རྒྱ་གར་ནང་ཉིན་གྲངས་ ༣ ནང་ཚ་ཚད་རྒྱས་ནས་མི་གྲངས་ ༩༦ ལྷག་རྐྱེན་འདས་སུ་གྱུར་ཡོད་པ་མ་ཟད་འདས་པའི་ཉིན་ཤས་རིང་རྒྱ་གར་གྱི་ས་ཁུལ་མང་ཆེ་བར་ཚ་རླབས་མཆེད་སྲིད་པའི་ཚོད་དཔག་བྱེད་ཀྱི་འདུག
At Least 96 Die In Uttar Pradesh And Bihar From Extreme Heat.Photo: AP
ཉེ་ལམ་རྒྱ་གར་གྱི་མངའ་སྡེ་མང་པོ་ཞིག་གི་ཚ་རླབས་རྒྱས་ནས་དཀའ་ངལ་འབྱུང་མུས་ཡིན་པ་ལྟར། ཟླ་འདིའི་ཕྱི་ཚེས ༡༥ ནས་ཉིན་གྲངས་གསུམ་ནང་རྒྱ་གར་ཨུ་ཊར་ཁན་མངའ་སྡེའི་བྷལ་ལི་ཡ་(Ballia ) རྫོང་དང་བྷི་ཧར་མངའ་སྡེ་གཉིས་ནས་མི་གྲངས་ ༩༦ ཚ་རླབས་ཀྱི་རྐྱེན་གྱིས་རྐྱེན་འདས་སུ་གྱུར་ཡོད་པ་མ་ཟད། ཆ་དྷི་སི་གྷར་(Chhattisgarh) དང་ཇར་ཁན་(Jharkhand) ཨོ་དྷི་ཤ་(Odisha) ཏི་ལིང་གྷ་ན་ (Telangana ) སོགས་སུ་ཚ་དྲོད་རྒྱས་སྲིད་པའི་ཚོད་དཔག་བྱེད་ཀྱི་ཡོད་འདུག
རྒྱ་གར་ཨུ་ཊར་ཁན་མངའ་སྡེའི་བློན་ཆེན་གཞོན་པ་དང་འཕྲོད་བསྟེན་བློན་ཆེན་སྐུ་ཞབས་བྷི་ཇེ་ཤི་པཱ་ཐག་ལགས་ཀྱིས། རྫོང་ཡོངས་སུ་གནམ་གཤིས་འགྱུར་ལྡོག་དང་། མངའ་སྡེ་དེའི་ནང་ཚ་བ་ཤུགས་ཆེན་རྒྱས་ནས་མི་རྣམས་ཀྱི་ཚེ་སྲོག་ཤོར་མུས་ཡིན་སྟབས། ཚང་མས་ཚ་དུག་ལ་གདོང་ལེན་བྱ་དགོས་པའི་རེ་སྐུལ་གནང་ཡོད་ལ། འདས་པའི་ཉིན་གྲངས་གསུམ་ནང་རྒྱ་གར་བྱང་ཕྱོགས་ཨུ་ཊར་ཁན་མངའ་སྡེའི་བྷལ་ལི་ཡ་རྫོང་ཁོངས་སུ་ཚ་རླབས་ཀྱི་རྐྱེན་གྱིས་མི་གྲངས་ ༡༥༤ རྫོང་གི་སྨན་ཁང་དུ་བསྙལ་ཡོད་པའི་ཁྲོད། ཟླ་འདིའི་ཕྱི་ཚེས་ ༡༥ ཉིན་མི་གྲངས ༢༣ དང་། ཕྱི་ཚེས ༡༦ ལ་མི་གྲངས་ ༢༠། ཕྱི་ཚེས ༡༧ ཉིན་མི་གྲངས་༡༡ བཅས་ཁྱོན་མི་གྲངས་ ༥༤ འདས་གྲོངས་སུ་གྱུར་ཡོད་ཅིང་། ཚ་རླབས་རྒྱས་པའི་རྐྱེན་གྱིས་རྒན་འཁོགས་མང་ཆེ་བར་གཅིན་སྙིའི་ནད་དང་། ཁྲག་ཤུགས་འཕེལ་བ། དེ་བཞིན་དབུགས་གཏོང་ལེན་སོགས་ལའང་དཀའ་ངལ་འབྱུང་གི་ཡོད་འདུག
དེའི་ཐད་ཨུ་ཊར་ཁན་མངའ་སྡེའི་སྨན་པ་ཨེ་ཁེ་སིང་(AK Singh) ལགས་ཀྱིས། ཨུ་ཊར་ཁན་དུ་ཚ་རླབས་རྒྱས་པ་དང་འབྲེལ་མི་གྲངས་ཀྱི་བརྒྱ་ཆ་༦༠ ལྷག་ལ་ནད་གཞན་གྱི་རྐྱེན་བྱས་པ་དང་། བརྒྱ་ཆ་༤༠ ལུས་པོའི་ཚ་ཚད་འཕར་ནས་འདས་གྲོངས་སུ་གྱུར་ཡོད་སྐོར་འགྲེལ་བརྗོད་གནང་འདུག
བྷི་ཧར་མངའ་སྡེ་ཡོངས་སུ་ཚ་རླབས་དྲག་པོ་རྒྱས་ནས་བྷི་ཧར་གྱི་རྫོང་ཁག ༡༥ ལྷག་གི་ནང་ཚ་བའི་དཀའ་ངལ་འཕྲད་དེ། འདས་པའི་ཉིན་གྲངས ༢ ནང་མི་གྲངས་ ༤༢ འདས་གྲོངས་སུ་གྱུར་ཡོད་ཅིང་། ད་ལྟ་བྷི་ཧར་གྱི་རྒྱལ་ས་རུ་ཚ་བས་མནར་བའི་མི་གྲངས ༢༠༠ ལྷག་ལ་ཞེན་ཁ་ལོག་པ་དང་བཤལ་ནད་སོགས་ཕོགས་ནས་སྨན་བཅོས་བྱེད་མུས་ཡིན་འདུག དེ་བཞིན་ཟླ་འདིའི་ཕྱི་ཚེས ༡༧ ཉིན་བྷི་ཧར་གྱི་རྫོང་ཁག ༡༡ ནང་ཚ་ཚད་ ༤༤ རུ་འཕར་སྟེ། དེ་ནི་འདས་པའི་ལོ་ ༡༠ ནང་བྷི་ཧར་ཁུལ་གྱི་གནམ་གཤིས་ཚ་ཚད་མཐོ་ཤོས་སུ་གྱུར་འདུག
གཞན་ཡང་། ཆ་དྷི་སི་གྷར་(Chhattisgarh) ཁུལ་དུ་ཚ་དྲོད་ཧ་ཅང་འཕེལ་ནས་ཕྲུ་གུ་ཆུང་ཆུང་སོགས་སློབ་གྲྭར་འགྲོ་བར་དཀའ་ངལ་ཤུགས་ཆེན་འཕྲད་མུས་ཡིན་སྟབས། ཟླ་འདིའི་ཕྱི་ཚེས་ ༡༤ ཉིན་ཆ་དྷི་སི་གྷར་མངའ་སྡེ་གཞུང་གིས་ཟླ་འདིའི་ཕྱི་ཚེས ༢༦ བར་ཁུལ་དེར་ཡོད་པའི་སློབ་གྲྭ་ཁག་གི་དབྱར་དུས་གུང་སེང་ཕར་འགྱངས་བྱས་ཡོད་ཅིང་། ཨོ་དྷི་ཤ་མངའ་སྡེ་གཞུང་གིས་ཟླ་འདིའི་ཕྱི་ཚེས ༢༡ བར་ཚ་རླབས་ཀྱི་རྐྱེན་གྱིས་ཁུལ་དེའི་གཞུང་སྒེར་སློབ་གྲྭ་ཚང་མ་དབྱར་ཁའི་གུང་སེང་སྤྲད་ཡོད་འདུག
ལོ་ལྟར་ཕྱི་ཟླ ༤ དང་། ༥། ༦ བཅས་ནི་རྒྱ་གར་གྱི་གནམ་གཤིས་ཆེས་ཚ་བའི་དུས་ཚིགས་སུ་ངོས་འཛིན་བྱེད་ཀྱི་ཡོད་ཅིང་། འདི་ལོའི་ཕྱི་ཟླ་ ༤ ནང་རྒྱ་གར་གྱི་ཚོང་གི་བསྟི་གནས་སུ་འབོད་པའི་མོན་བྷེ་གྲོང་ཁྱེར་དུའང་ཚ་རླབས་རྒྱས་ནས་མི་གྲངས ༡༣ རྐྱེན་འདས་སུ་གྱུར་འདུག་ལ། རྒྱ་གར་གནམ་གཤིས་རིག་པའི་ལྷན་ཁང་གིས། འདས་ལོ་གཅིག་པུར་རྒྱ་གར་རྒྱལ་ཡོངས་སུ་ཚ་རླབས་ཀྱི་རྐྱེན་གྱིས་མི་གྲངས་ ༢༢༢༧ རྐྱེན་འདས་སུ་གྱུར་ཡོད་པ་ཤེས་རྟོགས་བྱུང་ཡོད་འདུག
གསར་འགོད་པ། དཔལ་ལྡན།
