༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་སྐབས་སློབ་མའི་དད་པ་དང་དམ་ཚིག་ཇི་ཙམ་སྟོབས་ཆེ་བའི་ཚོད་ཀྱིས་བླ་མ་སྐུ་ཚེ་རིང་པོར་བཞུགས་རྒྱུ་རྟེན་འབྲེལ་གྱི་ཆོས་ཉིད་ཡིན་སྐོར་སོགས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་ལ་གླེ་གསུང་ཆོས་ར་བའི་ནང་དུ་བརྟན་བཞུགས་བསྟར་འབུལ་ཞུས། ༢༠༢༣།༠༧།༢༤ དུས་བབ་ཀྱི་པར།
དེ་རིང་ལ་དྭགས་ནང་ཚོགས་དང་དགོན་ཚོགས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ཁ་སང་ཁེ་ཉིན་ཆོས་འབྲེལ་བྱས་ནས་ལེགས་འགྲུབ་བྱུང་བ་རེད། དེ་རིང་ཁྱེད་རང་ཚོས་བརྟན་བཞུགས་ཕུལ་གནང་གི་ཡོད་རེད། སློབ་མའི་དད་པ་དང་དམ་ཚིག་གཡོ་བ་མེད་པ་འདི་འདྲ་ཞིག་ཡོད་དུས། དེའི་རྟེན་འབྲེལ་གྱི་མཐུ་ལ་བརྟེན་ནས་བླ་མ་ཡང་ཚེ་རིང་པོ་བསྡད་རྒྱུ་ཕལ་ཆེར་རྒྱུ་འབྲས་ཀྱི་འབྲེལ་བ་ཞིག་ཆགས་ཡོང་གི་ཡོད་རེད། ངོས་རང་གི་རྨི་ལམ་ལ་བལྟས་ཡོང་དུས་ཕལ་ཆེར་ངོས་རང་ལོ་བརྒྱ་དང་བཅུ་གྲངས་ཤིག་བསྡད་ཐུབ་རྒྱུ་ཡིན་ཚོད་འདུག ཁྱེད་རང་ཚོས་ངོས་རང་གི་གདོང་ལ་བལྟས་ན་ངོས་རང་ལོ་བརྒྱད་ཅུ་གྱ་གྲངས་ཤིག་གི་ཟོལ་ཞིག་མཐོང་གི་མི་འདུག་ག ད་ལྟ་གཞོན་ནུ་ཞིག་འདུག་ག གང་ལྟར་ངོས་རང་ལ་དངོས་གནས་དྲང་གནས་བོད་གངས་ཅན་གྱི་ལྗོངས་ཀྱི་རྒྱ་ཆེ་མི་མང་གི་དད་པ་དང་དམ་ཚིག་གཡོ་བ་མེད་པ་བྱེད་ཀྱི་ཡོད་རེད། ས་གནས་འདི་(ལ་དྭགས) ལ་ཆ་བཞག་ན། ཁྱེད་རང་ཚོས་དད་པ་དང་དམ་ཚིག་གཡོ་བ་མེད་པ་རེད། འཛམ་གླིང་ཤར་ནུབ་ལྷོ་བྱང་གི་ནང་པ་ཡིན་མིན་ལ་མ་ལྟོས་པའི་ཏཱ་ལའི་བླ་མ་ཟེར་དུས་དངོས་གནས་དྲང་གནས་དགའ་པོ་བྱེད་མཁན་མང་པོ་ཞེ་དྲགས་ཤིག་འདུག དེ་འདྲ་ཡིན་དུས་ཕྱི་ནང་གི་རྟེན་འབྲེལ་འཛོམས་ཡོང་དུས་ངོས་རང་ཚེ་རིང་པོ་སྟེ་ལོ་བརྒྱ་དང་བཅུ་གྲངས་ཤིག་གཏན་གཏན་བསྡད་ཐུབ་ཀྱི་རེད། ཁྱེད་རང་ཚོར་དད་པ་དང་དམ་ཚིག་གཡོ་བ་མེད་པ་ཡོད་རེད། ངོས་རང་སྟོན་པ་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་གིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཙོ་བོ་ཉམས་ལེན་བྱེད་ཀྱི་ཡོད་རེད། བྱས་ཙང་ཁྱེད་རང་ཚོས་ངོས་ལ་དད་པ་དང་དམ་ཚིག་གཡོ་བ་མེད་པ་ཡིན་དུས། ཁྱེད་རང་ཚོས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ག་ཚོད་ཐུབ་ཐུབ་ཀྱིས་བསམ་བློ་ཐོངས། དེས་ཚེ་རབས་ནས་ཚེ་རབས་བདེ་ཞིང་སྐྱིད་པ་དང་། མཐར་མངོན་པར་རྫོགས་པར་སངས་རྒྱས་ཐུབ་པ་ཡོང་རྒྱུར་བརྒྱ་ཆ་བརྒྱ་ཐག་ཆོད་པ་རེད། བླ་མ་དང་སློབ་མ་དམ་ཚིག་གཡོ་བ་མེད་པ་ཞིག་ཡོད་དུས། བླ་མའི་ཚེ་རིང་པོར་བསྡད་རྒྱུར་རྟེན་འབྲེལ་འགྲིག་གི་རེད། དེ་རིང་བརྟན་བཞུགས་གནང་བར་ཐུགས་རྗེ་ཆེ། ཞེས་གསུངས་སོང་།
ཡང་མགོན་པོ་གང་ཉིད་ཀྱིས། མི་མང་གི་དད་པ་དང་དམ་ཚིག་གཡོ་བ་མེད་པ་ཞིག་རེད། སློབ་མའི་དད་པ་དང་དམ་ཚིག་ཇི་ཙམ་སྟོབས་ཆེ་བའི་ཚོད་ཀྱིས་བླ་མའི་ཚེ་རིང་པོར་གནང་རྒྱུ་རྟེན་འབྲེལ་གྱི་ཆོས་ཉིད་རེད། མི་མང་གིས་རྩེ་གཅིག་པའི་དད་པ་དང་དམ་ཚིག་གཡོ་བ་མེད་པ་ཞིག་རེད། དེའི་མཐུ་ལས་བླ་མའི་ཚེ་རིང་པོར་གནས་རྒྱུར་ངོས་རང་ལ་ཚད་མ་ཡོང་གི་འདུག ཕལ་ཆེར་ངོས་རང་ལོ་བརྒྱ་དང་བཅུ་བསྡད་རྒྱུར་ཚད་མ་ཡོང་གི་འདུག དེ་འདྲ་ཡིན་དུས་ད་བར་མིག་མཐོང་ལག་ཟིན་གྱིས་བསྟན་པ་དང་འགྲོ་བའི་དོན་བྱས་ཡོད་རེད། ད་དུང་འབྱུང་འགྱུར་ལོ་ཉི་ཤུ་སྐོར་མུ་མཐུད་ནས་ངོས་རང་གིས་བསྟན་པ་དང་འགྲོ་བའི་དོན་བྱ་རྒྱུའི་ཕྱི་ནང་གི་རྟེན་འབྲེལ་འཛོམས་ཀྱི་ཡོད་པའི་ཟོལ་འདྲ་བོ་ཞིག་འདུག གཙོ་ཆེ་བ་ང་རང་ཚོ་ཚང་མས་ཕྱི་ཆོས་པའི་གཟུགས་སུ་སྣང་བ། ནང་ཉོན་མོངས་དུག་གསུམ་གྱི་གཞན་དབང་ལ་བཏང་ནས་སྣང་ལ་མ་ངེས་བ་དེ་འདྲ་བྱ་རྒྱུ་ཡོད་མ་རེད། ང་རང་ཚོ་དངོས་གནས་དྲང་གནས་ཆོས་ལ་དད་པ་ཡོད་པ་ནང་བཞིན་གྱི་ནང་བསམ་བློའི་ཐོག་ནས་ཡིན་ནའང་སེམས་པ་བཟང་པོ་བྱོས། ཀུན་ལ་ཕན་སེམས་བྱོས། གནག་སེམས་གནོད་སེམས་ཟེར་བའི་བསམ་བློ་དེ་འདོར་བྱ་བྱོས། དངོས་གནས་ལྷག་བསམ་རྣམ་དག་གིས་རྒྱལ་བ་སྲས་དང་བཅས་པར་དགྱེས་པ་སྐྱེས་རྒྱུ་ཞིག་སོ་སོས་བྱ་དགོས་རེད་ལ། ཁྱེད་རང་ཚོ་ཚང་མས་བྱེད་ཀྱི་ཡིན་བསམ་པའི་སེམས་ཤུགས་སྐྱེད་ཤོག་ཨ། ང་རང་གི་ངོས་ནས་བཤད་ན། ཁ་སང་ཁར་ཉིན་ཞུས་ཡོད་རེད། ཉིན་རེ་བཞིན་དུ་བྱང་ཆུབ་ཀྱི་སེམས་བསྒོམ་རྒྱུ། སྟོད་ཉིད་ཀྱི་ལྟ་བ་བསྒོམ་རྒྱུ། དེ་དག་ངོས་རང་གིས་ཉིན་རེ་བཞིན་ཆད་མེད་སྒོམ་བསྡད་ཀྱི་ཡོད། དེ་འདྲ་ཡིན་དུས། ཁྱེད་རང་ཚོས་ཉིན་རེ་བཞིན་དེ་དེ་བཞིན་དུ་བྱང་ཆུབ་ཀྱི་སེམས། སྟོད་ཉིད་ཀྱི་ལྟ་བ་ག་ཚོད་ཐུབ་ཐུབ་ཀྱིས་སྒོམས་ཤོག ཅེས་དང་། ཆོས་ཟེར་བ་དེ་ཁ་ཙམ་ཚིག་ཙམ་ཞིག་མ་རེད། སོ་སོའི་སྒོ་གསུམ་གྱི་སྤྱོད་པ་དེ་ཆོས་ནས་བཤད་པ་བཞིན་ཡག་པོ་ཞིག་ལག་ལེན་བསྟར་ཐུབ་པ་ཞིག་བྱུང་ན། སོ་སོའི་སེམས་སྐྱིད་པ། ལུས་བདེ་བ། ཀུན་དང་མཛའ་བ། དངོས་ཤུགས་བརྒྱུད་གསུམ་ནས་གཞན་ལ་ཕན་ཐོགས་བྱ་ཐུབ་རྒྱུ་ཞིག་ཡོང་གི་རེད། ཚང་མས་ཧུར་ཐག་གནང་ཤོག ཉིན་ཤས་རིང་ཆོས་འབྲེལ་བྱེད་པའི་སྐབས། ས་གནས་གཞུང་གི་ལས་བྱེད་པ་ཚོས་ཧུར་ཐག་གནང་ནས་བཀའ་དྲིན་ཆེན་པོ་བྱུང་སོང་། ཐུགས་རྗེ་ཆེ་་ཞུ་ཡི་ཡིན། མི་མང་ཚོ་ལ་ཆ་བཞག་ན་དད་པ་གཡོ་བ་མེད་པ་ཞིག་ཡོད་པ་རེད། ངོས་རང་ཡང་སེམས་ཤུགས་ཡར་འཕར་ནས་འབྱུང་འགྱུར་ལོ་མང་པོ་ཞིག་གི་རིང་ལ་དབྱར་ཁ་འཆར་ཅན་ཚ་གཡོལ་ཆེད་ལ་དྭགས་སུ་ཡོང་ཐུབ་རྒྱུར་བསམ་བློ་གཏོང་གི་ཡིན། ང་ཚོ་ཚང་མ་ཡང་བསྐྱར་ཐུག་ཆོག་གི་རེད། ཚང་མར་ཐུགས་རྗེ་ཆེ་ཞུ་ཡི་ཡིན། ཞེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཚོག་གི་ལ་དྭགས་ཁུལ་གྱི་མཛད་འཆར་ནང་གསལ་ལྟར་ན། གནངས་ཉིན་ཕྱི་ཚེས་ ༢༦ ཉིན་ལ་དྭགས་བོད་ཁྱིམ་དུ་བོད་མི་གཙོས་དད་ལྡན་མང་ཚོགས་རྣམས་ལ་བཀའ་སློབ་བསྩལ་རྒྱུ་ཡིན་འདུག
གསར་འགོད་པ་དཔལ་ལྡན་དང་དོན་གྲུབ་བཀྲིས་གཉིས་ཀྱིས་ལ་དྭགས་རྒྱལ་ས་གླེ་ནས་སྤེལ།
