དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་རཱི་སཱིབ་ཊའེ་ཡིབ་ཨེར་ཌོ་གྷན་ (Recep Tayyip Erdogan) ལགས་ལ་བསྐྱར་དུ་སྲིད་འཛིན་རྒྱལ་ཁ་ཐོབ་པར་འཚམས་འདྲི་མཛད་པའི་མི་མང་གི་མངོན་འདོད་དང་རེ་བ་བསྒྲུབ་སླད་དཀའ་ངལ་རྣམས་ལ་གདོང་ལེན་གནང་དགོས་པའི་ལམ་སྟོན་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་ནས་བསྩལ་བའི་གསུང་འཕྲིན་ནང་། དེང་གི་གཉན་འཕྲང་ཆེ་བའི་དུས་སྐབས་འདིར་ཏུར་ཀིའི་རྒྱལ་ཁབ་མུ་མཐུད་དུ་ཡར་རྒྱས་གོང་འཕེལ་དུ་འགྲོ་ཡི་ཡོད་པ་དང་། ང་ཚོ་གཅིག་ལ་གཅིག་རྟེན་གྱི་འཛམ་གླིང་འདི་ཞི་བདེ་དང་སྲ་བརྟན་ཡོང་བར་ཞབས་འདེགས་བསྒྲུབ་ཐུབ་རྒྱུའི་རེ་བ་ཡོད། སྐུ་ཉིད་ནས་ཏུར་ཀིའི་མི་མང་ཡོངས་དང་སྤྱི་ཚོགས་ཀྱི་ཟུར་དུ་ཕུད་པའི་མི་མང་རྣམས་ཀྱི་མངོན་འདོད་དང་རེ་བ་བསྒྲུབ་སླད། འབྱུང་འགྱུར་གྱི་དཀའ་ངལ་རྣམས་ལ་གདོང་ལེན་བྱ་ཐུབ་པའི་སྨོན་འདུན་ཡོད། ཅེས་གསུངས་འདུག
ཁ་སང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཏུར་ཀིའི་སྲིད་འཛིན་གྱི་འོས་བསྡུའི་ཁྲོད། ཏུར་ཀིའི་སྤྱི་མཐུན་སྲིད་དོན་ཚོགས་པ་(the Republican People’s Party)ཡི་མགོ་འཁྲིད་སྐུ་ཞབས་ཀེ་མལ་ (Kemal Kilicdaroglu) ལགས་སུ་འོས་གྲངས་བརྒྱ་ཆ་ ༤༧།༩ དང་། སྲིད་འཛིན་ལས་ཐོག་སྐུ་ཞབས་རི་སིབ་ཊའེ་ཡིབ་ཨེར་ཌོ་གྷན་ (Recep Tayyip Erdogan) ལགས་ལ་འོས་གྲངས་བརྒྱ་ཆ་ ༥༢།༡ ཐོབ་སྟེ་ཁོང་ཡང་བསྐྱར་སྲིད་འཛིན་དུ་བདམས་ཡོད་འདུག ད་ལན་ནི་སྐུ་ཞབས་ཨེར་ཌོ་གྷན་ལགས་སུ་ཡུལ་དེའི་སྲིད་འཛིན་གྱི་རྒྱལ་ཁ་ཐོབ་པ་ཐེངས་གསུམ་པ་དེ་ཡིན་འདུག
སྐུ་ཞབས་ཨེར་ཌོ་གྷན་ལགས་ལ་སྲིད་འཛིན་གྱི་རྒྱལ་ཁ་ཐོབ་རྗེས་ཁོང་གིས། ད་ལྟའི་དུས་སུ་འོས་བསྡུའི་སྐབས་ཀྱི་རྩོད་རྙོག་རྣམས་ལ་བསམ་བློ་མི་གཏོང་བར། ང་ཚོའི་རྒྱལ་ཁབ་ཀྱི་དམིགས་ཡུལ་དང་འཆར་སྣང་རྣམས་གཅིག་ཏུ་འདུས་དགོས། ཞེས་དང་། ཁོང་གི་རྒྱབ་སྐྱོར་བ་རྣམས་ལ་ཐུགས་རྗེ་ཆེ་ཞུ་བ་དང་། ང་ཚོ་གཅིག་པུར་རྒྱལ་ཁ་ཐོབ་པ་མ་རེད། ཏུར་ཀི་ལ་རྒྱལ་ཁ་ཐོབ་པ་རེད། ང་ཚོའི་སྤྱི་ཚོགས་ཀྱི་ཆ་ཤས་ཡོངས་ལ་རྒྱལ་ཁ་ཐོབ་པ་དང་། ང་ཚོའི་དམངས་གཙོ་ལ་རྒྱལ་ཁ་ཐོབ་པ་རེད། ཅེས་གསུངས་འདུག
སྲིད་འཛིན་ཨེར་ཌོ་གྷན་ལགས་ཀྱིས། ཕྱི་ཟླ་ ༢ ཚེས་ ༦ ཉིན་ཏུར་ཀི་དང་སི་རི་ཡའི་ནང་ས་ཡོམ་བྱུང་བའི་རྐྱེན་གྱིས་མི་གྲངས་ ༥༠,༠༠༠ ལྷག་འདས་གྲོངས་སུ་ཕྱིན་པ་སོགས་གནས་སྟངས་ཛ་དྲག་པོ་ཆགས་པར་བརྟེན། རྒྱལ་ཁབ་ཀྱི་གནས་སྟངས་ཡར་རྒྱས་གཏང་རྒྱུ་དང་། རྒྱལ་ཁབ་ཀྱི་ཅ་དངོས་སོགས་ཀྱི་རིན་གོང་བརྒྱ་ཆ་ ༤༣།༧༠ འཕར་ཆ་ཆེ་རུ་ཕྱིན་པའི་རྐྱེན་གྱིས་རྒྱུ་ནོར་གྱི་གྱོང་གུད་ཕོག་མཁན་རྣམས་ལ་གུན་གསབ་སྤྲོད་རྒྱུ་དང་། ཅ་དངོས་སོགས་ཀྱི་རིན་གོང་ཤུགས་ཆེན་འཕར་བ་རྣམས་ཆུང་དུ་གཏང་རྒྱུའི་ཁས་ལེན་དམ་བཅའ་བཞག་ཡོད། ཅེས་གསུངས་འདུག
ཁོང་གི་ཁ་གཏད་ཚོགས་པའི་ཚོགས་གཙོ་སྐུ་ཞབས་ཀེ་མལ་ (Kemal Kilicdaroglu) ལགས་ཀྱིས། ད་ལན་གྱི་འོས་བསྡུ་ནི་ཆེས་དྲང་བདེན་མིན་པའི་འོས་བསྡུ་ཞིག་ཡིན་པ་དང་། ཐེངས་འདིའི་འོས་བསྡུའི་ནང་ནས་མི་མང་རྣམས་ཀྱིས་མི་གཅིག་དབང་སྒྱུར་གྱི་རིང་ལུགས་ལ་འགྱུར་བ་གཏོང་རྒྱུའི་རེ་འདུན་ཡོད་པ་གསལ་པོ་མངོན་ཐུབ་པ་དང་། ང་ཚོའི་རྒྱལ་ཁབ་དེ་དོན་དངོས་སུ་དམངས་གཙོར་མ་འགྱུར་བར་དུ་མུ་མཐུད་ནས་དཀའ་ལས་རྒྱག་གི་ཡིན། ཞེས་བརྗོད་འདུག
རི་སིབ་ཊའེ་ཡིབ་ཨེར་ཌོ་གྷན་ (Recep Tayyip Erdogan) ལགས་ནི་ཕྱི་ལོ་ ༡༩༥༤ ལོར་ཁ་ཆེའི་ཁྱིམ་ཚང་སྐྱོ་བོ་ཞིག་ཏུ་སྐྱེས་བ་དང་། ཕྱི་ལོ་ ༡༩༦༥ ལོར་ཀ་སིམ་པ་ས་པི་ཡལ་གཞི་རིམ་སློབ་གྲྭར་ (Kasımpaşa Piyale primary school) ཕྱིན་རྗེས། ཕྱི་ལོ་ ༡༩༧༣ ལོར་ཨི་མམ་ཧ་ཏིབ་སློབ་གྲྭ་ (İmam Hatip school) ནས་ཁ་ཆེའི་ཆོས་ལུགས་དང་དེའི་འཚོ་ཐབས་སྐོར་ལ་སློབ་སྦྱོང་བྱས། ཕྱི་ལོ་ ༡༩༩༤ ནས་ ༡༩༩༨ བར་ཨི་སི་ཊན་བྷུལ་ (Istanbul) གྲོང་ཁྱེར་སྤྱི་ཁྱབ་ཀྱི་ཕྱག་ལས་གནང་སྟེ། ཆུའི་དཀའ་ངལ་དང་སྦག་བཙོག འགྲིམ་འགྲུལ་གྱི་དཀའ་ངལ་སོགས་གང་ཙམ་སེལ་ཐུབ་ཡོད་འདུག ཁོང་ནི་དྲང་བདེན་དང་ཡར་རྒྱས་ཚོགས་པའི་ཚོགས་མི་ཡིན་པ་དང་། ཕྱི་ལོ་ ༢༠༠༣ ནས་ ༢༠༡༤ བར་ཏུར་ཀིའི་རྒྱལ་ཁབ་ཀྱི་སྲིད་བློན་གྱི་ཕྱག་ལས་གནང་། ཕྱི་ལོ་ ༢༠༡༤ ནས་ད་བར་སྲིད་འཛིན་གྱི་ཕྱག་ལས་གནང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
