་ནས་བརྩིས་པའི་ལོ་ཕྱེད་ཅིག་གི་རྗེས་སུ་ཕུ་བོས་བོད་ནས་ཡི་གེ་ཞིག་བསྐུར་ཏེ་ངའི་རྩོམ་ཡིག་དེ་<<གངས་རྒྱན་མེ་ཏོག>>་སྟེང་བཀོད་པ་མ་ཟད། པདྨ་ཚེ་བརྟན་གྱིས་རྩོམ་ཡིག་དེ་རྒྱ་ཡིག་ཏུ་བསྒྱུར་ནས་ལྷ་སར་འདོན་སྤེལ་བྱེད་བཞིན་པའི་<<བོད་ཀྱི་རྩོམ་རིག>>་ཅེས་པའི་རྒྱ་ཡིག་གི་དུས་དེབ་གྲགས་ཅན་དེའི་སྟེང་དུ་བཀོད་འདུག་ཚུལ་བརྗོད་བྱུང་ལ། དེ་དུས་<<བོད་ཀྱི་རྩོམ་རིག>>་དུས་དེབ་ཀྱི་རྩོམ་སྒྲིག་པ་གཙོ་བོ་ཞིག་ནི་དེང་སྐབས་ཆབ་སྲིད་རྩོམ་ཡིག་མང་པོ་འབྲི་བཞིན་པའི་མཛངས་མ་ཚེ་རིང་འོད་ཟེར་ལགས་རེད། སྐབས་དེར་དེང་སྐབས་བཞིན་དུ་བརྡ་འཕྲིན་བརྒྱུད་ལམ་ཅི་ཡང་མེད་པས། ཁོ་བོས་རང་གི་རྩོམ་ཡིག་རྒྱ་ཡིག་ཏུ་བསྒྱུར་མཁན་ལོ་ཙྰ་བ་པདྨ་ཚེ་བརྟན་ལ་ཐུགས་རྗེ་ཆེ་ཞུ་ཡིག་ཙམ་ཞིག་ཀྱང་བསྐུར་རྒྱུ་མ་བྱུང་།

རྗེས་སུ་ངའི་ཕུ་བོ་ལྡོང་ཕྲུག་ལགས་དང་ལྷན་དུ་ཁ་པར་སོགས་བརྒྱུད་ལམ་འདྲ་མིན་ནས་ཁ་བརྡ་བྱེད་ཐེངས་མང་པོ་ཞིག་ལ་ཁོང་དང་པདྨ་ཚེ་བརྟན་གཉིས་གྲོགས་པོ་ཧ་ཅང་ཐག་ཉེ་བོར་གྱུར་པ་དང་། པདྨ་གློག་བརྙན་བཟོ་སྐྲུན་གྱི་ལམ་བུར་འཇུག་རྩིས་ཡོད་ལུགས་བརྗོད་བྱུང་ལ། ངའི་ནུ་བོ་སྐལ་ལྡན་ལགས་བརྒྱུད་དེ་པདྨའི་གློག་བརྙན་ཐོག་མ་<<རྩྭ་ཐང>>་ཞེས་པ་དེའི་འོད་སྡེར་ཞིག་ཀྱང་ལག་སོན་བྱུང་སྟེ། ཧ་ཅང་སྤྲོ་སྣང་ཆེན་པོས་ཁོང་གི་གློག་བརྙན་དེར་བལྟས་པ་དང་ཆབས་ཅིག བོད་རིགས་ཀྱི་ཁྲོད་དུ་ཡང་ཆེས་ཐོག་མར་གློག་བརྙན་བཟོ་སྐྲུན་པ་ཞིག་ཐོན་པར་དགའ་སྤྲོ་ཚད་མེད་སྐྱེས་མྱོང་།

རིམ་བཞིན་པདྨས་<<ལྷིང་འཇགས་ཀྱི་མ་ཎི་རྡོ་འབུམ་>>ཞེས་པའི་གློག་བརྙན་ཞིག་བཟོས་པར་ཡང་དྲ་ལམ་ནས་བལྟས་པ་ཡིན་ལ། གློག་བརྙན་དེས་འདོད་པ་དེ་ཙམ་མ་ཁེངས་ཀྱང་སྤྱིར་ན་བོད་མི་ཞིག་གིས་གློག་བརྙན་ཡིན་ཞིང་། སྒོས་སུ་རང་དང་འབྲེལ་བ་ཕྲན་བུ་ཡོད་པ་ཞིག་གིས་བཟོས་པའི་གློག་བརྙན། བྱེ་བྲག་ཏུ་རང་ཉིད་ལ་ཆ་རྒྱུས་ཡོད་པའི་ས་གནས་སུ་བཟོས་པའི་གློག་བརྙན་ཞིག་ཡིན་པས། གློག་བརྙན་དེ་དུས་ཡུན་རིང་པོ་ཞིག་ལ་སེམས་གཏིང་ནས་བརྗེད་ཐབས་མེད་པ་ཞིག་ཏུ་གྱུར་པ་དང་། རིམ་བཞིན་གློག་བརྙན་དེར་ཕྱི་བརྩེགས་ནང་བརྩེགས་ཀྱི་གོ་དོན་མི་འདྲ་བ་སྣ་ཚོགས་ཤིག་ཡོད་པའི་ངེས་ཤེས་ཤིག་ཀྱང་སེམས་གཏིང་ནས་འཕྲོ་རིམ་འཕྲོར་འཕྱུར་མྱོང་།

ཁོང་གི་གློག་བརྙན་གྲགས་ཅན་<<ཁྱི་རྒན>>་སྤྱི་ཚོགས་སྟེང་བསླེབས་ནས་ཅང་མ་འགོར་བར། ཨ་རིའི་ཉིག་ཡོར་དུ་ཡོད་པའི་ཀུན་ཕན་ཐེབས་རྩ་ཚོགས་པས་རོགས་རམ་བྱས་ཏེ། པདྨ་ཨ་རིར་དབྱིན་ཡིག་ཟབ་སྦྱོང་ཞིག་ལ་ཡོང་སྟེ་ཕལ་ཆེར་ལོ་གཅིག་ཙམ་གྱི་རིང་བསྡད་པ་དང་། སློབ་གསེང་དུ་ཁོང་གིས་གློག་བརྙན་<<ཁྱི་རྒན>>་ཞེས་པ་དེ་ཨ་རིའི་ས་གནས་ཁ་ཤས་སུ་འགྲེམ་སྟོན་བྱས་པ་རེད། ང་རང་ཡོད་སའི་ས་གནས་འདིར་ཡང་ཁོང་གིས་གློག་བརྙན་དེ་འགྲེམ་སྟོན་བྱས་པ་དང་། ངོ་ཤེས་ཤིག་གིས་ཁོང་ལ་ང་འདི་གར་ཡོད་ལུགས་བརྗོད་པས། ཁོང་གིས་ང་ལ་འབྲེལ་བ་བྱས་ནས་གནམ་ཐང་དུ་ལེན་དུ་ཡོང་རོགས་ཞེས་བརྗོད་པར། ཁོ་བོས་རང་གི་ཨ་རིའི་སློབ་མ་ཨེ་རིག་ཅེས་པ་ཞིག་ཡོད་པ་ཁྲིད་ནས་གནམ་ཐང་དུ་ཁོང་བསུ་རུ་བསྐྱོད། སྐབས་དེར་ཁོང་སྐད་གྲགས་གང་འཚམ་ཆེན་པོ་ཡོད་པའི་གློག་བརྙན་བཟོ་སྐྲུན་པ་ཞིག་ཏུ་གྱུར་ཟིན་པ་དང་། ཨ་རིག་གི་རླངས་འཁོར་དེ་ནི་གསར་པ་གོང་ཆེན་ཞིག་མ་ཡིན་པར་རྙིང་པ་གོང་ཆུང་ཞིག་ཡིན་པས། རང་ཡུལ་གྱི་མི་སྣ་གྲགས་ཅན་ཞིག་བསུ་སྟངས་ཀྱི་ཐད་ནས་བརྗོད་ན་ངོ་ཚ་བོ་ཏོག་ཙམ་བྱུང་སོང་། གང་ལྟར་ཁོང་ནི་མི་གཉོམ་ཆུང་ཁ་དེ་ཙམ་གྲག་རྒྱུ་མེད་པ། ཕར་སྐད་ཆ་མ་བཤད་ན་ཚུར་གནས་ཚུལ་འདྲ་མིན་ཐད་ཁ་བརྡ་མི་བྱེད་པའི་གཤིས་ཀ་ཅན་ཞིག་འདུག

ཕྱི་རོལ་ཏུ་དབྱར་ཁའི་ཉི་འོད་དྲོ་ཞིག་འཇམ་པའི་ཕྱི་དྲོ་དེར། མི་ལྔ་བཅུ་ཙམ་ཤོངས་པའི་གློག་བརྙན་ཁང་ཆུང་ཆུང་ཞིག་ཏུ་པདྨའི་གློག་བརྙན་<<ཁྱི་རྒན>>་ཞེས་པ་དེ་བསྟན་སོང་། ཁོ་བོར་མཚོན་ན་ཕ་ཡུལ་དང་ཁ་བྲལ་ནས་ལོ་ངོ་ཧ་ཅང་མང་པོ་ཞིག་ཕྱིན་ཡོད་ལ། ཕ་ཡུལ་རང་གི་འཚོ་བ་མཚོན་པའི་གློག་བརྙན་ཞིག་ཕ་ཡུལ་རང་གི་མིས་འཁྲབ་ཁྲིད་དང་འཁྲབ་སྟོན་བྱས་པ་ཞིག་ལ་བལྟས་པའི་མྱོང་ཚོར་དེ་ནི་སྨྲ་བསམ་བརྗོད་ལས་འདས་པ་ཞིག་རེད་ཨང་།

གློག་བརྙན་བསྟན་ནས་ཚར་ཙམ་ལ་པདྨ་ལྡིངས་ཆའི་སྟེང་དུ་བསྐྱོད་ནས་དྲི་བ་དྲི་ལན་གྱི་མགོ་རྩོམ་དུས། གློ་བུར་བའི་དོན་རྐྱེན་ཞིག་བྱུང་སྟེ་པདྨ་དང་ལྟད་མོ་བ་ཚང་མ་ཧང་སངས་ཤིང་དོགས་མི་བདེ་བ་ཆེན་པོ་ཞིག་གི་གནས་སུ་བསྐྱལ། དེ་ནི་ལྟད་མོ་བའི་ཁྲོད་དུ་ཨ་རི་བ་དང་ས་གནས་བོད་རིགས་གང་འཚམ་ཞིག་ཡོད་པའི་ཁྲོད་ནས། རྒྱ་གར་གཞིས་ཆགས་ནས་བསླེབས་པའི་བོད་མི་རྒན་པོ་ཞིག་གློ་བུར་དུ་ཡར་ལངས་ཏེ་སྐད་ཤུགས་ཆེན་པོའི་སྒོ་ནས། ཁྱོད་ཀྱི་གློག་བརྙན་འདི་ནི་རྒྱ་མིའི་དྲིལ་བསྒྲགས་ཀྱི་ལག་ཆ་ཞིག་རེད། ང་ཚོས་འདིར་བོད་ནང་དུ་བོད་མི་ཚོར་ལས་ཀ་ཅི་ཞིག་བྱེད་པར་རང་དབང་སྤུ་ཙམ་ཡང་མེད་པའི་དྲིལ་སྒྲོག་བྱེད་བཞིན་ཡོད་མོད། ཁྱོད་ལ་གློག་བརྙན་འདི་ལྟ་བུ་ཞིག་བཟོ་སྐྲུན་བྱེད་པའི་ཆོག་མཆན་སུས་སྤྲད་སོང་ངམ། ཞེས་བརྗོད་སོང་བར། པདྨའི་གདོང་མདོག་ལ་འགྱུར་བ་ཅི་ཡང་མེད་པར་ལན་སྟབས་བདེ་ཞིག་བཏབ་བྱུང་ལ། རྒན་པོ་དེས་ད་དུང་ངར་ངར་གྱིས་ཅིག་རྗོད་བཞིན་འདུག་མོད། ང་ནི་ཟློས་གར་འདི་རིགས་ལ་དེ་ཙམ་གོམས་མེད་པས་དོན་རྐྱེན་དེས་པདྨ་ཚེ་བརྟན་ངོ་ཚ་ཁ་སྐྱེངས་བཟོ་བར་དོགས་ནས་གནས་སྟངས་འདི་གང་མྱུར་མཇུག་སྒྲིལ་ན་བསམས་བྱུང་།

ཨ་རི་ནས་བོད་ནང་ལོགས་ནས་པར་སྐྲུན་བྱས་པའི་རྩོམ་ཡིག་དུས་དེབ་དང་ཚགས་པར་ཁག་ལག་ཏུ་ཡོང་རྒྱུ་ཧ་ཅང་དཀའ། ཡིན་ན་ཡང་ངོ་ཤེས་པ་རེ་བརྒྱུད་ནས་རྩོམ་པ་པོ་ཚད་ལྡན་དག་གི་བརྩམས་ཆོས་དཔེ་དེབ་བསྐུར་དུ་འཇུག་གི་ཡོད་ལ། པདྨའི་བརྩམས་སྒྲུང་ཕྱོགས་བསྒྲིགས་ཀྱི་དེབ་<<བསླུ་བྲིད>>་ཅེས་པ་དེ་མངགས་པ་ཡིན། དེབ་དེའི་ནང་དུ་ཁོང་གི་བརྩམས་སྒྲུང་ཐུང་ངུ་བཅུ་དགུ་བསྡུས་འདུག དེ་དག་ལས་་<<ཡུལ་གྱར་རྡུང་ལེན་པ>>་དང་<<རྩེད་ཐང་ལ་འགྲོ>> <<ཨ་ཁུ་ཐོད་པར་བཅར་འདྲིར་ཕྱིན་པ>>་སོགས་ནི་ཁྲག་དང་མཆི་མ། ཤ་དང་རུས་པའི་བརྩེ་དུང་ངོ་།།

འཆི་བ་མི་རྟག་པ་ཞེས་པ་དེ་བསླེབས་པའི་སྐབས་སུ། ང་ཚོ་འགྲོ་བ་རིགས་དྲུག་དང་སྐྱེ་གནས་བཞིས་བསྡུས་པའི་གནས་རིས་གང་ཞིག་ཏུ་ཡོད་ཀྱང་། ཟ་མ་ཟ་འཕྲོ་དང་གོམ་པ་སྤོ་འཕྲོ། གཉིད་ཉལ་འཕྲོ་དང་སྒོམ་རྒྱག་འཕྲོ རྩོམ་ཡིག་འབྲི་འཕྲོ་དང་གློག་བརྙན་འཁྲབ་འཕྲོ་སོགས། མདོར་ལ་ལས་ཀ་ཡོད་ཚད་ཀྱི་འཕྲོ་བཞག་སྟེ་འཇིག་རྟེན་འདིའམ་མི་ཚེ་འདི་ནས་ཆ་རྒྱུས་མེད་ཅིང་དོགས་འདྲིས་ཁེངས་པའི་སྐྱེ་བ་ཕྱི་མའི་ལུས་རྟེན་དེ་དང་སྡོད་གནས་དེ་འཚོལ་དུ་འགྲོ་དགོས་པས། པདྨ་ཚེ་བརྟན་ལགས་ཀྱི་སྐུ་ཕུང་ལྷ་སར་གདན་འདྲེན་གྱིས་ཇོ་ཁང་ལ་སྐོར་བ་གསུམ་བརྒྱབ་རྗེས། སྟོད་ལུང་དུ་ཁྱེར་ནས་སྦྱིན་སྲེག་བྱས་པ་དང་། དེ་ནས་རུས་ཐལ་དཀར་པོ་ཁུག་མ་གང་ཁོང་གི་ཕ་ས་ཕ་ཡུལ་དང་ཁ་ཐག་ཧ་ཅང་ཉེ་བའི་གནའ་མཁར་ཟི་ལིང་དུ་ཁྱེར་ཡོང་སྐབས། ལས་རིགས་གཅིག་པ་དང་ཤ་ཁྲག་གཅིག་པའི་མི་སྣ་བརྒྱ་ཕྲག་འགའ་ཕེབས་བསུར་བསླེབས་ཡོད། སྐབས་འདིར་ཁོང་གི་རྣམ་ཤེས་སྦྲང་མ་འདྲ་བོ་དེ་ཡང་བོད་ཀྱི་གངས་རི་དང་རྩྭ་ཐང་། རི་ཚོགས་དང་ལུང་གཤོང་སོགས་སུ་གང་འདོད་དུ་འཕུར་ལྡིང་བྱེད་བཞིན་ཡོད་ལ། བར་དོའི་ལུས་རྟེན་དེ་ནི་གློག་གམ་འོད་ཀྱི་རང་བཞིན་ཅན་ཞིག་ཡིན་པས། དེ་ལ་ཁོང་གི་ཚེ་ཐོག་འདིའི་སྟེང་དུ་ལོ་མང་རིང་མྱངས་པའི་གཅིན་སྙིའི་ན་ཚའི་ཟུག་གཟེར་དང་ཉེན་རྟོག་པས་ཟི་ལིང་བཀག་སྐྱིལ་ཁང་དུ་གཅར་རྡུང་བྱེད་སྐབས་བཞག་པའི་ལུས་སྟེང་གི་རྨ་ཁ་སོགས་ཅི་ཡང་མེད་པར་ཐོགས་རེག་བྲལ་བའི་སྒྱུའི་མའི་ལུས་རྟེན་ཞིག་རེད་ཨང་།

གལ་སྲིད་ང་ཚོས་ངེས་པར་དུ་མི་ཡུལ་ལ་ཟས་རིན་གོས་རིན་ཞེས་པ་ཞིག་འཇོག་དགོས་ཀྱི་ཡོད་ན། པདྨའི་གློག་བརྙན་དེ་ཚོ་ནི་ཁོང་གིས་མི་ཡུལ་ལ་བཞག་པའི་ཟས་རིན་གོས་རིན་ཡག་ཤོས་དེ་ཡིན་རྒྱུ་རེད། གལ་སྲིད་ང་ཚོས་ལོ་རེ་བཞིན་པདྨ་ལ་རྗེས་དྲན་བྱེད་དགོས་ཚེ། པདྨའི་གློག་བརྙན་དེ་ཚོ་ནི་ཁོང་གི་སྣང་བརྙན་གསོན་པོ་རེ་རེ་ཡིན་རྒྱུ་རེད། གལ་སྲིད་ང་ཚོས་པདྨའི་མི་ཚེའི་རྐང་རྗེས་དེ་དག་འཚོལ་དགོས་ཚེ། པདྨའི་གློག་བརྙན་དེ་ཚོ་ནི་ཁོང་གི་འཚོ་བའི་ཟིན་བྲིས་རེ་རེ་ཡིན་རྒྱུ་རེད། པདྨས་ཁོང་གི་བུ་འཇིགས་མེད་ཀྱིས་མཚོན་པའི་བོད་ཀྱི་གློག་བརྙན་འཁྲབ་ཁྲིད་པའི་མི་རིགས་གསར་པ་ཞིག་བསྐྱེད་སྲིང་བྱས་ཡོད་པས། པདྨའི་ཤ་ཁྲག་གི་ལུས་པོ་དེ་འཇིག་རྟེན་འདི་ན་མེད་ཀྱང་ཁོང་གི་རྣམ་ཤེས་ཀྱི་བསྡུས་གཟུགས་དང་ཕུགས་བསམ་གྱི་གོང་བུ་རེ་རེ་ད་དུང་འོད་དུ་འཚེར་ཞིང་རེ་བས་ཁེངས་འདུག་ཨང་།

པདྨ་ཚེ་བརྟན་གྱི་སྐུའི་མེ་ཏོག་འཐོར་བའི་ཉིན་འདི་བོད་ཀྱི་གློག་བརྙན་དུས་ཆེན་གྱི་ཉིན་མོར་གཏན་ཁེལ་ན་ལེགས་པའི་བསམ་ཚུལ་འདོན་མཁན་རེ་ཟུང་འདུག་པར་ཁོ་བོས་ཀྱང་རྒྱབ་སྐྱོར་བྱེད་པ་ཡིན། འདས་པའི་ཉིན་ཤས་རིང་བོད་ནང་གི་སྨྱུག་ཐོགས་པ་མང་པོ་ཞིག་གིས་པདྨའི་སྐོར་འབྲི་བཞིན་འདུག་ལ། ཨ་རིའི་བོད་སྐད་རླུང་འཕྲིན་ཁང་ཁག་གིས་ཀྱང་པདྨའི་སྐོར་བཅར་འདྲི་བྱེད་བཞིན་འདུག དེ་བཞིན་བོད་ཀྱི་དུས་བབ་སོགས་ཚགས་པར་ཁང་ཁག་གིས་ཀྱང་པདྨའི་སྐོར་གནས་ཚུལ་སྤེལ་སོང་། པདྨ་དང་རྩོམ་ཡིག་གི་འབྲེལ་ཐག་མཐུད་མྱོང་ཞིང་པདྨ་དང་གློག་བརྙན་ཞིག་གིས་ཐུག་འཕྲད་བྱེད་མྱོང་བའི་བདག་གིས་ཀྱང་རྩོམ་ཐུང་འདི་འདྲ་ཞིག་མ་བྲིས་ཐབས་མེད་བྱུང་སོང་།

པདྨ་ཚེ་བརྟན་གྱི་གློག་བརྙན་དག་རིམ་བཞིན་ངོ་སྤྲོད་ཀྱིས་མཇུག་བསྡུ་བར་བྱ།

རྩྭ་ཐང་། སྤྱི་ལོ་ ༢༠༠༤

ལྷིང་འཇགས་ཀྱི་མ་ཎི་རྡོ་འབུམ། ༢༠༠༤

༡༩༨༣ ལོའི་དོར་མ་དོང་ཆེན་ཁ། ༢༠༠༨

འཚོལ། ༢༠༠༩

ཁྱི་རྒན། ༢༠༡༡

གཡང་མདའ ༢༠༡༤

ཐར་ལོ། ༢༠༡༥

ལག་དམར། ༢༠༡༨

དབུགས་སྒང་། ༢༠༡༩

ཁོང་གི་གློག་བརྙན་ཁག་ཅིག་ལ་དྲ་ཚིགས་འདི་ནས་བལྟ་ཐུབ། 【བོད་བརྙན་གཟིགས་འབུལ།】པདྨ་ཚེ་བརྟན་གྱི་གློག་བརྙན་འོས་སྦྱོར། (qq.com)