འདས་ལོར་འཛམ་གླིང་ནང་མི་གྲངས་ས་ཡ ༧༡ ལྷག་འཚོ་གནས་ངེས་མེད་ཅན་དུ་གྱུར་ཡོད།

འདས་ལོར་འཐབ་འཁྲུག་དང་རང་བྱུང་གོད་ཆག་གིས་མི་མང་པོའི་ངེས་གཏན་གྱི་འཚོ་གནས་ལ་གོད་ཆག་དང་འདྲ་མཉམ་མིན་པའི་གནས་སྟངས་འོག་བཅུག་སྟབས། མི་གྲངས་ས་ཡ་ ༧༡ ལྷག་འཚོ་གནས་ངེས་མེད་དུ་གྱུར་ཡོད་འདུག

ནོར་ཝེའི་དམག་འཁྲུག་གི་རྐྱེན་གྱིས་གར་འགྲོ་འདིར་ངེས་མེད་པའི་སྐྱབས་བཅོལ་བའི་གནས་སྟངས་ལྟ་ཞིབ་ལྟེ་གནས་ཁང་ (IDMC)  གིས། ཕྱི་ལོ་ ༢༠༢༢ ལོའི་ལོ་འཁོར་སྙན་ཐོ་བཏོན་པའི་ནང་། ཕྱི་ལོ་ ༢༠༢༢ ལོར་དམག་འཁྲུག་དང་དྲག་སྤྱོད། རང་བྱུང་གོད་ཆག་སོགས་ཀྱི་རྐྱེན་བྱས་ཏེ།  འདས་ལོའི་ལོ་མཇུག་བར་འཛམ་གླིང་ཧྲིལ་པོའི་མི་གྲངས་ས་ཡ་ ༧༡ ལྷག་འཚོ་གནས་ངེས་མེད་ཅན་ཆགས་ཡོད་ཅིང་། དེ་ནི། ཕྱི་ལོ་ ༢༠༢༡ ལོ་དང་བསྡུར་ན་འཚོ་གནས་ངེས་མེད་ཅན་གྱི་མི་འབོར་བརྒྱ་ཆ་ ༢༠ ཡར་འཕར་ཡོད་འདུག་ལ། འདས་ལོ་ནི་ད་སྔ་བར་འཛམ་གླིང་ནང་འཚོ་གནས་ངེས་མེད་ཅན་གྱི་མི་འབོར་གྱི་གྲངས་ཐོ་མང་ཤོས་དེ་ཆགས་ཡོད་འདུག

སྙན་ཐོ་ལྟར་ན། འདར་ལོར་འཛལ་གླིང་ནང་མི་འབོར་ས་ཡ་ ༧༡།༡  ཙམ་འཚོ་གནས་ངེས་མེད་ཅན་དུ་གྱུར་བའི་ཤུགས་རྐྱེན་གཅིག་ནི་ཡོ་ཁུ་རེན་གྱི་དམག་འཁྲུག་གི་རྐྱེན་ཡིན་ཞིང་། འདས་ལོའི་ལོ་མཇུག་བར་ཡོ་ཁུ་རེན་གཅིག་པུའི་ནང་མི་འབོར་ས་ཡ་ ༡༧ ཙམ་གྱི་འཚོ་གནས་ལ་ཤུགས་རྐྱེན་ཐེབས་ནས། ཡོ་ཁུལ་རེན་གྱི་ས་ཁུལ་གཅིག་ནས་གཞན་དུ་བྲོས་བྱོལ་དང་གཡུལ་སར་ཞུགས་དགོས་བྱུང་བ་དང་། སི་རེ་ཡན་ནང་ལོ་ངོ་བཅུའི་དམག་འཁྲུག་གི་རྐྱེན་བྱས་ཏེ་འདས་ལོར་ད་དུང་མི་འབོར་ས་ཡ་ ༦།༨ སྡོད་གནས་ངེས་མེད་ཅན་དུ་གྱུར་ཡོད་པ་དང་། ཨ་ཧྥི་རི་ཁའི་ (Sub-Saharan) རྒྱལ་ཁབ་ཁོན་གྷོ་སྤྱི་མཐུན་རྒྱལ་ཁབ་(Democratic Republic of Congo) དང་ཨེ་ཐོ་པེ་ཡ་ (Ethiopia) སོགས་ཀྱི་ནང་མི་འབོར་མི་ས་ཡ་ ༡༦།༥།  དེ་བཞིན། འཛམ་གླིང་ཧྲིལ་པོའི་ནང་རང་བྱུང་གོད་ཆག་ཆུ་ལོག་དང་བཀྲེས་ལྟོགས་སོགས་ཀྱིས་རྐྱེན་བྱས་ཏེ། མི་འབོར་ས་ཡ་ ༨།༧ གནས་སྡོད་ངེས་མེད་དུ་གྱུར་ཡོད་པ་རེད་ལ། གྲངས་འབོར་དེ་ནི་ཕྱི་ལོ་ ༢༠༢༡ ལས་བརྒྱ་ཆ་ ༤༥ ཡར་འཕར་ཡོད་པ་རེད་འདུག

དེ་འབྲེལ་རྒྱ་གར་དུས་བབ་གསར་ཁང་གི་གནས་ཚུལ་ལྟར་ན། འཛམ་གླིང་གི་གནས་སྡོད་ངེས་མེད་ཀྱི་མི་འབོར་མང་ཤོས་རྒྱལ་ཁབ་བཅུའི་ནང་གནས་ཀྱི་ཡོད་པ་དང་། དེ་དག་ནི་སི་རེ་ཡ་དང་ཨབ་གྷན་ནེ་སི་ཐན། ཁོན་གྷོ་སྤྱི་མཐུན་རྒྱལ་ཁབ། ཡོ་ཁུ་རེན། ཁོ་ལིམ་བྷི་ཡ། ཨེ་ཐོ་པེ་ཡ། ཡ་མན་དང་ནེ་ཇཱར་རེ་ཡ། སོ་མ་ལི་ཡ། སོ་ཌན་བཅས་ཡིན་ཞིང་། དམིགས་བསལ་དམག་འཁྲུག་གི་རྐྱེན་གྱིས་ཡོ་ཁུ་རེན་དང་རང་བྱུང་གོད་ཆག་གི་ཁྲོད། པ་ཀི་སི་ཐན་ནང་ཆུ་ལོག་རྒྱུགས་ཏེ་མི་འབོར་ས་ཡ་ ༨།༢ ཀྱི་འཚོ་གནས་ལ་ཤུགས་རྐྱེན་ཐེབས་ཡོད་པ་རེད་ལ། ནོར་ཝེའི་སྐྱབས་བཅོལ་ལྷན་ཁང་གི་སྤྱི་ཁྱབ་དྲུང་ཆེ་ཇན་ཨགཱ་ལན་ཌི་ (Jan Egeland) ལགས་ཀྱིས། འཐབ་འཁྲུག་དང་རང་བྱུང་གོད་ཆག་གིས་འདས་ལོར་མི་མང་པོའི་ངེས་གཏན་གྱི་འཚོ་གནས་ལ་གོད་ཆག་དང་འདྲ་མཉམ་མིན་པའི་གནས་སྟངས་འོག་བཅུག་སྟབས། ང་ཚོས་ད་སྔ་བར་མཐོང་མ་མྱོང་བའི་འཚོ་གནས་ངེས་མེད་ཀྱི་མི་གྲངས་འབོར་ཆེན་དེ་འདྲ་བྱུང་བ་རེད། ཅེས་བརྗོད་འདུག

སྙན་ཐོའི་ནང་། འདི་ལོར་དམིགས་བསལ་འཚོ་གནས་ངེས་མེད་ཀྱི་མི་འབོར་ཇེ་མང་དུ་འགྲོ་བཞིན་པའི་གནས་སྟངས་གཞན་མ་མཐོང་མོད། མཉམ་འབྲེལ་རྒྱལ་ཚོགས་ཀྱི་གནས་སྤོ་ཚན་པས། གཟའ་འཁོར་འདིའི་ནང་སོ་ཌན་ནང་དམག་གཞུང་དང་ཁ་གཏད་གྱེན་ལོག་ཕྱོགས་ཁག་གཉིས་བར་འཐབ་འཁྲུག་བྱུང་སྟེ། མི་གྲངས་་༧༠༠༠༠༠ ཙམ་འཚོ་གནས་མེད་ཅན་གྱུར་ཡོད་པ་འགྲེལ་བརྗོད་བྱས་འདུག

གསར་འགོད་པ། སྐལ་བཟང་སྦྱིན་པ།