མཉན་ཡོད་དུ་དགེ་སློང་མའི་དབྱར་གནས་ཐོག་མ་དབུ་འཛུགས་གནང་།

ལོ་གསུམ་གྱི་རྗེས་ནས་མཉན་ཡོད་དུ་དཔལ་འབྲི་གུང་བཀའ་བརྒྱུད་པའི་དབྱར་གནས་ཆེན་མོ་དངོས་སུ་དབུ་འཛུགས་གནང་འདུག

དེ་རིང་བརྒྱད་པའི་ཚེས་གཅིག་སྟེ། བོད་ཟླ་ ༦ ཚེས་ ༡༥ ཉིན་་བདག་ཅག་གི་སྟོན་པ་བཅོམ་ལྡན་འདས་ཀྱི་གནས་ཆེན་བརྒྱད་ཀྱི་ཡ་གྱལ་མཉན་ཡོད་དུ། ༧སྒྲུབ་བརྒྱུད་བསྟན་པའི་མངའ་བདག་འབྲི་གུང་༧སྐྱབས་མགོན་མཆོག་གི་རླབས་ཆེན་གྱི་དགོངས་གཞི་ལྟར། བསྟན་པའི་གསལ་བྱེད་མཁན་མོ་(Gul Goang Fashi) དབུ་གཞུགས་ཐོག་ཨ་རི་དང་། ཐའེ་ཝན། ཝེ་ཏི་ནམ། འབྲུག་ཡུལ། རྒྱ་གར། བལ་ཡུལ། ཐེ་ལན་ཌི། ནེའུ་རྫི་ལན་ཌི། ཨོ་སི་ཊོ་ལི་ཡ། ཧྥ་རན་སི་སོགས་རྒྱལ་ཁབ་མི་འདྲ་བའི་དགེ་སློང་མ་ ༡༤༥ ལྷན་འཛོམས་ཐོག་མཉན་ཡོད་ཐེག་གསུམ་གཙུག་ལག་ཁང་དུ་དབྱར་གནས་དབུ་འཛུགས་གནང་ཡོད་འདུག

དེ་འབྲེལ་འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག་གི་མགྲིན་ཚབ་པ་མཁན་པོ་དཀོན་མཆོག་རང་གྲོལ་ལགས་ཀྱིས་འདི་གའི་གསར་འགོད་པར་བརྗོད་དོན། ད་ལོར་འཛམ་གླིང་རྒྱལ་ཁབ་དུ་མ་ནས་དགེ་སློང་མའི་ཞལ་གྲངས་༡༤༥ ལྷན་འཛོམས་ཐོག་མཉན་ཡོད་ཐེག་གསུམ་གཙུག་ལག་ཁང་དུ་དངོས་སུ་དབྱར་གནས་ཚོགས་ཐུབ་པ་ནི། ལོ་ངོ་གཉིས་སྟོང་ལྔ་བརྒྱ་ལྷག་གི་རྗེས་ལ་དགེ་སློང་མའི་སྡེས་གནས་ཆེན་འདིར་དབྱར་གནས་ཚོགས་པ་ཐེངས་དང་པོ་ཡིན་ངེས་པས། རྒྱལ་སྤྱིའི་ནང་པ་སངས་རྒྱས་པའི་ལོ་རྒྱུས་ནང་ཤིན་ཏུ་གནད་གལ་ཆེ་བའི་ལོ་རྒྱུས་ཀྱི་རྡོ་རིང་གསར་པ་ཞིག་ཡིན་པ་མ་ཟད། ལོ་རྒྱུས་སྨྲ་བ་ཚོར་ཁ་སྐོང་བྱེད་འོས་པའི་ལེའུ་གསར་པ་ཞིག་ཡིན།

འདི་ལོའི་དབྱར་གནས་གོ་སྒྲིག་བྱེད་མཁན་གཙོ་བོ་ནི་ཨ་རིར་གནས་སྡོད་མཁན་མོ་སྒྲོལ་མ་ལགས་དང་། འབྲི་གུང་བཀའ་བརྒྱུད་བྱེས་ཀྱི་གདན་སའི་ཁྱབ་ཁོངས་བཙུན་དགོན་བསམ་གཏན་གླིང་། དེ་བཞིན་མཉན་ཡོད་འཛིན་སྐྱོང་སྡེ་ཚན་བཅས་ཡིན་པ་དང་། གནས་ཆེན་མཉན་ཡོད་ནི་སྟོན་པ་བཅོམ་ལྡན་འདས་རང་ཉིད་འཁོར་དགེ་འདུན་སྟོང་ཚོ་དང་ལྷན་དུ་ཐེངས་ ༢༥ རིང་དབྱར་གནས་ལ་བཞུགས་པ་དང་། ཆོས་འཁོར་བསྐོར་བ། དེ་བཞིན་ཆོ་འཕྲུལ་བསྟན་པ་སོགས་མཛད་པ་མང་དག་བསྐྱངས་པའི་གནས་ཆེན་ཁྱད་པར་ཅན་ཞིག་ཡིན་པ་རེད།

འབྲི་གུང་༧སྐྱབས་མགོན་ཆེ་ཚང་རིན་པོ་ཆེ་མཆོག་གི་དགོངས་གཞི་ལྟར། ཕྱི་ལོ་༢༠༡༥ ལོར་མཉན་ཡོད་ནང་པའི་ཐེག་གསུམ་གཙུག་ལག་ཁང་རྟེན་དང་བརྟེན་པ་བཅས་པ་གསར་བཞེངས་གནང་ཡོད་པ་དང་། མཉན་ཡོད་ནང་པའི་རིག་གཞུང་དུས་སྟོན་ཆེན་མོ་ཞེས་མང་ཚོགས་ལ་ནང་ཆོས་ཀྱི་གོ་རྟོགས་སྤེལ་སླད་སྟོན་པ་བཅོམ་ལྡན་འདས་ཀྱི་གསུང་གི་སྙིང་པོ་ཆོས་ཀྱི་ཚིགས་སུ་བཅད་པའི་བཀའ་འཁྲིད་གནང་བས་མཚོན་མཛད་རིམ་རྒྱས་པ་ལོ་ལྟར་ཚོགས་གནང་ཡོད་ཅིང་། ལྷག་པར་ཕྱི་ལོ་ ༢༠༡༩ ལོར་འབར་མ་དང་སེངྒ་ལ་སོགས་ནས་ཆེད་དུ་གདན་འདྲེན་ཞུས་པའི་གནས་བརྟན་སྡེ་བའི་དགེ་སློང་ ༡༠༨ ལྷན་བཞུགས་ཀྱིས་ཟླ་གསུམ་རིང་དབྱར་གནས་གོ་སྒྲིག་ཞུས་ཡོད་པ་མ་ཟད། ལོ་ལྟར་ཐེག་གསུམ་དགེ་འདུན་རྣམས་རེས་མོས་ཀྱིས་དབྱར་གནས་ཚོགས་འཆར་ཡོད་ཀྱང་། འདས་པའི་ལོ་ངོ་གསུམ་རིང་ཏོོག་དབྱིབས་ནད་ཡམས་ཀྱི་རྐྱེན་པས་དབྱར་གནས་སོགས་མཛད་རིམ་ཁག་ཚོགས་མ་ཐུབ་པ་རེད་འདུག