རྒྱ་གར་ལ་རང་བཙན་ཐོབ་ནས་ལོ་ངོ་ ༧༧ འཁོར་བའི་དུས་དྲན་སྲུང་གཙི་གནང་། 

དེ་རིང་༹༹སྔ་དྲོའི་ཆུ་ཚོད་ ༩ །༣༠ ཐོག་བོད་མི་མང་སྤྱི་འཐུས་ལྷན་ཁང་གི་མདུན་ཐང་དུ། རྒྱ་གར་དབྱིན་ཇིའི་དབང་བསྒྱུར་འོག་རང་བཙན་ཐོབ་ནས་ལོ་ངོ་ ༧༧ འཁོར་བའི་དུས་དྲན་སྲུང་གཙི་གནང་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཚོགས་གཞོན་སྒྲོལ་མ་ཚེ་རིང་མཆོག་གི་དབུས་བཀའ་བློན་རྣམ་པ་དང་སྲི་ཞུ་བ་ཁག་ཅིག་བཅས་འཛོམས་ཏེ། རྒྱ་གར་གྱི་རྒྱལ་གླུ་གྱེར་ཏེ་རྒྱལ་དར་སྒྲེང་འཛུགས་གནང་སོང་།

དུས་དྲན་དང་འབྲེལ་ཏེ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ལུང་པ་གང་འདྲ་ཞིག་ཡིན་ཡང་ལོ་རྒྱུས་ཀྱི་ཐོག་ནས་གཅིག་གིས་གཅིག་གི་འོག་ཏུ་བསྡུ་པའི་ཐབས་ཤེས་མ་འཐེན་པ་དེ་འདྲ་ཡོད་པ་མ་རེད། རྒྱ་གར་ལ་མཚོན་པ་ཡིན་ནའང་དབྱིན་ཇིའི་འོག་ཏུ་ལྷག་ནས་ལོ་བརྒྱ་ཕྲག་ཁ་ཤས་ཕྱིན་པ་དང་། ཕྱི་ལོ་ ༡༩༤༧ ལོར་རང་བཙན་ཐོབ་ནས་ད་ལྟའི་བར་དུ་ལོ་ངོ་ ༧༧ འགྲོ་བཞིན་ཡོད་པ་རེད། ལོ་ངོ་ ༧༧ རིང་དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས་དམངས་གཙོའི་འགྲོ་ལུགས་ཚད་ལྡན་ཐོག་ཏུ་འགྲོ་ཐུབ་པ་བྱུང་བ་རེད། སྐབས་དེ་དུས་ཨེ་ཤ་ཡའི་མི་འབོར་ཆེ་ཤོས་ཨང་གཉིས་པ་ཡིན་ཞིང་། ད་ལྟའི་ཆར་འཛམ་གླིང་གི་མི་འབོར་ཆེ་ཤོས་དེ་རེད། རྒྱ་གར་རང་བཙན་ཐོབ་པའི་རྗེས་སུའང་དམངས་གཙོའི་ལམ་ལུགས་མུ་མཐུད་དུ་རྒྱུན་སྐྱོང་ཐུབ་པ་དེས་འཛམ་གླིང་སྤྱི་ལ་ཕན་ཐོགས་བྱུང་ཡོད། རྒྱལ་ཁབ་ཡར་རྒྱས་ཀྱི་ཐད་ནས་ཐོག་མར་དཀའ་ངལ་མང་པོ་འཕྲད་པ་རེད། ཕྱི་སྲིད་ཀྱི་སྲིད་ཇུས་འཛིན་སྟངས་ཐོག་ནས་བོད་དུ་རྒྱ་ནག་གི་བཙན་འཛུལ་བྱས་རྗེས། རྒྱ་ནག་ཁྱིམ་མཚེས་རྒྱལ་ཁབ་ཏུ་ཆགས་པས། རྒྱ་ནག་གི་ངོས་ནས་རྒྱ་གར་གྱི་སྟོབས་ཤུགས་བསྐྱེད་བཅུག་མེད་པ་མ་ཟད། ག་དུས་ཡིན་ཡང་འོག་ཏུ་མནན་བསྡད་པའི་གནས་སྟངས་ཤིག་ཏུ་འགྲོ་བསྡད་པ་རེད། འདས་པའི་བཅུ་ཕྲག་ཁ་ཤས་ཀྱི་ནང་དུ་རྒྱ་གར་གྱི་དཔལ་འབྱོར་གནས་སྟངས་ཡར་རྒྱས་ཤུགས་ཆེན་པོ་ཕྱིན་ཡོད་པ་རེད། རྒྱ་གར་གྱི་སྲིད་བློན་མཆོག་ནས་ཀྱང་སྤོབས་པ་ཆེན་པོའི་ངང་འབྱུང་འགྱུར་གྱི་ལོ་ལྔའི་ནང་དུ། དཔལ་འབྱོར་གྱི་ཐོག་ནས་རྒྱ་གར་འཛམ་གླིང་སྟོབས་ཆེན་རྒྱལ་ཁབ་ཨང་གསུམ་པ་ཆགས་པར་རེ་བ་གནང་གི་ཡོད་པ་རེད། དཔལ་འབྱོར་ཡར་རྒྱས་འགྲོ་བ་ཡིན་ན་དམག་དོན་གྱི་ཐོག་ཏུའང་རང་བཞིན་གྱིས་འགྲོ་སོང་གཏོང་རྒྱུ་མང་དུ་འགྲོ་བཞིན་ཡོད་པ་རེད། དམག་དོན་གྱི་ཐོག་ཏུ་འགྲོ་སོང་མང་པོ་གཏོང་བ་དེ་གཙོ་བོ་ཁྱིམ་མཚེས་རྒྱལ་ཁབ་རྒྱ་ནག་གཞུང་གི་བྱེད་བབ་ལ་བསྟུན་བཞིན་ཡོད་པ་དང་། དེ་བཞིན་ཉི་ཧོང་དང་། ཐའེ་ཝན། ཨོ་གླིང་བཅས་ལྷོ་ཤར་ཨེ་ཤ་ཡའི་རྒྱལ་ཁབ་མང་པོའི་ནང་དུ་སྔར་དང་མ་འདྲ་བར་གོ་མཚོན་ཐོག་ལ་འགྲོ་སོང་གཏོང་དགོས་པ་ཞིག་ཆགས་ཡོད་པ་རེད། རྒྱ་གར་གྱིས་ཀྱང་ད་ལྟའི་བར་གོ་མཚོན་མང་པོ་ཞིག་ཨུ་རུ་སུ་ནས་ཉོས་ཡོད་ཅིང་། ཨུ་ཡུག་གཉིས་ཀྱི་དམག་འཁྲུག་དང་། རྒྱལ་སྤྱིའི་གནས་བབ་ལ་བསྟུན་ནས་རྒྱ་གར་གྱིས་ཀྱང་གོ་མཚོན་མཁོ་སྒྲུབ་ཐོག་ཨ་རི་དང་། འཇར་མན། ཧྥ་རན་སི་བཅས་ལ་བསྟུན་དགོས་ཁེལ་ཡོད་པ་རེད། གང་ལྟར་འདས་པའི་ལོ་ངོ་ ༧༧ རིང་རྒྱ་གར་གཞུང་གི་དཔལ་འབྱོར་གྱི་གནས་བབ་ཡར་རྒྱས་ཤུགས་ཆེན་པོ་ཕྱིན་ཡོད་པ་དང་། དེ་བཞིན་རྒྱལ་ཁབ་ཀྱི་བདེ་འཇགས་ཐོག་སྔར་དང་མ་འདྲ་བའི་ནུས་པ་ཆེ་རུ་བཏོན་ཐུབ་ཡོད་པ་རེད། རྒྱལ་ཁབ་ནང་ལོགས་སུ་རྙོག་དྲ་བཟོ་མཁན་ཏོག་ཙམ་ཡོང་བསྡད་ཀྱི་ཡོད་ཀྱང་། ཁྱོན་ཡོངས་ནས་རྒྱ་གར་ནི་འཛམ་གླིང་གི་ཆོས་ལུགས་དང་སྐད་རིགས་སོགས་མང་པོ་ཡོད་པ་དེ་མཐུན་ལམ་གྱི་ཐོག་ནས་གནས་ཐུབ་པའི་མི་འབོར་ཆེ་ཤོས་ཀྱི་ཞི་བདེའི་རྒྱལ་ཁབ་ཅིག་རེད་བསམ་གྱི་འདུག་ཅེས་གསུངས་སོང་།

དེ་བཞིན་སྲིད་སྐྱོང་མཆོག་གིས། རྒྱ་གར་རང་བཙན་ཐོབ་པའི་སྐབས་སུ་ང་ཚོའང་རང་བཙན་གྱི་ཐོག་ཏུ་གནས་བསྡད་ཡོད་པ་རེད། ལོ་ཁ་ཤས་ཀྱི་རྗེས་སུ་རྒྱ་ནག་དམར་པོའི་གཞུང་གིས་བཙན་འཛུལ་བྱས་པས་བོད་ས་ཤོར་དགོས་བྱུང་བ་རེད། རྒྱ་གར་རང་བཙན་ཐོབ་པའི་སྐབས་ནི་འཛམ་གླིང་དམག་ཆེན་གཉིས་པའི་རྗེས་སུ་ཡིན་པ་དང་། དེ་དུས་རྒྱལ་ཁབ་མང་པོ་ཞིག་ལ་རང་བཙན་ཐོབ་ཡོད་པ་དང་། རྒྱ་གར་རང་བཙན་ཐོབ་པ་ནས་བཟུང་ད་ལྟའི་བར་དུ་རྒྱུན་སྐྱོང་ཐོག་གནས་ཐུབ་ཡོད་པ་མ་ཟད། དམངས་གཙོའི་ལམ་ལུགས་དང་། སྤྱི་ཚོགས་ཀྱི་བཟང་སྤྱོད་ལྡན་པའི་འགྲོ་ལུགས་སྲུང་གཙི་བྱེད་ཐུབ་པར་ལེགས་གསོལ་བསྔགས་བརྗོད་ཞུ་རྒྱུ་ཡིན། རྒྱ་གར་རང་བཙན་ཐོབ་ནས་ལོ་ངོ་ ༧༧ འཁོར་བའི་ཉིན་མོ་དང་སྟབས་བསྟུན་ནས། ༧གོང་ས་རྒྱལ་བ་རིན་པོ་ཆེ་མཆོག་གི་དབུས། བོད་ཕྱི་ནང་གཉིས་སུ་ཡོད་པའི་བོད་མི་ཡོངས་ཀྱིས་རྒྱ་གར་གཞུང་དང་རྒྱ་གར་མི་མང་ཡོངས་ལ་རང་བཙན་ཐོབ་ནས་རང་དབང་ཐོག་ཏུ་གནས་ཐུབ་པར་འཚམས་འདྲི་ཞུ་རྒྱུ་ཡིན། བོད་ལའང་མ་འོངས་པར་སྐྱིད་པའི་ཉི་མ་ཞིག་འཐོབ་པའི་རེ་བ་ཞུ་བཞིན་ཡོད། ཁྱེད་ཚོ་རང་བཙན་མེད་པའི་སྐབས་སུ་དཀའ་ངལ་འཕྲད་བསྡད་དུས། གཞན་གྱིས་རྒྱབ་སྐྱོར་བྱས་ཡོད་པ་བཞིན་དུ། བོད་ཀྱི་དཀའ་རྙོག་མ་སེལ་བར་དུ་མུ་མཐུད་དུ་རྒྱབ་སྐྱོར་གནང་རོགས་ཞུ་ཞེས་གསུངས་སོང་།

གསར་འགོད་པ། བྱམས་པ་ཚེ་རིང་།