སྲིད་སྐྱོང་སྤེན་པ་ཚེ་རིང་མཆོག་གིས་ཨོ་གླིང་ནང་གི་གསར་འགོད་པ་སོགས་ལ་བོད་ནང་གི་གནས་སྟངས་དང་བོད་རྒྱའི་དཀའ་རྙོག་སེལ་ཐབས་སོགས་ཀྱི་ཐོག་གཏམ་བཤད་གནང་།
དེ་རིང་ཨོ་གླིང་རྒྱལ་ཡོངས་གསར་འགོད་མཐུན་ཚོགས་ཀྱི་གོ་སྒྲིག་འོག སྲིད་སྐྱོང་སྤེན་པ་ཚེ་རིང་མཆོག་གིས་བོད་རྒྱའི་དཀའ་རྙོག་སེལ་ཐབས་དང་ཞི་བདེ་ཡོང་ཐབས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་ཅིང་། སྐབས་དེར་ཁོང་གིས་འབྱུང་འགྱུར་འཚེ་མེད་ཞི་བ་དང་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་ཐུབ་ཚེ། བོད་རྒྱའི་འབྲེལ་ལམ་ཡག་པོ་ཡོང་ཐུབ་པའི་ཁར། རྒྱལ་ཁབ་གཞན་གྱི་བདེ་འཇགས་སོགས་ལ་གནོད་འཚེ་གཏོང་མི་སྲིད་སྐོར་སོགས་གསུངས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས། ཨ་རིར་རྟེན་གཞི་བྱས་པའི་རང་དབང་ཁང་པས་ཕྱི་ལོ་ ༢༠༢༣ ལོའི་འཛམ་གླིང་རང་དབང་ཞེས་པའི་ལོ་འཁོར་སྙན་ཐོ་བཏོན་པའི་ནང་། འདས་པའི་ལོ་གཅིག་ནང་འཛམ་གླིང་ཁྱོན་ཡོངས་ཀྱི་རྒྱལ་ཁབ་དང་ས་སྐྱོང་ས་ཚིགས་ ༢༡༠ ཡི་སྤྱི་དམངས་རང་དབང་དང་། ཆབ་སྲིད་ཁེ་དབང་གི་གནས་སྟངས་སོགས་ཀྱི་ཐད་ཉམས་ཞིབ་བྱས་ཏེ། བོད་དེ་རང་དབང་ཆེས་སྡུག་ཤོས་ཀྱི་ས་ཁུལ་ཡིན་པའི་ངོས་འཛིན་བྱས་ཡོད་པ་ལྟར། དོན་དངོས་སུ་བོད་ནང་དུ་གསར་འགོད་པ་དང་ཡུལ་སྐོར་སྤྲོ་འཆམ་པ་སོགས་ལ་རང་དབང་མེད་པ་དང་། བོད་ནང་གི་གནས་སྟངས་དང་གནས་ཚུལ་རྣམས་ཕྱིར་བསྒྲགས་བྱེད་ཆོག་གི་མེད་པའི་སྐོར། གཞན་ཡང་ཕྱི་མི་ནང་དུ་བསྐྱོད་པར་རྒྱ་ནག་གཞུང་གིས་བཀག་སྡོམ་བྱས་དང་བྱེད་མུས་ཡིན་པའི་ཁར། བོད་མི་ལ་ཆབ་སྲིད་དང་འགྲོ་བ་མིའི་ཐོབ་ཐང་མེད་པར་བརྟེན། ཕྱི་ལོ་ ༢༠༠༩ ནས་ད་བར་བོད་མི་ ༡༥༧ ཙམ་གྱིས་རང་ལུས་མེར་བསྲེགས་པའི་སྐོར། བོད་ནང་དུ་ཆོས་དད་རང་མོས་མེད་པའི་སྐོར། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ངོས་འཛིན་ཐད་ལ་ཐེ་ཇུས་བྱེད་བཞིན་ཡོད་པའི་སྐོར། ༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་གང་འདྲ་ཡོད་མེད་ཤེས་ཀྱི་མེད་སྟབས། རྒྱལ་སྤྱིའི་ཚོགས་པ་ཁག་མང་པོ་ཞིག་གིས་ཁོང་ཉིད་འཕྲལ་དུ་ཀློད་གྲོལ་གཏང་དགོས་པའི་འབོད་སྐུལ་ཐེངས་མང་ཞུ་དགོས་སྐོར་སོགས་གསུངས་སོང་།
ཁོང་གིས། རྒྱ་གཞུང་གིས་བོད་ནང་དུ་འགྲོ་འོང་བཀག་སྡོམ་སོགས་བྱས་ཏེ་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད། བྱིས་པ་ཚུད་པའི་བོད་མིའི་རིགས་རྫས་བསྡུ་རུབ་བྱས་དང་བྱེད་མུས་ཡིན་ལ། བོད་ཕྲུག་མང་པོ་ཞིག་ཕ་མ་དང་ཁ་བྲལ་དུ་བཅུག་ནས་རྒྱ་ནག་གི་བཅའ་སྡོད་སློབ་གྲྭར་བཙན་གྱིས་བཅུག་སྟེ། རྒྱ་སྒྱུར་སློབ་གསོ་སྤྲོད་ཀྱི་ཡོད་པའི་སྐོར། རྒྱ་ནག་གཞུང་གིས་བོད་མི་མང་པོ་ཞིག་རྒྱ་ནག་གི་རང་སྐྱོང་ས་ཚིགས་ཁག་དང་། བོད་ནང་གི་ས་གནས་ཁག་ཏུ་བཙན་གྱིས་གནས་སྤོར་བྱེད་དུ་བཅུག་སྟེ། བོད་ཀྱི་ན་གཞོན་མང་པོ་ཞིག་བཙན་གྱིས་རྒྱ་ནག་ཏུ་མངག་གཏོང་བྱེད་ཀྱི་ཡོད་སྐོར་དང་། ཕྱི་ལོ་ ༢༠༠༠ ཙམ་ནས་རྒྱ་ནག་གཞུང་གིས་ཆུ་མཛོད་མང་པོ་ཞིག་གསར་རྒྱག་དང་། མེ་འཁོར་དང་གནམ་གྲུ་འབབ་ཚུགས་སོགས་གསར་འཛུགས་བྱས་ཏེ། བོད་ཀྱི་རང་བྱུང་ཁོར་ཡུག་གཏོར་བརླག་ཚད་མེད་བཏང་ཡོད་པ་དང་། ཨེ་ཤ་ཡའི་རྒྱུག་ཆུ་མང་པོ་ཞིག་བོད་མཐོ་སྒང་གི་འཁྱག་རོམ་སོགས་ལ་བརྟེན་ནས་བཞུར་གྱིན་ཡོད་སྟབས། བོད་ནི་ཨེ་ཤ་ཡའི་ཆུ་མཛོད་དང་། འཛམ་གླིང་གི་སྣེ་མོ་གསུམ་པ་ཡིན་སྐོར་སོགས་གསུངས་སོང་།
ཡང་སྲིད་སྐྱོང་མཆོག་གིས། ཧིན་བོད་ས་མཚམས་སུ་རྒྱ་དཀར་ནག་གཉིས་ཀྱི་བར་ས་མཚམས་རྩོད་རྙོག་མང་པོ་ཡོང་གི་ཡོད་པ་དང་། རྒྱ་ནག་གི་དམག་ཤུགས་རྒྱ་སྐྱེད་དེ་ཕྱིའི་རྒྱལ་ཁབ་མང་པོའི་བདེ་འཇགས་ལ་དཀའ་ངལ་ཆེན་པོ་བཟོ་ཡི་ཡོད་པར་བརྟེན། ༧གོང་ས་རྒྱལ་བ་རིན་པོ་ཆེ་མཆོག་གིས་བོད་རྒྱའི་དཀའ་རྙོག་ནི་འཚེ་མེད་ཞི་བ་དང་གྲོས་མོལ་ཁོ་ནའི་ལམ་ནས་སེལ་ཐབས་བྱེད་དགོས་གལ་ཆེ་སྐོར་གསུངས་ཡོད་པ་དང་། གལ་ཏེ་འབྱུང་འགྱུར་འཚེ་མེད་ཞི་བ་དང་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་ཐུབ་ཚེ། ས་ཁུལ་ཡོངས་ལ་ཞི་བདེ་ཡོང་སྲིད་པ་དང་། བོད་དང་རྒྱ་ནག་གི་འབྲེལ་ལམ་ཡག་པོ་ཡོང་བ། རྒྱལ་ཁབ་གཞན་གྱི་དེ་འཇགས་ལའང་ཉེན་ཚབས་མེད་སྐོར་དང་། རྒྱ་ནག་གིས་བོད་དེ་རྒྱ་ནག་གི་ཆ་ཤས་ཡིན་ཚུལ་འཆད་ཀྱི་ཡོད་ཀྱང་། དོན་དངོས་སུ་བོད་དེ་རྒྱ་ནག་གི་ཆ་ཤས་མིན་སྐོར་སོགས་གསུངས་སོང་།
སྲིད་སྐྱོང་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༢ ཉིན་ཨོ་གླིང་ཨིན་ཌི་ཡ་སློབ་གཉེར་ཁང་གིས་གདན་ཞུས་ལྟར། རྒྱ་གར་དང་བོད་ཀྱི་གནའ་དེང་གི་འབྲེལ་བའི་སྐོར་གསུང་བཤད་གནང་རྒྱུ་དང་། ཕྱི་ཚེས་ ༢༣ ཉིན་སྲིད་སྐྱོང་མཆོག་བོད་ཀྱི་རོལ་དབྱངས་དུས་སྟོན་ཐོག་ཕེབས་རྒྱུ་ཡིན་པ་མ་ཟད། མདོ་འཛིན་པ་སཱ་རཱ་ཧ་ཀཱ་ནོ་སི་ཁི་(Sarah Kanowski) དང་མཉམ་དུ་ཨེ་བྷི་སི་རླུང་འཕྲིན་ཁང་དུ་བོད་ཀྱི་རིག་གཞུང་དང་གནམ་གཤིས་གནས་སྟངས་སྐོར་བགྲོ་གླེང་གནང་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
