ཏོག་དབྱིབས་གཉན་རིམས་སྐྱེ་དངོས་མཚོན་ཆའི་སླད་དུ་བཟོ་སྐྲུན་བྱས་ཡོད་འདུག

རྒྱ་ནག་གཞུང་གིས་སྐྱེ་དངོས་མཚོན་ཆ་བཟོ་སྐྲུན་སླད་ཏོག་དབྱིབས་ནད་འབུ་ཆེད་དུ་བཟོས་པ་ཞིག་ཡིན་སྐོར་བརྗོད་འདུག

ཁ་སང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། རྒྱ་ནག་གི་གྲོང་ཁྱེར་ཝུའུ་ཧན་དུ་རྟེན་གཞི་བྱས་པའི་ཝུའུ་ཧན་ནད་འབུ་ཚན་རིག་བརྟག་དཔྱད་ཁང་ (The Wuhan Institute of Virology) གི་ཉམས་ཞིབ་པ་ཁྲའོ་ཧྲའོ་ (Chao Shao) ཡིས། ཏོག་དབྱིབས་ནད་འབུའི་འབྱུང་ཁུངས་དེ་རྒྱ་ནག་ནས་ཡིན་པ་དང་། རྒྱ་གཞུང་གིས་སྐྱེ་དངོས་མཚོན་ཆ་བཟོ་སྐྲུན་སླད་འགོས་ཉེན་ཆེ་བའི་ནད་འབུ་ཞིག་བཟོ་སྒྲིག་བྱས་ཡིན་སྐོར་བརྗོད་འདུག

དེ་འབྲེལ་རྒྱལ་སྤྱིའི་གསར་འགོད་མཐུན་ཚོགས་ (International Press Association) ཀྱི་ཚོགས་མི་ཇེ་ནི་ཧྥར་ (Jennifer Zeng) གྱིས་ཝུའུ་ཧན་ནད་འབུ་ཚན་རིག་བརྟག་དཔྱད་ཁང་གི་ཉམས་ཞིབ་པ་ཁྲའོ་ཧྲའོ་ (Chao Shao) ལ་བཅར་འདྲི་བྱེད་སྐབས་ཁོང་གིས། རྒྱ་ནག་གཞུང་གིས་སྐྱེ་དངོས་མཚོན་ཆ་བཟོ་སྐྲུན་སླད། ཁོའི་ལས་རོགས་ཤན་ཁྲའོ་ (Shan Chao) ཚུད་པའི་མི་བཞི་ལ་འབྲེལ་ཡོད་གོང་རིམ་ནས་ངོ་བོ་མི་འདྲ་བའི་ནད་འབུ་བཞི་སྤྲད་དེ། མི་ཚུད་པའི་སེམས་ཅན་གྱི་རིགས་ལ་འགོས་ཁྱབ་ཆེ་ཤོས་ཀྱི་ནད་འབུ་གང་ཡིན་ངོས་འཛིན་བྱེད་དུ་བཅུག་ཡོད་འདུག

དེ་ཡང་ཕྱི་ལོ་ ༢༠༡༩ ལོའི་རྒྱ་ནག་གི་གྲོང་ཁྱེར་ཝུའུ་ཧན་དུ་ཚོགས་པའི་འཛམ་གླིང་དམག་མིའི་ལུས་རྩལ་འགྲན་ཚོགས་སྐབས། ཁྲའོ་ཧྲའོ་ཡི་ལས་རོགས་ཁག་ཅིག་གློ་བུར་དུ་གར་སོང་ཆ་མེད་དུ་གྱུར་ཡོད་ཅིང་། ཕྱིས་སུ་ཁོའི་ལས་རོགས་ཚོ་འཛམ་གླིང་རྒྱལ་ཁབ་འདྲ་མིན་ནས་ཡོང་བའི་རྩེད་འགྲན་པ་དག་གི་འཕྲོད་བསྟེན་གནས་སྟངས་བརྟག་དཔྱད་སླད། རྩེད་འགྲན་པའི་མགྲོན་ཁང་དུ་མངག་གཏོང་བྱས་ཡོད་འདུག འོན་ཀྱང་། རྩེད་འགྲན་པའི་འཕྲོད་བསྟེན་གནས་སྟངས་བརྟག་དཔྱད་བྱེད་པར་ནད་འབུ་དཔྱད་ཞིབ་མཁས་པ་མངགས་པའི་དོགས་གཞི་བྱུང་བར་བརྟེན། ཉམས་ཞིབ་པ་ཁྲའོ་ཧྲའོ་ཡིས་རྒྱ་ནག་གིས་ཆེད་དུ་རྒྱལ་སྤྱིའི་རྩེད་འགྲན་པ་རྣམས་ལ་ནད་འབུ་འགོས་ཁྱབ་གཏང་རྒྱུའི་ལས་དོན་སྤེལ་ཡོད་པར་དོགས་གཞི་བྱུང་ཡོད་སྐོར་བརྗོད་འདུག

ཡང་། ཕྱི་ལོ་ ༢༠༢༠ ཟླ་ ༤ པའི་ནང་གོང་རིམ་འབྲེལ་ཡོད་ཀྱིས་ཁྲའོ་ཧྲའོ་ཤར་ཊུ་ཀི་སི་ཐན་ཁུལ་དུ་ཡོད་པའི་ཡུ་གུར་བའི་འཕྲོད་བསྟེན་གནས་སྟངས་དཔྱད་ཞིབ་བྱེད་དུ་མངགས་ཤིང་། སྐབས་དེ་དུས་ཀྱང་ཁོས་ནད་འབུ་དཔྱད་ཞིབ་པ་ཞིག་ཆེད་དུ་མི་མང་གི་འཕྲོད་བསྟེན་གནས་སྟངས་བརྟག་དཔྱད་བྱེད་པར་གཏོང་དོན་ཅི་ཡིན་སྐོར་ལ་དོགས་གཞི་བྱུང་བ་མ་ཟད། སྐབས་དེར་ཁོ་ལ་རྒྱ་ནག་གིས་ཤར་ཊུ་ཀི་སི་ཐན་ཁུལ་དུ་ནད་འབུ་འགོས་ཁྱབ་ཏུ་གཏོང་གི་ཡོད་པའམ། ཡང་ན་ནད་འབུས་མི་ལ་ཤུགས་རྐྱེན་ག་འདྲ་སྤྲོད་ཀྱི་ཡོད་མེད་ཞིབ་འཇུག་བྱས་པའི་དོགས་གཞི་བྱུང་ཡོད་པ་རེད།

ཉེ་ལམ་ཨ་རིའི་གསང་བའི་ལས་ཁུངས་ཀྱིས་སྙན་ཐོ་བཏོན་པའི་ནང་། ཕྱི་ལོ་ ༢༠༡༩ ལོར་རྒྱ་ནག་གི་གྲོང་ཁྱེར་ཝུའུ་ཧན་དུ་རྟེན་གཞི་བྱས་པའི་ཝུའུ་ཧན་ནད་འབུ་ཚན་རིག་བརྟག་དཔྱད་ཁང་ (The Wuhan Institute of Virology) གི་ཉམས་ཞིབ་པ་རྣམས་ལ་ཏོག་དབྱིབས་གཉན་རིམས་འགོས་ཁྱབ་ཀྱི་གནས་སྟངས་འོག་ནས་ནད་པར་གྱུར་བ་ཡིན་མིན་གསལ་འདོན་ཐུབ་མེད་ནའང་། སྙན་ཐོ་དེས་ཏོག་དབྱིབས་གཉན་རིམས་ཀྱི་འབྱུང་ཁུངས་ཐད་རྩོད་གླེང་མང་པོ་བྱུང་གི་ཡོད་པ་ཏོག་ཙམ་ཞི་འཇམ་དུ་བཏང་ཡོད་པ་དང་། ད་དུང་ཡང་ཕྱོགས་གཏོགས་པ་ཕན་ཚུན་གདོང་ཐུག་དང་། ཞིབ་འཇུག་མུ་མཐུད་བྱས་བཞིན་པ། ཏོག་དབྱིབས་གཉན་རིམས་ཇི་ལྟར་ཁྱབ་གདལ་ཕྱིན་པའི་དྲི་བ་ཁག་སྔར་བཞིན་ཚ་ཚ་འུར་འུར་གྱི་རྩོད་གླེང་ཞིག་ཆགས་ཡོད་ལ། ཉམས་ཞིབ་པ་ཁྲའོ་ཧྲའོ་ཡིས་ཏོག་དབྱིབས་གཉན་རིམས་ཀྱི་འབྱུང་ཁུངས་རྒྱ་ནག་ཡིན་སྐོར་བརྗོད་པ་དེ་ལ་ཞིབ་འཇུག་དང་། ཏོག་དབྱིབས་ཀྱི་འབྱུང་ཁུངས་སད་སི་(SARs)ནད་འབུ་བཟོ་སྐྲུན་གྱི་དགོས་དམིགས་སོགས་ངེས་པར་རྩད་གཅོད་གཏོང་གལ་ཆེ་སྐོར་སོགས་བརྗོད་འདུག

འཛམ་གླིང་གི་ཡུལ་ཕྱོགས་གང་སར་ཏོག་དབྱིབས་གཉན་རིམས་འགོས་ཁྱབ་ཤུགས་ཆེན་ཕྱིན་ནས། ད་བར་མི་གྲངས་ས་ཡ་ ༦༩༠(༦༩༠༩༡༣༣༠༥) ལྷག་ལ་ནད་འབུ་འགོས་ཡོད་པ་དང་། མི་གྲངས་ས་ཡ་ ༦ ལྷག་འདས་གྲོངས་སུ་ཕྱིན་ནས་མི་རྒྱུ་གཉིས་ལ་གནོད་འཚེ་ཤུགས་ཆེན་ཐེབས་ཡོད་པ་རེད། ཕྱི་ལོ་ ༢༠༢༠ ཟླ་ ༡༢ ཚེས་ ༣༡ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱིས། ཨ་རི་དང་འཇར་མན། སྦེལ་ཇམ། ཁོ་རོ་ཤི་ཡ་དང་ཨཡེ་རི་ལེན་ཌི་བཅས་ཀྱིས་བཟོས་པའི་ (Pfizer/BioNTech)འགོག་ཁབ་ལ་ངོས་ལེན་དང་བེད་སྤྱོད་ཀྱི་ཆོག་མཆན་ཐོབ་སྟེ། འཛམ་གླིང་གི་ཏོག་དབྱིབས་འགོག་ཁབ་ཨང་དང་པོར་གྱུར་ཡོད་འདུག ཕྱི་ལོ་ ༢༠༢༡ ཟླ་ ༡ ཚེས་ ༢༩ ཉིན་རྒྱ་གར་གྱི་(Oxford/AstraZeneca)ལ་ངོས་ལེན་ཆོག་མཆན་ཐོབ་ཡོད་འདུག ད་ལྟའི་ཆར་རྒྱ་གར་གྱི་ (COVOVAX) དང་ (Covishield)། (Bharat Biotech) ཡིས་བཟོ་སྐྲུན་བྱས་པའི་ (Covaxin)། ཨ་རིའི་ (Nuvaxovid)།  (Moderna)།  སྦེལ་ཇམ་ནང་རྟེན་གཞི་བྱས་པའི་ཨ་རིའི་ཇེན་སན་སྨན་རིགས་བཟོ་སྐྲུན་ཁང་( Janssen Pharmaceuticals) གིས་བསྐྲུན་པའི་  (johnson & johnson)།  རྒྱ་ནག་གི་ (Convidecia)དང་ (Covilo) (CoronaVac) བཅས་འགོག་ཁབ་ཁྱོན་ ༡༡ ལ་ངོས་ལེན་ཆོག་མཆན་ཐོབ་སྟེ་བེད་སྤྱོད་གཏོང་བཞིན་འདུག

གསར་འགོད་པ། བསྟན་འཛིན་ཕུར་བུ།