ལྷོ་ཀོ་རི་ཡའི་ནང་ས་རུད་དང་ཆུ་ལོག་གི་གནོད་སྐྱོན་བྱུང་སྟེ་མི་གྲངས་ ༤༠ རྐྱེན་འདས་སུ་ཕྱིན་པར་བརྟེན། རྒྱལ་ཡོངས་སུ་དམག་མི་འགྲམ་འཇོག་བྱས་ཏེ་མི་མང་གི་བདེ་འཇགས་སྲུང་སྐྱོབ་བྱེད་ཀྱི་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་བའི་ཉིན་ཤས་རིང་ཨེ་ཤ་ཡའི་རྒྱལ་ཁབ་ལྷོ་ཀོ་རི་ཡའི་ནང་ཆར་བ་ཤུགས་ཆེན་བབས་པར་བརྟེན། ལྷོ་ཀོ་རི་ཡ་རྒྱལ་ཡོངས་སུ་ཆུ་ལོག་དང་ས་རུད་རྒྱུགས་ཏེ། དེ་རིང་ཕྱི་ཚེས་ ༡༧ བར་མི་གྲངས་ ༤༠ རྐྱེན་འདས་སུ་ཕྱིན་པ་དང་། མི་གྲངས་ ༦༤༠༠ ཙམ་གནས་སྤོ་བྱེད་དགོས་བྱུང་ཡོད་འདུག
ཐེངས་འདིའི་ཆུ་ལོག་གི་གནོད་སྐྱོན་ཁྲོད་ལྷོ་ཀོ་རི་ཡའི་ལྷོ་ཤར་མངའ་སྡེ་ (Gyeongsang) ནང་གི་མི་གྲངས་ ༡༩ དང་། དབུས་གྲོང་ཁྱེར་ (Cheongju) གྱི་རིང་ཚད་ལ་མེ་ཊར་ ༦༨༥ ལྡན་པའི་ས་འོག་ཕུག་ལམ་ཞིག་གི་ནང་མི་གྲངས་ ༡༣ བཅས་རྐྱེན་འདས་སུ་ཕྱིན་ཡོད་པ་མ་ཟད། ཕུག་ལམ་དེའི་ནང་ད་དུང་མི་ ༩ ཆུ་ལོག་གི་རྐྱེན་གྱིས་ཕྱིར་འཐོན་མ་ཐུབ་པར་ལྷག་ཡོད་སྟབས། ལྷོ་ཀོ་རི་ཡ་གཞུང་གིས་ཆུ་འོག་མྱུར་སྐྱོབ་མི་སྣ་ཆེད་མངགས་ཀྱིས་སྐྱོབ་ཐབས་བྱེད་བཞིན་ཡོད་པ་རེད།
ལྷོ་ཀོ་རི་ཡའི་སྲིད་འཛིན་ཡོན་སིག་ཡེལ (Yoon Suk-yeol) ལགས་ཀྱིས། གནམ་གཤིས་འགྱུར་ལྡོག་གི་གནས་སྟངས་འོག རང་བྱུང་ཆགས་འཇིག་གི་གནས་ཚུལ་མང་པོ་ཞིག་བྱུང་དང་འབྱུང་སྲིད་སྟབས། ལྷོ་ཀོ་རི་ཡས་རྒྱལ་ཡོངས་སུ་རང་བྱུང་གོད་ཆག་ལ་གྲ་སྒྲིག་དང་གདོང་ལེན་བྱེད་དགོས་པའི་འབོད་སྐུལ་ཞུས་འདུག
ད་ལྟ་ལྷོ་ཀོ་རི་ཡའི་མི་མང་གིས་སྤྱི་ཚོགས་བརྒྱུད་ལམ་ཁག་ཏུ་ཕུག་ལམ་དུ་བྱུང་བའི་གནས་ཚུལ་དེ་གླེང་སློང་ཤུགས་ཆེན་བྱས་སྟབས། གནས་ཚུལ་དེ་ནི་རྒྱལ་ཡོངས་ཀྱི་གནད་དོན་ཞིག་ཏུ་གྱུར་ཡོད་པ་དང་། མྱུར་སྐྱོབ་རུ་ཁག་གིས་ཕུག་ལམ་ནང་ལུས་པའི་མི་མང་སྐྱོབ་ཐབས་བྱེད་བཞིན་ཡོད་འདུག་ལ། རེས་གཟའ་སྤེན་པའི་ཉིན་ཐོག་མར་ཕུག་ལམ་ནང་ཆུ་ལོག་རྒྱུག་སྐབས། སྤྱི་སྤྱིད་རླངས་འཁོར་གཅིག་ཚུད་པའི་རླངས་འཁོར་ཁྱོན་ ༡༥ ལྷག་ཕུག་ལམ་ནས་ཕྱིན་འཐོན་མ་ཐུབ་པར་ལྷག་ཡོད་པ་རེད།
འདི་ལོའི་ཆར་དུས་ནི་ལྷོ་ཀོ་རི་ཡའི་ལོ་རྒྱུས་ནང་ཆེས་དཀའ་ཁག་འཕྲད་པའི་ཆར་དུས་ཤིག་ཆགས་ཡོད་པ་དང་། རྒྱལ་ཡོངས་སུ་ས་རུད་དང་ཆུ་ལོག་རྒྱུགས་ཏེ། སྡོད་ཁང་དང་འགྲོ་ལམ། གློག་ལམ་སོགས་གཏོར་སྐྱོན་བཟོས་ཡོད་ཅིང་། བྱང་ཕྱོགས་མངའ་སྡེ་ (Chungcheong) ཉེ་འགྲམ་གྱི་ཆུ་མཛོད་ཅིག་འཕྱུར་ཉེན་ཡོད་པར་བརྟེན། དེའི་ཉེ་འཁྲིས་ཀྱི་ཁྱིམ་ཚང་ ༦༤༠༠ འཕྲལ་མར་གནས་སྤོ་བྱས་ཡོད་པ་དང་། ད་ལྟ་ལྷོ་ཀོ་རི་ཡ་གཞུང་ངོས་ནས་རྒྱལ་ཡོངས་སུ་དམག་མི་འགྲམ་འཇོག་བྱས་ཏེ་མི་མང་གི་བདེ་འཇགས་སྲུང་སྐྱོབ་བྱེད་ཀྱིན་ཡོད་འདུག
གསར་འགོད་པ། སྐལ་བཟང་སྦྱིན་པ།
