རྒྱ་གཞུང་གིས་མཐའ་མཚམས་འགོག་སྲུང་བྱེད་པར་བོད་མི་ཆེད་སྤྱོད་བྱེད་ཀྱི་ཡོད་འདུག

རྒྱ་གཞུང་གིས་བོད་པའི་དམག་མི་མཐའ་མཚམས་ཁུལ་རྒྱ་སྐྱེད་འགོག་སྲུང་བྱེད་པར་མངགས་གཏོང་བྱེད་མུས་ཡིན་འདུག

Tibetan soldiers were inducted into the Chinese Army as they are believed to be better suited to endure the conditions in high altitude areas. (Photo: Representational/Reuters file)

རྒྱ་དཀར་ནག་གཉིས་བར་ས་མཚམས་རྩོད་རྙོག་ཡང་ཡང་འབྱུང་བཞིན་པའི་རྐྱེན་གྱིས། རྒྱལ་ཁབ་གཉིས་བར་འཐབ་འཁྲུག་དང་ས་མཚམས་ཁུལ་ཆེད་དུ་དམག་མི་འབོར་ཆེན་འགྲམ་འཇོག་བྱེད་བཞིན་པ་མ་ཟད། དམིགས་བསལ་རྒྱ་གཞུང་གིས་ས་མཚམས་དེ་དག་གི་ནང་དུ་བོད་པའི་དམག་མི་ཆེད་མངགས་བྱེད་བཞིན་ཡོད་པའི་གནས་ཚུལ་ཡོང་གི་ཡོད་པ་ལྟར། དེ་རིང་གི་རྒྱ་གར་གསར་ཁང་(IndiaToday)གི་རྩོམ་སྒྲིག་པ་མཱན་ཇེ་ཏི་ནེ་གེ་(Manjeet Negi)ལགས་ཀྱིས། ད་ལྟའི་ཆར་རྒྱ་ནག་གཞུང་གི་དམག་མིའི་ནང་དུ་ཡོད་པའི་བོད་པ་རྣམས་ལ་དྭགས་དང་ཨ་རུ་ན་ཅཱལ་མངའ་སྡེའི་ཁུལ་གྱི་མཐའ་མཚམས་སྲུང་མཁན་དུ་ཆེད་སྤྱོད་བྱེད་ཀྱི་ཡོད་པ་དང་། རྒྱ་གར་གྱིས་རྒྱ་གཞུང་གིས་བཏང་བའི་ས་མཐོའི་མཐའ་མཚམས་ཀྱི་བོད་པའི་དམག་མི་རྣམས་ལ་འགོག་རྒོལ་བྱེད་བཞིན་ཡོད་པའི་འགྲེལ་བརྗོད་བྱས་ཡོད་འདུག

དེ་རིང་རྒྱ་གར་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་དམག་དཔུང་མང་ཆེ་ཤོས་ནང་དུ་རྒྱ་ནག་གི་ས་ཁུལ་རང་དུ་ཡོད་པའི་རྒྱ་མིའི་དམག་མི་རྣམས་མངགས་གཏོང་བྱེད་ཀྱི་ཡོད་ཀྱང་། ལ་དྭགས་ཤར་ཕྱོགས་མཚོན་པའི་མཐོ་སྒང་གི་ས་ཁུལ་ཁག་ཏུ་རྒྱ་ནག་གི་དམག་དཔུང་རྒྱ་སྐྱེད་དང་འགོག་རྒོལ་བྱེད་དགོས་ཀྱི་ཡོད་པར་བསྟུན། བོད་པའི་དམག་མི་རྣམས་ལ་ས་ཁུལ་དེ་དག་འགོག་སྲུང་བྱེད་པའི་ཆ་རྐྱེན་ཡག་པོ་ཚང་བར་ཡིད་ཆེས་བྱེད་ཀྱི་ཡོད། རྒྱ་གར་མཐའ་མཚམས་ཁུལ་དུ་དམག་ཤུགས་རྒྱ་བསྐྱེད་པར་བོད་པའི་ཁྱིམ་ཚང་རེ་ནས་མི་གཅིག་རེ་རྒྱ་གཞུང་གི་དམག་མིའི་ཁོངས་སུ་གཏོང་བའི་ཤུགས་རྒྱག་གི་ཡོད་ཅིང་། མཐོ་སྒང་གི་མཐའ་མཚམས་ཁག་བརྟན་སྲུང་བྱེད་ཆེད་བོད་པའི་གཞོན་སྐྱེས་རྣམས་དམག་མིར་གསར་འཇུག་བྱེད་ཀྱི་ཡོད་པ་མ་ཟད། འཆར་ཅན་ལྟར་དམིགས་བསལ་དམག་སྦྱོང་སྤྲོད་ཀྱི་ཡོད་འདུག

ཡང་གནས་ཚུལ་ནང་བོད་པའི་དམག་མིར་འདེམས་གསེས་བརྟག་དཔྱད་བྱེད་ཀྱི་ཡོད་པའི་སྐོར་ལ། བོད་མི་རྣམས་རྒྱ་གཞུང་གི་དམག་ཁོངས་སུ་ཚུད་པར་རྒྱའི་སྐད་ཤེས་དགོས་ཀྱི་ཡོད་པ་དང་། རྒྱ་ནག་དམར་ཤོག་ཚོགས་པའི་ཚོགས་མི་ཡིན་པའི་ཁས་ལེན་དམ་བཅའ་བཞག་པར་གཟབ་ནན་གྱི་རྟོག་ཞིབ་བྱེད་ཀྱི་ཡོད་འདུག རྒྱ་གར་དམག་ཁོངས་ཀྱི་བོད་པའི་དམིགས་བསལ་མདུན་མཆོང་དམག་མི་རྣམས་ཀྱིས་རྒྱ་གར་དམག་ཁུངས་སུ་ཞབས་འདེགས་ཞུ་བཞིན་ཡོད་པ་མཐོང་བའི་རྗེས་སུ། ཕྱི་ལོ་ ༢༠༢༡ མགོ་སྟོད་དུ་རྒྱ་ནག་གིས་བོད་པའི་དམག་མིའི་གྲངས་འབོར་ཇེ་མང་དུ་གཏོང་བར་ཤུགས་བརྒྱབ་ཡོད་པ་མ་ཟད། བོད་པའི་དམག་མི་རྣམས་ཀྱང་རྒྱ་ནག་གཞུང་གིས་བཅད་བགོ་བྱས་པའི་བོད་རང་སྐྱོང་ལྗོངས་ནང་གི་ས་གནས་མི་མང་བསྡུ་ལེན་བྱེད་རྒྱུ་ཐག་གཅོད་བྱས་ཡོད་འདུག

གསར་འགོད་པ། བྱམས་པ་ཚེ་རིང་།