རྒྱ་ནག་གཞུང་གིས་རེབ་གོང་རྫོང་གླིང་རྒྱ་སྡེ་བའི་ཆུ་མཛོད་འཛུགས་སྐྲུན་ལ་ཁ་གཡར་ཏེ་ཟླ་འདིའི་ཕྱི་ཚེས་ ༢༣ ནས་ཉིན་གྲངས་བཅུའི་ནང་ཚུད་རྫོང་དེའི་ཁོངས་གཏོགས་སྡེ་བ་བརྒྱད་ཀྱི་ནང་ནས་ས་ཆ་གཞུང་བཞེས་གཏོང་རྒྱུ་ཡིན་པས་སྒྲིག་འགལ་བྱེད་མཁན་ཡོད་ན་ས་སྐྱིན་སྤྲོད་རྒྱུ་མིན་སྐོར་བསྒྲགས།
བོད་མཚོ་སྔོན་ཞིང་ཆེན་རེབ་གོང་གྲོང་ཁྱེར་མི་དམངས་སྲིད་གཞུང་ཟེར་བ་དེས་ཟླ་འདིའི་ཕྱི་ཚེས་ ༢༣ ཉིན་བཀའ་རྒྱ་ཞིག་བཏང་སྟེ། བོད་མཚོ་སྔོན་ཞིང་ཆེན་རེབ་གོང་རྫོང་གླིང་རྒྱ་སྡེ་བའི་ནང་དུ་ཆུ་མཛོད་འཛུགས་སྐྲུན་གྱི་ལས་གཞིའི་ཆེད་མི་མང་གི་ས་ཆ་ཡར་བསྡུ་རྒྱུ་ཡིན་པས། གཞོགས་འདེགས་གང་ལེགས་བྱེད་དགོས་པ་མ་ཟད། ཆུ་མཛོད་ལས་གཞིའི་ས་ཁུངས་སུ་ཚུད་པའི་ས་ཞིང་ཐོག་ཏུ་འཛུགས་སྐྲུན་གཞན་པ་དང་། ལོ་ཏོག་སོགས་འདེབས་འཛུགས་བྱས་ཏེ་སྒྲིག་དང་འགལ་ཚེ། ས་ཞིང་གི་སྐྱིན་ཚབ་ཅི་ཡང་སྤྲོད་རྒྱུ་མིན་ལུགས་བརྗོད་འདུག
ཐེངས་འདིར་ཡར་བསྡུ་རྩིས་ཡོད་པའི་ས་ཆའི་གནས་ཡུལ་དང་ཁྱབ་ཁོངས་ནི། རེབ་གོང་གླིང་རྒྱ་སྡེ་བའི་བྱང་ཤར་ཕྱོགས་ཀྱི་རྒྱུད་ནས་སྨད་པ་ཁ་རྒྱ་སྡེ་བའི་བྱང་ཤར་གྱི་ཕྱོགས་བར་དུ་ཡིན་པ་དང་། དེའི་ནང་དུ་ཞོ་འོང་དཔྱི་སྡེ་བ་དང་། ཞོ་འོང་ཉིན་ལྟ་སྡེ་བ། གླིང་རྒྱ་སྡེ་བ། སྨད་པ་འཇམ་སྡེ་བ། སྨད་པ་མཁར་ནང་མཁར་ཕྱི་སྡེ་བ། སྨད་པ་ཁྱུང་བོ་སྡེ་བའི་ས་ཞིང་སོགས་ཚུད་པའི་ས་ཁྱོན་མུའུ་༡༧.༥༠༠༥ ཙམ་ཡོད་འདུག་ལ། ཟླ་འདིའི་ཕྱི་ཚེས་ ༢༣ ཉིན་ནས་རྩིས་པའི་ཉིན་གྲངས་ ༡༠ ནང་ཆུ་མཛོད་འདིའི་ཐེངས་དང་པོའི་འཛུགས་སྐྲུན་ལས་གཞི་མགོ་འཛུགས་རྒྱུ་ཡིན་སྐོར་བསྒྲགས་འདུག
ཕྱི་ལོ་ ༢༠༢༠ ཟླ་ ༡༠ ཚེས་ ༡༣ ཉིན་ཀྲུང་གོ་བོད་ཀྱི་དྲ་བར་དེ་འབྲེལ་གནས་ཚུལ་སྤེལ་བའི་ནང་། གླིང་རྒྱ་ཆུ་མཛོད་ནི་རྨ་ལྷོ་ཁུལ་གྱི་ལོ་ལྔ་ཚན་བཅུ་གསུམ་པའི་འཆར་འགོད་ཀྱི་གཙོ་གནད་རྣམ་གྲངས་དང་དམངས་གཉེར་ལས་གཞིའི་ཁྲོད་ཀྱི་གཅིག་ཡིན་ཚུལ་དང་། ཆུ་མཛོད་ཀྱི་སྤྱིའི་རྒྱ་ཁྱོན་ལ་སྨི་གྲུ་བཞི་མ་ཁྲི་ ༤༥༨ ཡོད་ཅིང་། ཐོ་རྒྱ་གྲོང་བརྡལ་སྨད་རྒྱུད་ཀྱི་གྲོང་ཚོ་ ༨ ཀྱི་ས་ཞིང་མུའུ་སྤྱི་ཆིང་༡༢༢༡ ལ་ཆུ་འདྲེན་པ་དང། མི་གྲངས་ ༡.༡༤༢ དང་ཕྱུགས་ཟོག་ཁྲི་ ༨. ༩༢ འཐུང་ཆུའི་གནད་དོན་ཐག་གཅོད་བྱ་རྒྱུ་ཡིན་ཚུལ་བཤད་འདུག
དེའི་སྐོར་འདི་ག་བོད་ཀྱི་དུས་བབ་གསར་འགོད་པར་འབྲེལ་ཡོད་བོད་མི་ཞིག་གིས། རྒྱ་ནག་གཞུང་གིས་བོད་མི་ཚོའི་ས་ཞིང་བཙན་འཕྲོག་བྱས་པ་ཡིན་ན། རང་ཉིད་ཀྱི་ས་གནས་སུ་འཚོ་བའི་མཐུན་རྐྱེན་དང་ཡོང་སྒོ་འཚོལ་ས་གང་ཡང་མེད་པར་བརྟེན། རྒྱ་ནག་གི་བཟོ་གྲྭ་ཁག་ཏུ་ལས་ཀ་འཚོལ་དུ་འགྲོ་བཞིན་ཡོད་པ་རེད། རང་ཉིད་ཀྱི་ས་གནས་སུ་འཚོ་བ་བསྐྱལ་མི་ཐུབ་པའི་དཀའ་ངལ་འཕྲད་ཀྱི་ཡོད་པ་རེད་ཅེས་བརྗོད་བྱུང་།
ཡང་གོང་བརྗོད་བོད་མི་དེས། རྒྱ་ནག་གིས་ཞིང་འབྲོག་མི་མང་གྲོང་ཁྱེར་ཅན་དུ་བསྒྱུར་བའི་ལས་གཞིའི་ཁྲོད་དུ། རེབ་གོང་སྟོད་ཀྱི་ཕྱོགས་སུ་བཙན་མོ་སྡེ་བར་ཆུ་མཛོད་ཅིག་བརྒྱབ་ཡོད་པ་དང་། གཉན་ཐོག་སྡེ་བ་དང་སེང་གེ་གཞུང་སོགས་ཀྱི་ས་ཞིང་གྲོང་ཁྱེར་གྱི་ས་ཁོངས་སུ་ཤོར་ཡོད་འདུག དེ་བཞིན་སྨད་པ་སྡེ་བར་ལྕགས་ལམ་གྱི་འབབ་ཚིགས་བཟོས་ཡོད་འདུག གླིང་རྒྱ་ཆུ་མཛོད་འཛུགས་སྐྲུན་སོགས་ནི་རྒྱ་ནག་གི་ལོ་མང་བོའི་སྔོན་གྱི་འཆར་གཞི་ཞིག་ཡིན་སྐོར་དང་། གྲོང་ཁྱེར་དུ་བསྒྱུར་བ་ཡིན་ན་རྒྱ་མི་བསླེབ་ཡོང་སྟེ་ས་གནས་མི་མང་གྲངས་ཉུང་མི་རིགས་སུ་འགྱུར་འགྲོ་རྒྱུ་ཡིན་སྐོར་འགྲེལ་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་།
