རྩོམ་པ་པོ་ཤེས་རབ་དར་རྒྱས་ལགས་ཀྱིས་བྲིས་པའི་ཡིད་བཞིན་དབང་གི་རྒྱལ་པོ་དང་གཟིགས་སྣང་དང་ཉམས་རྟོགས་ཞེས་པའི་དེབ་གཉིས་དབུ་འབྱེད་སྐབས་སྲིད་སྐྱོང་མཆོག་གིས་བོད་མི་ཚོས་༧གོང་ས་མཆོག་གི་དགོངས་པ་ཉམས་སུ་ལེན་གྱི་ཡོད་མེད་ལ་བརྟེན་ནས་མ་འོངས་པའི་ཁ་ཕྱོགས་གང་འདྲ་ཞིག་ལ་བསླེབས་ཀྱི་ཡོད་མེད་ཐག་ཆོད་ཀྱི་ཡོད་པས་བསམ་བློ་ཡག་པོ་གཏོང་རྒྱུ་གལ་ཆེན་པོ་ཡིན་སྐོར་གསུངས་སོང་།
དེ་རིང་ཞོགས་པའི་ཆུ་ཚོད་ ༩ ། ༣༠ ཐོག་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། མདོ་སྨད་དབུས་རྒྱུན་དང་དཔེ་དེབ་ལས་གཞི་སྒྲུབ་མཁན་གཉིས་ཀྱི་གོ་སྒྲིག་འོག ཉམས་ཞིབ་པ་དང་རྩོམ་པ་པོ་ཤེས་རབ་དར་རྒྱས་ལགས་ཀྱིས་བརྩམས་པའི་རྒྱལ་བའི་ཐུགས་ཀྱི་ཡོན་ཏན་བརྗོད་པའི་༼ཡིད་བཞིན་དབང་གི་རྒྱལ་པོ།༽ དང་༼གཟིགས་སྣང་དང་ཉམས་རྟོགས།༽ ཞེས་པའི་དཔེ་དེབ་གཉིས་དབུ་འབྱེད་གནང་སོང་། དཔེ་དེབ་དབུ་འབྱེད་ཀྱི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་བཅས་བོད་མི་མང་སྤྱི་འཐུས་ཁག་ཅིག་དང་། ཤེས་ཡོན་པ་ཁག་ཅིག་བཅས་འཛོམས་འདུག
གསར་འགོད་པས་དཔེ་དེབ་གཉིས་ཀྱི་སྐོར་ལ་བཅར་འདྲི་བྱས་པར་རྩོམ་པ་པོ་ཤེས་རབ་དར་རྒྱས་ལགས་ཀྱིས། གཟིགས་སྣང་དང་ཉམས་རྟོགས་ནི་༧གོང་ས་རྒྱལ་བ་རིན་པོ་ཆེ་མཆོག་གི་གསུང་གཞིར་བཞག་བྱས་ནས་བྲིས་ཡོད་ཅིང་། དེབ་འདིའི་ནང་གི་གཟིགས་སྣང་གི་སྐབས་སུ་༧གོང་ས་མཆོག་གི་བཀའ་སློབ་ནང་དུ་ཡོད་པའི་སྐུ་སྐྱེ་སྔ་མ་བཅོ་ལྔ་ཙམ་གྱི་སྐོར་དང་། གཟིགས་སྣང་མ་འདྲ་བ་དམིགས་བསལ་བཞི་བཅུ་ཞེ་གྲངས་སྐོར་བྲིས་ཡོད་ལ། ཉམས་རྟོགས་ཀྱི་ནང་དུ་༧གོང་ས་མཆོག་གིས་ནང་པའི་ཆོས་ལ་ཉམས་ཞིབ་གནང་ནས་ཐུགས་རྒྱུད་ལ་རྟོགས་པ་འཁྲུངས་བའི་སྐོར་འཁོད་ཡོད། ཡིད་བཞིན་དབང་གི་རྒྱལ་པོའི་ནང་དུ་ཉམས་རྟོགས་སྐོར་ལ་དུས་ཚོད་མི་འདྲ་བའི་ནང་དུ་བཀའ་སློབ་ཅི་ཙམ་གནང་ཡོད་པ་དེ་དག་ཚང་མ་ཕྱོགས་སྒྲིག་བྱས་ཡོད། དེབ་འདི་གཉིས་ཀྱི་ཁྱད་ཆོས་གཙོ་བོ་ནི་ཁུངས་དང་ལྡན་པའི་ཐོག་ནས་བྲིས་ཡོད་པ་མ་ཟད། ཁུངས་དེ་ཡང་གང་ཟག་དང་པོ་༧གོང་ས་མཆོག་གི་གསུང་ལ་གཏུགས་ཡོད་ལ། རྩོམ་པ་པོའི་ཚོར་བའི་སྟེང་ནས་བྲིས་མེད་སྐོར་འགྲེལ་བརྗོད་གནང་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བོད་ཀྱི་བདེ་སྡུག་སོགས་དང་འབྲེལ་བའི་སྒོ་ནས་རྒྱལ་བའི་བཀའ་དྲིན་རྗེས་དྲན་གྱི་གསུང་བཤད་གནང་སྐབས། ༧རྒྱལ་བ་སྐུ་ཕྲེང་བཅུ་གསུམ་པའི་ཐུགས་རེ་བཞེས་སྟངས་དེ་བོད་མི་ཚོས་ཉམས་སུ་ལེན་ཐུབ་ཡོད་མ་རེད། དེ་ལ་བརྟེན་ནས་ད་ལྟ་ང་ཚོ་བཙན་བྱོལ་བའི་གནས་བབ་ལ་བསླེབས་ཡོད་པ་རེད། ད་ལྟ་༧རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དགོངས་པ་གང་ཡོད་པ་དེ་དག་ང་ཚོས་ཉམས་སུ་ལེན་གྱི་ཡོད་མེད་ལ་བརྟེན་ནས། ང་ཚོའི་མ་འོངས་པའི་ཁ་ཕྱོགས་གང་འདྲ་ཞིག་ལ་བསླེབས་ཀྱི་ཡོད་མེད་ཐག་ཆོད་ཀྱི་རེད། འདིའི་སྒང་ལ་བསམ་བློ་གཏང་རྒྱུ་གལ་ཆེན་པོ་དང་། ད་ལྟ་བར་དུ་གནང་བཞག་པ་དེ་ང་ཚོས་མཁྱེན་མཁྱེན་པ་རེད། འོན་ཀྱང་མ་འོངས་པའི་དགོངས་པ་གང་ཡོད་པ་རྣམས་ཤེས་པར་བྱས་ཏེ། དེའི་ཁ་ཕྱོགས་ལ་གོམ་པ་བརྒྱག་རྒྱུ་ནི་གལ་ཆེན་པོ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་དང་གསུང་ཆོས་ལ་དོ་སྣང་ལེགས་པོར་གནང་སྟེ། ཉམས་ལེན་བྱ་རྒྱུ་གལ་ཆེན་ཡིན་པ་རེད་ཅེས་དང་། ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་བཅོ་ལྔའི་སྟེང་དུ་གྲོ་མོར་ཕེབས་དགོས་བྱུང་སྟེ། རྒྱ་གར་དུ་ཕེབས་དགོས་མིན་ཐད་དགོངས་པ་བཞེས་ཀྱི་ཡོད་པ་རེད། དེ་དུས་གྲོ་མོ་ནས་འབྲས་ལྗོངས་བློན་ཆེན་ལ་འབྲེལ་བ་བྱས་ཀྱང་ཡ་ལན་ཅི་ཡང་བྱས་མེད་པ་གསུངས་ཡོད་པ་དེས། སྐབས་དེར་ང་ཚོར་ཆབ་སྲིད་ཐོག་ནས་ཇི་ལྟར་ལྟ་བཞིན་ཡོད་པ་ཆབ་སྲིད་ཀྱི་གནས་སྟངས་འགྲེལ་བཤད་བསྐྱོན་གྱི་ཡོད་པ་རེད། ཕྱི་ལོ་ ༡༩༥༢་ནས་བོད་ནང་དུ་ལེགས་བཅོས་ཚོགས་ཆུང་བཙུགས་ཏེ། སའི་བདག་དབང་དང་། ཁྲལ་གྱི་འགྲོ་སྟངས། མི་མང་གི་དཀའ་ངལ་ལ་ལེགས་བཅོས་བྱེད་པའི་དགོངས་པ་ཡོད་ཀྱང་། རྒྱ་ནག་གིས་བཙན་འཛུལ་བྱས་པས་ལས་དོན་དེ་དག་ལམ་ལྷོངས་མ་བྱུང་བ་རེད་ཅེས་སོགས་གསུངས་སོང་། ཡང་སྲིད་སྐྱོང་མཆོག་ནས་རྩོམ་པ་པོ་ཤེས་རབ་དར་རྒྱས་ལགས་ནས་དཔེ་དེབ་འདི་འདྲ་གལ་ཆེན་པོ་གཉིས་རྩོམ་སྒྲིག་གནང་བ་དེ་ཧ་ཅང་ཡག་པོ་རེད་ལ། མ་འོངས་པར་སྒྲ་རུ་ཕབ་ཐུབ་ན་བོད་ནང་ལའང་ཕན་ཐོགས་ཡོང་རྒྱུ་ཡིན་པའི་ལམ་སྟོན་གནང་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་ཆོས་བརྒྱུད་རིས་མེད་ལ་གཟིགས་སྐྱོང་དང་ཆོལ་གསུམ་གཅིག་ཏུ་བསྒྲིལ་བར་མཛད་པའི་བཀའ་དྲིན་རྗེས་དྲན་གྱི་གསུང་བཤད་གནང་སྐབས། ༧གོང་ས་སྐུ་ཕྲེང་བཅུ་བཞི་པ་མཆོག་གིས་དགུང་ལོ་ ༡༦ ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་པའི་སྐབས་སུ། སྐབས་དེ་དུས་ཀྱི་བོད་ཀྱི་གནས་སྟངས་དེ་ཛ་དྲག་པོ་ཆགས་ཡོད་པ་རེད། ཕྱོགས་གཅིག་ནས་རྒྱ་ནག་གི་དབང་ཤུགས་བསླེབས་ཀྱི་ཡོད་པ་རེད། ཕྱོགས་གཞན་ཞིག་ནས་ང་ཚོའི་སྒྲིག་འཛུགས་ཀྱི་ངོས་ནས་གྲ་སྒྲིག་དམིགས་བསལ་ཡོད་མ་རེད། འོན་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་ནས་ཕྱོགས་མང་པོ་ནས་ཉམས་བཞེས་དང་རྒྱུས་ལོན་གནང་སྟེ་ལེགས་བཅོས་ཚོགས་ཆུང་བཙུགས་པ་རེད། ༧གོང་ས་མཆོག་གིས་སྤྱི་ཚོགས་དང་ཆབ་སྲིད་ཀྱི་ངོ་བོའི་ཐོག་ནས་ལས་ཀ་གནང་རྒྱུའི་དགོངས་པ་ཤུགས་ཆེན་བཞེས་འདུག སྐབས་དེ་དུས་རྒྱ་ནག་གི་དབང་ཤུགས་ཤུགས་ཆེན་བོད་ནང་བསླེབས་ཏེ་ལམ་ལྷོངས་མི་ཡོང་བར་ཕྱི་ལོ་ ༡༩༥༩ རྗེས་སུ་༧གོང་ས་རྒྱལ་བ་རིན་པོ་ཆེ་མཆོག་ནས་དབུ་ཁྲིད་པའི་བོད་མི་ཁྲི་ ༨ ཙམ་རྒྱ་གར་ལ་སྐྱབས་བཅོལ་དུ་ཡོང་བ་རེད། བོད་མི་རྣམས་ལ་གཅིག་སྒྲིལ་གྱི་རྣམ་པ་མེད་པ་དང་ནུས་པ་མཉམ་སྤུངས་བྱུང་མ་ཐུབ་པའི་རྐྱེན་གྱིས་ནང་ཆོས་དང་ཆབ་སྲིད་སོགས་ཉམས་ཆག་ཕྱིན་ཡོད་པར་བརྟེན། གནས་མཆོག་རྡོ་རྗེ་གདན་དུ་ཆོལ་གསུམ་བོད་མིའི་མནའ་གན་མཐུ་མོ་ཆེ་བཞག་སྟེ། ༧གོང་ས་མཆོག་གི་བཀའ་དང་དགོངས་གཞི་གང་ཡོད་པ་དེའི་ཐོག་ལ་ཤར་སྐྱོད་ཞུ་རྒྱུ་བྱས་ཡོད་སྐོར་དང་། ༧གོང་ས་མཆོག་ནས་གདོང་ལེན་མང་པོ་གནང་སྟེ། ཆོལ་གསུམ་ཆོས་བརྒྱུད་དང་བཅས་པའི་ཐོག་ནས་དམངས་གཙོའི་ཀ་བ་གསུམ་ལྡན་གྱི་སྒྲིག་འཛུགས་ཚགས་ཚུད་པོ་ཡོང་བསྡད་པ་དང་། ཆོས་བརྒྱུད་རིས་མེད་ཀྱི་ཐོག་ནས་འཛིན་སྐྱོང་གནང་ཐུབ་པ་སོགས་བྱུང་བ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་གྱིས་ཡིན་སྐོར་སོགས་གསུངས་སོང་།
བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་༧གོང་ས་མཆོག་ནས་བུད་མེད་ལ་དམིགས་བསལ་གཟིགས་སྐྱོང་དང་དགེ་བཤེས་མའི་དམ་འཇོག་གསར་གཏོད་གནང་བ་འི་བཀའ་དྲིན་རྗེས་དྲན་གྱི་གསུང་བཤད་གནང་སྐབས། གནའ་སྔ་མོ་ཡུལ་ལུང་སོ་སོའི་མི་གྲངས་ཕྱེད་ཀ་བུད་མེད་ཡིན་ཡང་། ཡུལ་ལུང་གང་དུའང་བུད་མེད་ཀྱིས་འཛིན་སྐྱོང་དང་ཆབ་སྲིད་ཀྱི་འགན་འཁུར་མཁན་ཧ་ཅང་ཉུང་ཉུང་རེད་ལ། བོད་དུའང་དེ་བཞིན་ཡིན་ཡང་། བུད་མེད་ལ་ཆབ་སྲིད་ཀྱི་ནུས་སྟོབས་མེད་པ་དེ་འདྲ་ཡང་མ་རེད། རྒྱ་གར་དང་། རྒྱ་གར་གྱི་སྤྱི་ཚོགས་ནང་དུ་ཁྱོ་ག་གྲོངས་ཚེ་བཟའ་ཟླ་མཉམ་དུ་ཤི་བ་དང་། རྒྱ་ནག་ནང་བུད་མེད་ཀྱི་རྐང་བ་བསྡམས་པ་སོགས་ཀྱི་གནས་སྟངས་ལ་བལྟས་ཚེ། བོད་ཀྱི་བུད་མེད་ཀྱི་གནས་སྟངས་ཡག་པོ་ཡོད་པར་ངོས་འཛིན་བྱེད་མཁན་ཡང་ཡོད་པ་རེད། དེ་ནི་ནང་པ་སངས་རྒྱས་བའི་ཆོས་ཀྱི་བྱིན་རླབས་ཀྱིས་མ་གྱུར་སེམས་ཅན་ཐམས་ཅད་ངོས་འཛིན་སྟངས་ཀྱིས་འགྱུར་བ་ཐེབས་ཡོད་སྲིད། བཙན་བྱོལ་དུ་མང་གཙོའི་སྒྲིག་འཛུགས་དབུ་བརྙེས་པ་དང་། བུད་མེད་ཀྱི་ནུས་པ་གདེང་འཇོག་གིས་ས་མིག་སོགས་གནང་ཡོད་འདུག་ཞེས་གསུངས་སོང་།
དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་ནས་བསྟན་པ་སླར་གསོ་དང་དག་ཐེར་སོགས་ཀྱིས་རྒྱལ་བའི་བསྟན་པ་རིན་པོ་ཆེར་མཛད་རྗེས་ཅི་བཞག་དང་འབྲེལ་བའི་གསུང་བཤད་གནང་སྐབས། སྤྱིར་༧གོང་ས་རྒྱལ་བ་རིན་པོ་ཆེ་མཆོག་ནས་སངས་རྒྱས་ཀྱི་བསྟན་པ་ལ་སླར་གསོ་དང་དག་ཐེར་མཛད་པ་རྣམས་རེ་རེ་བཞིན་བཤད་དགོས་ན། མི་མང་པོ་ཞིག་གིས་ལོ་ཟླ་མཐུད་ནས་བཤད་དགོས་པ་ཞིག་ལས། མི་གཅིག་གིས་རང་གར་བཤད་ཐུབ་པ་ཞིག་གཏན་ནས་མིན་ཡང་། འཛམ་གླིང་ཤར་ནུབ་གང་སར་བསྟན་པའི་འཆད་ཉན་བྱེད་སྟངས་དེ་༧གོང་ས་རྒྱལ་བ་རིན་པོ་ཆེ་མཆོག་ནས་གནང་བ་ལྟ་བུ་ཞིག་ཡིན་ཞིང་། སྒྲུབ་པའི་སྒོ་ནས་༧གོང་ས་རྒྱལ་བ་རིན་པོ་ཆེ་མཆོག་སྐུ་གཞོན་ནུའི་དུས་ནས་ཉིན་རྟག་པར་སྒོམ་པར་གཞོལ་ནས། དུས་རྟག་ཏུ་བྱ་བྲལ་བ་བཞིན་བཞུགས་ཀྱིན་ཡོད་པ་རེད། དེ་བཞིན་དེ་རིང་མཇལ་ཁ་སོགས་ཚུད་པའི་མཛད་པ་མང་དག་ཅིག་སྐྱོང་མུས་ཡིན་པས། དེ་ནི་བྱ་བྲལ་བ་བཞིན་རིར་ཕེབས་མེད་ཀྱང་། བྱ་བྲལ་བ་ལས་ལྷག་པའི་མཛད་པ་སྐྱོང་བཞིན་ཡོད་པ་མ་ཟད། མགོན་པོ་གང་ཉིད་ཀྱིས་ཐུན་དང་ཐུན་མཚམས་གཉིས་སུ་དབྱེ་རྒྱུ་མེད་སྐོར་གསུང་གི་ཡོད་པ་བཞིན། ཆུ་ཚོད་ཉེར་བཞིའི་རིང་ཐུན་ལ་གནས་ཀྱི་ཡོད་པས། དེ་ནི་༧མགོན་པོ་གང་གི་བསམ་གྱིས་མི་ཁྱབ་པའི་རླབས་ཆེན་ཀྱི་མཛད་པ་ཞིག་ཡིན་སྐོར་དང་། དེ་བཞིན་མགོན་པོ་གང་ཉིད་ཀྱིས་ཚོགས་པ་དང་སྒྲིག་འཛུགས་ཁག་ལ་ཞལ་འདེབས་གནང་ཐེངས་ནི་གྲངས་ཀྱིས་མི་ལངས་བ་ཞིག་ཡིན་པ་རེད། བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་གསེད་དཀྲོལ་གྱི་ཐོག་ནས་མཛད་པ་བསྐྱངས་པ་བཞིན། ༧མགོན་པོ་གང་ཉིད་ཀྱིས་ཀྱང་འཛམ་གླིང་ཤར་ནུབ་གང་སར་ཆོས་ལུགས་རིས་མེད་དང་། མི་རིགས་དབྱེར་མེད་ཀྱི་དོན་དུ་རླབས་ཆེན་གྱི་མཛད་པ་བསྐྱངས་དང་སྐྱོང་བཞིན་ཡོད་སྐོར་སོགས་གསུངས་སོང་།
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་གི་ཤེས་ཡོན་གྱི་སྡེ་དང་སྤྱི་ཚོགས་ཀྱི་བསམ་བློར་ཤུགས་རྐྱེན་ཅི་གནང་བ་དང་འབྲེལ་བའི་སྒོ་ནས་བ་ཀའ་དྲིན་་རྗེས་དྲན་གྱི་གསུང་བཤད་གནང་སྐབས། གཟིགས་སྣང་གོ་བདེ་བའི་ངང་ནས་བཤད་ན་མཐོང་སྣང་རེད། མི་དཀྱུས་མ་ཞིག་ཡིན་ཚེ་ཡག་པོ་དང་སྡུག་པོ་སོགས་མཐོང་བའི་དབང་གིས་འཁྲུག་འཛིང་འབྱུང་བཞིན་ཡོད་པ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་གཟིགས་སྣང་ནི་ང་ཚོའི་བློ་ལ་མ་ཤོངས་བ་ཞིག་རེད། དེ་དག་བཀླག་པ་ཡིན་ཚེ་སྙན་པོ་ཡང་ཡོད། ཉམས་རྟོགས་ནི་ཕར་ཕྱོགས་ཀྱི་བཟང་བའི་ཕྱོགས་ཐམས་ཅད་ཉམས་སུ་ལེན་དགོས་པ་ཞིག་ལ་ཟེར་གྱི་ཡོད། མི་དཀྱུས་མ་ཞིག་ཡིན་ན་ཚོགས་པ་ཆུང་ཆུང་ཞིག་བཙུགས་ནས་ལས་ཀ་མགོ་རྔ་གཙང་མ་ཞིག་སྒྲུབ་ཐུབ་མི་འདུག་ཀྱང་། ༧གོང་ས་མཆོག་ནས་བོད་པའི་སྤྱི་ཚོགས་སྤོབས་པ་སྐྱེ་དགོས་པ་ཞིག་བཟོས་ཡོད་པ་མ་ཟད། རྒྱལ་ཁབ་གང་དུ་ཕྱིན་ཡང་ཕ་བུའི་བྱམས་བརྩེ་བཞིན་བསྐྱངས་བའི་དབང་གིས་འཛམ་གླིང་མི་མང་གིས་དགའ་བོ་ཞེ་དྲགས་བྱེད་ཀྱི་འདུག དགུང་ལོ་གྱ་བདུན་དུ་ཕེབས་ཡོད་ཀྱང་ཉིན་མ་རེ་རེ་བཞིན་སེམས་ཅན་དོན་དུ་ཕྱག་ལས་རྒྱུན་མ་ཆད་པར་གནང་བཞིན་ཡོད་པས་ཤེས་ཐུབ་ཞིག་ཡིན་ཞེས་སོགས་གསུངས་སོང་།
གསར་འགོད་པ། བྱམས་པ་ཚེ་རིང་།
