༧གོང་ས་མཆོག་གིས་འཇམ་དཔལ་དབྱངས་ཀྱི་རྗེས་གནང་གནང་སྐབས། བོད་མི་ཚོས་ནུབ་ཕྱོགས་པའི་རིག་གསར་ཐོག་དོ་སྣང་བྱས་ཏེ་རང་རེའི་བོད་མིའི་ཆོས་དང་རིག་གཞུང་ཐོག་སློབ་སྦྱོང་བྱ་རྒྱུ་འཐུས་ཤོར་ཕྱིན་ཡོད་པའི་བཀའ་སློབ་བསྩལ།
དེ་རིང་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བོད་པའི་སློབ་མ་རྣམས་ལ་རྗེ་བཙུན་འཇམ་དཔལ་དབྱངས་ཀྱི་རྗེས་གནང་ཉིན་གཉིས་པའི་བཀའ་ཆོས་སྩལ་གནང་མཛད་སྐབས། དེ་རིང་རྗེ་བཙུན་འཇམ་དཔལ་དབྱངས་ཀྱི་རྗེས་གནང་བྱ་རྒྱུ་རེད། གང་ལྟར་རིགས་གསུམ་མགོན་པོ་ཟེར་ནས་སྤྱན་རས་གཟིགས་དང་། འཇམ་དཔལ་དབྱངས། ཕྱག་སྟོང་སྤྱན་སྟོང་བཅས་ང་ཚོས་རྩ་ཆེན་པོ་བརྩི་ཡི་ཡོད་པ་རེད། མགོན་པོ་འཇམ་དཔལ་དབྱངས་ཟེར་བ་འདི་ཤེས་རབ་ཀྱི་ལྷ་རེད། ངོས་རང་ཆུང་དུས་སྐུ་འབུམ་གྱི་རྗེ་རིན་པོ་ཆེའི་གསེར་གདུང་ཡོད་ས་དེར་ལྟད་མོ་ལྟ་བར་ཕྱིན་པའི་སྐབས། གྲྭ་པ་ཆུང་ཆུང་གིས་གསེར་གདུང་ཆེན་མོའི་སྐུ་མདུན་ལ་ཕྱག་འཚལ་གྱིན་ཨོཾ་ཨ་ར་པ་ཙ་ན་དྷཱིཿཞེ་དྲགས་བགྲང་གི་རེད། ངོས་རང་གིས་ཀྱང་ཏོག་ཙམ་བགྲངས་མྱོང་། ང་རང་ཚོའི་བོད་ལ་སྐྱ་སེར་མཆོག་དམན་མེད་པར་མང་པོ་ཞིག་གིས་འཇམ་དཔལ་དབྱངས་ཀྱི་གཟུངས་སྔགས་ཨོཾ་ཨ་ར་པ་ཙ་ན་དྷཱིཿཟེར་བ་དེ་འདོན་གྱི་ཡོད། འདི་ཞེ་དྲགས་ཀྱི་གལ་ཆེན་པོ་རེད་འདུག ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་གོང་ནས་གོང་དུ་འཕེལ་རྒྱས་མ་བྱུང་ན། སྤྱིར་བླང་དོར་གྱི་གནས་ག་པར་ཡིན་ནའང་ཐེ་ཚོམ་མ་གཏོགས་གསལ་པོ་ཡོང་གི་མེད་པ་རེད། རིག་པ་གསལ་བོ་ཡོད་ན་དངོས་གནས་དྲང་གནས་ཀྱིས་ཆོས་དང་འཇིག་རྟེན་གྱི་བྱ་བ་གང་འདྲ་ཞིག་ཡིན་ནའང་ཕར་བརྟག་དཔྱད་བྱེད་དུས། བདེན་དོན་གསལ་བོ་ཆགས་ཡོང་གི་རེད། དེར་བརྟེན། ཤེས་རབ་ཀྱི་ལྷ་རྗེ་བཙུན་འཇམ་དཔལ་དབྱངས་ཟེར་བ་དེ་ཞེ་དྲགས་རྩ་ཆེན་པོ་རེད་འདུག ཅེས་གསུངས།
ཡང་༧མགོན་པོ་གང་ཉིད་མཆོག་གིས། ངོས་རང་ཆུང་ཆུང་སྐབས་ཨོཾ་ཨ་ར་པ་ཙ་ན་དྷཱིཿཟེར་བ་འདི་པུ་གུ་ཆུང་ཆུང་ཚོས་འདོན་གྱི་ཡོད་པ་ད་ལྟའང་གསལ་བོ་ཞེ་དྲགས་དྲན་གྱི་འདུག ངོས་རང་གིས་ཁོང་ཚོར་ལད་ཟློས་བྱེད་ཀྱི་ཡོད། དེ་དུས་ངོས་རང་ལོ་གསུམ་བཞི་ཙམ་ཞིག་རེད། ཆུང་ཆུང་རེད། སྐུ་འབུམ་དགོན་པའི་གྲྭ་པའི་ནང་ལ་མཐོང་མ་འདོད་པ་གཅིག་ཡོད། ངོས་རང་གིས་ཏོག་ཙམ་མ་དགའ་བའི་རྣམ་འགྱུར་བསྟན་པས་ཁོ་བྲོས་ཕྱིན་སོང་། ཁོ་རང་ཁང་པ་ཆུང་ཆུང་ཞིག་གི་ནང་ལོགས་ལ་ཡར་འཛུལ་ནས་ཁང་པའི་སྒོ་དེ་བརྒྱབ་པ་རེད། ངོས་རང་གིས་སྒོ་འགྲམ་ལ་གོ་ཐལ་གང་འཚམ་བྱུག་པ་ཡིན། དེ་དུས་ཆུང་ཆུང་རེད་ལ། ཚོགས་ཆེན་གྱི་མདུན་དུ་ཨ་ར་པ་ཙ་བགྲངས་ནས་ཕྱག་འཚལ་མཁན་མང་པོ་ཡོང་གི་འདུག ངོས་རང་གིས་དེར་ཏོག་ཙམ་དོ་སྣང་བྱུང་། ཨ་ར་པ་ཙ་དངོས་གནས་དྲང་གནས་ཀྱིས་སྔགས་བྱིན་རླབས་ཆེན་པོ་རེད་འདུག འདིས་རིམ་བཞིན་རྗེ་བཙུན་འཇམ་དཔལ་དབྱངས་སྒྲུབ་ཐབས་སུ་ཕྱི་སྐོར་དང་ནང་སྐོར། གསང་སྐོར་སོགས་མང་པོ་ཞེ་དྲགས་ཡོད། ངོས་རང་ལ་འཇམ་དབྱངས་ཆོས་སྐོར་རྒྱུད་སྡེ་གོང་འོག་གི་ཐོག་ནས་མི་འདྲ་བ་ཡོད་པ་དེ་ཚོ་ཧ་ལམ་ཆ་ཚང་ཐོབ་ཡོད། ཉིན་རེ་བཞིན་དུ་ཡར་ལངས་པ་དང་བྱང་ཆུབ་ཀྱི་སེམས་བསྒོམ། ཚེ་སྒྲུབ་ཀྱི་སྔགས་མ་འདོན་གོང་ལ་ཨ་ར་པ་ཙ་ཞོགས་ལྟར་བགྲང་གི་ཡོད། དེ་ནས་ཤེས་རབ་ཆེ་བ། ཤེས་རབ་གསལ་བ། ཤེས་རབ་མྱུར་བ། དེ་བཞིན་འཆད་པའི་ཤེས་རབ། རྩོད་པའི་ཤེས་རབ། རྩོམ་པའི་ཤེས་རབ་ཟེར་བ་དེ་འདྲ་མང་པོ་འདུག སྤྱིའི་ཆ་ནས་རྣམ་འབྱེད་ཀྱི་ཤེས་རབ་གཅིག་པ་རེད་དེ། སྡེ་ཚན་སོ་སོའི་ནང་ལོགས་ལ་དམིགས་བསལ་གྱིས་ཤེས་རབ་གཅིག་ཡོད་པར་བརྟེན། འཆད་པའི་ཤེས་རབ། རྩོད་པའི་ཤེས་རབ། རྩོམ་པའི་ཤེས་རབ་སོགས་ཤེས་རབ་ཀྱི་ནང་གསེས་བྱེད་ལས་མི་འདྲ་བ་ཡོད་པ་རེད། ཅེས་གསུངས།
ཡང་༧མགོན་པོ་གང་ཉིད་མཆོག་གིས། ངོས་རང་ལ་ཆ་བཞག་ན། ད་ལྟ་བཤད་མ་ཐག་པ་ནང་བཞིན་རེད། ངོས་རང་ཆུང་ཆུང་སྐབས་ནས་རྗེ་བཙུན་འཇམ་དཔལ་དབྱངས་ལབ་དུས་སེམས་ཐག་ཉེ་བོ་ཡོད། ཆུང་དུས་ནས་ངོས་རང་གིས་ཨ་ར་པ་ཙ་བགྲང་གི་ཡོད། ད་ལྟ་ལོ་བརྒྱད་ཅུ་གྱ་གྲངས་ནང་བསླེབས་ཡོད་དུས། རྗེ་བཙུན་འཇམ་དཔལ་དབྱངས་འཕགས་པའི་ལྷ་ལ་བརྟེན་ནས། དེའི་གཟུངས་སྔགས་ཨོཾ་ཨ་ར་པ་ཙ་ན་དྷཱིཿ ་ཞར་དང་ཞོར་ལ་བགྲངས་ནས་རྗེ་བཙུན་འཇམ་དཔལ་དབྱངས་ལ་གསོལ་བ་བཏབ་པ་དེས། དངོས་གནས་དྲང་གནས་ཀྱིས་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་ནས་གོང་དུ་འཕེལ་བར་ཕན་ཐོགས་བྱུང་བའི་བཟོ་འདྲ་བོ་མཐོང་གི་འདུག དེར་བརྟེན་ང་རང་ཚོ་ཆོས་གྲོགས་གཞོན་སྐྱེས་ཚོར་ཆ་བཞག་ནའང་རྗེ་བཙུན་འཇམ་དཔལ་དབྱངས་ལ་བརྟེན་ནས་ཨ་ར་པ་ཙ་བགྲངས་ནས། སོ་སོའི་སློབ་སྦྱོང་ག་རེའི་ཐོག་ལ་ཡིན་ནའང་རྗེ་བཙུན་འཇམ་དཔལ་དབྱངས་ཀྱི་བྱིན་རླབས་ཀྱི་ཐོག་ནས་རིག་པ་ཡག་ཏུ་ཕྱིན་པ་ཡིན་ན། ག་རེ་ཡིན་ཡང་ལས་སླ་པོར་ཤེས་པ་ཞིག་ཡོང་གི་རེད།
ངོས་རང་བོད་ལ་ཡོད་སྐབས་ནས་དོ་སྣང་བྱུང་། ང་ཚོའི་དགེ་བཤེས་དང་མཚན་ཞབས་ནང་ལའང་བརྩོན་འགྲུས་ཞེ་དྲགས་ཆེན་པོ་རེད་དེ་རིག་པ་རྣོ་བོ་མེད་དུས་དཀའ་ལས་ཞེ་དྲགས་རྒྱག་གི་ཡོད། ཡིན་ནའང་ངོས་རང་གིས་དཀའ་ལས་གང་ཡང་རྒྱག་དགོས་བྱུང་མེད། བསམ་བློ་བཏང་དུས་ངོས་རང་ལ་ཆུང་ཆུང་སྐབས་ནས་རྗེ་བཙུན་འཇམ་དཔལ་དབྱངས་ཀྱི་བྱིན་རླབས་ཏན་ཏན་ཐོབ་འདུག་བསམ། རྩ་བའི་ཆ་ནས་ཚེ་རབས་མང་པོའི་བག་ཆགས་ཤིག་ཡོད་ཀྱི་རེད་ལ། ཚེ་འདིའི་དབང་དུ་བྱེད་པ་ཡིན་ནའང་ཆུང་དུས་ནས་རྗེ་བཙུན་འཇམ་དཔལ་དབྱངས་ཀྱི་བྱིན་རླབས་བཞུགས་བསྡད་པ་ཞིག་གིས། གཞོན་ནུའི་ཆ་ལུགས་འཆང་བ་པོ། །ཤེས་རབ་སྒྲོན་མེའི་རབ་ཏུ་རྒྱན། །འཇིག་རྟེན་གསུམ་གྱི་མུན་སེལ་བ། ཞེས་དངོས་གནས་དྲང་གནས་སྲིད་པ་གསུམ་གྱི་སེམས་ཅན་གྱི་རྒྱུད་ཀྱི་མ་རིག་པའི་མུན་པ་སེལ་བའི་འཕྲིན་ལས་ཐུན་མོང་མ་ཡིན་པ་ཡོད་བསྡད་པ་ཞིག་རེད། ཅེས་གསུངས།
༧མགོན་པོ་མཆོག་གིས། རྗེ་བླ་མ་ཙོང་ཁ་པ་ཆེན་པོ་ཡོངས་གྲགས་རེད། རྗེ་རིན་པོ་ཆེའི་འཁྲུངས་ས་དེ་ངོས་རང་སྐྱེས་ས་དང་ཐག་ཉེ་པོ་ཡོད་པ་རེད། དེར་བརྟེན་རྗེ་རིན་པོ་ཆེའི་བསྟོད་བསྔགས་ཐོས་ཡོང་དུས། རྗེ་རིན་པོ་ཆེ་དང་ངོས་རང་གཉིས་ཕ་ཡུལ་གཅིག་པ་ཡིན་བསམ་ནས་ངོས་རང་གིས་རྟག་པར་དྲན་གྱི་ཡོད། རྗེ་རིན་པོ་ཆེས་བོད་གངས་ཅན་ལྗོངས་ཀྱི་ས་སྐྱ་བཀའ་རྙིང་རིས་སུ་མ་མཆེད་པར་བཀའ་འགྱུར། བསྟན་འགྱུར་སོགས་གཞུང་ཚང་མར་གཟིགས་པ་ནི་དངོས་གནས་དྲང་གནས་ཧ་ལས་པ་ཞིག་རེད། ཡིན་ནའང་དེ་དུས་ཚན་རིག་དར་མེད། ནུབ་ཕྱོགས་པའི་ཤེས་ཡོན་དེ་ཚོ་མེད། ངོས་རང་རྗེ་རིན་པོ་ཆེའི་ཕ་ཡུལ་གཅིག་པ་དང་མིང་ལ་ལྷ་མོ་དོན་གྲུབ་ཟེར་བ་རེད། ངོས་རང་གིས་ད་ལྟའི་འཛམ་གླིང་འདིའི་སྒང་གི་ཤེས་ཡོན་མི་འདྲ་བ་མང་པོ་ཞིག་ཐོས་པ་ཙམ་དུ་མ་ཟད། མཁས་དབང་ཚོ་མཉམ་དུ་གོ་བསྡུར་བྱེད་ཀྱི་ཡོད། གང་ལྟར་རང་བཞིན་ལྷན་སྐྱེས་ཀྱི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཟབ་པོ་ཞིག་ཡོད་པའི་ཐོག་ལ་དེང་སྐབས་འཛམ་གླིང་གི་ཕྱི་ནང་གང་སར་ནས་ཤེས་ཡོན་མི་འདྲ་བ་མང་པོ་ཞིག་གོ་བསྡུར་བྱེད་པ་དང་འགྲེལ་བཤད་རྒྱག་དགོས་པའི་རིགས་ཡོང་གི་འདུག དེར་བརྟེན་རྗེ་བཙུན་འཇམ་དཔལ་དབྱངས་ཀྱི་རལ་གྲི་འདི་འོད་ཇེ་ཆེར་འཕྲོས་མཁན་ཞིག་ཆགས་བསྡད་ཡོད། རྗེ་བཙུན་འཇམ་དཔལ་དབྱངས་ཀྱི་བསྟོད་པའི་ནང་ལ་འཇིག་རྟེན་གསུམ་གྱི་མུན་སེལ་བ་ཟེར་བ་དེ། ངོས་རང་དེང་སང་ཕྱི་ནང་གི་མི་མང་པོ་ཞིག་ངོ་ཤེས་པ་དང་འབྲེལ་བ་ཆགས་ཏེ། ཁམས་གསུམ་ཟེར་ནས་གཟུགས་ཁམས་དང་གཟུགས་མེད་ཁམས་ཀྱི་འབྲེལ་བ་ཡོད་པ་མ་རེད་དེ། གང་ལྟར་ང་ཚོའི་འདོད་པའི་ཁམས་འདིའི་སྒང་ལ་ཕལ་ཆེར་རྗེ་བཙུན་འཇམ་དཔལ་དབྱངས་ཀྱི་ཤེས་རབ་ཀྱི་འོད་ཟེར་འདིས། འཛམ་གླིང་འདིའི་སྒང་གི་བླང་དོར་གྱི་གནས་ལ་རྨོངས་པའི་བློ་གསལ་བར་ཞབས་འདེགས་སྒྲུབ་ཀྱི་ཡོད། འདི་རྗེ་བཙུན་འཇམ་དཔལ་དབྱངས་ཀྱི་ཐུགས་རྗེ་བཀའ་དྲིན་རེད། ཆུང་དུས་ནས་ཨ་ར་པ་ཙ་བགྲང་གི་ཡོད། དེར་བརྟེན་འཇིག་རྟེན་གསུམ་གྱི་མུན་སེལ་བ་ཟེར་ནས་གསུངས་པ་དེ་རེད། ཅེས་གསུངས།
ཡང་༧ཁོང་ཉིད་མཆོག་གིས། འཛམ་གླིང་ནང་ནང་པའི་ཡུལ་གྲུ་མང་པོ་ཡོད་ཀྱང་། སློབ་སྦྱོང་བྱས་ནས་གཏིང་ཟབ་པོ་ཞིག་གི་ཐོག་ནས་འགྲེལ་བཤད་བརྒྱག་པར་ང་ཚོ་བོད་པ་དྲག་ཤོས་རེད་འདུག སྔ་མོ་ཡིན་ན་བོད་དང་སོག་པོ་རེད། བོད་ཀྱིས་ལོ་སྟོང་ཕྲག་རིང་བདག་པོ་བརྒྱབ་པའི་སངས་རྒྱས་ཀྱི་ཆོས་དངོས་གནས་དྲང་གནས་སྤུས་དག་པོ་ཞེ་དྲགས་ཡོད་པ་རེད། ཁྱེད་རང་ཚོ་ཚང་མར་ཆོས་སྤུས་དག་པོ་ཐོབ་ནས་ཡོད་པ་ཡིན་དུས། དེ་ལ་སོ་སོས་དོ་སྣང་ཡག་པོ་བྱོས། སློབ་སྦྱོང་ཡག་པོ་བྱོས། སེམས་ཀྱི་ནང་ལོགས་ལ་སངས་རྒྱས་པའི་ཆོས་བསམ་དུས། དེ་འདྲའི་ཞིག་ཡིན་བསམ་པ་ཞིག་སེམས་ནང་ཤར་ཐུབ་དགོས། ང་ཚོ་བོད་པ་ཞིག་གི་ངོས་ནས་བཤད་པ་ཡིན་ན། བོད་ཀྱི་ཆོས་དང་རིག་གཞུང་དཔལ་ན་ལེནྜ་ནས་བརྒྱུད་པ་སྤུས་དག་པོ་ཞེ་དྲགས་ཡོད་པ་དེ་བར་སྐབས་ཤིག་ལ་ཉམས་ཆག་ཞེ་དྲགས་ཕྱིན་པ་རེད་དེ། བོད་རྒྱ་ཆེའི་མི་མང་གིས་ལྷག་བསམ་དང་དད་པ་འགྱུར་བ་མེད་པ་བྱས་ནས་བསྡད་ཡོད་པ་རེད། ཁོ་ཚོ་ང་ཚོ་ཚང་མའི་སྤུན་ཟླ་ཆགས་ཀྱི་ཡོད། ངོས་ཀྱིས་མགོན་པོ་འཇམ་དཔལ་དབྱངས་ཀྱི་རྗེས་གནང་དེ་དག་རང་ངོས་ནས་ཉམས་ལེན་ག་རེ་ཡོད་པ་དག་དང་འབྲེལ་ནས་ཁྱེད་རང་ཚོར་ཞུས་པ་རེད། ཉམས་ལེན་བྱ་རྒྱུ་དེ་ཧ་ཅང་གལ་ཆེན་པོ་རེད། ཚང་མས་ཧུར་ཐག་བྱས་ཤོག་ཨ། ཞེས་གསུངས་སོང་།
བོད་ཁྱིམ་སུ་ཇ་སློབ་གྲྭའི་སློབ་མ་བསྟན་འཛིན་བདེ་ཆེན་ལགས་ཀྱིས། དེང་སང་བོད་པའི་སྤྱི་ཚོགས་ནང་ནུབ་ཕྱོགས་རྒྱལ་ཁབ་ཀྱི་ལྟ་གྲུབ་དང་སྤྱོད་པ། གོམས་གཤིས་སོགས་གལ་ཆེན་པོ་བརྩི་བ་དང་ལག་བསྟར་གནང་གི་ཡོད་པས། དེའི་ཕན་གནོད་གང་ཡོད་སྐོར་དྲིས་པར། ༧གོང་ས་རྒྱལ་བ་རིན་པོ་ཆེ་མཆོག་གིས། དེ་བདེན་པ་རེད། བར་སྐབས་ང་རང་ཚོ་ནུབ་ཕྱོགས་རྒྱལ་ཁབ་ལ་ཡིད་འཕྲོག་ནས་དེང་དུས་རིག་གསར་གྱི་ཐོག་ལ་དོ་སྣང་ཞེ་དྲགས་བྱས་པ་དང་། སོ་སོ་རང་ལ་ཡོད་པའི་གསོ་བ་རིག་པའི་མཚོན་པའི་རིག་གནས་དེ་ཚོར་དམིགས་བསལ་གྱིས་དོ་སྣང་དང་སློབ་སྦྱོང་བྱ་རྒྱུ་སོགས་མ་བྱུང་བར་འཐུས་ཤོར་ཏན་ཏན་ཕྱིན་འདུག ནུབ་ཕྱོགས་ཀྱི་ཤེས་ཡོན་དང་སྨན་བཅོས་འཕྲོད་བསྟེན་སོགས་ཀྱི་ཤེས་ཡོན་ལ་དོ་སྣང་ཞེ་དྲགས་བྱས། སོ་སོ་རང་གི་དེ་ལ་དེ་ཙམ་གྱིས་དོ་སྣང་མེད་བསྡད་པས་ཏོག་ཙམ་འཐུས་ཤོར་ཕྱིན་པ་འདྲ་བོ་འདུག དེང་སང་ནུབ་ཕྱོགས་རྒྱལ་ཁབ་ཀྱི་མཁས་པ་དང་ཤེས་ཡོན་ཅན་ཚོས་བོད་ཀྱི་ཆོས་དང་རིག་གཞུང་གི་ཐོག་ལ་དོ་སྣང་གསར་པ་བསླེབས་ཡོང་གི་འདུག སྨན་བཅོས་སྐོར་ལ་ཆ་བཞག་ནའང་། མི་ཁ་ཤས་ཀྱིས་བོད་སྨན་གྱི་དམིགས་བསལ་ཁྱད་ཆོས་ཕལ་ཆེར་མཐོང་གི་ཡོད། དེར་བརྟེན། ང་ཚོས་འབྲེལ་བ་ཉུང་ཉུང་བྱས་པ་དང་འབྲེལ་བ་རྒྱ་ཆེན་པོ་བྱེད་མི་ཐུབ་པའི་རྐྱེན་གྱིས་སྐྱོན་དེ་དག་ཡོང་གི་ཡོད་པ་རེད། རིམ་པས་འགྱུར་འགྲོ་ཡི་རེད། ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
