༧གོང་ས་མཆོག་གིས་ང་ཚོས་ག་ཚོད་ཐུབ་ཐུབ་ཀྱིས་མི་ལ་བརྩེ་བ་བྱེད་པ་དང་། གནོད་པ་མི་བྱེད་རྒྱུ་ཞེ་དྲགས་གལ་ཆེན་པོ་རེད་ཅེས་གསུངས།
དེ་རིང་ཕྱི་ཚེས་ ༡༣ ཉིན་བཞུགས་སྒར་རྒྱལ་བའི་གཟིམ་ཆུང་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཏུ་ཤི་ཏཱ་ཆོས་ཚོགས་དང་། སངྐི་སཱ ནང་པའི་གཞོན་ནུ་ཚོགས་པ་གཉིས་ཀྱི་གོ་སྒྲིག་བྱས་པའི་ནང་ཆོས་ངོ་སྤྲོད་ཀྱི་ཟབ་སྦྱོང་ལ་མཉམ་ཞུགས་གནང་མཁན་རྒྱ་གར་གྱི་ནང་པ་ ༡༢༥ ལ་མཇལ་ཁ་དང་བཀའ་སློབ་བསྩལ་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་རྒྱ་གར་གྱི་ས་ཁུལ་མང་པོ་ཅིག་ནས་ཡོང་བའི་ནང་ཆོས་ལ་དོ་སྣང་ཡོད་མཁན་རྣམས་ལ་ཐུག་པའི་གོ་སྐབས་བྱུང་བར་དཔེ་དགའ་བོ་བྱུང་། ངོས་ནི་ནང་པའི་དགེ་སློང་ཞིག་རེད། ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། འཕྲུལ་ཆས་ཞེ་བོ་ཡར་རྒྱས་ཕྱིན་ཡོད་ཀྱང་། མིའི་སེམས་ཀྱི་ཞི་བདེ་ནི་འཕྲུལ་ཆས་ཀྱི་ཐོག་ནས་མེད་པར་བཟོ་རྒྱུ་ཁག་པོ་རེད། ང་ཚོའི་མིའི་ཀླད་པ་ཀོག་ནས་འཕྲུལ་ཆས་བཀལ་ན། བསམ་བློ་གཏོང་བའི་ནུས་པ་མེད་པར་ཆགས་འགྲོ་བཞིན་ཡོད་པ་རེད། འོན་ཀྱང་། འཕྲུལ་ཆས་ཀྱི་ཐོག་ནས་བྱང་ཆུབ་ཀྱི་སེམས་སྒོམ་པ་དང་། སྟོང་ཉིད་ཀྱི་ལྟ་བ་སྒོམ་ཐུབ་པ་ཡོང་གི་མ་རེད། སངས་རྒྱས་བཅོམ་ལྡན་འདས་ཀྱིས་བདག་ཉིད་བདག་གི་མགོན་རེད་ཟེར་བ་བཞིན། དེ་ལ་བསམ་བློ་གཏོང་རྒྱུ་ཞེ་བོ་ཡོད་པ་རེད། གང་ལྟར་མིའི་ཀླད་པར་བསམ་བློ་ཐུན་མོང་མ་ཡིན་པ་ཞིག་ཡོད་བསྡད་པ་དེ་བེད་སྤྱོད་གཏོང་དགོས། སེམས་ཁམས་རིག་པའི་སྐོར་ད་ཅི་ཞུས་པ་བཞིན།ཚན་རིག་པའི་ནང་དུ་བསམ་བློའི་འགྲོ་སྟངས་སྐོར་དོ་སྣང་ཡོད་མཁན་ཚོས་ནང་པ་སངས་རྒྱས་པའི་སེམས་ཁམས་རིག་པའི་སྐོར་ལ་དོ་སྣང་དམིགས་བསལ་བྱེད་ཀྱི་འདུག དེང་སང་གི་དུས་རབས་འདི་འདྲ་ཞིག་གི་ནང་དུ། མིའི་བསམ་བློ་གཏོང་སྟངས་སྐོར་དོ་སྣང་བྱེད་མཁན་མང་པོ་སླེབས་པའི་སྐབས་སུ། ནང་པའི་གཞུང་ནས་བཤད་པའི་སེམས་ཁམས་རིག་པས་དམིགས་བསལ་གྱི་ཕན་ཐོགས་ཆེན་པོ་ཡོང་བསྡད་ཀྱི་འདུག ཅེས་གསུངས།
དྲི་བ་དྲི་ལན་སྐབས་སུ་༧མགོན་པོ་གང་ཉིད་ཀྱིས། ཕལ་ཆེར་ཕ་མ་གཉིས་ལས་ཨ་མར་བརྩེ་བའི་ཤུགས་ཆེ་བ་ཡོད་ཀྱི་འདུག ཨ་མ་ཟེར་དུས་བརྩེ་བའི་བདག་ཉིད་བློ་ལ་ཤར་གྱི་འདུག ཨ་མའི་ཕྲུ་གུར་བརྩེ་བ་བྱེད་སྟངས་དེ་ང་ཚོའི་ངོས་ནས་གྲོགས་པོ་ཚོར་རྒྱ་བསྐྱེད་ཐུབ་པ་ཞིག་དགོས་ཀྱི་འདུག དཔེ་ཆའི་ནང་དུའང་མ་ཤེས་དང་། དྲིན་དྲན། དྲིན་བཟོ་ལབ་པ་མ་གཏོགས། ཕ་ཤེས། དྲིན་དྲན། དྲིན་བཟོ་ལབ་ཀྱི་མི་འདུག དེ་ཕལ་ཆེར་རེད་འདུག དུད་འགྲོ་ཡིན་ཡང་ཨ་མ་ལ་བརྩི་བཀུར་ཞེ་བོ་བྱེད་ཀྱི་འདུག བྱས་ཙང་མ་ཤེས་ཞེས་པ་དེ་དཔེ་གལ་ཆེན་པོ་རེད། མ་ཤེས། དྲིན་དྲན། དྲིན་བཟོ། ཡིད་འོང་གི་བྱམས་པ། སྙིང་རྗེ། ལྷག་བསམ། སེམས་བསྐྱེད་དངོས། རྒྱུ་འབྲས་མན་ངག་བདུན་རེད། གང་ལྟར་ང་ཚོའི་མིའི་སྤྱི་ཚོགས་ནང་དུ་ཨ་མའི་བརྩེ་བ་དཔེ་འཇོག་ས་རེད། ང་ཚོས་ག་ཚོད་ཐུབ་ཐུབ་ཀྱིས་མི་ལ་བརྩེ་བ་བྱེད་པ་དང་། གནོད་པ་མི་བྱེད་རྒྱུ་ཞེ་དྲགས་གལ་ཆེན་པོ་རེད། ཅེས་གསུངས།
མཛད་འཆར་ལྟར་ན། ཕྱི་ཟླ་ ༩ ཚེས་ ༥ ནས་ཉིན་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་ལ་ལྷོ་ཤར་ཨེ་ཤ་ཡའི་དད་ལྡན་ཚོས་ཇི་ལྟར་གསོལ་འདེབས་ཞུས་པ་ལྟར། དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་འཇུག་པའི་རང་འགྲེལ་གྱི་བཀའ་ཆོས་བསྩལ་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
