བོད་ཀྱི་སྲིད་བྱུས་ཉམས་ཞིབ་པས་རྒྱ་ནག་གཞུང་གིས་ཆོས་ལུགས་སྤེལ་ཡུལ་དོ་དམ་བྱེད་ཐབས་ཟེར་བའི་སྲིད་བྱུས་གསར་པ་དེའི་ཐོག་ནས་མ་འོངས་པར་བོད་ནང་ཁྲིམས་མཐུན་གྱི་རྣམ་པའི་ཐོག་ནས་ཆོས་ལུགས་ལ་བསླབ་པ་སློབ་གཉེར་དང་ཉམས་ལེན་བྱེད་པར་སྔར་ལས་དམ་དྲག་ཤུགས་ཆེ་རུ་འགྲོ་རྒྱུ་ཡིན་པ་ཧ་ཅང་གསལ་པོ་ཡིན་སྐོར་བརྗོད་བྱུང་།
![](https://tibettimes.net/wp-content/uploads/2023/09/Tibet-Policy-Institute.png)
རྒྱ་ནག་གཞུང་གིས་ཟླ་འདིའི་ཕྱི་ཚེས་ ༡ ཉིན་ནས་བཟུང་ཆོས་ལུགས་ལ་སྔར་ལྷག་དམ་དྲག་བྱེད་པའི་སྲིད་བྱུས་འོག ཆོས་ལུགས་བྱེད་སྒོ་སྤེལ་ཡུལ་དུ་དོ་དམ་བྱེད་ཐབས་《宗教活动场所管理办法》ཟེར་བའི་ཚན་པ་ ༧༦ ཡོད་པའི་སྲིད་བྱུས་གསར་པ་ཞིག་ལག་བསྟར་བྱེད་བཞིན་ཡོད་པ་ལྟར། དེ་རིང་འདི་ག་དུས་བབ་གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིགས་ལགས་སུ་སྲིད་བྱུས་དེའི་ནང་གཙོ་བོ་ག་རེ་བྲིས་ཡོད་པ་དང་། སྔོན་མ་དང་མ་འདྲ་བའི་དམ་དྲག་སྲིད་བྱུས་གང་ཡོད་དྲིས་པར་ཁོང་གིས། སྲིད་བྱུས་དེའི་ནང་མ་འདྲ་བ་དམ་དྲག་བྱེད་སྟངས་མང་པོ་འདུག སྤྱིར་བཏང་འཛམ་གླིང་གཞུང་གིས་ཆོས་ལུགས་སྤེལ་སའི་ས་ཆར་ཁྲིམས་བཟོས་ཚེ། ཆོས་ལུགས་སྤེལ་སའི་ས་ཆ་ཞིག་ལ་རྩིས་པར་བརྟེན། དེར་ནུས་པ་འཐོན་རྒྱུར་གཞུང་གི་ངོས་ནས་ཞབས་ཕྱི་དང་རོགས་པ་བྱེད་པ། དེ་བཞིན་དཀའ་ངལ་མི་འཕྲད་པ་དང་དམིགས་ཡུལ་སྒྲུབ་པར་མཐུན་རྐྱེན་སྦྱོར་བ། དེ་ལ་སྲུང་སྐྱོབ་བྱ་རྒྱུ་སོགས་ཡོད་པ་རེད། ད་ལན་གྱི་སྲིད་བྱུས་དེའི་དོན་ཚན་ཆ་ཚང་ལ་བལྟ་ཡོང་དུས། ཕལ་ཆེར་དམ་དྲག་བྱ་རྒྱུ་དེ་རེད་འདུག གཅིག་མི་ཆོག གཉིས་མི་ཆོག་ཟེར་བ་རྐྱང་རྐྱང་དང་། དམ་དྲག་དང་སྒྲིག་འཛུགས་ཀྱི་ནང་དོན་ནང་རྒྱ་ནག་གཞུང་གི་ཁྲིམས་ཐོག་ལ་མེད་པ་རྣམས་དངོས་སུ་ལག་ལེན་བྱེད་བཞིན་པ་ཞིག་རེད་འདུག དེ་ཡང་ཁྲིམས་ཡིག་དེའི་ནང་ཆོས་ལུགས་ཀྱི་བྱེད་སྒོ་སྤེལ་ཡུལ་ལ་ཐོབ་ཐང་སྲུང་སྐྱོབ་དང་ལས་དོན་ལམ་ལྷོངས་ཡོང་རྒྱུའི་ཐོག་ལ་ཚིག་གཅིག་ཀྱང་མི་འདུག སྲིད་བྱུས་དེའི་ནང་དོན་གཙོ་བོ་ནི་ཆོས་ལུགས་ས་ཁུལ་ནང་སྐུ་འདྲ་བཞེངས་མི་ཆོག་པ་དང་། ཆོས་ལུགས་ཀྱི་ར་བའི་ཕྱི་ལོགས་སུ་ཆོས་སྤེལ་མི་ཆོག་པ། ཆོས་ལུགས་ནང་རྒྱ་སྐད་བེད་སྤྱོད་གཏོང་དགོས་པ། དེ་བཞིན་ཆོས་ལུགས་ཀྱི་ས་ཁུལ་དེའི་ནང་འཛུགས་སྐྲུན་བྱ་རྒྱུའི་ལས་གཞི་ཁག་རྒྱ་ནག་གི་རིག་གཞུང་དང་མཐུན་དགོས་པ་དང་། ལས་ཀ་བྱེད་སྟངས་དེ་ཚོ་རྒྱ་ནག་གི་བཟང་སྤྱོད་དང་ལུགས་སྲོལ་ལ་མཐུན་དགོས་པ་བཀོད་འདུག ཅེས་བརྗོད་བྱུང་།
སྲིད་བྱུས་དེའི་ཐོག་ནས་མ་འོངས་པར་སྔར་ལས་ལྷག་པ་དམ་དྲག་ཤུགས་ཆེན་དུ་འགྲོ་ཡི་ཡོད་པ་ལ་ངོས་འཛིན་གནང་གི་ཡོད་མེད་དྲིས་པར་ཁོང་གིས། དམ་དྲག་མུ་མཐུད་དུ་འགྲོ་བསྡད་ཀྱི་ཡོད་རེད། མ་འོངས་པར་དམ་དྲག་འགྲོ་བཞིན་པ་དེ་ཁྲིམས་མཐུན་ཡིན་ཁུལ་བྱེད་པ་དང་། ད་ལྟ་ཁྲིམས་ཀྱི་རྣམ་པའི་ཐོག་ནས་བཟོས་པ་འདིའི་ཐོག་ནས་མ་འོངས་པར་མུ་མཐུད་དུ་དམ་དྲག་ཤུགས་ཆེན་བྱ་རྒྱུ་ཡིན་པ་མཚོན་གྱི་ཡོད་པ་རེད། དམ་དྲག་ཤུགས་ཆེན་བྱེད་པར་སྐྱོན་བརྗོད་མི་ཡོང་བའི་ཆེད་དུ་ཁྲིམས་ལག་བསྟར་བྱེད་པ་དང་། ཁྲིམས་ལུགས་དང་མཐུན་པ་འགྲོ་ཡི་ཡོད་པའི་གྲ་སྒྲིག་བྱེད་ཀྱི་ཡོད་པ་རེད། མ་འོངས་པར་དམ་དྲག་ཤུགས་ཆེ་རུ་འགྲོ་ཡི་རེད་ཟེར་ནས་རྒྱ་ནག་གིས་ཁྱབ་བསྒྲགས་བྱེད་པ་ལྟ་བུ་རེད། དེར་བརྟེན་དམ་དྲག་ཤུགས་ཆེ་རུ་འགྲོ་རྒྱུ་དེ་ཧ་ཅང་གསལ་པོ་ཡིན་སྐོར་གསུངས་བྱུང་།
ཆོས་ལུགས་ཀྱི་ཐོག་ནས་ཕྱི་ལ་འབྲེལ་འདྲིས་བྱེད་པར་དམ་དྲག་དགོས་པ་བཀོད་འདུག ཕྱི་ལ་འབྲེལ་འདྲིས་བྱེད་པར་དམ་དྲག་ཟེར་དུས་ག་འདྲ་ཞིག་ལ་ངོས་འཛིན་གནང་དགོས་དྲིས་པར་ཁོང་གིས། ཕྱི་ལོགས་ནས་རྒྱབ་སྐྱོར་ལེན་པ་དང་ངོས་འཛིན་བྱེད་པར་དམ་དྲག་བྱེད་ཀྱི་ཡོད་པ་བཤད་ཀྱི་ཡོད་རེད། དཔེར་ན་ཕྱི་ལོགས་ནས་ཁྱེད་རང་བླ་མ་དང་སྤྲུལ་སྐུ་ཞིག་ཡིན་པ་ངོས་འཛིན་བྱེད་ཚེ། ཁྱེད་རང་དགོན་པའི་ནང་བསྡད་ཆོག་གི་མེད་པ་དང་ཕྱིར་ཕུད་གཏང་དགོས་ཀྱི་ཡོད་རེད། ལོ་གཉིས་གོང་ནས་ཆོས་ལུགས་ཚོགས་པ་ཁག་གིས་ཕྱི་ལོགས་ནས་རྔན་པ་དང་དངུལ་སོགས་རྒྱ་སྒོར་ཁྲི་ ༡༠ ལས་བརྒལ་བ་ལེན་ཆོག་གི་མེད་པ་རེད། ད་ལྟ་སྒོར་གཅིག་ཀྱང་ལེན་ཆོག་གི་མེད་པ་བཟོས་ནས་སྒོར་ ༢༠ ལེན་ཡང་ཁྲིམས་འགལ་ཆགས་ཀྱི་ཡོད་པ་རེད། དེར་བརྟེན་ཕྱི་ལོགས་ནས་དཔལ་འབྱོར་དང་འཛིན་སྐྱོང་སོགས་ཀྱི་རོགས་རམ་ལེན་མི་ཆོག་པ་བཟོས་ནས་ཆོས་ལུགས་དང་དཔལ་འབྱོར་ཐོག་ནས་འབྲེལ་བ་བཅད་ཡོད་སྐོར་བརྗོད་བྱུང་།
![](https://tibettimes.net/wp-content/uploads/2023/09/Chinas-new-relious-policy--scaled.jpg)
ཕྱི་ལོ་ ༢༠༢༢ ལོའི་ཟླ་ ༣ ཚེས་ ༡ ཉིན་ནས་བཟུང་རྒྱ་ནག་གཞུང་གིས་དྲ་ལམ་གྱི་ཆོས་ལུགས་ཆ་འཕྲིན་ཞབས་ཞུ་སྟངས་འཛིན་བྱེད་ཕྱོགས་ཟེར་བའི་ནང་འཕྲིན་སྟེགས་དང་ཟིན་བྲིས། སྐད་འཕྲིན་སོགས་སྤྱི་ཚོགས་དྲ་གནས་སོགས་སུ་ཐད་གཏོང་དང་སྒྲ་སྒམ། པར་དང་ཡི་གེ། བརྙན་སོགས་ཀྱི་ཐབས་ལམ་བརྒྱུད་དེ་སྤྱི་ཚོགས་ཁྲོད་ཆོས་ལུགས་རིག་གནས་དང་ཆོས་ལུགས་བྱེད་སྒོའི་རིགས་སོགས་སྤེལ་དགོས་ན་ངེས་པར་དུ་དྲ་ལམ་ཆོས་ལུགས་ཆ་འཕྲིན་ཞབས་ཞུ་ཁང་ནས་ཆོག་མཆན་དགོས་པ་མ་ཟད། ཆོས་ལུགས་བྱེད་སྒོ་སྤེལ་མཁན་གྱི་སྐུ་ཚབ་བམ་ཡང་ན་གཙོ་གཉེར་བ་རྒྱ་ནག་ནང་ལོགས་སུ་གནས་སྡོད་བྱེད་མཁན་དང་ཐོབ་ཐང་ལག་ཁྱེར་ཡོད་པ། ཆོས་ལུགས་ཁྲིམས་ཡིག་ཁག་ལ་རྒྱུས་མངའ་ཡོད་པ། ཉུང་མཐར་འདས་པའི་ལོ་ ༣ ནང་ཁྲིམས་འགལ་གྱི་ནག་ཉེས་མེད་པ་དང་། ཆོས་ལུགས་ཁྲིམས་སྒྲིག་ལ་འགལ་བ་མ་ཡིན་པ་སོགས་དགོས་པའི་ཆ་རྐྱེན་བཏོན་ཡོད་པ་རེད། དེ་བཞིན་ཆོག་མཆན་ཡི་གེ་དེ་ལོ་གསུམ་རེ་ནས་བསྐྱར་ཞིབ་བརྒྱུད་གསར་བཟོ་དགོས་པ་དང་། ཆོག་མཆན་ཐོབ་ཐང་བེད་སྤྱོད་དེ་དངུལ་དངོས་བསྡུ་མི་ཆོག་པ་དང་། ཆོས་ལུགས་ཀྱི་སློབ་གླིང་དང་ཆོས་ལུགས་ཚོགས་པ། ཆོས་ལུགས་ཀྱི་བྱེད་སྒོའི་རིགས་སྤེལ་མི་ཆོག་པ་བཅས་དོན་ཚན་ཆེན་པོ་ལྔ་ཡོད་པའི་བཀག་སྡོམ་ཁྲིམས་ཡིག་ཅིག་དངོས་སུ་ལག་བསྟར་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།