ཟམ་ཆེན་ཞིག་གློ་བུར་དུ་བརྡིབས་ནས་ཉུང་མཐར་མི་གྲངས་ ༢༦ ལྷག་རྐྱེན་འདས་སུ་ཕྱིན།

རྒྱ་གར་གྱི་བྱང་ཤར་མངའ་སྡེ་མི་རྫོ་རམ་དུ་འཛུགས་སྐྲུན་བྱེད་བཞིན་པའི་མེ་འཁོར་ལྕགས་ལམ་གྱི་ཟམ་ཆེན་ལ་གློ་བུར་དུ་རྡིབ་སྐྱོན་བྱུང་སྟེ་ཉུང་མཐར་མི་གྲངས་ ༢༦ རྐྱེན་འདས་སུ་ཕྱིན་འདུག

ཁ་སང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༣ ཉིན་རྒྱ་གར་གྱི་བྱང་ཤར་མངའ་སྡེ་མི་ཛོ་རམ་ (Mizoram) གྱི་ཨེ་རྫལ་(Aizawl)རྫོང་ཁོངས་ཀྱི་བྷའེ་རཱ་བྷི་ནས་སའེ་རང་བར་གྱི་མེ་འཁོར་ལྕགས་ལམ་(Bhairbi-Sairang line railway )གྱི་ཟམ་ཆེན་དེར་གློ་བུར་དུ་རྡིབ་སྐྱོན་བྱུང་སྟེ། ཉུང་མཐར་མི་གྲངས་ ༢༦ རྐྱེན་འདས་སུ་ཕྱིན་ཡོད་པ་དང་། མི་མང་པོ་གར་སོང་ཆ་མེད་དང་རྨས་སྐྱོན་ཐེབས་ཡོད་འདུག

དེའི་ཐད་རྒྱ་གར་གྱི་སྲིད་བློན་མོ་དྷི་མཆོག་གིས། མི་རྫོ་རམ་ནང་ཟམ་པར་རྡིབ་སྐྱོན་ཤོར་བའི་དོན་རྐྱེན་བྱུང་བར་བློ་ཕམ་ཆེན་པོ་བྱུང་བ་དང་། དོན་རྐྱེན་དེའི་ཁྲོད་རྐྱེན་འདས་སུ་ཕྱིན་པ་ཚོའི་ནང་མི་རྣམས་ལ་གདུང་སེམས་མཉམ་སྐྱེད་ཡོད་སྐོར་དང་། རྨས་སྐྱོན་ཕོག་པ་རྣམས་གང་མགྱོགས་དྲག་སྐྱེད་ཡོང་བའི་སྨོན་ལམ་ཡོད་ལ། རྒྱ་གར་གཞུང་ནས་རྐྱེན་འདས་སུ་ཕྱིན་པ་ཚོའི་ནང་མི་གཉེན་ཉེ་ལ་འབུམ་ ༢ རེ་སྤྲོད་རྒྱུ་དང་། རྨས་སྐྱོན་ཕོག་པའི་མི་རེར་སྟོང་ཕྲག་ ༥༠ རེ་སྤྲོད་རྒྱུ་ཡིན་སྐོར་གསུངས་འདུག་ལ། མངའ་སྡེ་དེའི་སྤྱི་ཁྱབ་བློན་ཆེན་ཛོ་རམ་ཐང་ག་ (Zoramthanga) ལགས་ཀྱིས་ཀྱང་གདུང་སེམས་མཉམ་སྐྱེད་ཡོད་སྐོར་བརྗོད་འདུག

མེ་འཁོར་ལྕགས་ལམ་གྱི་ལས་འཆར་དེ་ནི་ཕྱི་ལོ་ ༢༠༡༥ ཙམ་ལ་མགོ་འཛུགས་བྱས་ཏེ་འདི་ལོའི་ཕྱི་ཟླ་ ༨ པའི་ནང་མཇུག་བསྡུ་འཆར་ཡོད་ཀྱང་། ལས་ཡུན་ནང་འགྲུབ་མེད་པར་མུ་མཐུད་ནས་འཛུགས་སྐྲུན་བྱེད་བཞིན་པ་ཡིན་འདུག མེ་འཁོར་ལྕགས་ལམ་དེ་མཐར་རྒྱ་གར་དང་འབར་མའི་ས་མཚམས་བར་དུ་སྐྱེལ་བའི་འཆར་གཞི་ཡོད་འདུག་ལ། རྒྱ་གར་དབུས་ལྕགས་ལམ་བཟོ་སྐྲུན་ཁང་གི་བྱང་ཤར་ཁུལ་གྱི་ལྕགས་ལམ་ལྟེ་བ་ཆགས་ཡོད་འདུག

འདས་ལོའི་ཕྱི་ཟླ་ ༡༠ པའི་ནང་རྒྱ་གར་གྱི་གྷུ་ཇ་ར་ཏི་མངའ་སྡེའི་ནང་ཟམ་ཆེན་ཞིག་ལ་རྡིབ་སྐྱོན་བྱུང་སྟེ་མི་གྲངས་ ༡༤༠ ལྷག་རྐྱེན་འདས་སུ་ཕྱིན་ཡོད་པ་རེད།

གསར་འགོད་པ། སྐལ་བཟང་སྦྱིན་པ།