རྒྱ་ནག་གིས་སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་ནང་ཕེབས་རྒྱུར་ངོ་རྒོལ་བྱེད་བཞིན་འདུག

རྒྱ་ནག་གཞུང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་ནང་གཞུང་འབྲེལ་ཕྱོགས་ཕེབས་གནང་འཆར་ཡོད་པར་བཀག་འགོག་གི་ཐབས་ཤེས་བྱེད་བཞིན་ཡོད་འདུག

China has been accused of trying to block Penpa Tsering, the head of Tibet’s government-in-exile, from speaking at the National Press Club

དེ་རིང་སིཌ་ནེ་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ཨོ་གླིང་ནང་གདན་ཞུའི་ལྟར་གཞུང་འབྲེལ་ཕྱོགས་ཕེབས་གནང་གཏན་ཁེལ་ཡོད་ཀྱང་། ཨོ་གླིང་དུ་ཡོད་པའི་རྒྱ་ནག་གཞུང་ཚབ་ཁང་གིས། སྲིད་སྐྱོང་མཆོག་གི་ཕྱོགས་ཕེབས་ལ་དགག་པ་མཐའ་གཅིག་ཏུ་ཡོད་པ་མ་ཟད། ཨོ་གླིང་གཞུང་གིས་སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་ནང་གཞུང་འབྲེལ་གདན་ཞུ་གནང་རྒྱུ་ཕྱིར་འཐེན་དགོས་པའི་སྐུལ་མ་བཏང་ཡོད་འདུག

དེ་འབྲེལ་གནས་ཚུལ་ནང་། རྒྱ་ནག་གཞུང་ཚབ་མི་སྣ་ཁག་ཅིག་གིས་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ཚོགས་གཙོ་མོའུ་རེ་སི་ (Maurice Reilly) ལགས་དང་ཐུག་འཕྲད་བྱས་ཏེ། སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ལས་རིམ་ཞིག་གི་སྟེང་ཕེབས་འཆར་ཡོད་པ་ཕྱིར་བསྡུ་གནང་དགོས་པ་མ་ཟད། ཨོ་གླིང་ནང་ཁ་བྲལ་བའི་ལས་འགུལ་སྤེལ་མི་ཆོག་ཅེས་སྲིད་སྐྱོང་མཆོག་གི་གསུང་བཤད་ལས་རིམ་དང་ཨོ་གླིང་དུ་གནས་བཞུགས་བོད་མི་ཆབ་སྲིད་བཙོན་པ་རྣམས་དང་ཐུག་འཕྲད་བྱ་རྒྱུ་སོགས་མཚམས་འཇོག་དགོས་སྐོར་བརྗོད་ཡོད་འདུག

སྐབས་དེར་རྒྱ་ནག་གཞུང་ཚབ་ཁང་གིས་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ལ་ཞུ་ཡིག་ཅིག་སྤྲད་ཡོད་པའི་ནང་། ཨོ་གླིང་གཞུང་གིས་རྒྱ་ནག་གི་ལངས་ཕྱོགས་དང་གནས་བབ་སོགས་ལ་རྩིས་མེད་བཏང་བ་དང་། བོད་རང་སྐྱོང་ལྗོངས་ཟེར་བའི་ནང་གི་གྲངས་ཉུང་མི་རིགས་ཡོངས་ཀྱིས་རྒྱ་ནག་དབུས་ས་གཉིས་ཀྱི་སྲིད་ཇུས་ལ་སེམས་གཏིང་ནས་མོས་མཐུན་དང་རྒྱབ་སྐྱོར་ཡོད་ལ། ད་ལྟ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེ་ལོ་རྒྱུས་ནང་གནས་སྟངས་ཆེས་ལེགས་པ་ཞིག་ཏུ་ཡོད། ཅེས་བརྗོད་ཡོད་པ་རེད།

ཡང་རྒྱ་ནག་གཞུང་ཚབ་ཁང་གི་ཞུ་ཡིག་དེའི་ནང་། བོད་ཅེས་པའི་ཚབ་ཏུ་ཤི་ཙང་ཞེས་བྲིས་དེ། སླར་ཡང་རྒྱ་ནག་གཞུང་གིས་རྒྱལ་སྤྱིའི་སྟེང་བོད་རྒྱལ་ཁབ་ཀྱི་མིང་ནག་བསུབ་དང་དེའི་ཚབ་ཏུ་རྒྱ་ནག་གིས་འབོད་ཀྱིན་པའི་ཤི་ཙང་ཞེས་པ་འཇུག་ཐབས་བྱེད་བཞིན་ཡོད་པ་མངོན་གསལ་ཆགས་ཡོད།

དེ་འབྲེལ་ཐད་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ཚོགས་གཙོ་ (Maurice Reilly) ལགས་ཀྱིས། སི་ནེ་ཞོགས་པའི་ཆ་འཕྲིན་ལ་བརྗོད་དོན། སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་ལས་རིམ་སྟེང་མཉམ་ཞུགས་བྱ་རྒྱུ་ཕྱིར་འཐེན་མི་བྱེད་པ་མ་ཟད། ད་ལྟ་ཚོགས་པ་དེའི་དྲ་རྒྱའི་སྟེང་སྲིད་སྐྱོང་མཆོག་གི་གསུང་བཤད་ལས་རིམ་གྱི་འཛིན་བྱང་འཚོང་གི་ཡོད་པ་སྤྱི་བསྒྲགས་བྱས་ཡོད་ཅེས་བརྗོད་འདུག་ལ། སྐུ་ཞབས་མོའུ་རེ་སི་ལགས་རྒྱ་ནག་གཞུང་ཚབ་པར་ཐུག་སྐབས། ཁོས་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ནི་རང་དབང་གི་ཐོག་ནས་སྤྱི་དམངས་ཀྱི་བགྲོ་གླེང་དང་གསར་འགོད་རང་དབང་། སྨྲ་བརྗོད་རང་དབང་བཅས་ཀྱི་ལྟེ་གནས་ཤིག་ཡིན་ཞེས་རྒྱ་ནག་གཞུང་ཚབ་ཀྱི་ལས་བྱེད་པར་བརྗོད་ཡོད་འདུག

སིཌ་ནེ་ཞོགས་པའི་ཆ་འཕྲིན་གྱིས། རྒྱ་ནག་གཞུང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་མཆོག་ཨོ་གླིང་ནང་གཞུང་ཕྱོགས་ཕེབས་གནང་རྒྱུ་བཀག་འགོག་བྱེད་པར་ཐབས་ཤེས་གཏོང་བཞིན་ཡོད་སྟབས། དེས་ཨོ་གླིང་གི་སྨྲ་བརྗོད་རང་དབང་ལ་ཁྱད་གསོད་གཏོང་གི་ཡོད་ཅེས་བརྗོད་འདུག

ད་ལྟ་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་དྲ་ཐག་ཏུ། ཟླ་འདིའི་ཕྱི་ཚེས་ ༢༠ ཉིན་གྱི་སྔ་དྲོའི་ཆུ་ཚོད་ ༡།༣༠ ནས་ཉིན་རྒྱབ་ཆུ་ཚོད་ ༡།༣༠ བར་སྲིད་སྐྱོང་སྤེན་པ་ཚེ་རིང་མཆོག་གིས། བོད་རྒྱའི་དཀའ་རྙོག་སེལ་ཐབས་དང་ཞི་བདེ་ཡོང་ཐབས་ཞེས་པའི་བརྗོད་གཞིའི་ཐོག་གསུང་བཤད་གནང་གཏན་ཁེལ་ཡོད་ཅིང་། སྤེན་པ་ཚེ་རིང་མཆོག་ནི་ཕྱི་ལོ་ ༢༠༢༡ ལོར་ཨོ་གླིང་ཚུད་པའི་འཛམ་གླིང་རྒྱལ་ཁབ་ ༣༠ མ་ཟིན་ཙམ་གྱི་ནང་གི་བོད་མི་ཚོས་དམངས་གཙོའི་ལམ་ནས་བདམས་ཐོན་བྱུང་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་ཡིན་པ་དང་། ཕྱི་ལོ་ ༡༩༩༦ ནས་ ༢༠༡༦ བར་གྲོས་ཚོགས་འཐུས་མི་དང་སྤྱི་འཐུས་ཚོགས་གཙོ་སྐབས་གཉིས་ཀྱི་རིང་གནང་མྱོང་བ་སོགས་བཙན་བྱོལ་བོད་མིའི་གྲོས་ཚོགས་ནང་ཕྱག་ལས་གནང་མཁན་རིང་ཤོས་ཀྱི་གྲས་ཤིག་ཡིན་པ་སོགས་ངོ་སྤྲོད་གནང་འདུག་པ་མ་ཟད། འདས་པའི་ལོ་ངོ་ ༧༠ ལྷག་གི་རིང་རྒྱ་ནག་གཞུང་གིས་བོད་ལ་བཙན་འཛུལ་བྱས་དང་བྱེད་མུས་ཡིན་པ་དང་། དམིགས་བསལ་ད་ལྟ་རྒྱ་ནག་གཞུང་གིས་བཅའ་སྡོད་སློབ་གྲྭའི་སྲིད་ཇུས་ལག་བསྟར་བྱས་ཏེ། བོད་མི་རྣམས་རྒྱ་སྒྱུར་བྱེད་བཞིན་ཡོད་ཀྱང་། ད་དུང་བོད་མི་རྣམས་ཀྱིས་རང་ཡུལ་དུ་ལོགས་པའི་རེ་བ་དང་འདུན་པ་བརྟན་པོ་ཡོད་སྐོར་སོགས་བཀོད་འདུག

གསར་འགོད་པ། སྐལ་བཟང་སྦྱིན་པ།