༧གོང་ས་མཆོག་རྒྱ་གར་ལྷོ་ཕྱོགས་སུ་ཕེབས་རྒྱུ་ཡིན་པའི་གནས་ཚུལ་ཐོན་འདུག་ཀྱང་ད་ལྟ་གཏན་འཁེལ་གང་ཡང་མི་འདུག
རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་མངའ་སྡེ་ཀེ་རེ་ལའི་སྤྱི་ཚོགས་མཉམ་འབྲེལ་ལྷན་ཚོགས་ (CCC) ཀྱིས། ཇི་ལྟར་གསོལ་འདེབས་ཞུས་དོན་བཞིན། ཕྱི་ཟླ་ ༧ ཚེས་ ༡ ཉིན་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལྷོ་ཕྱོགས་ཀེ་རེ་ལ་མངའ་སྡེའི་གྲོང་ཁྱེར་ཀོ་ཆིའི་(Kochi)) ནང་ཆིབས་སྒྱུར་བསྐྱང་རྒྱུ་ཡིན་སྐོར་བསྒྲགས་འདུག
དེ་རིང་འདི་གའི་གསར་འགོད་པས་དཔལ་ལྡན་དགའ་ལྡན་ཕོ་བྲང་གི་དྲུང་ཆེ་དང་གསར་འགོད་འབྲེལ་མཐུད་པ་ཚེ་བརྟན་བསམ་འགྲུབ་ལགས་སུ་དེ་འབྲེལ་གནས་ཚུལ་གྱི་ཐད་བཀའ་འདྲི་ཞུ་སྐབས། སྤྱིར་༧གོང་ས་རྒྱལ་བ་རིན་པོ་ཆེ་མཆོག་མི་སུ་ཞིག་གིས་ས་གནས་གང་དུ་གདན་ཞུ་གནང་ཡང་ཁོང་ཕེབས་རེ་ཡོད་ཀྱང་། ད་ལྟ་༧གོང་ས་མཆོག་དགུང་ལོ་བགྲེས་པོ་ཡིན་པ་དང་ལ་དྭགས་སུ་ཕེབས་པའི་མཛད་རིམ་ཡོད་པ་ལས། གཞན་མཛད་རིམ་གཏན་འཁེལ་གང་ཡང་མེད་སྐོར་གསུངས་བྱུང་།
དེ་འབྲེལ་རྒྱ་གར་དུས་བབ་ཀྱི་གནས་ཚུལ་ནང་། གཟའ་འཁོར་འདིའི་རེས་གཟའ་སྤེན་པ་སྟེ། ཟླ་ ༧ ཚེས་ ༡ ཉིན་རྒྱ་གར་ལྷོ་ཕྱོགས་མངའ་སྡེ་ཀེ་རི་ལའི་ཀོ་ཆིའི་གྲོང་ཁྱེར་ནང་འཚོགས་གཏན་ཁེལ་བའི་ཆོས་ལུགས་དང་རིག་གཞུང་། སྤྱི་ཚོགས་བཅས་ཀྱི་གནད་ཡོད་མི་སྣའི་ཚོགས་འདུ་ཞིག་གི་སྟེང་༧གོང་ས་རྒྱལ་བ་རིན་པོ་ཆེ་མཆོག་ལྷན་ཞུགས་གནང་རྒྱུ་ཡིན་སྐོར་བརྗོད་འདུག
མཛད་འཆར་ལྟར་ན། ཕྱི་ཟླ་ ༧ ཚེས་ ༢༡ ནས་ ༢༣ བར་ཉིན་གྲངས་གསུམ་རིང་གླེ་ལྕོག་ལམ་སར་ཞི་བའི་ཚལ་ཕོ་བྲང་དུ། ༧གོང་ས་མཆོག་གིས་ལ་དྭགས་མི་མང་ལ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་དང་། སྤྱན་རས་གཟིགས་ཀྱི་བཀའ་དབང་བསྩལ་རྒྱུ་དང་སྐབས་དེར་ལ་དྭགས་ནང་པའི་ཚོགས་པ་དང་དགོན་པ་ཚོགས་པ་ཐུན་མོང་ནས་བརྟན་བཞུགས་བསྡུས་པ་ཞིག་བསྟར་འབུལ་ཞུ་རྒྱུ་ཡིན་འདུག
