ལྷོ་ཀོ་རི་ཡའི་གྲོས་ཚོགས་འཐུས་མིར་སྐྱོན་བརྗོད་བྱས།

ལྷོ་ཀོ་རི་ཡའི་ནང་པའི་ཆོས་ཚོགས་ཀྱིས་གྲོས་ཚོགས་འཐུས་མིས་བོད་ཀྱི་གནད་དོན་འཁྱོག་བརྗོད་བྱས་པར་སྐྱོན་བརྗོད་བྱས།

Democratic Party Rep. Do Jong-hwan takes a bow to Chinese officials and other attendees after walking off stage in making a speech at the China Xizang Tourism and Culture Expo on Saturday. Some seven DP representatives left for China as they were invited to the event by the Chinese government. [YONHAP]

ལྷོ་ཀོ་རི་ཡའི་ཉིན་རེའི་གསར་ཁང་(Korea JoongAng Daily)གིས་གནས་ཚུལ་སྤེལ་བ་ལྟར་ན། ཟླ་འདིའི་ཟླ་མགོར་རྒྱ་གཞུང་གིས་བགོས་བཅད་བྱས་ཡོད་པའི་བོད་རང་སྐྱོང་ལྗོངས་ཟེར་བའི་ནང་དུ། རྒྱ་ནག་གཞུང་གི་གོ་སྒྲིག་མཐུན་འགྱུར་འོག ཡུལ་སྐོར་དང་རིག་གཞུང་ཁྲོམ་སྟོན་ཞིག་འཚོགས་ཡོད་ཅིང་། སྐབས་དེར་ལྷོ་ཀོ་རི་ཡའི་སྲིད་བློན་ཟུར་བ་དང་གྲོས་ཚོགས་འཐུས་མི་ཏོ་ཅོང་ཧན་(Do Jong-hwan) དང་། གྲོས་ཚོགས་འཐུས་མི་མེན་ཡོང་ཌིག་(Min Byoung-Dug) བཅས་དམངས་གཙོ་ཚོགས་པའི་ཚོགས་མི་བདུན་མཉམ་ཞུགས་བྱས་ཡོད་འདུག

སྐབས་དེའི་ཚོགས་ཐོག་ཏུ་གྲོས་ཚོགས་འཐུས་མི་ཏོ་ཅོང་ཧན་གྱིས། མི་མང་གི་ལྟ་ཚུལ་མི་མཐུན་པ་དང་། ནུབ་ཕྱོགས་པའི་རྒྱལ་ཁབ་ཁག་ཚོགས་ཞུགས་མ་བྱས་པའི་རྒྱུ་མཚན་ཅི་ཡང་ཤེས་ཀྱི་མེད་སྐོར་དང་། ཁོ་རང་ཕྱིར་ལྷོ་ཀོ་རི་ཡར་འབྱོར་མཚམས་སུ་རླུང་འཕྲིན་ཁང་གི་བཅར་འདྲིའི་སྐབས་སུ་ཁོང་གིས། བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་དོན་རྐྱེན་ནི་ཕྱི་ལོ་ ༡༩༥༡ དང་ ཕྱི་ལོ་ ༡༩༥༩ ནང་བྱུང་ཟིན་པ་ཞིག་རེད། ང་ཚོ་ཡུལ་སྐོར་དང་རིག་གཞུང་གི་ཆེད་དུ་བསྐྱོད་པ་ཡིན། ངས་རེ་བར་མི་མང་གིས་འགྲོ་བ་མིའི་ཐོབ་ཐང་དང་ཡུལ་སྐོར་རིག་གཞུང་ཁྲོམ་སྟོན་གཉིས་ཀྱི་དབྱེ་བ་འབྱེད་དགོས་སྐོར་བརྗོད་འདུག གྲོས་ཚོགས་འཐུས་མི་མེན་ཡོང་ཌིག་གིས་ཀྱང་ལོ་ངོ་བདུན་ཅུ་སྔོན་དུ་བྱུང་ཟིན་པའི་གནད་དོན་ཞིག་གླེང་བས་རྒྱལ་ཁབ་ལ་ཁེ་བཟང་ཅི་ཡང་མེད་ཚུལ་བརྗོད་འདུག

དེའི་ཐད་ལྷོ་ཀོ་རི་ཡའི་ནང་པའི་ཆོས་ཚོགས་ཆེ་ཤོས་(Jogye order of Korean Buddhism) ཀྱིས། མི་སྒེར་དང་ཚོགས་པ་ཁག་གིས་རྒྱལ་ཁབ་ཀྱི་སྐུ་ཚབ་བྱས་ནས་རྒྱལ་ཁབ་གཞན་དང་མཉམ་དུ་མཐུན་སྒྲིལ་དང་འབྲེལ་ལམ་གོང་སྤེལ་གཏོང་བར་བསྐྱོད་ཀྱི་ཡོད་མོད། ལྷོ་ཀོ་རི་ཡའི་གྲོས་ཚོགས་འཐུས་མི་རྣམས་ཀྱིས་ལྷོ་ཀོ་རི་ཡའི་མི་མང་ཙམ་མ་ཟད། འཛམ་གླིང་མི་མང་ལ་རྒྱུས་མངའ་ཡོད་པའི་འགྲོ་བ་མིའི་ཐོབ་ཐང་གནད་དོན་སྐོར་དང་འདས་པའི་ལོ་རྒྱུས་ལ་མ་བལྟས་པར་འཁྱོག་བརྗོད་བྱས་ཡོད་པས། ང་ཚོས་བློ་འགྱོད་དྲག་པོས་སྐྱོན་བརྗོད་བྱེད་ཀྱི་ཡོད། གྲོས་ཚོགས་འཐུས་མི་ཏོ་ཅོང་ཧན་དང་མེན་ཡོང་ཌིག་གཉིས་ཀྱིས་རང་ལུས་མེར་བསྲེགས་བཏང་ནས་རྒྱ་གཞུང་ལ་ངོ་རྒོལ་བྱེད་མཁན་གྱི་རྣམ་ཤེས་དང་། ད་ལྟའི་ཆར་རྒྱ་གཞུང་གི་མནར་གནོད་འོག་ཏུ་དཀའ་ངལ་མྱོང་བཞིན་ཡོད་པའི་བོད་མི་ཡོངས་ལ་ལྷག་བསམ་རྣམ་དག་གིས་དགོངས་སེལ་ངེས་པར་ཞུ་དགོས། ཞེས་བརྗོད་འདུག

དེ་བཞིན་རྒྱ་ནག་གཞུང་ཚབ་པ་ཞིན་ཧེ་མིན་(Xing Haiming)གྱིས་ལྷོ་ཀོ་རི་ཡའི་དམངས་གཙོ་སྲིད་དོན་ཚོགས་པའི་ཚོགས་གཙོ་ལེ་ཇེ་ཡུང་(Lee Jae Myung) ལ་རྒྱ་ནག་ལ་ཁ་གཏད་བཅག་པ་ཡིན་ན་རྗེས་སུ་བློ་འགྱོད་སྐྱེ་དགོས་སྐོར་དང་། ཐེངས་འདིའི་གྲོས་ཚོགས་འཐུས་མིའི་ཕྱོགས་བསྐྱོད་ཀྱི་གནད་དོན་འབྲེལ་ནས་རྒྱ་ནག་དང་ལྷོ་ཀོ་རི་ཡ་རྒྱལ་ཁབ་ཀྱི་འབྲེལ་ལམ་སྡུག་ཏུ་འགྲོ་བའི་ཚོད་དཔག་བྱེད་བཞིན་ཡོད་འདུག

གསར་འགོད་པ། བྱམས་པ་ཚེ་རིང་།