ཤིན་ཅང་གི་དམག་སྤྱི་གཞོན་པ་ཞིག་འཛིན་བཟུང་བྱས་འདུག

ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་ཐོན་སྐྱེད་དང་འཛུགས་སྐྲུན་དམག་སྡེའི་དམག་སྤྱི་གཞོན་པ་ཅའོ་ཞའོ་ཕིང་ཞེས་པ་ཞིག་ལ་འཕེལ་རྒྱས་ཀྱི་ལམ་ལུགས་རྩིས་མེད་བཏང་བ་སོགས་ཀྱི་ནག་ཉེས་འོག་ཞིབ་བཤེར་བྱེད་བཞིན་འདུག

ཟླ་འདིའི་ཕྱི་ཚེས་ ༡༦ ཉིན་རྒྱ་ནག་གི་ཆེས་མཐོའི་མི་དམངས་ཞིབ་དཔྱོད་ཁང་ཟེར་བས་གནས་ཚུལ་བསྒྲགས་པ་ལྟར་ན། ཤིན་ཅང་ཐོན་སྐྱེད་དང་འཛུགས་སྐྲུན་དམག་སྡེའི་དམག་སྤྱི་གཞོན་པ་དང་། རྒྱ་ནག་གསར་སྐྲུན་མཐུན་ཚོགས་ཀྱི་འགན་འཛིན་གཞོན་པ་ཟུར་པ་ཅའོ་ཞའོ་ཕིང་ (焦小平) ཞེས་པ་ཞིག་གིས་ལྐོག་རྔན་བླངས་པའི་དོགས་གཞིའི་འོག་འཛིན་བཟུང་བྱས་ཏེ་ཞིབ་བཤེར་བྱེད་བཞིན་འདུག

འདི་ལོའི་ཕྱི་ཟླ་ ༣ ཚེས་ ༡ ཉིན་རྒྱ་ནག་དབུས་ཁྲིམས་སྒྲིག་ལྟ་ཞིབ་ཁང་དང་ཡུ་གུར་རང་སྐྱོང་ལྗོངས་ལྟ་ཞིབ་ཁང་གིས། གནད་ཡོད་མི་སྣ་ཁག་ཅིག་ཕྱིར་ཕུད་བཏང་བའི་བཀོད་ཁྱབ་འོག ཅའོ་ཞའོ་ཕིང་གི་ཤིན་ཅང་ཐོན་སྐྱེད་དང་འཛུགས་སྐྲུན་དམག་སྡེའི་དམག་སྤྱི་གཞོན་པ་དང་། རྒྱ་ནག་གསར་སྐྲུན་མཐུན་ཚོགས་ཀྱི་འགན་འཛིན་གཞོན་པ་སོགས་ཀྱི་གོ་གནས་མེད་པ་བཟོས་ཡོད་པ་མ་ཟད། ཕྱི་ཟླ་ ༧ ཚེས་ ༢༧ ཉིན་ཅའོ་ཞའོ་ཕིང་དམག་ཤོག་ཚོགས་ཁོངས་ནས་ཕུད་ཡོད་འདུག

ལོ་མང་རིང་ནོར་སྲིད་ལྷན་ཁང་དུ་ལས་ཀ་བྱས་མྱོང་བའི་ཅའོ་ཞའོ་ཕིང་གིས། འཕེལ་རྒྱས་ཀྱི་ལམ་ལུགས་གསར་པ་རྩིས་མེད་རྡོག་རོལ་བཏང་བ་དང་། ཆིན་ལིང་རི་རྒྱུད་ཁུལ་གྱི་ཁོར་ཡུག་སྲུང་སྐྱོབ་གལ་ཆེན་དུ་མི་འཛིན་པར་ཆུ་གློག་གསར་སྤེལ་བྱས་ཏེ། ཆིན་ལིང་གི་སྣོད་བཅུད་ལ་གཏོར་བཤིག་བཏང་བ། རྒྱལ་ཁབ་ཀྱི་བུ་ལོན་ཉེན་ཁ་ཆེ་རུ་བཏང་བ། དངུལ་རྩའི་བདེ་འཇགས་ལ་རྐྱེན་ངན་བཟོས་ཡོད་ལུགས་དང་། དེ་བཞིན་ལྐོག་ནས་སྒེར་གྱི་ཁེ་ལས་གཉེར་བ་དང་ཉེ་འབྲེལ་ལ་ཁེ་ཕན་བསྐྲུན་པ་སོགས་ཀྱི་ནག་ཉེས་གཡོགས་འདུག

ཅའོ་ཞའོ་ཕིང་རིག་གནས་གསར་བརྗེ་ཡི་ལས་འགུལ་ཆེན་མོ་མགོ་བཙུགས་པའི་ལོ་དེར་སྐྱེས་ཤིང་། དཔལ་འབྱོར་རིག་པའི་ཐོག་རབ་འབྱམས་པ་དང་། མཐོ་རིམ་དཔལ་འབྱོར་རིག་པའི་མཁས་ཅན་དུ་ངོས་འཛིན་བྱེད་ཀྱི་ཡོད་འདུག ཕྱི་ལོ་ ༡༩༨༩ ནས་བཟུང་རྒྱ་ནག་ནོར་སྲིད་ལྷན་ཁང་དང་སྤྱི་ཚོགས་ཀྱི་མ་རྩ་མཉམ་ལས་ལྟེ་གནསཀྱི་འགན་འཛིན་གཞོན་པའི་འགན་འཁུར་མྱོང་ཡོད་འདུག  འདས་ལོའི་ཕྱི་ཟླ་ ༦ པའི་ནང་ཤིན་ཅང་ཐོན་སྐྱེད་དང་འཛུགས་སྐྲུན་དམག་སྡེའི་རྒྱུདམག་སྤྱི་གཞོན་པ་དང་། རྒྱ་ནག་གསར་སྐྲུན་མཐུན་ཚོགས་ཀྱི་འགན་འཛིན་གཞོན་པར་བསྐོས་ཡོད་འདུག

གསར་འགོད་པ། བསྟན་འཛིན་ཕུར་བུ།