༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རི་སྐུ་ཚབ་ཚོགས་ཆུང་ལ་མཇལ་འཕྲད་གནང་བར་རྒྱ་ནག་གཞུང་གིས་རྒྱ་ནག་གི་ནང་སྲིད་ལ་ཐེ་གཏོགས་བྱས་ཚུལ་བརྗོད་དེ་རྒོལ་གཏམ་བསྒྲགས་པ་མ་ཟད་ཨ་རིའི་བོད་དོན་དམིགས་བསལ་འབྲེལ་མཐུད་པ་ནམ་ཡང་ངོས་ལེན་བྱེད་ཀྱི་མེད་ཚུལ་བསྒྲགས།
ཁ་སང་ཕྱི་ཚེས་ ༡༠ ཉིན་རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གིས། ༧གོང་ས་རྒྱལ་བ་རིན་པོ་མཆོག་ནས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་རཱ་ཛེ་ཡཱ་(Uzra Zeya)་མཆོག་གིས་སྣེ་ཁྲིད་པའི་ཨ་རིའི་ལྡི་ལིའི་གཞུང་ཚབ་ཆེན་མོ་ཨེ་རི་ཁི་གྷར་སེ་ཌ་ཌི་(Eric Garcetti) ལགས་དང་། ཨ་རིའི་རོགས་དངུལ་ཐེབས་རྩ་ཁང་གི་ཨེ་ཤ་ཡའི་སྡེ་ཚན་འགན་འཛིན་ཨན་ཇཱ་ལི་ཀྰུལ་(Anjali Kaul) ལགས་སོགས་ཀྱི་ཨ་རིའི་ཆེས་མཐོའི་སྐུ་ཚབ་ཚོགས་ཆུང་དང་མཇལ་འཕྲད་གནང་བའི་སྐོར་ལ་ངོ་རྒོལ་བསྒྲགས་གཏམ་ཞིག་སྤེལ་བའི་ནང་། བོད་ཀྱི་གནད་དོན་ནི་རྒྱ་ནག་ནང་ཁུལ་གྱི་གནད་དོན་ཞིག་ཡིན་པས། རྒྱལ་ཁབ་གཞན་གྱིས་རྒྱ་ནག་ནང་དུ་ཐེ་གཏོགས་བྱེད་པའི་ཐོབ་ཐང་མེད། ལྕམ་ཨུ་ཛི་རཱ་ཛེ་ཡཱ་ཡི་བོད་དོན་དམིགས་བསལ་འབྲེལ་མཐུད་པའི་ལས་གནས་དེ་ནི་ཨ་རིས་རྒྱ་ནག་གི་ནང་སྲིད་ལ་ཐེ་གཏོགས་བྱེད་པར་དམིགས་པའི་ཆབ་སྲིད་ཀྱི་ངན་ཇུས་ཤིག་ཡིན་པས། རྒྱ་ནག་གཞུང་གིས་དེ་ལ་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་པ་མ་ཟད། ངོས་ལེན་གཏན་ནས་བྱེད་ཀྱི་མེད། ཅེས་བསྒྲགས་འདུག
ད་དུང་བསྒྲགས་གཏམ་ནང་༧གོང་ས་མཆོག་ནི་ཆོས་ཕྱོགས་ཀྱི་དབུ་ཁྲིད་ཙམ་ཞིག་མིན་པར་རྒྱ་ནག་ཁ་བྲལ་གཏོང་བའི་བཙན་བྱོལ་སྲིད་དོན་པ་ཞིག་ཡིན་ལ། བཙན་བྱོལ་བོད་གཞུང་ཡང་རྒྱ་ནག་གཞུང་གི་རྩ་ཁྲིམས་དང་ཡོངས་སུ་འགལ་བའི་ཆབ་སྲིད་ཁ་བྲལ་རིང་ལུགས་པའི་ཚོགས་པ་ཞིག་ཡིན་ཚུལ་དང་། ཨ་རིའི་གཞུང་གིས་བོད་དེ་རྒྱ་ནག་གི་ཆ་ཤས་ཡིན་པ་ཤེས་རྟོགས་ཡོད་པའི་ཐོག རྒྱ་ནག་ནང་ཁུལ་གྱི་གནད་དོན་ལ་བོད་དོན་དུ་སྙད་འདོགས་བྱས་ནས་རྒྱ་ནག་ཁ་བྲལ་གཏོང་བའི་བྱ་སྤྱོད་ལ་རྒྱབ་སྐྱོར་མ་བྱེད་ཅེས་རྒོལ་གཏམ་བསྒྲགས།
ཟླ་འདིའི་ཕྱི་ཚེས་ ༨ ཉིན་༧གོང་ས་མཆོག་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བཀའ་དྲིན་བསྐྱངས་སྐབས་གསར་འགོད་པར་བཀའ་ལན་གནང་བའི་ནང་དུ། ངོས་ཀྱིས་ག་དུས་ཡིན་ཡང་རྒྱ་ནག་དང་མཉམ་དུ་་འབྲེལ་མོལ་བྱ་རྒྱུར་གྲ་སྒྲིག་ཡོད། རྒྱ་ནག་གིས་བོད་མི་ཡོངས་ཀྱི་འགྱུར་བ་མེད་པའི་སྙིང་སྟོབས་ཤེས་ཐུབ་ཀྱི་ཡོད། ང་ཚོས་རང་བཙན་རྩོད་ཀྱི་མེད་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ནང་དུ་སྡོད་རྒྱུ་ཡིན་པ་ལོ་མང་པོའི་སྔོན་ནས་ཐག་བཅད་ཡོད་པས། ངོས་ཀྱིས་རྒྱ་ནག་དང་གྲོས་མོལ་བྱ་རྒྱུར་གྲ་སྒྲིག་ཨང་གསར་ཡིན་ལ། རྒྱ་ནག་གི་གཞུང་ཁུངས་དང་གཞུང་ཁུངས་མིན་པ་གཉིས་ཀྱི་ལམ་ནས་ངོས་ལ་འབྲེལ་བ་བྱས་ཡོང་གི་འདུག ཅེས་བཀའ་སྩལ་འདུག
༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་ཉིན་མོར་ཨ་རིའི་ཕྱི་སྲིད་དྲུང་ཆེ་ཨན་ཐོ་ནེ་བྷི་ལིན་ཁེན་(Antony Blinken) མཆོག་གིས་ཨ་རིའི་ཕྱི་སྲིད་ལྷན་ཁང་གི་དྲ་ཚིགས་ཐོག་ཏུ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༨ ལ་ཕེབས་པར་སྙིང་ཐག་པ་ནས་བཀྲ་ཤིས་བདེ་ལེགས་ཞུ། འདི་ནི་བོད་མི་ཡོངས་ཀྱི་བཀྲ་ཤིས་དོན་འགྲུབ་ཀྱི་ཉིན་མོ་ཞིག་རེད། མགོན་པོ་གང་ཉིད་ཀྱི་ཕངས་པ་མེད་པའི་བྱམས་བརྩེས་འཛམ་གླིང་ཡོངས་སུ་བློ་སྤོབས་བསྐྲུན་ཡོད་པ་མ་ཟད། ༧གོང་ས་མཆོག་གི་འཚེ་བ་མེད་པ་དང་ཞི་བདེའི་དམ་བཅའ་ལ་ངས་སེམས་གཏིང་ནས་རྗེས་སུ་ཡི་རངས་ཞུ་བཞིན་ཡོད། དེ་རིང་གི་ཉིན་མོ་འདི་ནི་༧མགོན་པོ་གང་ཉིད་ཀྱི་བྱམས་སྙིང་རྗེ་དང་བཟོད་པའི་ཐུགས་རེ་ཡིས་བོད་མི་ཡོངས་དང་། འཛམ་གླིང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པར་ཁས་ལེན་བྱེད་པའི་ཉིན་མོ་ཞིག་ཀྱང་ཡིན། ཨ་རིའི་གཞུང་ངོས་ནས་བོད་ཀྱི་ངོ་བོ་མཚོན་པའི་སྐད་ཡིག་དང་། རིག་གཞུང་། ཆོས་ལུགས་སྲུང་སྐྱོབ་བྱེད་པ། གནོན་ཤུགས་ཅི་ཡང་མེད་པར་རང་དབང་གི་ཐོག་ནས་ཆོས་ཕྱོགས་ཀྱི་དབུ་ཁྲིད་འོས་འདེམས་དང་དད་མོས་བྱེད་པར་འགྱུར་བ་མེད་པའི་རྒྱབ་སྐྱོར་བརྟན་པོ་བྱ་རྒྱུ་ཡིན་ཞེས་གསུངས་ཡོད་པ་རེད།
གསར་འགོད་པ། བྱམས་པ་ཚེ་རིང་།
