རྡོ་རྗེ་བཀྲིས་ཀྱི་གཅེན་མོ་མགོན་པོ་སྐྱིད་ལགས་ཀྱིས་ཕྱག་འཚལ་ནས་ཞི་བའི་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་ཁོ་མོར་རུབ་རྡུང་བཏང་སྟེ་ཕྱིར་རང་ཁྱིམ་དུ་ཀློད་ཡོད་འདུག
ཁ་སང་ཕྱི་ཚེས་ ༡ ཉིན་བོད་ཀྱི་གྲགས་ཅན་ཚོང་པ་དང་ཆབ་སྲིད་བཙོན་པ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས། སླར་ཡང་བོད་རང་སྐྱོང་ལྗོངས་ལྷ་ས་གྲོང་ཁྱེར་དུ་ཡོད་པའི་གྲྭ་བཞི་བཙོན་ཁང་མདུན་དུ། རྡོ་རྗེ་བཀྲ་ཤིས་ལགས་སུ་བཙོན་ཁང་དུ་ཐུག་འཕྲད་བྱེད་སླད། ཕྱག་འཚལ་ནས་ཞི་བའི་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་ཁོང་ལ་གཅར་རྡུང་བྱས་ཏེ་བཙན་གྱིས་ཕྱིར་ལོག་བཏང་ཡོད་འདུག
འདི་གའི་གསར་འགོད་པར་འབྱོར་བའི་གནས་ཚུལ་ལྟར་ན། མགོན་པོ་སྐྱིད་ལགས་ཀྱིས་ཕྱག་འཚལ་ནས་ཞི་བའི་ལས་འགུལ་སྤེལ་སྐབས། ལྷ་ས་གྲོང་ཁྱེར་གྱི་ཉེན་རྟོག་པས། ཕྱག་འཚལ་བ་ནི་ཁྲིམས་འགལ་ཡིན་ལུགས་བརྗོད་དེ་ཁོ་མོའི་སྟེང་དུ་རུབ་ནས་གཅར་རྡུང་བཏང་ཡོད་པ་མ་ཟད། ཡར་མར་བཙན་འཁྲིད་བྱས་ཏེ་ཕྱིར་རང་ཁྱིམ་དུ་ལོག་བཏང་ཡོད་འདུག
ཁ་སང་གི་ཞུ་གཏུགས་སྐབས་གྲྭ་བཞི་བཙོན་ཁང་མདུན་དུ་མགོན་པོ་སྐྱིད་ལགས་ཀྱིས། རྒྱ་ནག་གི་རྩ་ཁྲིམས་ནང་གསལ་བ་ལྟར། མི་སྒེར་ལ་བཙོན་པ་ཐུག་པའི་ཐོབ་ཐང་ཡོད་པའི་གནས་ལུགས་དྲངས་ཏེ། མོར་རང་ཉིད་ཀྱི་གཅེན་པོ་རྡོ་རྗེ་བཀྲ་ཤིས་ལགས་སུ་ཐུག་འཕྲད་བྱེད་ཆོག་པའི་རེ་བ་ཞུས་ཡོད་ཀྱང་། རྒྱ་གཞུང་ཉེན་རྟོག་པས་ཁོ་མོའི་རེ་བ་དང་ལེན་བྱས་མེད་པའི་ཁར། རུབ་རྡུང་བརྒྱབ་ནས་ཕྱིར་ལོག་བཏང་ཡོད་འདུག
རྡོ་རྗེ་བཀྲ་ཤིས་ལགས་ནི་ལྷ་སའི་གཡག་མགྲོན་ཁང་གི་སྦྱིན་བདག་ཡིན་ཞིང་། ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་བྱུང་བའི་ཟླ་བ་འགའི་རྗེས་སུ་རྒྱ་ནག་གཞུང་གིས་ངོ་རྒོལ་བར་མཐུན་འགྱུར་བསྐྲུན་པ་དང་༧གོང་ས་རྒྱལ་བ་རིན་པོ་ཆེ་མཆོག་ལ་སྐྱབས་རྟེན་ཕུལ་ཡོད་ལུགས་སོགས་བརྗོད་དེ་འཛིན་བཟུང་བྱས་ནས་ཟླ་ ༨ ཙམ་རིང་གར་སོང་ཆ་མེད་དུ་གྱུར་ཡོད་པ་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ཀྱང་འཛིན་བཟུང་བྱས་ནས་ལོ་གཉིས་ཙམ་རིང་བཀག་ཉར་བྱས་རྗེས། ཕྱི་ལོ་ ༢༠༡༠ ཟླ་ ༥ ཚེས་ ༡༧ ཉིན་ལྷ་ས་འབྲིང་རིམ་མི་མང་ཁྲིམས་ཁང་ཟེར་བ་དེས་ཁུངས་སྐྱེལ་ར་སྤྲོད་གང་ཡང་མེད་པར་གསང་བའི་ཐོག་ནས་རྒྱ་སྒོར་ཁྲི་ ༡༥༠ ཙམ་གྱི་དངུལ་བུན་གཡོ་ལེན་བྱས་ཚུལ་བརྗོད་དེ། རྡོ་རྗེ་བཀྲ་ཤིས་ལགས་ལ་ཚེ་བཙོན་དང་། ཁོང་གི་ཕུ་བོ་རྡོ་རྗེ་ཚེ་བརྟན་ལགས་ལ་ལོ་དྲུག་གི་ཁྲིམས་ཐག་བཅད་དེ། བོད་རང་སྐྱོང་ལྗོངས་ཟེར་བའི་བཙོན་ཁང་ཆེ་ཤོས་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བ་ཟེར་བའི་ཉེས་མིང་ཕོག་པའི་བཙོན་པ་བཅུག་སའི་གྲྭ་བཞི་བཙོན་ཁང་དུ་བཅུག་ཡོད་པ་རེད།
ཕྱི་ལོ་ ༢༠༢༠ ལོ་སྟེ་ཁོང་བཙོན་འཇུག་བྱས་ཏེ་ལོ་ ༡༠ ཕྱིན་པའི་སྐབས་དེར་ཁོང་གི་ཁྲིམས་རྩོད་པ་དང་ནང་མི་ཚོས་ཐེངས་མང་དྲང་བདེན་མིན་པའི་ཁྲིམས་ཆད་དེར་བསྐྱར་ཞིབ་དགོས་པའི་རེ་བ་བཏོན་ཡོད་ཀྱང་དོན་འབྲས་ཐོན་མེད་པར་བརྟེན། འདས་ལོའི་ཕྱི་ཟླ་ ༡༠ ཙམ་ནས་བཟུང་ཁོང་གི་གཅེན་མོ་མགོན་པོ་སྐྱིད་ལགས་དང་གཅེན་པོ་རྡོ་རྗེ་ཚེ་བརྟན་ལགས་སོགས་ཀྱིས་ལྷ་སའི་འབྲིང་རིམ་མི་མང་ཁྲིམས་ཁང་ཟེར་བའི་མདུན་དུ་ཞི་རྒོལ་ལས་འགུལ་བསྟུད་མར་སྤེལ་ཡོད་པ་དང་། ཉེན་རྟོག་པས་ཁོང་ཚོར་ཐེངས་མང་འདྲི་རྩད་བྱས་ཏེ་སྡིགས་ར་བསྐུལ་ཡོད་འདུག
English version: Chinese Police Officers Physically Abuse Gonpo Kyi
གསར་འགོད་པ། སྐལ་བཟང་སྦྱིན་པ།
