དེ་རིང་༧གོང་ས་མཆོག་གིས་ཧ་ཝར་ཌི་སློབ་ཆེན་གྱི་སློབ་མ་ཁག་ཅིག་ལ་བཀའ་སློབ་བསྩལ་ཏེ། ཀུན་སློང་གཙང་མ་ཞིག་ཡོད་རྒྱུ་གལ་ཆེ་སྐོར་གསུངས་འདུག
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་ནས་ཨ་རིའི་ཧ་ཝར་ཌི་གཙུག་ལག་སློབ་ཆེན་གྱི་སློབ་མ་ཁག་ཅིག་ལ་མཇལ་ཁ་སྩལ་སྐབས། ༧མགོན་པོ་མཆོག་གིས་ནང་སེམས་ཀྱི་ཞི་བདེ་བསྐྲུན་ཐབས་དང་། ཁོང་ཁྲོ་དང་ཕྲག་དོགས་སོགས་ཉོན་མོངས་ཇེ་ཉུང་དུ་གཏོང་ཐབས་ནི་སེམས་བཅོས་པ་ལ་བརྟེན་ནས་བྱུང་གི་ཡོད། གལ་སྲིད་ངོས་རང་ལྟ་བུ་དཔེར་བཞག་ན། ཐོག་མའི་འཆར་ང་ཚོ་ཚང་མ་འདྲ་པོ་ཡིན་ཡང་། བསམ་བློ་མང་པོ་བཏང་བ་བརྒྱུད་དེང་སང་ངོས་ཀྱི་སེམས་སྔར་ལྷག་གིས་ཧ་ཅང་ཞི་བདེ་ཡིན།
རྒྱ་ནག་དམར་ཤོག་ཚོགས་པར་ཁོང་ཁྲོ་ཟ་བ་ལས་ལྷག་གིས། ཁོ་ཚོའི་ལྟ་རྒྱང་ཐོས་རྒྱ་ཆུང་དྲགས་པ་དང་བསམ་བློ་གུ་གསུབ་དོགས་པོ་ཡོད་པར་སྙིང་རྗེ་ཡི་འདུག དེར་བརྟེན། ངོས་ཀྱིས་ཁོ་ཚོར་སྨོན་ལམ་རྒྱག་གི་ཡོད་པ་ལས་བསམ་བློ་ངན་པ་འཛིན་མ་མྱོང་ལ། དེ་ཧ་ཅང་ཡག་པོ་འདུག ཀུན་སློང་གཙང་མ་ཞིག་ཡོད་པ་ཡིན་ན་གཉིད་ཀྱང་སྐྱིད་པོ་ཞིག་ཡོང་གི་འདུག ཅེས་གསུངས།
དགའ་ལྡན་ཕོ་བྲང་གི་མཛད་འཆར་ལྟར་ན། ཕྱི་ཟླ་ ༩ ཚེས་ ༥ དང་ ༦ བཅས་ཉིན་གཉིས་རིང་༧གོང་ས་རྒྱལ་རིན་པོ་ཆེ་མཆོག་གིས་ལྷོ་ཤར་ཨེ་ཤེ་ཡའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་འཇུག་པའི་རང་འགྲེལ་གྱི་བཀའ་ཆོས་བཀའ་དྲིན་སྩལ་རྒྱུ་དང་། ཕྱི་ཟླ་ ༡༠ ཚེས་ ༢ ནས་ ༤ བར་ཉིན་གྲངས་གསུམ་རིང་༧མགོན་པོ་གང་ཉིད་མཆོག་གིས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་སོགས་ཀྱིས་ཇི་ལྟར་གསོལ་བ་བཏབ་པ་ལྟར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་ལམ་རིམ་བསྡུས་དོན་དང་། བློ་སྦྱོང་དོན་བདུན་མ། སྤྱན་རས་གཟིགས་ཀྱི་བཀའ་དབང་བཅས་ཀྱི་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག
