རྒྱལ་སྤྱིའི་ནང་ཨོ་མི་ཁུ་རོན་གྱི་ཏོག་དབྱིབས་གཉན་སྲིན་གྱི་འགོག་ཁབ་བརྒྱག་རྒྱུར་གྲ་སྒྲིག་བྱ་དགོས་པའི་རེ་སྐུལ་བྱེད་བཞིན་འདུག
སྤྱིར་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་གནས་སྟངས་ཇེ་ལེགས་སུ་ཕྱིན་ཡོད་པ་མ་ཟད། ཟླ་འདིའི་ཕྱི་ཚེས ༥ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་རྒྱལ་སྤྱིའི་ནང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ཡོལ་ཟིན་པའི་ཡོངས་ཁྱབ་གསལ་བསྒྲགས་ཤིག་གནང་ཡོད་ཀྱང་། ཁ་སང་ཕྱི་ཚེས་ ༢༢ ཉིན་རྒྱ་ནག་གི་ཆེད་མཁས་པ་སྐུ་ཞབས་ཀྲོང་ནན་ཧྲིན་(Zhong Nanshan) ལགས་ཀྱིས་ཕྱི་ཟླ་ ༦ པའི་ཟླ་མཇུག་ཙམ་ནས་རྒྱ་ནག་ནང་སླར་ཡང་ཏོག་དབྱིབས་རིམས་ནད་མཆེད་ནས། བདུན་རེར་ནད་པ་མི་གྲངས་ས་ཡ་ ༦༥ ལྷག་འབྱུང་ཉེན་ཡོད་པའི་ཚོད་དཔག་བྱས་ཡོད་འདུག
དེའི་ཐད་རྒྱ་ནག་གི་ཆེད་མཁས་པ་སྐུ་ཞབས་ཀྲོང་ནན་ཧྲིན་ལགས་ཀྱིས། ད་ལྟ་རྒྱ་ནག་ནང་འབྱུང་ཉེན་ཡོད་པའི་ཏོག་དབྱིབས་ཀྱི་རླབས་རྒྱུན་དེ་ནི། འདས་ལོའི་ནས་འདི་ལོའི་ཕྱི་ཟླ་ ༡ བར་རྒྱ་ནག་ནང་བྱུང་བའི་ཏོག་དབྱིབས་རིམས་ནད་ཀྱི་དཀའ་ངལ་ལས་ཆེ་བར་འབྱུང་ཉེན་ཡོད་པ་མ་ཟད། སྐབས་དེར་གཉན་རིམས་ཀྱི་ངོ་བོ་མི་འདྲ་བའི་ཨོ་མི་ཁུ་རོན་གྱི་ནད་འབུ་དེ་དག་ཉིན་རེར་མི་གྲངས་ས་ཡ་ ༣༧ ལ་འགོས་ཉེན་ཡོད་པའི་ཁར། རིམས་ནད་འགོས་པའི་ནད་པ་དང་ཕུང་པོས་སྨན་ཁང་དང་དུར་ཁང་ཡོངས་སུ་ཁེངས་ཉེན་ཡོད་སྐོར་དང་། མི་མང་གི་ཉིན་རེའི་འཚོ་བ་ལའང་སྔར་ལས་ལྷག་པའི་དཀའ་ངལ་འཕྲད་སྲིད་སྐོར་སོགས་བརྗོད་འདུག
ཡང་ཁོང་གིས། རྒྱ་ནག་ནང་སླར་ཡང་ཏོག་དབྱིབས་གཉན་རིམས་ཀྱི་དཀའ་ངལ་ཤུགས་ཆེན་འབྱུང་ཉེན་ཡོད་པའི་དུས་སྐབས་འདིར། རྒྱ་ནག་གཞུང་གིས་ཨོ་མི་ཁུ་རོན་གྱི་ཨེ་སི་བྷི་བྷི་གཉན་སྲིན་(XBB ) ལ་ཆེད་དུ་དམིགས་པའི་འགོག་ཁབ་མཁོ་སྐྲུན་གྱི་ལས་དོན་གཉེར་མུས་ཡིན་པ་མ་ཟད། རྒྱ་ནག་གི་སྨན་རྫས་ཐོན་ཁུངས་ལས་ཁུངས་(NMPA) ཀྱིས་ཀྱང་འགོག་ཁབ་གཉིས་ལ་ཆོག་མཆན་ཐོབ་སྟེ། ད་ལྟ་བསྐྱར་དུ་འགོག་ཁབ་གསུམ་བཞི་ཙམ་ཞིག་བཟོ་སྐྲུན་བྱེད་མུས་ཡིན་སྐོར་བརྗོད་འདུག
དེ་བཞིན་ཟླ་འདིའི་ཕྱི་ཚེས་ ༡༨ ཉིན་རྒྱལ་སྤྱིའི་འཕྲོད་བསྟེན་སྒྲིག་འཛུགས་ཀྱིས་ཀྱང་། ད་ལྟ་ཨེ་སི་བྷི་བྷི་ (XBB ) གཉན་རིམས་དེ་ཁྱབ་གདལ་འགྲོ་རྒྱུར་ཉེན་ཁ་ཧ་ཅང་ཆེན་པོ་ཡོད་པ་དང་། གཉན་སྲིན་དེས་སླར་ཡང་འཛམ་གླིང་ཁྱོན་ཡོངས་ཀྱི་སྲིད་འབྱོར་རིག་གསུམ་ལ་འགོག་རྐྱེན་བཟོ་ཉེན་དང་། མིའི་ཚེ་སྲོག་ལའང་གནོད་འཚེ་གཏོང་ཉེན་ཤུགས་ཆེན་ཡོད་པས། རྒྱལ་ཁབ་རིམ་པས་ཨེ་སི་བྷི་བྷི་གཉན་སྲིན་གྱི་འགོག་ཁབ་བརྒྱག་རྒྱུར་གྲ་སྒྲིག་བྱ་དགོས་པའི་རེ་སྐུལ་བྱས་ཡོད་འདུག
གཞན་ཡང་། བྷི་ལོམ་བྷི་རིག་( Bloomberg ) གི་སྙན་ཐོའི་ནང་། རྒྱ་ནག་ནང་ཏོག་དབྱིབས་གཉན་རིམས་ཀྱི་གནས་སྟངས་ཇེ་བཟང་དུ་ཕྱིན་ནས། ཟླ་ངོ་དྲུག་ཙམ་གྱི་རྗེས་སུ། རྒྱ་ནག་ནང་སླར་ཡང་ཨོ་མི་ཁུ་རོན་གྱི་ཨེག་སི་བྷི་བྷི་(XBB) གཉན་རིམས་དེ་མཆེད་ཉེན་ཤུགས་ཆེན་ཡོད་པ་མ་ཟད། ཕྱི་ཟླ་ ༥ པའི་གཞུག་ཙམ་ནས་རྒྱ་ནག་ཏུ་བདུན་གཅིག་ནང་རིམས་ནད་འགོས་པའི་མི་གྲངས་ས་ཡ་ ༤༠ དང་། ཟླ་བ་རྗེས་མ་ནས་རྒྱ་ནག་ནང་བདུན་རེར་ནད་པ་མི་གྲངས་ས་ཡ་ ༦༥ ལྷག་འབྱུང་ཉེན་ཡོད་ཅིང་། རྒྱ་ནག་གཞུང་གི་རིམས་ནད་བཀག་འགོག་ལྷན་ཚོགས་ཀྱིས་ཀྱང་། ཕྱི་ཟླ་ ༥ པའི་ནང་རྒྱ་ནག་ཏུ་ཉིན་རེར་རིམས་ནད་ཇི་ཙམ་བྱུང་ཡོད་མེད་ཀྱི་གནས་ཚུལ་གསལ་སྟོན་བྱས་མེད་ཅིང་། ཏོག་དབྱིབས་རིམས་ནད་སོགས་དང་འབྲེལ་བའི་གནད་དོན་མང་པོ་ཞིག་སྦས་སྐུང་བྱས་ཡོད་སྐོར་སོགས་གསལ་འདུག
འཛམ་གླིང་ཏོག་དབྱིབས་གཉན་རིམས་ཀྱི་གྲངས་ཐོ་ཞིབ་བཤེར་བྱེད་ས་ (World Meters) ལྟར་ན། འདས་པའི་ཆུ་ཚོད་ཉེར་བཞིའི་རིང་འཛམ་གླིང་ཁྱོན་ཡོངས་སུ་རིམས་ནད་འགོས་མཁན་མི་གྲངས་ ༢༣༠༡༡ བྱུང་ཡོད་ཅིང་། མི་གྲངས་ ༢༨༢ རྐྱེན་འདས་དང་མི་གྲངས་ ༡༩༤༩༩ དྲག་སྐྱེད་བྱུང་ཡོད་འདུག་ལ། ད་བར་འཛམ་གླིང་ཁྱོན་ཡོངས་ཀྱི་མི་གྲངས་ས་ཡ་དྲུག་བརྒྱ་(༦༨༩༠༢༤༧༥༣) ལྷག་ལ་རིམས་ནད་འགོས་ཡོད་པ་མ་ཟད། མི་གྲངས་ས་ཡ་དྲུག (༦༨༨༠༧༠༢) ལྷག་རྐྱེན་འདས་སུ་གྱུར་ཡོད་ཀྱང་། རྒྱ་ནག་ནང་འདས་པའི་ཉིན་གྲངས་ ༢ རིང་ནད་པ་གཅིག་ཀྱང་བྱུང་མེད་པ་རེད་འདུག
གསར་འགོད་པ། དཔལ་ལྡན།
