༧གོང་ས་མཆོག་ཆུ་ཤོད་ཁ་ཆེའི་ལྷ་ཁང་དུ་ཕེབས། 

སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་གིས་ནམ་རྒྱུན་ནས་མི་སུ་ལ་ཐུག་པ་ཡིན་ནའང་ང་ཚོ་གཅིག་པ་ཡིན་བསམ་པ་ཞིག་མ་གཏོགས། ང་ཏཱ་ལའི་བླ་མ་ཟེར་ནས་མི་འདྲ་བ་ཞིག་ཡིན་ཅི་དྲན་གྱི་མེད། མི་དུང་ཕྱུར་བདུན་བརྒྱད་ཅིག་ཡོད་པ་ཚང་མ་མ་ཡི་མངལ་ནས་མར་བཙས། ང་ཚོ་ཚང་མ་ཨ་མའི་འོ་མས་གསོས་བཞག་པ་གཅིག་པ་རེད། ང་ཚོའི་མི་ཚེ་དང་པོ་ཚུགས་དུས་ཨ་མའི་བརྩེ་བས་ང་ཚོ་བསྐྱངས་པ་གཅིག་པ་རེད་འདུག ངོས་རང་གིས་རྟག་པར་ང་ཚོའི་མི་ཚེ་མགོ་ཚུགས་པའི་ཁ་ཐུག་དེར་མའི་བྱམས་སྐྱོང་དང་བརྩེ་བའི་འོག་ནས་འཚོ་བ་ཞིག་དྲན་བསྡད་ཀྱི་ཡོད། བྱས་ཙང་མི་ཚེ་གང་བོར་མི་སུ་ལ་ཡིན་ནའང་མི་གཅིག་གིས་གཅིག་ལ་བརྩེ་བ་བྱས། གཅིག་གིས་གཅིག་ལ་རོགས་བྱས་ན། ཤི་བའི་ཁ་ཐུག་ལའང་དངོས་གནས་དྲང་གནས་བྱམས་བརྩེ་ལྡན་པའི་གྲོགས་པོ་ཚོས་སྐོར་ནས་བསྡད་པའི་ངང་ནས་ཤི་ཡ་ཞིག དེ་དཔེ་གལ་ཆེན་པོ་རེད་འདུག ང་ཚོ་བློ་ཕམ་ཡ་ཞིག་ལ་འཛམ་བུ་གླིང་འདིའི་སྒང་ལ་ཆོས་ལུགས་མི་འདྲ་བ་དང་ལུང་པ་མི་འདྲ་བའི་ཐོག་ནས། ང་དང་ཁྱོད་ཟེར་བ་དེ་ཤུགས་ཆེན་པོ་བྱས་ནས་འཛམ་བུ་གླིང་འདིའི་སྒང་ལ་དམག་ཆེན་དང་པོ། དམག་ཆེན་གཉིས་པ་དེ་འདྲ་བྱུང་བ་རེད། དཔེ་མི་སྲིད་པའི་ཐབས་སྐྱོ་བོ་རེད། མི་གཅིག་པ་ཡིན་པ་ཞིག་ལ་ཕན་ཚུན་གསོད་རེས་བཏང་ནས་ཆག་སྒོ་བློ་ཡུལ་ལས་འདས་པ་རེད་འདུག ད་འདས་པའི་ལོ་རྒྱུས་དེ་ཚར་བ་རེད། འདས་པའི་ལོ་རྒྱུས་དེའི་རྒྱུ་དང་རྐྱེན་གོ་བསྡུར་བྱ་རྒྱུ་རེ་མ་གཏོགས་འདས་པའི་བྱུང་བ་དེ་ཚར་བ་རེད། འབྱུང་འགྱུར་གྱི་འཛམ་བུ་གླིང་དེ་མིའི་ལྷན་སྐྱེས་རང་བཞིན་མཐུན་པའི་ཞི་བདེ་ཞིག་ལ་བསལ་བློ་གཏང་རྒྱུ་དཔེ་གལ་ཆེན་པོ་རེད། དེ་རིང་ཁ་སང་གནས་ཚུལ་གསར་པ་ཞིག་ནི་འཛམ་གླིང་ཚ་དྲོད་ཆེ་རུ་ཆེ་རུ་ཕྱིན་ནས། ང་རང་ཚོའི་དཔེ་ཆའི་ནང་སྐལ་བ་མེ་འཇིག་ཟེར་བ་དེ་སླེབས་ཀྱི་འདུག་ག ཚན་རིག་པ་ཚོས་ཚ་དྲོད་ཆེ་རུ་ཆེ་རུ་འགྲོ་བསྡད་པ་དེ་བཤད་ཀྱི་ཡོད་རེད། དངོས་ཡོད་གནས་ཚུལ་ལའང་ཚ་དྲོད་ཆེ་རུ་ཆེ་རུ་འགྲོ་ཡི་འདུག ང་ཚོའི་མངོན་པ་མཛོད་ལས་སྐལ་བ་མེ་འཇིག་ཆུ་འཇིག་ཟེར་བའི་མེ་འཇིག་སྒང་ལ་མགོ་ཞིག་ཚུགས་ཀྱི་ཡོད་པའི་ཟོོལ་ཞིག་འདུག བྱས་ཙང་། ང་ཚོས་འདས་པའི་ལོ་རྒྱུས་ནང་ལ་མི་དང་མི་འཁྲུག་པ་བརྒྱབ་ནས་གསོད་རེས་གཏོང་བའི་གནས་ཚུལ་དེ་ནམ་ཡང་མ་ཡོང་བ་ཞིག ང་རང་ཚོ་སྐྱེས་པའི་ཁ་ཐུག་ནས་ཨ་མའི་འོ་མས་བསྐྱངས་ནས་གཅིག་པ་རེད། ཅེས་གསུངས་སོང་།

ཡང་༧གོང་ས་རྒྱལ་བ་རིན་པོ་ཆེ་མཆོག་ནས། ང་རང་ཚོའི་མི་ཚེ་མགོ་བཙུགས་ཡ་དེ་ཨ་མའི་བརྩེ་བའི་ཐོག་ནས་མགོ་ཚུགས་པ་ཞིག་རེད། གསོན་པའི་རིང་ལ་ང་དང་ཁྱོད་ཅེས་གསོད་རེས་གཏང་ཡ་དེ་དཔེ་མི་སྲིད་པའི་ཐབས་སྐྱོ་བོ་རེད། མི་དང་མི་འཁྲུག་པ་བརྒྱབ་པ་དེ་ནམ་ཡང་མ་ཡོང་བ་ཞིག་བྱོས། ང་ཚོ་ཚང་མ་མི་གཅིག་གྱུར་འདུ་ཤེས་ཀྱི་ཐོག་ནས་ང་ཚོ་ཚང་མས་གཅིག་གིས་གཅིག་ལ་བརྩེ་བ་བྱོས། གཅིག་གིས་གཅིག་ལ་རོགས་པ་བྱོས། འཛམ་བུ་གླིང་སྤྱི་དེ་དངོས་གནས་དྲང་གནས་མི་དུང་ཕྱུར་བདུན་བརྒྱད་ཅིག་ཡོད་པ་དེ་དག་མི་གཅིག་གྱུར་གྱི་འདུ་ཤེས་ཀྱི་ཐོག་ནས། ང་ཚོས་དགའ་དགའ་སྐྱིད་སྐྱིད་བྱས་ནས་བསྡད་ཐུབ་པ་ཞིག་བྱ་དགོས་རེད། འཛམ་གླིང་ཤར་ནུབ་ལྷོ་བྱང་ཚང་མ་འཁྲུག་པ་བརྒྱག་རྒྱུར་ཡིད་ཐང་ཆད་ནས། ང་ཚོ་ཚང་མར་ཞི་བདེ་ཡག་པོ་ཞིག་ཡོང་རྒྱུར་ཚང་མས་འབད་བརྩོན་དང་འདོོད་པ་བྱེད་བསྡད་ཡ་ཞིག་ཆགས་བསྡད་འདུག་གང་ཚོ་ལམ་ལུགས་མི་འདྲ་བ་དང་རྒྱལ་ཁབ་མི་འདྲ་བ་ཞིག་རྒྱུ་མཚན་དུ་བྱས་ནས། མི་གསོད་རེས་གཏོང་བསྡད་རྒྱུ་རྒྱུ་མཚན་གཏན་ནས་ཡོད་མ་རེད། ང་རང་ཚོ་ཁྱིམ་ཚང་གཅིག་གི་ནང་གི་དཀའ་ངལ་ཕྲན་བུ་ཕྲན་བུ་སྐབས་སུ་སྐད་ཆ་བཤད་ནས། དཀའ་ངལ་སེལ་གྱི་ཡོད་རེད། འཛམ་བུ་གླིང་ཁྱིམ་ཚང་གཅིག་ལ་བལྟས་ནས། ང་ཚོར་དཀའ་ངལ་ག་རེ་བྱུང་ནའང་གཅིག་གིས་གཅིག་ལ་ནང་ཚགས་བརྩིས་ནས། དཀའ་ངལ་གསལ་རྒྱུའི་སྐད་ཆ་བྱ་རྒྱུ་མ་གཏོགས་གོ་མཚོན་ཐོག་ནས་འཁྲུག་པ་བརྒྱག་རྒྱུའི་དུས་ཚོད་དེ་ཡོལ་བ་རེད། མི་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། ང་ཚོ་སྐྱེས་པའི་ཁ་ཐུག་ལ་མའི་བརྩེ་བས་བསྐྱངས་པ་རེད། ང་ཚོའི་མི་ཚེ་འདི་བརྩེ་བ་དང་ལྡན་པ་ཞིག་གི་ཐོག་ནས། གཅིག་གིས་གཅིག་ལ་འཁྲུག་པ་བརྒྱག་རྒྱུ་དང་གསོད་རེས་གཏང་རྒྱུ་ནམ་ཡང་མ་ཡོང་བ་ཞིག་གི་སྨོན་ལམ་རྒྱག་གི་ཡོད་ལ། འབད་བརྩོན་ཡང་བྱེད་ཀྱི་ཡོད། ཅེས་གསུངས་སོང་།

༧མགོན་པོ་གང་ཉིད་ཀྱིས། སྐབས་སུ་བབ་པ་འདིར་ལ་དྭགས་ཁ་ཆེ་ལྷ་ཁང་འདིར་འཛོམས་ནས། ང་ཚོ་ཆོས་ལུགས་ཚང་མ་སྤྲུན་ཟླ་ནང་བཞིན་གྱི་འདུ་ཤེས་སྐྱེས་དགོས་པ་དེ་དཔེ་གལ་ཆེན་པོ་རེད། ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་འཁྲུག་པ་རྒྱག་པ་དེ་ཧ་ཅང་གི་ཐབས་སྐྱོ་བོ་རེད། ངོས་རང་ནང་པ་རེད། ངོས་རང་གིས་ཆོས་ལུགས་ཚང་མར་གུས་ཞབས་བྱེད་བསྡད་ཀྱི་ཡོད། ཆོས་ལུགས་ཚང་མའི་དངོས་གནས་དྲང་གནས་ཀྱི་བསླབ་བྱ་ངོ་མ་ཉམས་ལེན་བྱས་ན། སེམས་བཟང་པོ་བྱ་རྒྱུ། གཅིག་གིས་གཅིག་ལ་བརྩེ་བ་བྱ་རྒྱུ་དེ་ཆོས་ལུགས་ཚང་མའི་བསླབ་བྱ་རེད་འདུག་ག ང་ཚོའི་ཆོས་ལུགས་དང་ཁོང་ཚོའི་ཆོས་ལུགས་ཟེར་ནས། དཔེར་ན་ང་ཚོའི་བོད་ལ་ཆ་བཞག་ན་སྤྱི་ཡོངས་ཀྱི་ཐོག་ནས་ནང་པ་གཅིག་གྱུར་རེད་དེ། བཀའ་བརྒྱུད་ཟེར་ཡ། རྙིང་མ་ཟེར་ཡ། དགེ་ལུགས། ཇོ་ནང་ཟེར་ནས་ཆུང་ཚགས་ཤིག་ནས་འཐེན་འཁྱེར་བྱ་རྒྱུ་འདྲ་བོ། དེ་དག་ཚང་མ་རྦད་དེ་ནོར་བ་རེད། དེ་རིང་ངོས་རང་ཁ་ཆེ་ལྷ་ཁང་ལ་ཡོང་བ་རེད། དངོས་གནས་དྲང་གནས་ང་ཚོ་ཚང་མའི་ཆོས་དད་མི་འདྲ་བ་རེད་དེ། ང་ཚོ་ཚང་མ་གཅིག་གྱུར་གྱི་སེམས་པ་བཟང་པོ་བྱ་རྒྱུ། མིས་མི་ལ་བརྩེ་བ་བྱ་དགོས་རྒྱུ་དེ་ཆོས་ལུགས་ཚང་མས་གསུང་གི་ཡོད་རེད། དེ་རིང་ང་ཚོ་ཁ་ཆེ་གྲོགས་པོ་ཚོ་དང་མཉམ་དུ་འཚོགས་ནས་དཔེ་དགའ་པོ་བྱུང་། ལ་དྭགས་སུ་སྤྱིར་བཏང་ཆོས་ལུགས་མཐུན་སྒྲིལ་ཡག་པོ་ཡོད་པའི་ཟོལ་འདྲ་བོ་ཞིག་འདུག ད་དུང་ཚང་མའི་དོ་སྣང་བྱས་ནས་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས། འཐེན་འཁྱེར་བྱས་བསྡད་པ་ཧ་ལས་པའི་སེམས་སྐྱོ་བོ་རེད། ཅེས་གསུངས་སོང་།

གསར་འགོད་པ། དོན་འགྲུབ་བཀྲིས།