ཡང་རྒྱ་ནག་སྟོབས་ཆེན་རྒྱལ་ཁབ་ཉི་ཤུའི་ལྷན་ཚོགས་ཐོག་མཉམ་ཞུགས་བྱས་མི་འདུག

རྒྱ་ནག་གཞུང་གིས་རྩོད་གླེང་ཧ་ཅང་ཆེ་བའི་རང་སྐྱོང་ས་ཁུལ་ཟེར་བར་ཁ་གཡར་ནས་རྒྱ་གར་གྱི་ཇཱ་མུ་ཀ་ཤི་མིར་ཁུལ་དུ་འཚོག་བཞིན་པའི་སྟོབས་ཆེན་རྒྱལ་ཁབ་ ༢༠ ལྷན་ཚོགས་ཐོག་མཉམ་ཞུགས་བྱས་མི་འདུག

ཁ་སང་ཕྱི་ཚེས་ ༢༣  ནས་ཉིན་གྲངས་གཉིས་རིང་རྒྱ་གར་བྱང་ཕྱོགས་ཇཱ་མུ་དང་ཀ་ཤི་མིར་མངའ་སྡེའི་ཤྲི་ནཱ་སྒར་དུ་འཚོག་མུས་ཡིན་པའི་འཛམ་གླིང་སྟོབས་ཆེན་རྒྱལ་ཁབ་ ༢༠ ཡི་ལྷན་ཚོགས་ཐོག རྒྱ་ནག་གི་འཐུས་མི་གཙོས་སོ་དྷི་ཨ་རབ་བྷེ་ཡ་(Saudi Arabia)ཨི་ཇིབ་ (Egypt) ཌར་ཀི་ (Turkey) སོགས་ཀྱིས་མཉམ་ཞུགས་བྱས་མེད་པའི་ཁར། རྒྱ་ནག་ཕྱི་སྲིད་ལྷན་ཁང་གིས་མགྲིན་ཚབ་པ་ཝང་ཝིན་པིན་(Wang Wenbin) གྱིས་རྒྱ་ནག་གཞུང་གིས་རྩོད་གླེང་ཧ་ཅང་ཆེ་བའི་རང་སྐྱོང་ས་ཁུལ་ཁག་ཏུ་བསྡུས་པའི་ཚོགས་འདུ་གང་ལའང་མཉམ་ཞུགས་བྱེད་ཀྱི་མེད་ཅེས་བསྒྲགས་འདུག

ཚོགས་ཆེན་དང་འབྲེལ་ཏེ་ཇཱ་མུ་ཀ་ཤི་མིར་མངའ་སྡེའི་སྤྱི་ཁྱབ་མགྲིན་ཚབ་པ་སྐུ་ཞབས་ཇི་ཏན་དྷ་སིང་(Jitendra Singh) ལགས་ཀྱིས། ད་ལན་འཛམ་གླིང་སྟོབས་ཆེན་ཉི་ཤུའི་ཚོགས་ཆེན་དེ་ཇཱ་མུ་དང་ཀ་ཤི་མི་ཡི་ཤྲི་ན་སྒར་(Srinagar) ལ་འཚོགས་པ་ནི་ཁུལ་དེའི་ནུས་སྟོབས་དང་རིག་གཞུང་སོགས་གསལ་སྟོན་བྱས་པའི་གོ་སྐབས་ཡག་ཤོས་ཤིག་ཡིན་པ་དང་། ཁུལ་དེར་རྒྱལ་སྤྱི་རིམ་པའི་ཚོགས་འདུ་ཞིག་བསྡུས་པ་དེས། རྒྱ་གར་དང་རྒྱལ་སྤྱིའི་ནང་བཟང་ཕྱོགས་ཀྱི་བརྡ་ལན་ཞིག་ཀྱང་གཏོང་གིན་ཡོད་སྐོར་སོགས་བརྗོད་འདུག 

དེ་བཞིན་ཇཱ་མུ་དང་ཀ་ཤི་མི་ནི་རྒྱ་གར་དང་པ་ཀི་སི་ཐན་གཉིས་ཀྱི་རྩོད་གླེང་ཧ་ཅང་ཆེ་བའི་ས་ཁུལ་ཞིག་ཏུ་གྱུར་ཡོད་སྟབས། པ་ཀི་སི་ཐན་གྱིས་ཀྱང་ཁུལ་དེར་བསྡུས་པའི་སྟོབས་ཆེན་རྒྱལ་ཁབ་ཉི་ཤུའི་ཚོགས་ཆེན་ལ་དགག་པ་ཤུགས་ཆེན་རྒྱག་གིན་འདུག་ལ། སྤྱིར་འདས་པའི་མི་ལོ་ ༦༠ ལྷག་གི་རིང་རྒྱ་གར་བྱང་ཕྱོགས་ཇཱ་མུ་དང་ཀ་ཤི་མིར་ནི་རྒྱ་གར་དང་པ་ས་ཀི་སི་ཐན་གཉིས་ཀྱི་རྩོད་གླེང་ཆེས་ཆེ་བའི་ས་ཁུལ་དུ་གྱུར་ཡོད་པས།  པ་ཀི་སི་ཐན་གྱི་ཕྱི་སྲིད་བློན་ཆེན་བྷི་ལ་ཝལ་ (Bilawal Bhutto Zardari) གྱིས་རྒྱ་གར་གཞུང་གིས་འཛམ་གླིང་གི་དཔལ་འབྱོར་དང་ཚོང་འབྲེལ་གྱི་ནུས་པ་མཉམ་སྤུངས་བྱེད་པའི་སྟོབས་ཆེན་རྒྱལ་ཁབ་ཉི་ཤུའི་ཚོགས་གཙོའི་གོ་གནས་དང་དབང་ཚད་ལོག་སྤྱོད་བྱེད་ཀྱིན་ཡོད་ལུགས་སོགས་བརྗོད་འདུག 

ཕྱི་ལོ་ ༢༠༢༠ ལོར་ལ་དྭགས་གྷ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་གདོང་ཐུག་ཚབས་ཆེན་བྱུང་རྗེས། བོད་ཧིན་མཐའ་མཚམས་ཁག་ཏུ་རྒྱ་དཀར་ནག་གི་དམག་མིའི་བར་གདོང་ཐུག་དང་རྩོད་གླེང་ཡང་ཡང་འབྱུང་གི་ཡོད་པ་དང་། ཕྱོགས་གཉིས་བར་ཐེངས་མང་གྲོས་མོལ་བྱས་ཡོད་ཀྱང་གྲུབ་འབྲས་དེ་ཙམ་ཐོན་གྱི་མེད་པར་བརྟེན།  ད་ལྟ་བོད་ཧིན་མཐའ་མཚམས་ཀྱི་ས་གནས་མང་པོ་ཞིག་ཏུ་རྒྱ་དཀར་ནག་གཉིས་ཀྱིས་ཚོར་ཤུགས་ཆེན་པོས་འཛུགས་སྐྲུན་དང་ལྟ་སྲུང་བྱེད་མུས་ཡིན་པ་མ་ཟད། འདི་ལོའི་ཕྱི་ཟླ ༣ ཚེས་ ༢༥  ནས་ཉིན་གྲངས་གཉིས་རིང་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་རྒྱལ་ས་ཨི་ཊ་ནཱ་གྷར་ (Itanagar) དུ་འཚོགས་པའི་འཛམ་གླིང་སྟོབས་ཆེན་རྒྱལ་ཁབ་ ༢༠ ཡི་ཚོགས་ཆེན་ཁྲོད་དུའང་མཉམ་ཞུགས་བྱས་མེད་པ་རེད། འདི་ལོའི་ཕྱི་ཟླ ༤ ནང་རྒྱ་ནག་གི་མཐའ་མཚམས་སྐོར་གྱི་ཉམས་ཞིབ་པ་ཀྲང་ཡོང་པན་ (Zhang Yongpan) ཟེར་བ་ཞིག་གིས། རྒྱ་གར་གཞུང་གིས་བོད་ཀྱི་ལྷོ་རྒྱུད་ས་ཁུལ་ལ་བཙན་འཛུལ་བྱས་རྗེས། རྒྱ་གར་གཞུང་གིས་ཁྲིམས་མཐུན་མིན་པའི་ཐོག་ནས་ས་ཁུལ་དེ་དག་ལ་གང་འདོད་དུ་མིང་བཏགས་ཡོད་པས།  ད་ལྟ་རྒྱ་ནག་གཞུང་ལ་ས་ཁུལ་དེ་དག་ལ་མིང་འདོགས་པ་དང་ལྟ་སྲུང་བྱེད་པའི་ཐོབ་ཐང་དགོས་ལུགས་དང་། རྒྱ་ནག་གཞུང་གིས་རྒྱ་ནག་གི་མཐའ་མཚམས་དང་རྒྱལ་སྲུང་བདེ་འཇགས་སླད་བོད་ཀྱི་ལྷོ་རྒྱུད་ཀྱི་ས་ཁུལ་དེ་དག་སྲུང་སྐྱོབ་བྱ་དགོས་སྐོར་སོགས་བརྗོད་དེ། མོན་རྟ་དབང་ཁུལ་གྱི་ས་གནས་མང་པོ་ཞིག་ནི་བོད་ཀྱི་ལྷོ་རྒྱུད་ཡིན་ཡང་། རྒྱ་གར་གཞུང་གིས་ས་ཁུལ་དེ་དག་བཙན་འཛུལ་བྱེད་མུས་ཡིན་སྐོར་བསྒྲགས་ཡོད་པ་རེད།

 འདི་ལོའི་ཕྱི་ཟླ ༣ ཚེས་ ༢ བར་ཉིན་གྲངས་གཉིས་ཀྱི་འཛམ་གླིང་རྒྱལ་ཁབ་ཉི་ཤུའི་ཕྱི་སྲིད་བློན་ཆེན་རྣམ་པའི་ལྷན་ཚོགས་དེ་རྒྱ་གར་གྱི་རྒྱལ་ས་ལྡི་ལིར་འཚོགས་ཡོད་ཅིང་། ཚོགས་ཆེན་དེའི་ཐོག་ཨོ་གླིང་དང་། རྒྱ་གར། དབྱིན་ཡུལ། ཨ་རི། འཇར་མན་གཙོས་འཛམ་གླིང་གི་སྟོབས་ཆེན་རྒྱལ་ཁབ་བཅུ་དགུ་ཡི་ཕྱི་སྲིད་བློན་ཆེན་རྣམས་ཀྱིས་རྒྱལ་ཁབ་ཁག་གི་མཉམ་རུབ་ཀྱི་ཐོག་ནས་ཟས་རིགས་དང་ཚོང་དོན་ཡར་རྒྱས་གཏོང་ཐབས་དང་།  འགྲོ་བ་མིའི་ཐོབ་ཐང་། སྟོབས་ཆེན་རྒྱལ་ཁབ་ཁག་གི་མཉམ་རུབ་ཀྱི་ནུས་པ་ཇི་ལྟར་སྐྱེད་དགོས་མིན། ཨུ་རུ་སུ་དང་ཡུ་ཁི་རེན་གྱི་དཀའ་རྙོག་སོགས་ཀྱི་ཐད་ལ་གླེང་སློང་བྱས་ཡོད་ལ། སྐབས་དེར་རྒྱ་ནག་གི་ཕྱི་དྲིལ་བློན་ཆེན་ཆིན་ཀྲང་(Qin Gang)མཉམ་ཞུགས་བྱས་ཡོད་པ་རེད།

ད་ལན་ཇཱ་མུ་དང་ཀ་ཤི་མིར་དུ་འཚོགས་པའི་སྟོབས་ཆེན་རྒྱལ་ཁབ་ཉི་ཤུའི་ཚོགས་ཆེན་དེ་རྒྱ་གར་དུ་བསྡུས་ཐེངས་གསུམ་པར་གྱུར་ཡོད་ཅིང་། ཚོགས་ཆེན་དེའི་ཐོག་སྟོབས་ཆེན་རྒྱལ་ཁབ་ཁག་གི་འཐུས་མི་ ༦༠ ལྷག་གིས་མཉམ་ཞུགས་གནང་སྟེ། དྭངས་གཙང་གི་ཡུལ་སྐོར་ལྗོངས་རྒྱུ་(Green Tourism)དང་། འཕྲུལ་རིག་ཡར་རྒྱས། ནུས་པ་ཡར་སྐུལ། དམིགས་ཡུལ་ངེས་ཅན་གྱི་འཛིན་སྐྱོང་བྱ་བ་(Destination Management) སོགས་བརྗོད་གཞི་ཆེན་པོ་ལྔའི་ཐོག་གླེང་སློང་གནང་གིན་ཡོད་འདུག 

གསར་འགོད་པ། དཔལ་ལྡན།