མི་ཚང་མ་སྤྱི་ཚོགས་ལ་བརྟེན་ནས་འཚོ་དགོས་སྟབས་བསམ་བློ་དང་བསམ་ཚུལ་མ་མཐུན་པ་རྐྱེན་དུ་བྱས་ནས་འཁྲུག་པ་བརྒྱག་རྒྱུའི་འོས་བབ་མེད་སྐོར་བླང་དོར་བཀའ་སློབ་བསྩལ།
དེ་རིང་ནས་ཉིན་གྲངས་གསུམ་རིང་༸གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་རྒྱལ་ས་གླེའི་གསུང་ཆོས་ར་བ་རུ། དད་ལྡན་མང་ཚོགས་ཁྲི་ཕྲག་འགར་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་བཀའ་ཆོས་དབུ་འཛུགས་མཛད་སོང་། དེ་རིང་བཀའ་ཆོས་ཀྱི་ཉིན་དང་པོར་༸གོང་ས་རྒྱལ་བ་རིན་པོ་ཆེ་མཆོག་ནས། འཛམ་གླིང་གི་ཆོས་ལུགས་ཚང་མར་རང་རང་གི་ལྟ་གྲུབ་མི་འདྲ་རེ་ཡོད་པ་ཙམ་ལས། ཚང་མའི་མཐར་ཐུག་དང་དམིགས་འབེན་གཅིག་མཚུངས་ཡིན་པས། ཆོས་ལུགས་ཚང་མས་མཐུན་སྒྲིལ་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།
༸གོང་ས་རྒྱལ་བ་རིན་པོ་ཆེ་མཆོག་ནས། ཆོས་ལུགས་ཚང་མས་གཞན་ལ་ཕན་པ་དང་། བརྩེ་བ་བྱ་དགོས་པར་བཤད་ཀྱི་ཡོད་རེད། ངོས་རང་གིས་ཆོས་ལུགས་ཚང་མར་རྗེས་སུ་ཡི་རངས་དང་ཡག་པོ་རེད་བསམ་པའི་ངོས་འཛིན་བྱེད་བསྡད་ཀྱི་ཡོད། ངོས་རང་གིས་ཆོས་ལུགས་ཚང་མར་གུས་ཞབས་དང་བརྩི་མཐོང་བྱས་པ་ལ་བརྟེན་ནས། ངོས་རང་ལུང་པ་འདྲ་མི་འདྲར་འགྲོ་བསྡད་པའི་སྐབས་སུ། ཆོས་ལུགས་འདྲ་མི་འདྲའི་ལྷ་ཁང་ལ་འགྲོ་བསྡད་ཀྱི་ཡོད་ལ། ཆོས་ལུགས་ཚང་མར་མོས་གུས་བྱེད་ཀྱི་ཡོད། ཆོས་ལུགས་མི་འདྲ་བ་རྐྱེན་དུ་བྱས་ནས་འཁྲུག་པ་རྒྱག་པའི་རྐྱེན་ལ་འགྲོ་རྒྱུ་དེ་ནི་ཧ་ལས་པའི་སེམས་སྐྱོ་བོ་དང་བློ་ཕམ་པོ་རེད། ཆོས་ལུགས་ཚང་མས་གཞན་ཕན་བསྒྲུབ་རྒྱུ་དེ་གསུང་གི་ཡོད་རེད་དེ། ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་ང་རང་ཚོ་ཕན་ཚུན་འཁྲུག་པ་རྒྱག་རེས་བྱས་པ་དེ་ཧ་ཅང་བློ་ཕམ་པོ་རེད། བྱས་ཙང་ངོས་རང་གིས་ཆོས་ལུགས་ཚང་མར་གུས་ཞབས་དང་མཐུན་ལམ་ཡག་པོ་ཞིག་ཡོང་བར་འབད་བརྩོན་བྱེད་བསྡད་ཀྱི་ཡོད། ཅེས་གསུངས་སོང་།
ཡང་༸མགོན་པོ་མཆོག་ནས། ལ་དྭགས་ལ་ཆ་བཞག་ན་མང་བ་ནང་པའི་ཆོས་པ་རེད། འདིར་ཁ་ཆེ་ཆོས་ལུགས་བྱེད་མཁན་གང་ལ་གང་འཚམ་ཡོད་རེད། དུས་རབས་གསར་པའི་ནང་ཡི་ཤུའི་ཆོས་བྱེད་མཁན་གཏན་གཏན་ཡོང་གི་རེད། གནའ་རབས་ཀྱི་རྒྱ་གར་གྱི་མུ་སྟེགས་པའི་ཆོས་བྱེད་མཁན་ཡང་ཡོད་རྒྱུ་རེད། རང་རང་སོ་སོས་ཆོས་དད་བྱེད་སྟངས་དང་འགྲེལ་བཤད་དེ་མི་འདྲ་བ་ཡོད་རེད་དེ། ཆོས་ལུགས་ཚང་མས་གཅིག་གྱུར་གྱིས་མི་ལ་ཕན་བདེ་བྱ་རྒྱུ། སྤྱི་ཚོགས་སུ་ཞབས་འདེགས་བསྒྲུབ་རྒྱུའི་བསླབ་བྱ་གཅིག་པ་ཡོད་རེད་ལ། འཛམ་བུ་གླིང་འདིའི་སྒང་ལ་མཐོང་ཆོས་སུ་ཡི་ཤུའི་ཆོས་པ་དེ་འདྲས་དངོས་གནས་དྲང་གནས་སྨན་བཅོས་བྱ་རྒྱུས་མཚོན་པའི་སློབ་སྦྱོང་སོགས་ཀྱི་ཐོག་ལ་རོགས་པ་ཞེ་དྲགས་བྱེད་ཀྱི་ཡོད་རེད། ངོ་མཚར་སྐྱེས་ཡ་རེད། དེ་བཞིན་ཁ་ཆེའི་ཆོས་པ་ཚོའང་ཞེ་དྲགས་ཡག་པོ་ཡོད་རེད། མུ་སྟེགས་པ་ཚོའང་གཞན་ཕན་བསྒྲུབ་རྒྱུར་ཡག་ཐག་ཆོད་ཡོད་རེད། དེ་འདྲ་ཡིན་པ་སོང་ཙང་ཆོས་ལུགས་ཚང་མས་ཐུགས་མཐུན་པོ་བྱས་ནས་གཅིག་གིས་གཅིག་ལ་ལེགས་བཤད་བླང་རེས་བྱ་དགོས། རྩ་བའི་རང་གི་ཆོས་དད་དེ་སོ་སོ་རང་གི་ཆོས་ལུགས་དེའི་སྒང་ནས་ཕྱིན། ལེགས་ཆ་དེ་ཆོས་ལུགས་གཞན་གྱི་ནང་དུའང་ཡོད་པ་ཡིན་དུས། ཆོས་ལུགས་ཚང་མས་ནང་ཚགས་བྱས་ནས། དུས་ནས་དུས་སུ་འཚོགས་ཏེ་བགྲོ་གླེང་བྱས་ན་ཡག་པོ་འདུག་པས། ངོས་རང་གིས་དེ་ལྟར་བྱེད་ཀྱི་ཡོད་རེད། ཅེས་གསུངས་སོང་།
ཡང་༸གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་ང་རང་ཚོས་མིག་གིས་མ་མཐོང་བ་མ་གཏོགས་ཡུལ་ལྷ་གཞི་བདག་དེ་ཚོའི་གྲས་ཕལ་ཆེར་འདིར་ཡོད་པའི་ཚོར་བ་ཞིག་ཡོང་གི་འདུག ཅེས་དང་། ངོས་རང་གིས་དངུལ་ཆུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་འདི་ཁུ་ནུ་བླ་མ་རིན་པོ་ཆེའི་སྐུ་མདུན་ནས་ཞུས་པ་ཡིན། དངོས་གནས་དྲང་གནས་སེམས་རྒྱུད་འདུལ་ཐབས་དང་། བྱང་ཆུབ་སེམས་ཀྱི་ཉམས་ལེན་བྱ་རྒྱུར་ཞེ་དྲགས་ཀྱི་ཕན་ཐོགས་ཆེན་པོ་རེད་འདུག ངོས་རང་ཞོགས་པ་ཡར་ལངས་མ་ཐག་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། རང་དོན་སྒྲུབ་པར་བྱང་ཆུབ་ཀྱི་སེམས་ལས་ལྷག་པ་མི་འདུག་ལ། གཞན་དོན་སྒྲུབ་པ་ལའང་བྱང་ཆུབ་ཀྱི་སེམས་ལས་ལྷག་པ་མི་འདུག རང་དོན་ལ་ཆ་བཞག་ན་བྱང་ཆུབ་སེམས་སྒོམ་ཡོང་དུས་སེམས་ལྷོད་ལྷོད་ཆགས་ནས་སེམས་ཞུམ་བསྡད་པའི་ཟོལ་ཞིག་ཁྱོན་ནས་མེད་པ། དེ་བཞིན་ལྷག་བསམ་དང་། སྙིང་སྟོབས་གཞན་དང་མི་འདྲ་བ་ཞིག་གིས་སེམས་ཅན་ཐམས་ཅད་ཀྱི་དོན་དུ་ཇི་སྲིད་ནམ་མཁའ་མ་ཟད་བར་དུ་བསྒྲུབ་བསམ་པའི་སྙིང་སྟོབས་ཤུགས་ཆེན་པོ་སྐྱེད། ཡང་སེམས་ཅན་ཐམས་ཅད་ལ་ཕན་པ་བསྒྲུབ་པ་མ་གཏོགས། རྨི་ལམ་ཚུན་ཆད་ནས་གནོད་པ་ནམ་ཡང་མི་བྱེད་བསམ་པའི་བསམ་བློ་ཞིག་གཏོང་ཡོང་དུས། འཕྲལ་དུ་སོ་སོའི་སེམས་ཞི་བདེ་ཡོང་རྒྱུ་དང་། སེམས་ཞི་བདེ་ཡོད་པའི་རྐྱེན་ལ་བརྟེན་ནས་ལུས་པོ་བདེ་ཐང་ཡོང་རྒྱུ། མཐའ་མ་གཉིད་ཉལ་དུས་ཀྱང་སྐྱིད་པོ་ཁུག་གི་རེད། ཅེས་གསུངས་སོང་།
ཡང་མགོན་པོ་གང་ཉིད་ཀྱིས། འཛམ་གླིང་ཤར་ནུབ་ལྷོ་བྱང་ཚང་མས་འཛམ་གླིང་ཞི་བདེ་ཟེར་ནས་འབོད་སྒྲ་ཞིག་ཡོང་བསྡད་ཀྱི་ཡོད་རེད། གང་ཡིན་ཟེར་ན། དམག་ཆེན་དང་པོ་དང་གཉིས་པ་སོགས་ཀྱི་ཁ་ཐུག་ལ་གོ་མཚོན་བེད་སྤྱོད་བྱས་ནས་མི་མང་པོ་སྲོག་ཐོག་དང་རྨས་སྐྱོན་ཐེབས་ནས། འཛམ་བུ་གླིང་གི་དམག་འཁྲུག་ལ་ཡིད་སུན་ཡ་ཞིག་ཆགས་བསྡད་འདུག དེ་འདྲའི་སྐབས་སུ་དམག་འཁྲུག་ཡག་པོ་མ་རེད་ཟེར་བ་ཙམ་གྱིས་ཕན་གྱི་ཡོད་པ་མ་རེད། ང་རང་ཚོའི་སེམས་ནས་རང་རྒྱལ་གཞན་ཕམ་གྱི་བློ་དེ་ཤུགས་ཆེན་པོ་བསྡད་པ་ཡིན་ན་དམག་འཁྲུག་ཡོང་གི་འདུག་ག བྱས་ཙང་འཛམ་གླིང་འདིའི་སྒང་ལ་ཡོད་པའི་མི་དུང་ཕྱུར་བདུན་ཅུ་བརྒྱད་ཅུ་ཡོད་པ་ཚང་མ་མི་གཅིག་གྱུར་ཡིན་ལ། ཚང་མ་མིའི་སྤྱི་ཚོགས་ལ་བརྟེན་ནས་འཚོ་དགོས་ཡོད་རེད། དེ་འདྲ་ཡིན་དུས་ཕྲན་བུའི་བློ་མ་མཐུན་པ་དང་བསམ་ཚུལ་ཁ་ཁ་ཡིན་པའི་རྒྱུ་མཚན་དུ་བྱས་ནས་འཁྲུག་པ་བརྒྱག་རྒྱུའི་འོས་བབ་གཏན་ནས་ཡོད་མ་རེད། ཅེས་གསུངས་སོང་།
གསར་འགོད་པ་དོན་གྲུབ་བཀྲིས་དང་དཔལ་ལྡན་གཉིས་ཀྱིས་གླེ་ནས་སྤེལ།
