གྲོས་ཚོགས་ཚོགས་དུས་དྲུག་པའི་སྐབས་གཞི་རིམ་མི་མང་རེ་འབོད་ཚོགས་པ་དང་རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་གཉིས་ནས་གྲོས་ཚོགས་ལ་ཞུ་འབོད་ལས་འགུལ་སྤེལ་སོང་།
དེ་རིང་ཆར་བ་སིམ་སིམ་ཞིག་འབབ་བཞིན་པ་དང་བསྟུན། སྔ་དྲོའི་ཆུ་ཚོད་ ༩།༣༠ སྟེང་གངས་སྐྱིད་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་རྭ་བའི་ནང་ཉིན་གྲངས་དགུའི་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་དབུ་འཛུགས་གནང་སོང་བ་དང་། ཚོགས་དུས་དྲུག་པའི་སྟེང་སྤྱི་འཐུས་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་དང་རྡོ་རྗེ་ཚེ་བརྟན་ལགས་གཉིས་ལས་ཉིན་དང་པོའི་སྐབས་མཉམ་ཞུགས་གནང་ཐུབ་མེད་པ་དང་། སྤྱི་འཐུས་དབྲ་ཙ་བསོད་ནམས་ནོར་བུ་ལགས་ཚོགས་ཐུན་ཧྲིལ་པོའི་རིང་དགོངས་པ་ཞུས་ཡོད་འདུག་ལ། བོད་མི་མང་སྤྱི་ཟུར་ཚུལ་ཁྲིམས་བསྟན་འཛིན་ལགས་འདས་གྲོངས་སུ་ཕྱིན་པར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་གཅིག་དང་། བོད་ནང་གི་ཛ་དྲག་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་བདུན་གྱི་སྐོར་ལ་གླེང་མོལ་གནང་བཞིན་པ་རེད་འདུག
ཡང་གྲོས་ཚོགས་དང་ཐག་ཉེ་བའི་གངས་སྐྱིད་ལག་སྤོལ་རྩེད་ཐང་དུ་རྒྱ་བལ་གཉིས་དང་ཨ་རི། ཡུ་རོབ་སོགས་ནས་ཕེབས་པའི་གཞི་རིམ་མི་མང་ལྔ་བརྒྱ་ཙམ་གྱིས། མང་གཙོའི་ཀ་བ་གསུམ་གྱི་ལྗིད་མཉམ་སྟངས་འཛིན་དང་འབྲེལ། ད་ལྟའི་གྲོས་ཚོགས་ཚོགས་དུས་དྲུག་པའི་སྟེང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཡོང་སླད་ཞི་འབོད་ལས་འགུལ་སྤེལ་གྱིན་འདུག་པ་དང་། རྒྱལ་སྤྱིའི་ཇོ་ནང་འགྲོ་ཕན་ལྷན་ཚོགས་ཀྱིས་སྤྱི་འཐུས་རྣམས་ལ། དཔལ་རྒྱལ་བ་ཇོ་ནང་པའི་ཆོས་བརྒྱུད་ལ་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་ཁྱབ་ཁོངས་སུ་ཆོས་བརྒྱུད་སྤྱི་མཚུངས་བཞིན་ཐོབ་ཐང་འདྲ་མཉམ་གནང་སྐྱོང་ཡོང་བའི་འབོད་སྐུལ་ཞུ་ཡིག་ཕུལ་གྱིན་འདུག
དེ་བཞིན། དེ་རིང་སྔ་དྲོར་གསར་འགོད་པ་རྣམས་གྲོས་ཚོགས་ཀྱི་ནང་དུ་བསྐྱོད་པར་འགག་སྲུང་ནན་མོ་བྱེད་བཞིན་པ་མ་ཟད། སྙན་ཞུ་ཕུལ་བ་བཞིན་ཚོགས་དྲུང་ལས་ཁུངས་ནས་ཟུར་ཉན་ལག་འཁྱེར་ཞིག་གནང་བའི་ནང་། གསར་འགྱུར་བརྒྱུད་ལམ་ཁག་གི་ཟུར་ཉན་པས་བརྙན་པར་འདེབས་རྒྱུ་དང་། སྒྲ་འཇུག་བཅས་བྱ་དགོས་ཚེ་ཚོགས་གཙོའི་བཀའ་འཁྲོལ་ཞུ་ཐོབ་དགོས་ཞེས་བྲིས་འདུག་ལ། ཚོགས་དྲུང་ལས་ཁུངས་ལ་སྤྱི་འཐུས་རྒྱུན་ལས་ཀྱིས་བཀའ་ཕེབས་པ་ཞིག་ཕྱི་དྲིལ་ལས་ཁུངས་བརྒྱུད་གསར་འགོད་པ་རྣམས་ལ་འབྱོར་བའི་བརྡ་ཐོ་ཞིག་གི་ནང་། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པའི་སྐབས་གསར་འགོད་པ་དང་ཟུར་ཉན་རྣམས་སྒྲིག་གསལ་བཞིན་གྲོས་ཚོགས་སུ་བཅར་ཆོག ཡིན་ནའང་གྲོས་ཚོགས་ནང་བརྙན་ལེན་པར་ཆས་རིགས་བསྣམ་མི་དགོས་པར། སྔར་ལྟར་པར་དང་བརྙན་ཐུང་ཁག་བོད་ཀྱི་སྒྲ་བརྙན་ཚན་པས་བརྒྱབ་པའི་པར་དང་བརྙན་ཐུང་ནས་ལེན་བེད་གནང་ཞེས་བཀའ་ཕེབས་སོང་བ་དེ་དོན་དགོངས་འཇགས་ཞུ། ཞེས་གསལ་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཚོགས་གཙོའི་གསུང་བཤད་གནང་སྐབས། ང་ཚོས་ལས་དོན་གང་དང་གང་བརྩམས་ཀྱང་། སྡེ་ཚན་ཁག་གསུམ་དུ་བསམ་བློ་གཏོང་དགོས་ཏེ། གཅིག་ནི་བོད་ནང་གི་བོད་མིའི་ཆབ་སྲིད་ཀྱི་གནས་སྟངས་དང་། གཉིས་པ་བོད་མིའི་སྒྲིག་འཛུགས་ཀྱི་གནས་སྟངས། གསུམ་པ་རྒྱལ་སྤྱིའི་སྡེ་ཚན་ཁག་ཏུ་བོད་དོན་ལས་དོན་བྱེད་ཕྱོགས་ཐད་གོ་སྐབས་འཛིན་སྟངས་རེད། གནད་འགག་འདི་གསུམ་ལ་བརྟེན་ནས་བོད་དོན་ལས་འགུལ་བྱེད་ཕྱོགས་གལ་ཆེན་དུ་མཐོང་གི་ཡོད། བོད་ནང་དུ་ཡ་ང་བའི་གནས་སྟངས་ཆགས་ཡོད་པ་བཞིན་དུ། ཆོས་དད་རང་དབང་དང་། འགྲོ་བ་མིའི་ཐོབ་ཐང་། འགྲོ་འདུག་སྤྱོད་གསུམ་ཐོག་དམ་དྲག་ཤུགས་ཆེན་བྱེད་བཞིན་ཡོད་ལ། རྩོམ་པ་པོ་དང་ཤེས་ཡོན་ཅན་གྱི་གནད་ཡོད་མི་སྣ་མང་པོ་མ་ཉེས་ཁ་གཡོགས་ཀྱིས་བཙོན་འཇུག་མནར་གཅོད་ཀྱི་དཀའ་ངལ་མང་པོ་ཡོང་བཞིན་ཡོད་ཅིང་། གནད་དོན་འདི་དག་རྒྱ་ནག་གཞུང་གི་སྲིད་ཇུས་འཛིན་སྟངས་དང་། ས་གནས་ཀྱི་དཔོན་རིགས་ཁག་གིས་སྟངས་འཛིན་བྱེད་སྟངས་དང་འབྲེལ་བ་ཡོད་པ་ཞིག་རེད། རྒྱ་གཞུང་གིས་དོན་དངོས་ཐོག་བོད་ནང་གི་གནས་སྟངས་ལ་ལྟ་རྒྱུ་གལ་ཆེན་པོ་ཆགས་ཡོད་ཀྱང་། བོད་དོན་ཟུར་དུ་བཞག་ནས་རྒྱལ་སྤྱིའི་ཐོག་འདྲ་མཉམ་གླེང་བཞིན་པ་ནོར་འཁྲུལ་ཆེན་པོ་ཡིན་པ་མ་ཟད། བོད་ནང་གི་བོད་མིའི་མངོན་འདོད་སྦས་སྐོང་བྱས་ཏེ་དྲིལ་བསྒྲགས་བྱེད་བཞིན་པ་རྒྱལ་སྤྱིའི་ཐོག་ནས་ཤེས་རྟོགས་བྱུང་ཡོད་པ་དང་། ཞི་ཅིན་ཕིན་གྱིས་རྒྱ་ནག་གི་སྲིད་འཛིན་ལས་ཡུན་གསུམ་པ་འགྲོ་བཞིན་ཡོད་ཀྱང་། རྒྱ་ནག་ནང་ཁུལ་གྱི་དཔོན་རིགས་མང་པོའི་གནས་ཚུལ་ཕྱི་གསལ་ནང་གསལ་མིན་པའི་གནས་སྟངས་ཆགས་ཡོད་ཅེས་གསུངས་སོང་།
ཡང་ཁོང་གིས། གྲོས་ཚོགས་ནང་གི་ལས་རིམ་དང་སྤྱི་ཚོགས་ནང་གི་གླེང་སློང་ལ་བགྲོ་གླེང་བྱེད་སྐབས། སྤྱི་འཐུས་རྣམས་ཀྱིས་ཚིག་རྩུབ་དང་། ཟུར་ཟ། ང་རྒྱལ་སོགས་ཀྱི་རྣམ་པ་མི་འབྱུང་བར་བྱ་རྒྱུ་གལ་ཆེན་པོ་ཞེ་བོ་རེད། རྒྱུ་མཚན་ཡོད་ཚེ་ཅི་ཡང་བཤད་ཆོག་པའི་གོ་སྐབས་ཡོད་ཀྱང་། རྒྱུ་མཚན་མེད་ཚེ་གྲོས་ཚོགས་ནང་དུ་ཕན་ཚུན་བར་དུ་ཟུར་ཟ་བྱས་བསྡད་ན་གྲོས་ཚོགས་ཀྱི་ཆེ་མཐོང་དང་། ང་ཚོའི་རིག་གཞུང་ཉམས་ཆག་འགྲོ་བཞིན་འདུག གྲོས་ཚོགས་ནི་བཙན་བྱོལ་བོད་མིའི་མིག་དཔེ་ལྟ་བུ་ངོས་འཛིན་བྱེད་ཀྱི་ཡོད་པ་རེད། གྲོས་ཚོགས་ལ་དོ་སྣང་བྱེད་མཁན་བོད་མི་གཅིག་པོ་མ་རེད། ང་ཚོ་དང་འབྲེལ་བ་ཡོད་མིན་གཉིས་ཀྱིས་དོ་སྣང་བྱས་བསྡད་ཡོད་པ་རེད། ང་ཚོའི་ཞུ་གཏུགས་ལས་འགུལ་སྐབས་སུ་དོ་སྣང་བྱེད་མཁན་མང་པོས་ཚུར་བཤད་ཀྱི་ཡོད་པ་ཚང་མས་མཁྱེན་གསལ་རེད། ང་ཚོའི་གནས་སྟངས་དོ་སྣང་བྱེད་མཁན་རྣམས་ལ་ཐུགས་སྨོན་སོས་པ་ཞིག་ཞུ་ཐུབ་རྒྱུ་གལ་ཆེན་པོ་རེད། དེ་བཞིན་ང་ཚོའི་སྤྱི་ཚོགས་ནང་ཤོག་ཁག་འཐེན་འཁྱེར་བྱས་བསྡད་པ་ཡིན་ན་ཡག་པོ་ཁྱོན་ནས་མ་རེད། བར་སྐབས་ཤིག་ནས་ང་ཚོའི་སྤྱི་ཚོགས་ནང་དེ་འདྲ་ཡོང་བསྡད་ཀྱི་འདུག ང་ཚོར་མིའི་ལུང་པར་དཔལ་འབྱོར་དང་། མི་འབོར་གྱི་གནས་བབ་ཅི་ཡང་ཡོད་པ་མ་རེད། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་དུ་གནས་བསྡད་ཡོད་པ་རེད།༧མགོན་པོ་གང་ཉིད་ཀྱི་དགོངས་གཞི་བསྒྲུབ་པ་ཡིན་ན་བོད་ཆོལ་ཁ་གསུམ་ཤི་ན་མཉམ་ཤི་ཡིན་དགོས་རེད་མ་གཏོགས། དེ་ལ་ཆ་བགོས་བྱས་བསྡད་ན་ཕན་ཐོགས་གང་ཡང་ཡོད་པ་མ་རེད། མཚམས་མཚམས་སུ་སོ་སོའི་འདོད་པ་མ་ཁེངས་པ་ཡོད་སྲིད་ཀྱང་། དེ་ཡང་ཕན་ཚུན་བསམ་ཤེས་བྱེད་ཆོག་པ་ཞིག་རེད། ང་ཚོའི་རིག་གཞུང་ལ་བསམ་བློ་བཏང་ནས་སྤྱི་ཚོགས་གནས་བབ་གོང་མཐོར་གཏོང་ཐུབ་དགོས་རྒྱུ་གལ་ཆེན་པོ་རེད། ང་ཚོར་རྒྱབ་སྐྱོར་བྱེད་མཁན་མང་པོས་སེམས་འཚབ་བྱེད་ཀྱི་འདུག ང་ཚོའི་གནས་བབ་སོར་ཆུད་དང་སྔར་ལས་ལྷག་པ་ཡོང་དགོས་པ་གལ་ཆེན་པོ་རེད། དེ་བཞིན་སྤྱི་ཚོགས་ནང་དུ་གྲོས་ཚོགས་ཀྱི་བརྙན་བཅད་གཏུབ་ཀྱིས་སོ་སོའི་འདོད་པ་བཞིན་དྲ་ཚོམས་སུ་བསྐུར་པ་དང་ཁ་ངན་བཤད་པ་སོགས་བྱུང་གི་ཡོད་པ་རྩ་བ་ཉིད་ནས་མ་གནངས་རོགས་ཞེས་གསུངས་སོང་།
གསར་འགོད་པ། བྱམས་པ་ཚེ་རིང་དང་སྐལ་བཟང་སྦྱིན་པ།
རྩོམ་སྒྲིག་པ། སྐལ་བཟང་སྦྱིན་པ།
