དེ་རིང་ཁ་སང་གི་དུས་ཚོད་ནང་བསླབ་གསུམ་སྒོམ་པ་ཡ་མ་བྲལ་བར་བསམ་བློ་གཏོང་རྒྱུ་དེ་གལ་ཆེན་པོ་རེད།

དེ་རིང་བཞུགས་སྒར་ཕོ་བྲང་དུ་༧གོང་ས་མཆོག་ནས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་ཚོགས་པའི་ལས་བྱེད་རྣམས་ལ་མཇལ་ཁ་དང་བཀའ་སློབ་གནང་སྐབས་སློབ་གཉེར་བྱེད་པའི་དགོས་དོན་དེ་ལག་ལེན་ཏུ་འཁེལ་དགོས་པ་རེད་ཅེས་གསུངས་འདུག

མཇལ་ཁ་གནང་སྐབས་༧མགོན་པོ་གང་ཉིད་ཀྱིས། སྙིགས་མའི་དུས་འདིར་མང་ཐོས་སྒྲུབ་ལ་བརྩོན། །ཆོས་བརྒྱད་སྤངས་པས་དལ་འབྱོར་དོན་ཡོད་བྱས། །མགོན་པོ་ཁྱོད་ཀྱི་རླབས་ཆེན་མཛད་པ་ལ། །བདག་ཅག་བསམ་པ་ཐག་པས་ཡི་རང་ངོ༌། །ཞེས་ལབ་པ་བཞིན་དུ། ང་ཚོས་དཔེ་ཆ་ལྟ་བ་དང་། ཐོས་དོན་སྒྲུབ་པར་གཞོལ་ནས་སེམས་རྒྱུད་འདུལ་བོ་བྱེད་དགོས། གང་ལྟར་འཇམ་མགོན་བླ་མ་ཙོང་ཁ་པས་ལམ་སྟོན་ཡག་པོ་ཞེ་བོ་གནང་ཡོད་པ་རེད། རྣམ་པར་དག་པའི་སྟེང་ནས་གཞུང་ཆེན་དེ་དག་སློབ་སྦྱོང་བྱས། སློབ་སྦྱོང་བྱས་པའི་གྲུབ་འབྲས་ལམ་གཙོ་གསུམ་གྱི་ཉམས་ལེན་བྱས་པ་དེར། ང་ཚོས་མིག་དཔེ་རྗེ་རིན་པོ་ཆེའི་རྣམ་ཐར་ལ་ལྟ་དགོས་པ་རེད། སྙིགས་མའི་དུས་འདིར་མང་ཐོས་སྒྲུབ་ལ་བརྩོན། མང་དུ་ཐོས་པ་ཡོད་ན་ཉམས་ལེན་བྱེད་པ་དེ་ཟབ་རྒྱས་ཀྱི་ལམ་གང་དུ་ཡིན་ཡང་གོམས་ས་ལ་མ་འགྲོ་བ་དང་། མ་རྟོགས་པ། ལོག་པར་རྟོག་པ། ཕྱིན་ཅི་ལོག་པར་རྟོག་པ། དེ་འདྲ་མ་ཡོང་བའི་སློབ་གཉེར་བྱ་རྒྱུ་གལ་ཆེན་པོ་རེད། སློབ་གཉེར་བྱེད་པའི་དགོས་དོན་དེ་ལག་ལེན་ཏུ་འཁེལ་དགོས་པ་རེད། ངོས་རང་ལ་ཆ་བཞག་ན། སློབ་གཉེར་ཆུང་ཆུང་སྐབས་ནས་བྱས་པ་རེད། ཞོགས་པར་ཡར་ལངས་པ་དང་མཉམ་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་བཞིན་ཡོད། མང་ཐོས་སྒྲུབ་ལ་བརྩོན་ཟེར་བ་ཤེས་སོང་ངམ། ཆོས་བརྒྱད་སྤངས་པ་ཞེས་པ་འཇིག་རྟེན་ཆོས་བརྒྱད་ཀྱི་བློ་དང་མ་འདྲེས་པ་དང་། བསམ་པ་རྣམ་དག་གིས་རྗེ་ཡབ་སྲས་ཀྱི་དགོངས་པ་ཚུལ་བཞིན་དུ་སྒྲུབ་ཐུབ་པ་ཞིག་བྱེད་དགོས། རྗེ་ཡབ་སྲས་ཟེར་དུས་མགོན་པོ་ཀླུ་སྒྲུབ་ཀྱི་ལྟ་གྲུབ་དེ་ང་ཚོས་འཁྱེར་དགོས་ཀྱི་རེད། ཅེས་གསུངས་འདུག

ཡང་མགོན་པོ་གང་ཉིད་ཀྱིས། ངོས་རང་ལ་ནམ་རྒྱུན་དེ་འདྲའི་ཚོར་བ་ཞིག་ཡོང་བསྡད་ཀྱི་འདུག མགོན་པོ་ཀླུ་སྒྲུབ་ཀྱིས་གསུང་ཆོས་གནང་བཞིན་པའི་གྲལ་མཇུག་དེར་ངོས་རང་ཡོད་བསྡད་པའི་སྣང་བ་ཤར་ཡོང་གི་འདུག བྱས་ཙང་ཀླུ་སྒྲུབ་ཀྱི་དགོངས་པ་ཇི་བཞིན་དུ་དབུ་མའི་ལྟ་བ་དང་འབྲེལ་བའི་བྱང་ཆུབ་ཀྱི་སེམས་ཉམས་ལེན་བྱེད་རྒྱུ་དེ། ཆོས་བརྒྱད་སྤངས་པས་དལ་འབྱོར་དོན་ཡོད་བྱས་ཟེར་བ་དེ་རེད། དེ་ནས་ཚང་མས་མཉམ་ལས་ཧུར་ཐག་གནང་ཤོག དེ་རིང་ཁ་སང་གི་དུས་ཚོད་ནང་དུ་བསླབ་གསུམ་སྒོམ་པ་ཡ་མ་བྲལ་བར་བསམ་བློ་བཏང་བ་དེར། འཛམ་གླིང་གི་མི་རྣམས་ཀྱིས་དོ་སྣང་ཞེ་དྲགས་བྱས་བསྡད་ཡོད་པ་རེད། དེ་དཔེ་གལ་ཆེན་པོ་འདུག  ཅེས་བཀའ་སློབ་བསྩལ་སོང་།

མཛད་འཆར་ལྟར་ན། ཕྱི་ཟླ་ ༡༠ ཚེས་ ༢ ནས་ཉིན་གསུམ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱིས་ཇི་ལྟར་གསོལ་བ་བཏབ་པ་བཞིན། ༧གོང་ས་རྒྱལ་བ་རིན་པོ་ཆེ་མཆོག་ནས་ལམ་རིམ་བསྡུས་དོན་དང་། བློ་སྦྱོང་དོན་བདུན་མ། སྤྱན་རས་གཟིགས་ཀྱི་བཀའ་དབང་བཅས་ཀྱི་བཀའ་ཆོས་སྩལ་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།