རྒྱལ་བའི་སྲས་ཞེས་པའི་༧གོང་ས་མཆོག་གི་མཛད་རྣམ་ཞིག་གཟིགས་འབུལ་ཞུ་བཞིན་འདུག

རྒྱལ་བའི་སྲས་ཞེས་༧གོང་ས་མཆོག་གི་སྐུ་ཚེའི་མཛད་རྣམ་ཞིག་གཏམ་བརྗོད་ཀྱི་ལམ་ནས་ཨ་རིའི་མེན་ནེ་སོ་ཊ་མངའ་སྡེའི་ནང་གཟིགས་འབུལ་ཞུ་བཞིན་འདུག

ཟླ་འདིའི་ཕྱི་ཚེས་ ༢༣ ཉིན་ནས་དབུ་འཛུགས་ཀྱིས་ཕྱི་ཟླ་ ༧ ཚེས་ ༩ བར་ཨ་རིའི་མངའ་སྡེ་མེན་ནི་སོ་ཊའི་མི་ནི་ཡ་པོ་ལི་སི་ (Minneapolis) གྲོང་ཁྱེར་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚེའི་མཛད་རྣམ་དང་འབྲེལ་བའི་རྒྱལ་བའི་སྲས་ (The Buddha Prince) ཞེས་པའི་གཏམ་བརྗོད་ཅིག་གཟིགས་འབུལ་ཞུ་བཞིན་འདུག

གཏམ་བརྗོད་དེ་ནི་༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་གཞོན་དུས་ཀྱི་སྐུ་ཚེ་དང་རྒྱ་གར་ནང་བྲོས་བྱོལ་དུ་ཕེབས་པའི་བརྒྱུད་རིམ་སོགས་ལ་དམིགས་པ་ཞིག་ཡིན་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་གསུང་ཆོས་དང་ཁོང་གི་སྐུ་ཚེའི་མཛད་རྣམ་བཙན་བྱོལ་གྱི་རང་དབང་ (Freedom in Exile) སོགས་ཕྱག་དེབ་ཁག་ནས་བརྗོད་བྱ་བདམས་ཏེ་གཏམ་བརྗོད་ཀྱི་ཁོངས་སུ་བཅུག་ཡོད་འདུག་ལ། གཏམ་བརྗོད་འཁྲབ་མཁན་ཨ་རིའི་མངའ་སྡེ་མེན་ནི་སོ་ཊའི་ནང་གནས་སྡོད་བྱེད་བཞིན་པའི་བོད་པའི་གཞོན་སྐྱེས་ལོ་ན་ ༡༣ ནས་ ༡༥ བར་གྱི་འཁྲབ་སྟོན་པ་དང་ས་གནས་ཡུལ་མི་རོལ་མོའི་སྒྱུ་རྩལ་བ་བཅས་ཡིན་པ་རེད།

དེ་འབྲེལ་ཐད་གཏམ་བརྗོད་འཁྲབ་ཁྲིད་པ་མར་ཀལ་ (Markell Kiefer) ལགས་ཀྱིས། མི་མི་འདྲ་བ་ལ་༧གོང་ས་རྒྱལ་བ་རིན་པོ་ཆེ་མཆོག་གི་མཚོན་དོན་མི་འདྲ་བ་རེ་ཡོད། འོན་ཀྱང་། མི་མང་པོ་ཞིག་གིས་ཁོང་གི་དམིགས་བསལ་མཛད་རྣམ་དག་ཤེས་ཀྱི་མེད་པ་རེད། ཅེས་དང་། ང་ཚོས་ཁོང་གི་སྐུ་ཚེའི་མཛད་རྣམ་འགྲེལ་བརྗོད་ཇི་ལྟར་བྱ་དགོས་མིན་ཐད་བསམ་བློ་གཏོང་སྐབས། ཁོང་དགུང་ལོ་གཞོན་དུས་སུ་སེམས་ཅན་ལ་འཕྲད་པ་དང་། རང་བྱུང་ཁོར་ཡུག་སོགས་ཀྱི་སྐོར་ལ་སེམས་འགུལ་ཐེབས་པའི་བཀའ་མོལ་མང་པོ་གནང་བ་རྣམས་དྲན་པར་བརྟེན། ཁོང་གི་སྐུ་ཚེའི་མཛད་རྣམ་ཁག་ཕྱི་རོལ་དུ་གཏམ་བརྗོད་ཀྱི་ལམ་ནས་འཁྲབ་ཁྲིད་བྱ་རྒྱུ་དེ་འོས་ཤིང་འཚམས་པ་ཞིག་ཡིན་པ་ཚོར་བྱུང་། ཞེས་བརྗོད་འདུག

ད་ལྟ་རང་ལོ་ ༢༦ ཡིན་པ་དང་ཨ་རིའི་མཁའ་དམག་ནང་སྲི་ཞུ་སྒྲུབ་བཞིན་པའི་བསྟན་འཛིན་ལེགས་ལྡན་ལགས་ཀྱིས། གཏམ་བརྗོད་འདི་བརྒྱུད་ནས་ང་ལ་རང་ཉིད་ཀྱི་རིགས་རྒྱུད་སྐོར་ལ་གོ་རྟོགས་ཡག་པོ་བྱུང་བ་དང་། མི་གཞན་གྱིས་༧གོང་ས་རྒྱལ་བ་རིན་པོ་ཆེ་མཆོག་གི་གསུང་ཆོས་སྐོར་ལ་སློབ་གཉེར་བྱེད་པའི་རེ་བ་ཡོད། ང་རང་བོད་མི་ཞིག་ཡིན་པ་དང་ཐེངས་དང་པོར་གཏམ་བརྗོད་དེ་འཁྲབ་སྐབས། བོད་ཀྱི་ལོ་རྒྱུས་ལ་ཤེས་རྟོགས་མང་པོ་མེད། འོན་ཀྱང་། གཏམ་བརྗོད་དེ་བརྒྱུད་ནས་གནད་དོན་མང་པོའི་ཐོག་ལ་ཤེས་རྟོགས་བྱུང་སོང་། ཞེས་བརྗོད་འདུག

བསྟན་འཛིན་ངག་དབང་ལགས་ཀྱིས། ང་ལ་བོད་མི་རིགས་ཀྱི་སྐད་ཡིག་འཇིག་ཉེན་ཡོད་པའི་དོ་སྣང་བྱུང་བར་བརྟེན། ང་ཚོ་ཨ་རིར་གནས་སྡོད་བྱེད་པའི་སྐབས་སུ་སློབ་མ་མང་པོ་ཞིག་གིས་དབྱིན་སྐད་དང་བོད་སྐད་གཉི་ག་ཤོད་ཀྱི་ཡོད། ང་ལ་ང་ཚོའི་རིག་གཞུང་དང་སྐད་ཡིག་འཇིག་གི་རེད་བསམ་ནས་ཞེད་སྣང་ཡོང་གི་འདུག དེར་བརྟེན། གཏམ་བརྗོད་འདི་བརྒྱུད་ནས་མི་མང་པོ་ཞིག་གིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་སོགས་ཤེས་དགོས་གལ་ཆེན་པོ་ཡིན་པ་དང་། ༧ཁོང་གིས་དུས་རྟག་ཏུ་བྱམས་བརྩེའི་སྐོར་ལ་བཀའ་སློབ་གནང་གི་ཡོད་པ་རེད། ད་ལྟའི་ཆར་ང་ཚོའི་འཛམ་གླིང་ལ་བྱམས་བརྩེའི་གོ་རྟོགས་དགོས་གལ་ཆེན་པོ་རེད། ཅེས་བརྗོད་འདུག

གཏམ་བརྗོད་འཁྲབ་སྐབས་སྒྱུ་རྩལ་བ་ཚོས་འབག་གྱོན་པ་དང་། བོད་ཀྱི་གཞས་དང་ཞབས་བྲོ་སོགས་དངོས་སུ་འཁྲབ་ཀྱི་ཡོད་ཅིང་། གཏམ་བརྗོད་དེ་ནི་ཕྱི་ལོ་ ༢༠༠༡ ལོར་ཐོག་མར་ཨ་རིའི་མངའ་སྡེ་དེའི་ནང་འཁྲབ་སྟོན་བྱས་ཤིང་།  ཨ་རི་བ་མར་ཀལ་ (Markell Kiefer) ལགས་དང་བོད་མི་བསྟན་འཛིན་ངག་དབང་ལགས་གཉིས་མཉམ་འབྲེལ་གྱིས་བཟོས་པའི་གཏམ་བརྗོད་ཅིག་ཡིན་འདུག

གསར་འགོད་པ། བསྟན་འཛིན་ཕུར་བུ།