རྒྱ་ནག་གཞུང་གིས་ཀིརྟིའི་དགོན་ཁག་དང་ལྷ་སྡེ་ཚོར་༸སྐྱབས་རྗེ་ཀིརྟི་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱེད་པར་བཀག་སྡོམ་ཤུགས་ཆེན་བྱེད་བཞིན་ཡོད་པར་བརྟེན། འབྲེལ་ཡོད་དད་ལྡན་སེར་སྐྱ་མང་ཚོགས་ཀྱི་སེམས་ལ་རྨ་ཁ་སྔར་ལས་ཆེན་པོ་བཟོ་ཡི་ཡོད་འདུག
དེ་ཡང་འབྲེལ་ཡོད་ཅིག་གིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་བོད་ནང་གི་ཀིརྟིའི་དགོན་ཁག་དང་འབྲེལ་ཡོད་མང་ཚོགས་བཅས་ལ་རྒྱུན་དུ་དམ་དྲག་དམིགས་བསལ་གྱིས་བྱེད་བཞིན་ཡོད་པ་ལྟར། འདི་ལོའི་ཆོ་འཕྲུལ་སྨོན་ལམ་ཆེན་མོའི་སྐབས་སྟག་ཚང་ལྷ་མོ་ཀིརྟི་དགོན་པའི་བཅོ་ལྔ་མཆོད་པའི་ནང་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་སྒྲིག་གཤོམ་བྱས་ཡོད་པ་ས་གནས་ཉེན་རྟོག་པས་དེ་བཤམ་མི་ཆོག་ཅེས་བཙན་བཀའ་བཏང་སྟེ། སྐུ་པར་ཕྱིར་བསྡུ་བྱེད་དུ་བཅུག་ཡོད་པ་མ་ཟད། ཉེ་ཆར་ནས་རྔ་བ་ཀིརྟི་དགོན་པ་དང་ཀིརྟི་དགོན་པའི་ལྷ་སྡེ་བཅས་ཀྱི་ནང་༸སྐྱབས་རྗེ་ཀིརྟི་རིན་པོ་ཆེའི་སྐུ་པར་སྒྲིག་གཤོམ་མི་ཆོག་ཅེས་སྐུ་པར་བཀག་སྡོམ་གྱི་ལས་འགུལ་ཞིག་སྤེལ་མུས་ཡིན་འདུག
འདས་པའི་ལོ་ཤས་གོང་ནས་བཟུང་༸སྐྱབས་རྗེ་ཀིརྟི་རིན་པོ་ཆེའི་འཁྲུངས་སྐར་ཉིན་རྟེན་འབྲེལ་ཙམ་ཡང་ཞུ་རུ་མི་འཇུག་པར་མ་ཟད། རྟེན་འབྲེལ་ཞུ་བྱེད་ཀྱི་སྤྲི་གོར་ཉོ་འཚོང་འགོག་ཆེད། འཁྲུངས་སྐར་ལ་མ་སླེབས་པའི་ཉིན་ཤས་གོང་ནས་བཟུང་ཁྲོམ་དུ་སྤྲི་གོར་འཚོང་མཁན་གྱི་ཚོང་ཁང་རྣམས་སྒོ་རྒྱག་ཏུ་བཅུག་པ དང་། གཤིན་པོའི་ཆེད་དུ་༸སྐྱབས་རྗེ་ཀིརྟི་རིན་པོ་ཆེ་མཆོག་ལ་བསྔོ་རྟེན་བསྐུར་བ་རེད་ཅེས་འཛིན་བཟུང་བཙོན་འཇུག་བྱེད་པ། ཕྱི་ལོགས་སུ་སྤུན་མཆེད་གྲོགས་པོ་སོགས་ལ་ཁ་པར་བརྒྱུད་ཕན་ཚུན་འཚམས་འདྲི་ཙམ་བྱས་ནའང་ལམ་སེང་ཉེན་རྟོག་པས་འདྲི་རྩད་སྣ་ཚོགས་དང་འཇིགས་བསྐུལ་བྱེད་པ་སོགས་ཕྱོགས་མང་པོ་ནས་དམ་དྲག་དང་། བཙན་ཤེད། འཇིགས་སྐུལ། བཙིར་གནོན་སོགས་རྒྱུན་དུ་བྱེད་བཞིན་ཡོད་པ་རེད།
བླ་མ་དང་དཔོན་པོ་རེ་ཟུང་ཆེན་པོ་བཟོ་འདོད་ཙམ་རེད་པ།