ཕལ་ཆེར་ལོ་ཁ་ཤས་ནང་སྦྱོར་ལམ་གྱི་རྟོགས་པ་སྐྱེ་ཡོང་བསམ་པའི་རེ་བ་བྱེད་བཞིན་ཡོད་ཅེས་གསུངས།

ཁ་སང་ཕྱི་ཚེས་༢༦ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་སཱ་ར་མཐོ་སློབ་དང་། ཨེ་མོ་རི་མཐོ་སློབ་བར་གྱི་ཤེས་ཡོན་བརྗེ་ལེན་ལས་གཞིའི་དགེ་སློབ་རྣམས་དང་། བོད་པའི་སློབ་གྲྭ་ཁག་གི་སཱི་ཤེས་ཡོན་སློབ་གསོའི་མཐུན་སྦྱོར་བ་རྣམས་ལ་མཇལ་ཁ་དང་བཀའ་སློབ་བསྩལ་ཡོད་ཅིང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས་

ང་ཚོ་ཕྱོགས་གཅིག་ནས་བཙན་བྱོལ་བ་ཆགས་ཡོད་ཀྱང་། ཕྱོགས་གཞན་ཞིག་ནས་རྒྱ་གར་དམངས་གཙོའི་རྒྱལ་ཁབ་ཏུ་ཡོད་པས་འཛམ་གླིང་དུ་འབྲེལ་བ་བྱེད་པར་ཕར་ཚུར་འགྲོ་འོང་སྟབས་བདེ་རུ་ཕྱིན་ཡོད། ངོས་རང་ལོ་རྒས་ཡོད་པས་ས་ཆ་ཐག་རིང་པོར་འགྲོ་བར་འདོད་པ་མེད་ཀྱང་། དགེ་བཤེས་ལགས་དང་རྒན་ལགས་རྣམས་ཕར་ཚུར་འགྲོ་འོང་བྱེད་ཐུབ་ཀྱི་ཡོད། ངོས་རང་སྐྱབས་མགོན་རིན་པོ་ཆེ་ཡིན་པས་སྔོན་མ་ཡིན་ན་བཞུགས་ཁྲི་ཞིག་གི་སྟེང་དུ་རྫིག་པོ་བྱས་ནས་བསྡད་དེ་སྐད་ཆ་ཡང་ཞེ་དྲགས་བཤད་ཀྱི་ཡོད་པ་མ་རེད། དེང་སྐབས་རང་དབང་དམངས་གཙོའི་ལུང་པར་བསྡད་ཡོད་པ་དང་། ངོས་རང་བཙན་བྱོལ་བ་ཆགས་ནས་ཡོད་དུས། ཆུ་འདྲིས་ནང་བཞིན་མི་གཞན་དང་མཉམ་དུ་ཉམས་མྱོང་གི་སྟེང་ནས་སྐད་ཆ་བཤད་པར་ཁ་ཡོད་ལག་ཡོད་ཀྱིས་ཕན་ཐོགས་ཡག་པོ་འདུག རྟེན་ཅིང་ཆོས་ཉིད་མི་འདོད་ལ།། འབྱུང་ཞིང་འཇིག་རྟེན་ཚུལ་ཡང་བཏོན།། རིག་སྲོལ་ཀུན་ལས་རྒྱལ་བོ་ཅན།། རྟེན་ཅིང་འབྲེལ་འབྱུང་མཚན་མའི་བཀའ།། གོ་རྒྱུ་ཧ་ཅང་ཆེན་པོ་རེད། དེ་སྟོང་ཉིད་ཀྱི་ལྟ་བ་ཟེར་ནས་ཕྱི་ལོགས་ཀྱི་རྣམ་གཞག་ཙམ་གཏན་ལ་ཕབ་པ་མ་ཡིན་པར། ང་ཚོའི་ཆགས་སྡང་གི་བློ་སྐྱེ་ཡོང་དུས། ཆགས་སྡང་སྐྱེ་སའི་ཡུལ་དེ་དོན་གྱི་ངོས་ནས་ཡོད་པ་ཞིག་བློ་ལ་སྣང་ཡོང་གི་ཡོད། སྣང་བ་བཞིན་དུ་ཕར་ངོས་ན་ཡོད་པའི་བསམ་བློ་བཏང་དེ་ཡིད་དུ་འོང་བ་ལ་ཆགས་པ་དང་། ཡིད་དུ་མི་འོང་བར་སྡང་བའི་བློ་སྐྱེ་ཡོང་གི་ཡོད། དེ་ཐམས་ཅད་མིང་རྐྱང་བཏགས་ཡོད་ཙམ་ཡིན་པ་དང་། རྟོགས་པའི་བཏགས་ཙམ་ཡིན་པའི་བསམ་བློ་འཁོར་ཡོང་དུས། ཆགས་སྡང་གི་བློ་སྐྱེ་བ་ག་ལེར་ཞི་འགྲོ་ཡི་ཡོད་པས་ཞེ་བོ་ཡག་པོ་རེད། ཐབས་ཀྱི་ཆ་ནས་བྱང་ཆུབ་སེམས་སྒོམ་ནས། ཀུན་ལ་ཕན་པའི་བསམ་བློ་ཡག་པོ་ཐོངས། ཤེས་རབ་ཀྱི་ཆ་ནས་རྟོགས་པ་གཉིས་ཀྱི་དོན་ལ་བསམ་བློ་བཏང་ཡོང་དུས། དེ་གཉིས་ཟུང་དུ་འབྲེལ་ནས་རང་རྒྱུད་ཀྱི་ཆགས་སྡང་རྨོངས་གསུམ་གང་གིས་ཀྱང་མི་ཐུབ་པའི་ཡང་དག་ལྟ་བ་ཡག་པོ་སླེབས་ཀྱི་འདུག ངོས་རང་ལ་ཞི་གནས་སྒོམ་པའི་དུས་ཚོད་ཡོང་གི་མི་འདུག་མོད། གཞན་སྟོང་ཉིད་དང་བྱང་ཆུབ་སེམས་ལ་བསམ་བློ་གཏོང་དུས། ངོས་ཀྱི་མི་ཚེ་འདིར་བྱང་སེམས་སྦྱོར་ལམ་སྐྱེ་ཐུབ་པར་དྲན་གྱི་འདུག སྦྱོར་ལམ་གྱི་རྟོགས་པ་རྙེད། དེ་ནས་རིམ་པ་བཞིན་ས་དང་པོ་དང་། ས་གཉིས་པ། ས་གསུམ་པ་སོགས་ས་ཆུ་རིམ་གྱིས་བགྲོད་ནས། ཨོཾ་ཏདྱ་ཐཱ། ག་ཏེ་ག་ཏེ་པཱ་ར་ག་ཏེ། པཱ་ར་སཾ་ག་ཏེ། བོ་དྷི་སྭཱ་ཧཱ། ཚིག་ཙམ་མིན་པར་སངས་རྒྱས་ཀྱི་ས་ལ་འགྲོ་བ་ལ། བསམ་བློར་ཕལ་ཆེར་ལོ་ཁ་ཤས་ནང་སྦྱོར་ལམ་གྱི་རྟོགས་པ་སྐྱེ་ཡོང་བསམ་པའི་རེ་བ་བྱེད་བཞིན་ཡོད། ངོས་ཀྱི་སེམས་སུ་གདེང་ཚོད་ཞེ་དྲགས་ཡོང་གི་འདུག  རྒྱ་མི་གུང་ཁྲན་གྱིས་བོད་པར་སྡུག་པོ་བཏང་དེ། བོད་མི་མང་པོས་རང་ཤི་རྒྱག་དགོས་ཁེལ་བ་ཡོང་གི་ཡོད། སྡུག་བསྔལ་མྱོང་མཁན་གྱི་ལྷག་བསམ་དང་སྙིང་སྟོབས་ལ་རྗེས་སུ་ཡི་རངས་དང་སྨོན་ལམ་འདེབས་ཀྱི་ཡོད། རྒྱ་མི་གུང་ཁྲན་དང་མ་རིག་པའི་གཞན་དབང་དུ་གྱུར་བ་ལ་སྙིང་རྗེའི་བློ་ཤུགས་ཆེན་ཡོང་གི་འདུག་པས། ཆགས་སྡང་གི་བློ་རང་བཞིན་གྱིས་ཤུགས་ཆུང་དུ་འགྲོ་བཞིན་འདུག ད་ལྟ་བར་དུ་བྱང་ཆུབ་ཀྱི་སེམས་དང་སྟོང་ཉིད་ཉམས་ལེན་ལ་ཧུར་ཐག་བྱས་པ་ཡིན། ལྷ་ཡི་རྣལ་འབྱོར་མང་པོ་བཏོན་གྱི་ཡོད་ཀྱང་གཙོ་འདོན་བྱེད་ཀྱི་མེད། གཙོ་བོ་ནི་བྱང་ཆུབ་ཀྱི་སེམས་དང་སྟོང་ཉིད་ཀྱི་ཐོག་བསམ་བློ་གཏོང་བཞིན་ཡོད། ཅེས་གསུངས་སོང་།

ཡང་མགོན་པོ་གང་ཉིད་ཀྱིས། ངོས་རང་དཔལ་འབྱོར་གྱི་གནས་སྟངས་ཐོག་སྤྱི་ཚོགས་རིང་ལུགས་ལ་དགའ་བོ་ཞེ་དྲགས་ཡོད་ཀྱང་། ཁ་ཤས་ཀྱིས་དབང་ཆ་བཟུང་ནས་ཕྱུག་པོ་ཆགས་བསྡད་ཡོད་པ་ནོར་འཁྲུལ་རེད། ངའི་ངོས་ནས་མི་མང་དབུལ་ཕོངས་ཀྱི་སྡུག་བསྔལ་ལས་སེལ་བར་གང་ཐུབ་ཀྱིས་སྤྱི་ཚོགས་ལ་བསམ་བློ་གཏོང་བ་དེ་ཡིན། མང་ཚོགས་ལ་བསམ་བློ་གཏོང་དགོས་པ་གལ་ཆེན་རེད། ཚོང་པ་དང་དཔལ་འབྱོར་ཡོད་མཁན་ཚོའང་མི་མང་ལ་བརྟེན་ཡོད། དེང་སང་གི་དུས་སྐབས་འདིར་སོ་སོའི་ལུང་པ་དང་། ཁྱིམ་མཚེས། ཁྱིམ་ཚང་བཅས་གཅིག་པོར་དངོས་ཡོད་གནས་ཚུལ་གྱིས་ལྟ་བར་རན་པོ་མི་འདུག སྤྱི་པར་བསམ་བློ་གཏོང་བར་དངོས་ཡོད་གནས་ཚུལ་གྱི་ཐོག་ནས་རན་པ་ཞིག་རེད། སེམས་པ་རྣམ་དག་དང་ཕྱི་གསལ་ནང་གསལ་གྱིས་སྤྱི་དོན་སྒྲུབ་ན་བསྟོད་བསྔགས་བྱེད་མཁན་དང་། དགའ་མོས་བྱེད་མཁན་རང་ཤུགས་ཀྱིས་ཡོང་བ་ཞིག་རེད། དེང་སང་གསར་འགྱུར་ག་རེ་ཡིན་ཡང་ཕྱི་གསལ་ནང་གསལ་ཡོང་གི་ཡོད། སྤྱི་ཚོགས་རྙིང་པའི་ནང་དུ་རྒྱབ་མདུན་བྱས་ནས་མི་ཚེ་བསྐྱལ་མཁན་ཡོད་ཀྱང་དུས་ཚོད་དེ་ཡོལ་བ་རེད། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག་ཞེས་འདོན་པ་འདོན་གྱི་ཡོད། ལག་ལེན་གྱི་ཐོག་ནས་སོ་སོའི་ལུང་པ་དང་། སོ་སོའི་ཕྱོགས་སུ་འགྲོ་བཞིན་ཡོད་པ་དེར་བསྒྱུར་བཅོས་གཏོང་དགོས། ཁ་ནས་སེམས་ཅན་ཐམས་ཅད་ལབ་པ་བཞིན་དུ་བདེ་བ་འདོད་ཅིང་། སྡུག་བསྔལ་མི་འདོད་པ་སྒོ་ཀུན་ནས་མཚུངས་བའི་སེམས་ཅད་ལ་བདེ་བ་དང་ལྡན་པར་གྱུར་ཅིག སྡུག་བསྔལ་དང་བྲལ་བར་གྱུར་ཅིག  དེ་འདྲའི་བསམ་བློ་བཏང་བ་དང་ཆབས་ཅིག་དངོས་ཡོད་ཀྱི་ལག་ལེན་སྟེང་ནས་གཞན་ཕན་གྱི་བྱ་བ་བསྒྲུབ་རྒྱུ་གལ་ཆེན་པོ་རེད། སོ་སོའང་སྲོག་ལྡན་པ་ཞིག་ཆགས་ཡོད་དུས། དེའི་སྒོ་གསུམ་གྱི་ཆ་རྐྱེན་ག་རེ་ཡོད་པའི་ཐོག་ནས་ནམ་མཁའི་མཐའ་དང་མཉམ་པའི་སེམས་ཅན་ལ་དངོས་དང་བརྒྱུད་པའི་ཐོག་ནས། ཕན་པའི་རྒྱུ་རུ་འགྲོ་བ་ཞིག་བྱ་རྒྱུ་ཡིན་པའི་སྙིང་སྟོབས་དང་དམ་བཅའ་འཇོག་པ། རང་ཉིད་ཀྱི་སྒོ་གསུམ་ནས་གཞན་ཕན་གྱི་བསམ་བློ་ཁོ་ན་གཏོང་བའི་འདུན་པ་སྐྱེ་ན་ཡག་པོ་རེད། ཅེས་བཀའ་སློབ་བསྩལ་སོང་།