ཉེ་ལམ་རྒྱ་གར་བྱང་ཕྱོགས་ཀྱི་ཧི་མ་ཅལ་མངའ་སྡེའི་ནང་ཆར་ཞོད་ཀྱི་རྐྱེན་གྱིས་རི་ཉུལ་སོགས་བྱུང་ནས་མི་གྲངས་༥༠ ལྷག་རྐྱེན་འདས་སུ་གྱུར་ཏེ། མི་རྒྱུ་གཉིས་ལ་གོད་ཆག་ཆེན་པོ་བྱུང་ཡོད་པར་བརྟེན། དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་ལྕོག་ལམ་སར་ཞི་བའི་ཚལ་ཕོ་བྲང་ནས། ཧི་མ་ཅལ་མངའ་སྡེའི་སྤྱི་ཆེན་མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་བསྩལ་བའི་ནང་དུ། ཧི་མ་ཅལ་ནི་ཕྱི་ལོ ༡༩༦༠ ནས་ངོས་རང་གི་ཁྱིམ་གཞིས་ཡིན་ཞེས་ཤོད་ཀྱིན་ཡོད་ལ། ངོས་རང་ཧི་མ་ཅལ་མངའ་སྡེའི་མི་མང་ལའང་མཛའ་འབྲེལ་ཆེན་པོ་ཡོད་པའི་ཚོར་སྣང་ཞིག་ཀྱང་ཡོད། ངོས་རང་གིས་རྐྱེན་འདས་སུ་གྱུར་བའི་གཅེན་གཅུང་རྣམས་ལ་སྙིང་དབུས་ནས་སྨོན་ལམ་འདེབས་ཀྱི་ཡོད་ལ། ཁོང་ཅག་གི་ཤུལ་ལུས་ནང་མི་རྣམས་གཙོས་རང་བྱུང་གོད་ཆག་གི་ཁྲོད་ནས་གནོད་འཚེ་ཕོག་མཁན་རྣམས་ལའང་ཐུགས་གསོ་ཞུ་རྒྱུ་ཡིན། ཞེས་གསུངས་འདུག
ཡང་༸མགོན་པོ་གང་ཉིད་ཀྱིས། ངོས་རང་གིས་དབུས་གཞུང་དང་འབྲེལ་ཡོད་ཚོགས་སྡེ་ཁག་གིས་གནོད་འཚེ་ཕོག་མཁན་ཚོར་ངལ་སེལ་དང་གོད་ཆག་ལས་སྐྱོབ་ཐབས་བྱེད་ཀྱིན་ཡོད་པ་ཤེས་ཀྱི་ཡོད། འོན་ཀྱང་། ཧི་མ་ཅལ་མངའ་སྡེའི་མི་མང་ལ་གདུང་སེམས་མཉམ་སྐྱེད་མཚོན་སླད། ཏཱ་ལའི་བླ་མའི་ཐེབས་རྩ་ནས་ངལ་སེལ་དང་མྱུར་སྐྱོབ་ཀྱི་ཆེད་ཞལ་འདེབས་ཤིག་དབུལ་རྒྱུ་ཡིན། ཞེས་གསུངས་འདུག
ཉེ་ལམ་རྒྱ་གར་བྱང་ཕྱོགས་སུ་ཆར་པ་ཤུགས་ཆེན་བབས་ནས་རྒྱུག་ཆུ་སོགས་རྒྱས་ཏེ་ཆུ་ལོག་རྒྱུག་པ་དང་། རི་ཉུལ་སོགས་ཡང་ཡང་བྱུང་སྟེ། རྒྱ་གར་བྱང་ཕྱོགས་ཀྱི་ས་གནས་མང་དག་ཅིག་ཏུ་རང་བྱུང་གོད་ཆག་འབྱུང་མུས་ཡིན་པའི་ཁར། ཁ་སང་ཕྱི་ཚེས་༡༤ ཉིན་ཧི་མ་ཅལ་གྱི་རྒྱལ་ས་སིམ་ལ་ཁུལ་དུ་ཆར་ཞོད་ཀྱི་རྐྱེན་གྱིས་མཆོད་རྟེན་ཞིག་འགྱེལ་ནས་ཉུང་མཐར་མི་གྲངས་༩ ལྷག་རྐྱེན་འདས་སུ་གྱུར་པ་མ་ཟད། ད་ལྟའང་ས་འོག་ནས་རྙེད་སོན་མ་བྱུང་བའི་ཕུང་པོ་དག་འཚོལ་ཞིབ་བྱེད་མུས་ཡིན་འདུག་ལ། དེ་བཞིན་ཆར་དུས་སུ་རྒྱ་གར་བྱང་ཕྱོགས་ཀྱི་ས་གནས་མང་དག་ཅིག་གི་གཞུང་ལམ་དང་ཟམ་པ་སོགས་ལ་གཏོར་སྐྱོན་ཚབས་ཆེན་འབྱུང་མུས་ཡིན་འདུག
གསར་འགོད་པ། དོན་འགྲུབ་བཀྲིས།
