བོད་ཀྱི་ཆབ་སྲིད་བཙོན་ཟུར་དགེ་སློང་བློ་བཟང་བསྟན་པ་ལགས་ཡུན་རིང་ནད་མནར་རྐྱེན་གྱིས་ཉེ་ལམ་བོད་ཀྱི་རྒྱལ་ས་ལྷ་ས་ནས་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པར་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༥ ཉིན་གྱི་སྔ་དྲོའི་ཆུ་ཚོད་ ༡༠ ཙམ་ལ་བོད་ཀྱི་རྒྱལ་ས་ལྷ་སར་བོད་ཀྱི་ཆབ་སྲིད་བཙོན་ཟུར་དགེ་སློང་བློ་བཟང་བསྟན་པ་ལགས་རང་ལོ་ ༥༢ སྟེང་ཕོ་བའི་ནད་མནར་རྐྱེན་གྱིས་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པས་མི་ཁག་ཅིག་ལ་བཀའ་འདྲི་ཞུས་ཏེ་རྒྱུས་ལོན་བྱུང་བའི་གནས་ཚུལ་ལྟར་ན། དགེ་སློང་བློ་བཟང་བསྟན་པ་ལགས་ཆབ་སྲིད་ཀྱི་ཉེས་མིང་འོག ཕྱི་ལོ་ ༡༩༩༦ ཟླ་ ༡༠ ནང་རྒྱ་ནག་གཞུང་གིས་འཛིན་བཟུང་བྱས་ཏེ་ལོ་ལྔའི་རིང་གྲྭ་བཞི་བཙོན་ཁང་དུ་བཙོན་འཇུག་བྱས་ཡོད་པ་དང་། ཕྱི་ལོ་ ༢༠༠༡ ཟླ་ ༡༠ ནང་ཀློད་གྲོལ་བཏང་ཡོད་འདུག
དམ་པ་བློ་བཟང་བསྟན་པ་ལགས་ནི་ཕྱི་ལོ་ ༡༩༧༢ ལོར་ཁང་དམར་རྫོང་གནས་རྙིང་ཤང་ཁོངས་སུ་སྐྱེས་ཤིང་། པ་ལགས་ཀྱི་མཚན་ལ་ལྷག་པ་ཞུ་བ་དང་ཁོང་གི་སྐྱ་མིང་ལ་ཉི་མཚམས་ཞུ་ཡི་ཡོད་འདུག ཕྱི་ལོ་ ༡༩༨༢ ལོ་ནས་ཁོང་གནས་སྙིང་དགོན་པའི་ཆོས་སྒོར་ཞུགས་ཏེ་གཞུང་ཆེན་སོགས་ལ་བསླབ་པ་སློབ་གཉེར་བྱས།
English version: Tibetan Former Political Prisoner Lobsang Tenpa Passes Away
