མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཁང་ཟེར་བས་མཚོ་སྔོན་དུ་ཡུན་རིང་དམར་ཤོག་ཚོགས་པའི་བྱ་བ་སྒྲུབ་མྱོང་བའི་རྒྱའི་དཔོན་རིགས་གསུམ་བཀག་ཉར་འོག་བཞག་སྟེ་འདྲི་རྩད་གཅོད་ཀྱི་ཡོད་འདུག
དེ་རིང་རྒྱ་ནག་གིས་བཅད་བགོ་བྱས་པའི་མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བའི་སྟེང་སྤེལ་བའི་གནས་ཚུལ་ལྟར་ན། ད་ལྟའི་མཚོ་ཞིང་ཆེན་མི་དམངས་སྲིད་གཞུང་གི་བཀོད་འདོམ་པ་ཝང་ཕིང་དང་། མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཁང་གི་འགན་འཛིན་གཞོན་པ་མཱ་ཡོན་ཀོ དེ་བཞིན་མཚོ་སྔོན་ཞིང་ཆེན་དམར་ཤོག་ཚོགས་པའི་འཐུས་མི་དང་ཞིང་ཆེན་སྒྲིག་ཁྲིམས་ཞིབ་བཤེར་ཁང་གི་དྲུང་ཡིག་ཁྲན་ཧེ་མེན་བཅས་ལ་མཚོ་སྔོན་ཞིང་ཆེན་སྒྲིག་ཁྲིམས་ཞིབ་བཤེར་ཁང་གིས་དམར་ཤོག་ཚོགས་པའི་ཁྲིམས་སྒྲིག་དང་འགལ་བའི་བྱ་བ་ཚབས་ཆེན་སྒྲུབ་པའི་དོགས་གཞིའི་འོག་འདྲི་གཅོད་གཏོང་གི་ཡོད་སྐོར་བསྒྲགས་འདུག
མཚོ་སྔོན་ཞིང་ཆེན་སྲིད་གཞུང་གི་དྲ་བའི་གནས་ཚུལ་ལྟར་ན། མཚོ་སྔོན་གྱི་དམར་ཤོག་དཔོན་རིགས་ཝང་ཕིང་དང་མཱ་ཡོན་ཀོ ཁྲན་ཧེ་མེན་བཅས་ཀྱིས་སྒྲིག་ཁྲིམས་ཞིབ་བཤེར་ལས་ཁུངས་ཀྱི་ཞིབ་བཤེར་འདྲི་གཅོད་དང་ལེན་བྱས་ཡོད་པ་དང་ད་ལྟ་འདྲི་ཞིབ་བྱེད་བཞིན་ཡོད་འདུག དཔོན་རིགས་གསུམ་གྱིས་སྒྲིག་འགལ་ཚབས་ཆེན་བྱས་ཡོད་ཟེར་བ་ཙམ་ལས། དོན་དངོས་ཐོག་ཁོ་ཚོའི་ནག་ཉེས་ཅི་ཡིན་མིན་སོགས་རྒྱལ་ལྗོངས་ཀྱི་གནས་ཚུལ་གསལ་ཁ་མི་འདུག
མཚོ་སྔོན་ཞིང་ཆེན་གྱི་དམར་ཤོག་བཀོད་འདོམ་པ་ཝང་ཕིང་ནི་ཕྱི་ལོ་༡༩༦༡ ཟླ་ ༤ ནང་ཅང་སུའུ་ནན་ཅིང་དུ་སྐྱེས་པ་ཡིན་ཞིང་སློབ་ཆེན་འགྲིམས་རྗེས། ཕྱི་ལོ་ ༡༩༨༤ ལོའི་ཟླ་ ༡༠ པར་གུང་ཁྲན་ཏང་ནང་ཞུགས། དེ་ནས་བཟུང་མཚོ་སྔོན་ཞིང་ཆེན་ཟི་ལིང་གྲོང་ཁྱེར་དུ་དམར་ཤོག་ཚོགས་པའི་ལས་དོན་འདྲ་མིན་ཐོག་ལས་ཀ་བྱས་མྱོང་བ་དང་། ཕྱི་ལོ་༢༠༢༡ ལོའི་ཟླ་ ༧ པ་ནས་ད་བར་མཚོ་སྔོན་ཞིང་ཆེན་མི་དམངས་སྲིད་གཞུང་གི་བཀོད་འདོམ་པ་བྱས་ཡོད་འདུག
མཱ་ཡོན་ཀོ་ཕྱི་ལོ་་༡༩༦༤ ལོར་ཞོན་ཧཱ་རུ་སྐྱེས་ཤིང་། ཕྱི་ལོ་ ༡༩༩༠ ལོར་དམར་ཤོག་ཏང་གི་ནང་ཞུགས། ཕྱི་ལོ་ ༡༩༩༨ ནས་ ༢༠༠༥ བར་མཚོ་སྔོན་ཞིང་ཆེན་གྱི་མགོ་ཁྲིད་གཞོན་པ་དང་ལྐོག་ཟ་རུལ་སུངས་འདྲི་ཞིབ་ཁང་གི་འདྲི་རྩད་པ་བྱས་པ་དང་། ཕྱི་ལོ་ ༢༠༢༠ ནས་ད་བར་མཚོ་སྔོན་གྱི་དམར་ཤོག་ཚོགས་པའི་སྒྲིག་ཁྲིམས་ཞིབ་བཤེར་ཁང་གི་འགན་འཛིན་གཞོན་པ་སོགས་བྱས་མྱོང་འདུག
ཁྲན་ཧེ་མེན་ཕྱི་ལོ་ ༡༩༧༧ ལོར་ཟི་ལིང་དུ་སྐྱེས། ཕྱི་ལོ་ ༡༩༩༩ ལོར་དམར་ཤོག་ཚོགས་པའི་ནང་ཞུགས། ཕྱི་ལོ་ ༢༠༠༦ ལོར་ཟི་ལིང་གྲོང་ཁྱེར་གྱི་མགོ་ཁྲིད་གཞོན་པ་བྱས་པ་དང་། ཕྱི་ལོ་ ༢༠༡༦ ནས་ ༢༠༢༢ བར་མཚོ་སྔོན་ཞིང་མི་དམངས་དངུལ་ཁང་གི་འགན་འཛིན་བྱས། ཕྱི་ལོ་ ༢༠༢༢ ཟླ་ ༥ པ་ནས་ད་བར་མཚོ་སྔོན་ཞིང་ཆེན་དམར་ཤོག་ཚོགས་པའི་སྒྲིག་ཁྲིམས་ཞིབ་བཤེར་ཁང་གི་འཐུས་མིར་གྱུར་ཡོད་འདུག
གསར་འགོད་པ། སྐལ་བཟང་སྦྱིན་པ།
