བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ཀྱིས་ཀར་ན་ཊ་ཀའི་སྤྱི་ཁྱབ་བློན་ཆེན་གསར་པར་འཚམས་འཕྲིན་གནང་འདུག
ཟླ་འདིའི་ཕྱི་ཚེས་ ༢༢ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་གནང་བའི་འཚམས་འཕྲིན་ནང་། ངས་བོད་མིའི་སྒྲིག་འཛུགས་ཀྱིས་གཙོས་པའི་བོད་མི་ཡོངས་དང་། བྱེ་བྲག་ཏུ་ཀར་ན་ཊ་ཀ་མངའ་སྡེར་གནས་སྡོད་བྱེད་བཞིན་པའི་བོད་མི་ཡོངས་ཀྱི་ཚབ་བྱས་ཏེ། མངའ་སྡེའི་འོས་བསྡུ་ཆེན་མོའི་ནང་སྐུ་ཉིད་ཀྱི་ཆབ་སྲིད་ཚོགས་པར་རྒྱལ་ཁ་ཐོབ་པ་དང་སྐུ་ཉིད་སྤྱི་ཁྱབ་བློན་ཆེན་དུ་བདམས་ཐོན་བྱུང་བར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ཀར་ན་ཊ་ཀ་མངའ་སྡེའི་གཞུང་མང་གཉིས་ནས་བོད་མིར་རྒྱབ་སྐྱོར་གྱིས་མིག་དཔེ་བཟང་པོ་བསྟན་ཡོད་ཅིང་། ད་ལྟའི་ཆར་ཀར་ན་ཊ་ཀ་མངའ་སྡེའི་ནང་བོད་ཀྱི་གདན་ས་ཆེ་ཁག་གཙོས་པའི་དགོན་སྡེ་ཆེ་ཁག་དང་། བོད་མིའི་གཞིས་ཆགས་ཆེ་ཤོས་ཆགས་ཡོད། ང་ཡང་སྦེལ་ཀོབ་ལུགས་ཟུང་བསམ་གྲུབ་གླིང་བོད་མིའི་གཞིས་ཆགས་སུ་སྐྱེས་ཤིང་འཚར་བའི་སྤོབས་པ་ལྡན་པའི་བོད་མི་ཞིག་ཡིན་པའི་ཆ་ནས་ཀར་ན་ཊ་ཀ་མངའ་སྡེ་གཞུང་མང་གཉིས་ནས་བོད་མིར་གཏོང་ཕོད་ཆེན་པོས་མཐུན་འགྱུར་རོགས་རམ་གནང་བར་བསྔགས་བརྗོད་ཞུ་རྒྱུ་མ་ཟད། སྐུ་ཉིད་ཀྱིས་དེ་སྔོན་མངའ་སྡེའི་སྤྱི་ཁྱབ་བློན་ཆེན་གནང་ཡུན་རིང་བོད་མིར་དགོས་ངེས་མཐུན་གྲོགས་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་གསུངས་འདུག
དེ་བཞིན། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་འཚམས་འཕྲིན་ནང་། ༧གོང་ས་རྒྱལ་བ་རིན་པོ་ཆེ་མཆོག་ཀར་ན་ཊ་ཀའི་མངའ་སྡེའི་སྤྱི་ཁྱབ་བློན་ཆེན་རིམ་པར་མཇལ་འཕྲད་གནང་ཡོད་པ་དང་། དེ་བཞིན་ཕྱི་ལོ་ ༢༠༡༨ ལོར་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་རྒྱ་གར་ལྷོ་ཕྱོགས་ནང་བོད་དོན་ཞུ་སྐུལ་གྱི་ལས་འགུལ་སྤེལ་སྐབས་སྐུ་ཉིད་དང་ལྷན་མཇལ་འཕྲད་གནང་རྒྱུའི་གོ་སྐབས་བྱུང་ཡོད། སྐུ་ཉིད་ནས་བོད་དོན་ཐོག་རྒྱུན་དུ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། འབྱུང་འགྱུར་ཡང་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན། ཀར་ན་ཊ་ཀའི་མངའ་སྡེ་ནི་བོད་མིའི་འདུས་སྡོད་གཞིས་ཆགས་ཆེ་ཤོས་ཁག་གི་ཆགས་ཡུལ་ཡིན་སྟབས། ངས་གོ་སྐབས་འདི་བརྒྱུད་ནས་ཀར་ན་ཊ་ཀའི་མངའ་སྡེའི་གཞུང་མང་གཉིས་ནས་ད་བར་མངའ་སྡེའི་ནང་གནས་སྡོད་བོད་མི་རྣམས་ལ་མཐུན་འགྱུར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་འདུག
འཚམས་འཕྲིན་གཉིས་ཀྱི་མཇུག་ཏུ། སྤྱི་ཁྱབ་བློན་ཆེན་གསར་པའི་ལས་དོན་མཐའ་དག་ལམ་ལྷོངས་ཡོང་བ་དང་། ཀར་ན་ཊ་ཀ་མངའ་སྡེའི་མི་མང་གི་རེ་འདོད་མངོན་འགྱུར་ཡོང་ཐུབ་པ་བཅས་ཀྱི་སྨོན་འདུན་ཞུས་འདུག
ཟླ་འདིའི་ཕྱི་ཚེས་ ༢༠ ཉིན་སྐུ་ཞབས་སི་དྷ་རཱ་མི་ཡ་ལགས་ཀྱིས་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་གསར་བའི་ལས་འཁུར་གྱི་དམ་འབུལ་ཞུས་ཡོད་པ་དང་། ཕྱི་ཚེས་ ༡༤ ཉིན་ཀར་ན་ཊ་ཀའི་ནང་ཁ་གཏད་སྲིད་དོན་ཚོགས་པ་བྷི་ཇི་པི་དང་རྒྱལ་ཡོངས་མང་གཙོ་ཚོགས་པ་གཉིས་ཀྱི་གཙོས་སྲིད་དོན་ཚོགས་པ་ཁག་ཅིག་གི་བར་འོས་བསྡུ་བྱས་ཏེ། རྒྱལ་ཡོངས་མང་གཙོ་ཚོགས་པར་འོས་བསྡུའི་རྒྱལ་ཁ་ཐོབ་པར་བརྟེན། ད་རེས་ཁོང་ཀར་ན་ཊ་ཀའི་མངའ་སྡེ་སྤྱི་ཁྱབ་བློན་ཆེན་དུ་བདམས་ཐོན་བྱུང་བ་ཐེངས་གཉིས་པ་ཆགས་ཀྱི་ཡོད་ཅིང་། ཕྱི་ལོ་ ༢༠༡༣ ནས་ ༢༠༡༨ བར་ཀར་ན་ཊ་ཀའི་སྤྱི་ཁྱབ་བློན་ཆེན་དུ་ཐོག་མར་བསྡད། སྐུ་ཞབས་སི་དྷ་རཱ་མི་ཡ་ལགས་ནི་སྤྱི་ཚོགས་རིང་ལུགས་དང་ཆོས་ལུགས་རིས་མེད་ཀྱི་རིང་ལུགས་གཙོ་འཛིན་བྱེད་མཁན་ཞིག་ཡིན་པའི་ཁར། ཁོང་ལ་འོས་བསྡུའི་རྒྱལ་ཁ་ཐོབ་པ་དེས་རྒྱ་གར་ནང་བྷི་ཇི་པི་སྲིད་དོན་ཚོགས་པའི་དབང་སྒྱུར་འོག སྒོ་བརྒྱབ་ཟིན་པ་ལྟ་བུའི་རྒྱ་གར་གྱི་ཆབ་སྲིད་ལམ་ལུགས་ལ་སྒོ་མོ་གསར་པ་ཞིག་ཕྱེ་རྒྱུ་ཡིན་པའི་ཚོད་དཔག་བྱེད་བཞིན་འདུག
