རྒྱ་ནག་མི་སྲོག་འགན་ལེན་ཚད་ཡོད་ཚོང་གཉེར་ཁང་གི་འགན་འཛིན་ཟུར་པ་ཝང་བྷིན་གྱིས་ཨ་སྒོར་ས་ཡ་ ༤༥ ལྷག་ལྐོག་ཟ་དང་ཨ་སྒོར་ས་ཡ་ ༧ ལྷག་སྦེད་སྐོང་བྱས་པའི་ཉེས་མིང་འོག་སྲོག་ཁྲིམས་བཅད་ཡོད་འདུག
ཁ་སང་ཕྱི་ཚེས་ ༡༣ ཉིན་གསར་ལམ་དུ་གནས་ཚུལ་ཐོན་པ་ལྟར་ན། རྒྱ་ནག་མི་སྲོག་འགན་ལེན་ཚད་ཡོད་ཚོང་གཉེར་ཁང་(China Life Insurance Company Limited)གི་འགན་འཛིན་ཝང་བྷིན་(Wang Bin)ཞེས་པ་ཞིག་གིས། ཨ་སྒོར་ས་ཡ་ ༤༥ ལྐོག་ཟ་བྱས་པ་དང་། ཨ་སྒོར་ས་ཡ་ ༧།༤༤ སྦེད་སྐོང་བྱས་པའི་ནག་ཉེས་འོག ཟླ་འདིའི་ཕྱི་ཚེས་ ༡༢ ཉིན་ཧྲན་ཏུང་ཞིང་ཆེན་ཅི་ནན་གྲོང་ཁྱེར་འབྲིང་རིམ་མི་མང་ཁྲིམས་ཁང་ཟེར་བས་དུས་ཡུན་ལོ་གཉིས་འཕར་འགྱང་གིས་ཝང་ལ་སྲོག་ཁྲིམས་བཅད་ཡོད་འདུག
འདས་ལོའི་ཕྱི་ཟླ་ ༡ པོའི་ནང་ཞིབ་འཇུག་བྱེད་མགོ་བཙུགས་ཡོད་པ་དང་། ལོ་དེའི་ཕྱི་ཟླ་ ༩ ཚེས་ ༡ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་གིས་ཝང་བྷིན་གྱིས་ལྐོག་ཟ་རུལ་སུངས་དང་ལྐོག་རྔན་བླངས་པ། རང་ཉིད་ཀྱི་ཁེ་ཕན་སླད་དབང་ཆ་བེད་སྤྱོད་ལོག་པར་བཏང་བའི་དོགས་གཞིའི་འོག ལས་གནས་དང་དམར་ཤོག་ཚོགས་པའི་ཁོངས་ནས་ཕྱིར་ཕུད་བཏང་ཡོད་འདུག དེ་ནས་ཟླ་དེའི་ཕྱི་ཚེས་ ༡༤ ཉིན་དངོས་སུ་འཛིན་བཟུང་བྱས་ཡོད་འདུག
བརྒྱུད་ལམ་ཁག་གི་གནས་ཚུལ་ལྟར་ན། ཕྱི་ལོ་ ༢༠༢༡ ལོར་ལྐོག་ཟ་རུལ་སུངས་ཚབས་ཆེན་བྱས་པའི་ཉེས་མིང་འོག་སྲོག་ཁྲིམས་བཅད་པའི་རྒྱ་ནག་ཧྭ་རོང་རྒྱུ་ནོར་དོ་དམ་ཚད་ཡོད་ཚོང་གཉེར་ཁང་གི་འགན་འཛིན་ཟུར་པ་ལའེ་ཞོ་མིན་དང་ཝང་བྷིན་བར་གསང་བའི་འབྲེལ་འདྲིས་ཟབ་པ་མ་ཟད། ཨོ་མིན་གྱི་རྒྱན་འཇོག་ཁྲོམ་རའི་ནང་གི་གཅེན་གཅུང་དུའང་འབོད་སྲོལ་ཡོད་འདུག ད་དུང་ཝང་བྷིན་གྱིས་ལའེ་ཞོ་མིན་གྱི་གཉེན་ཉེ་ཚོར་ཞི་བདེ་རྒྱ་མཚོ་ཚོང་གཉེར་ཁང་དང་རྒྱ་ནག་མི་སྲོག་འགན་ལེན་ཚད་ཡོད་ཚོང་གཉེར་ཁང་ནང་དུ་ལས་ཀའི་གོ་སྐབས་སྤྲད་པ་དང་། ལའེ་ཞོ་མིན་གྱིས་ཝང་བྷིན་གྱི་གཅུང་པོ་ཝང་ཆང་ཧྭ་རོང་རྒྱུ་ནོར་དོ་དམ་ཚད་ཡོད་ཚོང་གཉེར་ཁང་དུ་ཡར་འཇུག་མར་ལེན་ཐེངས་མང་བྱས་པ་སོགས་གོ་དབང་ལོག་སྤྱོད་བྱས་པ་མ་ཟད། འདས་ལོར་ཝང་བྷིན་འཛིན་བཟུང་བྱས་རྗེས་ཝང་ཆང་ཧོང་ཀོང་ནས་པེ་ཅིན་དུ་ཕྱིར་ལོག་རྗེས་གོ་ཐོས་མེད་པར་གྱུར་ཡོད་པ་རེད།
དེ་བཞིན་རྒྱ་སྒོར་ས་ཡ་ ༨༥ ལྷག་ལྐོག་ཟ་བྱས་པའི་རྒྱ་ནག་རྒྱལ་ཁབ་འཕེལ་རྒྱས་དངུལ་ཁང་གི་དམར་ཤོག་དྲུང་ཆེ་ཧུའུ་ཧའེ་པང་ལ་ཕྱི་ལོ་ ༢༠༢༡ ལོར་ཧུའུ་པའེ་ཞིང་ཆེན་ཁྲིན་ཌི་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས་ཚེ་བཙོན་གྱི་ཁྲིམས་ཐག་བཅད་ཡོད་པ་དང་། ཧུའུ་ཧའེ་པང་དང་ཝང་བྷིན་གཉིས་ལོ་ ༤ ལྷག་ལ་ལས་རོགས་བྱས་ནས་བསྡད་པ་མ་ཟད། ལའེ་ཞོ་མིན་དང་ཧུའུ་ཧའེ་པང་གཉིས་གཅིག་རྗེས་མཐུད་དུ་གནས་ཚུལ་བྱུང་རྗེས་ཝང་བྷིན་མཉམ་དུ་ཡོད་དགོས་ངེས་པའི་གླེང་གཞི་བྱུང་ཡོད་ཀྱང་། ད་ལྟ་བར་དུ་ཝང་བྷིན་ལ་ཐག་གཅོད་བྱུང་མེད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
