མ་ཧཱ་གུ་རུའི་འབུམ་ཚོགས་དེ་བཞུགས་སྒར་གཙོ་བྱས་པའི་ས་གནས་གང་སར་ཚོགས་སྲོལ་ཡོད་པ་བཞིན་ད་ཐེངས་ཐའེ་ཝན་ནང་འབུམ་ཚོགས་ཆེན་མོ་ཐེངས་གསུམ་འཚོགས་འདུག
ཟླ་འདིའི་ཕྱི་ཚེས་ ༡༧ ཉིན་ཐའེ་ཝན་རྒྱལ་ས་ཐའེ་པེ་རུ་ཐའེ་སྡོད་བོད་རིགས་སྤྱི་དང་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་སྣེ་ཁྲིད་འོག ཐའེ་ཝན་གནས་བཞུགས་བོད་བརྒྱུད་ནང་བསྟན་གྱི་མཁན་སྤྲུལ་དགེ་བཤེས་སོགས་རིས་མེད་དགེ་འདུན་པ་བརྒྱ་ཕྲག་དང་། ས་གནས་ཀྱི་བོད་རིགས་མི་མང་བརྒྱ་ཙམ་ལྷན་འཛོམས་ཀྱིས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མ་ཧཱ་གུ་རུའི་འབུམ་ཚོགས་ཐེངས་གསུམ་པ་ཚོགས་ཡོད་འདུག
ཐེངས་འདིར་སྔ་འགྱུར་རྙིང་མའི་བསྟན་པའི་འབྱུང་གནས་ཨོ་རྒྱན་སྨིན་གྲོལ་གླིང་གི་བསྟན་པའི་རྩ་ལག་༧སྐྱབས་རྗེ་མཁོ་ཁྱིམ་རིན་པོ་ཆེ་ཆེད་དུ་གདན་ཞུས་ཀྱིས། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཕྱག་ལས་ལ་བསྔགས་བརྗོད་དང་། འབུམ་ཚོགས་ཆེན་མོ་ཚོགས་པ་དེ་བསྟན་འགྲོ་སྤྱི་དང་བྱེ་བྲག་ལ་ཧ་ཅང་གལ་ཆེན་ཡིན་ཚུལ་སོགས་དང་འབྲེལ་བའི་གསུང་བཤད་གནང་ཡོད་འདུག
ཚོགས་ཞུགས་པ་མང་པོ་ཞིག་གིས། ཐའེ་ཝན་དུ་བོད་པ་རང་གི་ཆེད་དུ་གཙོ་བོར་དམིགས་པའི་ལས་འགུལ་འདི་འདྲ་ཞིག་སྤེལ་ཐུབ་པ་དེས་དགེ་འདུན་པ་དང་ས་གནས་ཀྱི་བོད་རིགས་བར་གྱི་འབྲེལ་ལམ་ཟབ་ཏུ་གཏོང་བ་དང་། ཁྱད་པར་དུ་ཕྲུ་གུ་རྣམས་ལ་ཆོས་དང་རིག་གཞུང་གི་བག་ཆགས་ཡག་པོ་ཞིག་འཇོག་ཐུབ་པ་སོགས་ལ་དམིགས་བསལ་ཕན་ཐོགས་ཆེན་པོ་བྱུང་དང་འབྱུང་བཞིན་པ་ཡིན་པའི་བསམ་ཚུལ་གཅིག་མཐུན་བྱུང་ཡོད་པ་དང་། ཐེངས་འདིའི་འབུམ་ཚོགས་ཀྱི་འགྲོ་གྲོན་ཡོངས་རྫོགས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་འགན་འཛིན་རིན་པོ་ཆེ་རྣམ་པ་དང་འབྲེལ་ཡོད་དགེ་འདུན་པ། ས་གནས་བོད་རིགས་བཅས་ཀྱིས་མ་སྐུལ་དང་བླངས་ཐོག་ཞལ་འདེབས་ཕུལ་བ་ཞིག་ཆགས་ཀྱི་འདུག
ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་འབུམ་ཚོགས་དེ་འདྲ་ཞིག་འཚོགས་དགོས་དོན་ནི། སློབ་དཔོན་རིན་པོ་ཆེ་ནི་བོད་ཁ་བ་ཅན་གྱི་ཐུན་མོང་མིན་པའི་ལྷ་སྐལ་ཡིན་པ་མ་ཟད། ༧རྒྱལ་དབང་ལྔ་པ་ཆེན་པོའི་དུས་ནས་བོད་ཀྱི་གཞུང་ས་དང་རྫོང་སྒོ་ཁག་ཏུའང་དམིགས་བསལ་གྱིས་བསྟན་འགྲོའི་རྒུད་པ་ཞི་བའི་ཆེད་དུ་དམིགས་པའི་ཚེས་བཅུའི་དུས་མཆོད་གཏན་འཇགས་ཀྱི་སྲོལ་གཏོད་པ་དང་། དུས་འདིར་ཡང་ལྷ་བླའི་དགོངས་པ་གཅིག་མཐུན་གྱིས་སྤྱི་མཐུན་གྱི་བསོད་ནམས་གསོག་པ་དང་། ཕྱི་ནང་གི་བར་ཆད་སེལ་བར་གུ་རུ་རིན་པོ་ཆེར་གསོལ་བ་འདེབས་པ་ལས་གལ་ཆེ་བ་མེད་པའི་བཀའ་ལུང་ཡང་ཡང་གནང་བའི་དགོངས་དོན་བཞིན། བཞུགས་སྒར་གཙོ་བོར་གྱུར་པའི་ས་གནས་དུ་མར་གུ་རུའི་འབུམ་ཚོགས་ཆེན་མོ་ལོ་ལྟར་འཚོགས་ཀྱི་ཡོད་པ་ལྟར། ཐའེ་ཝན་དུ་འབུམ་ཚོགས་ཚོགས་ཐུབ་ན་ཧ་ཅང་དགེ་མཚན་ཆེ་བར་མཐོང་ནས་གོ་སྒྲིག་ཞུས་པ་ཞིག་ཡིན་འདུག་ལ། ད་ཐེངས་ཀྱི་གུ་རུའི་འབུམ་ཚོགས་ཆེན་པོ་དེར་ཞིབ་འཇུག་ཚོགས་པའི་ངོས་ནས་ནམ་རྒྱུན་ལས་དོན་ཆ་བགོས་ཀྱི་འགྲོ་ཕྱོགས་ལྟར། ཚོགས་གཞོན་མཁན་པོ་ངག་དབང་མཁས་གྲུབ་དང་། སེར་བྱེས་དགེ་བཤེས་སྣང་སྣང་སྟེ་ཚོགས་གཞོན་རྣམ་པ་གཉིས་ཀྱིས་ཐུགས་འགན་བཞེས་ཡོད་པ་དང་། ཐའེ་སྡོད་བོད་རིགས་ཚོགས་པའི་ངོས་ནས་ཚོགས་གཞོན་བསྟན་འཛིན་རྣམ་དག་གི་དབུས་པའི་རྒྱུན་ལས་ཡོངས་ཀྱིས་ཀྱང་དེ་མཚུངས་འགན་ཁུར་བཞེས་ཡོད་པ་རེད།
བོད་བརྒྱུད་ནང་བསྟན་ཞིབ་འཇུག་ཚོགས་པས་གནས་ཚུལ་མཁོ་སྤྲོད་གནང་།
རྩོམ་སྒྲིག་པ། སྐལ་བཟང་སྦྱིན་པ།
