དཀྱིལ་འཁོར་སོགས་བཙན་གྱིས་གཏོར་ཏེ་དུས་འཁོར་དབང་ཆེན་གློ་བུར་དུ་བཀག་འདུག

བོད་མཚོ་སྔོན་ཞིང་ཆེན་མང་རྫོང་མགོ་མང་གྲོང་ཚོ་ས་རྨད་བཞི་སྡེ་བར༧སྐྱབས་རྗེ་ཨ་ཐིས་སྐལ་བཟང་བཀྲ་ཤིས་རྒྱ་མཚོ་མཆོག་གིས་དཔལ་དུས་འཁོར་ལོའི་དབང་ཆེན་གནང་བར་རྒྱ་ནག་གཞུང་གིས་ཆོག་མཆན་རྩིས་མེད་བཏང་སྟེ་བཀག་ཡོད་པ་མ་ཟད་དུས་དབང་གོ་སྒྲིག་པ་རྣམས་འདྲི་རྩད་བཀག་ཉར་འོག་བཞག་འདུག

ཟླ་འདིའི་ཕྱི་ཚེས་ ༢༠ ནས་ ༢༣ བར་དུ་བོད་མཚོ་སྔོན་ཞིང་ཆེན་མང་རྫོང་མགོ་མང་གྲོང་ཚོ་ས་རྨད་བཞི་སྡེ་བ་རུ། ༧སྐྱབས་རྗེ་ཨ་ཐིས་སྐལ་བཟང་བཀྲ་ཤིས་རྒྱ་མཚོ་མཆོག་གིས་དཔལ་དུས་འཁོར་ལོའི་དབང་ཆེན་གནང་གཏན་འཁེལ་ཏེ། བླ་མ་གདན་འདྲེན་ཞུས་ཏེ་ཆོས་ཞུ་བ་ཁྲི་ཕྲག་འགའ་འཛོམས་ཀྱི་ཡོད་ཀྱང་། ཁ་སང་ཞོགས་སྔ་ནམ་ལངས་མ་ལངས་ཙམ་ལ་ས་གནས་མགོ་འཁྲིད་དང་ཉེན་རྟོག་པ་སོགས་ཡོང་སྟེ། བླ་མ་བཙན་གྱིས་ཕྱིར་ཕེབས་བཅུག་ཡོད་པ་མ་ཟད། དུས་དབང་གོ་སྒྲིག་པ་རྣམས་འདྲི་རྩད་བཀག་ཉར་འོག་བཅུག་སྟེ། དུས་དབང་གི་དཀྱིལ་འཁོར་ཐོག་ཆུ་བླུགས་ཏེ་གཏོར་བཤིག་གཏོང་སྐབས། ཆོས་ཞུ་བ་མང་པོས་བཀག་འགོག་དང་། མུ་མཐུད་དུ་དུས་དབང་འཚོགས་བཅུག་པའི་རེ་སྐུལ་ཞུ་སྐབས་མི་མང་ལ་གཅར་རྡུང་བཏང་བ་དང་། དེ་ནས་མི་མང་གི་སྡོད་གུར་ཁུལ་དུ་ཕྱིན་ཏེ་དུས་དབང་འཚོགས་རྒྱུ་མིན་པས། མི་མང་ཚང་མར་རང་ཡུལ་དུ་ལོག་དགོས་པའི་བཙན་བཀའ་བཏང་ནས་དུས་དབང་གློ་བུར་དུ་འཚོགས་བཅུག་མི་འདུག

དེའི་སྐོར་འདི་ག་བོད་ཀྱི་དུས་བབ་གསར་འགོད་པར་འབྲེལ་ཡོད་བོད་མི་ཞིག་གིས། ༧སྐྱབས་རྗེ་ཨ་ཐིས་རིན་པོ་ཆེའི་དུས་འཁོར་དབང་ཆེན་དེ་ནི་དེ་གའི་མི་མང་གིས་ལོ་མང་པོའི་སྔོན་ནས་རྒྱ་ནག་གཞུང་ལ་རེ་ཞུ་བྱས་ཏེ་ཆོག་མཆན་ཐོབ་པ་བརྒྱུད་གོ་སྒྲིག་ཞུས་པ་ཞིག་ཡིན་ལ། ད་ལན་ཉིན་གྲངས་ལྔ་རིང་གི་དུས་འཁོར་དབང་ཆེན་གྲ་སྒྲིག་ཆ་ཚང་ཞུས་ཚར་བ་དང་། ཐག་རིང་གི་ཆོས་ཞུ་བ་ཕལ་ཆེར་བ་འབྱོར་ཚར་བའི་གནས་སྟངས་ཆགས་ཡོད་ལ། ཁ་སང་ཁེ་ཉིན་དུས་འཁོར་དབང་ཆེན་གྱི་སྟ་གོན་ཡིན་ཡང་། ཁ་སང་ཞོགས་པ་ནམ་ལངས་མ་ལངས་ཙམ་ལ་རྒྱ་ནག་གཞུང་གིས་དུས་འཁོར་དབང་ཆེན་འཚོག་མི་ཆོག་པའི་བཀའ་བསྒྲགས་པར་བརྟེན། དད་ལྡན་རོང་འབྲོག་མང་ཚོགས་ཁྲི་ཁ་ཤས་ཀྱི་སེམས་ལ་དཀའ་ངལ་འཕྲད་ཀྱི་ཡོད་པ་མ་ཟད། དུས་དབང་གི་སྐབས་སུ་གུར་སོགས་ཀྱི་གྲ་སྒྲིག་ཚང་མ་བྱས་ཟིན་ཡོད་པས། དཔལ་འབྱོར་གྱི་གྱོང་གུད་ཀྱང་ཆེན་པོ་ཐེབས་ཀྱི་འདུག དུས་འཁོར་དབང་ཆེན་ཞུ་སའི་ས་ཆ་གཅིག་པུར་རྒྱ་སྒོར་ཁྲི་ ༢༠༠ ལྷག་སྤྲད་དགོས་ཀྱི་ཡོད་སྐོར་བརྗོད་བྱུང་།

ཡང་ཁོང་གིས་རྒྱ་ནག་གཞུང་གིས་སྤྱིར་ཆོས་ལུགས་དད་མོས་རང་དབང་ཡོད་ཟེར་གྱི་ཡོད་ཀྱང་། དང་པོ་བླ་མ་དང་བཅས་པར་དུས་དབང་འཚོགས་ཆོག་ལུགས་བཤད་དེ་མགོ་བསྐོར་བཏང་ཡོད་པ་དང་། སང་ཉིན་དུས་དབང་གཏན་འཁེལ་བའི་དེ་རིང་བཀག་འགོག་བྱས་པ་ཡིན་ན་ཆོས་ལུགས་དད་མོས་རང་དབང་གཏོར་བཤིག་བཏང་བ་རེད། རྒྱ་ནག་གཞུང་གི་ཁྲིམས་ཐོག་ནས་ཆོག་མཆན་ཐོབ་ཡོད་པ་ཡང་རྩིས་མེད་བཏང་བ་རེད་ཅེས་འགྲེལ་བརྗོད་གནང་བྱུང་།

འབྲེལ་ཡོད་ཁག་ཅིག་གིས། སྤྱིར་བཏང་ད་ལན་གྱི་དུས་དབང་གནང་རྒྱུར་ཞིང་ཆེན་ནས་ཆོག་མཆན་སྤྲད་ཡོད་ཀྱང་། དུས་དབང་གི་བླ་མ་ཕེབས་བསུའི་བརྙན་སོགས་སྤྱི་ཚོགས་དྲ་ལམ་དུ་ཤུགས་ཆེན་ཁྱབ་པར་བརྟེན། གློ་བུར་དུ་བརྙན་ཐུང་རྣམས་སྤྱི་ཚོགས་དྲ་ལམ་ནས་བཀག་ཡོད་པ་མ་ཟད། དབུས་གཞུང་རང་ནས་དུས་དབང་གནང་མི་ཆོག་པའི་བཀའ་ཕབ་ཡོད་སྐོར་དང་། ཡང་མང་ཚོགས་ནང་དུ་དུས་དབང་བཀག་པ་དེ་བོད་ཁུལ་གྱི་བླ་མ་ཕན་ཚུན་བར་གྱི་དཀའ་རྙོག་རེའང་ཡིན་སྲིད་པའི་དཀྲོག་གཏམ་ཞིག་ཀྱང་སྤེལ་བཞིན་ཡོད་འདུག

༧སྐྱབས་རྗེ་ཨ་ཐིས་རིན་པོ་ཆེ་སྐལ་བཟང་བཀྲ་ཤིས་རྒྱ་མཚོ་མཆོག་ནི་བོད་མཚོ་སྔོན་པོའི་རྐང་ཚ་རྫོང་ཆོས་ཚ་སྡེ་བ་རུ་སྐུ་འཁྲུངས་ཞིང་། དགུང་ལོ་ཆེ་ཙམ་ཕེབས་རྗེས་ཨ་ཐིས་རིན་པོ་ཆེ་སྐུ་ཕྲེང་བདུན་པར་ངོས་འཛིན་ཞུས་ཏེ་ཕྱི་ལོ ༡༩༩༢ ལོར་ཨ་ཐི་དགོན་དུ་ཁྲི་སྟོན་མཛད་དེ།  སྔ་རྗེས་སུ་སྐུ་འབུམ་དགོན་པ་དང་། བླ་བྲང་བཀྲ་ཤིས་འཁྱིལ་སོགས་སུ་བསླབ་པ་སློབ་གཉེར་གནང་ཡོད་འདུག ཁོང་ནི་མདོ་སྨད་མང་རྫོང་གི་བློ་རྒྱ་དང་། ཚ་ནག ཇོ་སེར། རུ་སྔོན་བཅས་སྡེ་བ་བཞིའི་དུད་ཚང་ ༢༠༠༠ ཡས་མས་ཀྱི་རྩ་བའི་བླ་མ་ཡིན་འདུག ད་ལན་དུས་དབང་ཞུ་པར་བོད་མཚོ་སྔོན་ཞིང་ཆེན་དང་སི་ཁྲོན་ཞིང་ཆེན་གྱི་ཁོངས་ནས་དད་ལྡན་དོན་གཉེར་ཅན་ཁྲི་ ༤ ཡས་མས་འཛོམས་རྒྱུ་ཡིན་པའི་ཚོད་དཔག་བྱས་འདུག་ལ། ཚོང་ལས་འདྲ་མིན་གཉེར་མཁན་གྱི་ཚོང་གུར་ཁོ་ན་སྟོང་ཕྲག་གཅིག་བརྒལ་བ་ཡོད་སྟབས། གློ་བུར་དུ་དུས་དབང་བཀག་འགོག་བྱས་རྗེས་སྤྱི་ཚོགས་དྲ་ལམ་སོགས་ན། དུས་དབང་ཆེད་བག་ལེབ་དང་ཞོ་འོ་མ། ཚོང་རྫས་སྣ་ཚོགས་འབོར་ཆེན་གྲ་སྒྲིག་བྱས་པ་རྣམས་འཕྲོ་བརླག་ཏུ་ཕྱིན་ཏེ་གྱོང་གུད་ཆེན་པོ་ཐེབས་ཀྱི་ཡོད་སྐོར་གླེང་སློང་བྱེད་ཀྱི་འདུག

གསར་འགོད་པ། བྱམས་པ་ཚེ་རིང་།