རྒྱ་ནག་གི་སྲིད་འཛིན་གཞོན་པ་ཨ་རིའི་ནེའུ་ཡོག་ཏུ་རྒྱལ་ཚོགས་ཀྱི་ལོ་འཁོར་ཚོགས་ཆེན་ནང་མཉམ་ཞུགས་བྱེད་བཞིན་པ་དང་བསྟུན། བོད་རང་བཙན་སློབ་ཕྲུག་ཚོགས་པས་ངོ་རྒོལ་ལས་འགུལ་སྤེལ་འདུག
ཟླ་འདིའི་ཕྱི་ཚེས་ ༡༩ ནས་ ༢༦ བར་ཨ་རིའི་གྲོང་ཁྱེར་ནེའུ་ཡོག་ཏུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་འཚོག་བཞིན་ཡོད་པ་དང་། རྒྱ་ནག་གི་སྲིད་འཛིན་གཞོན་པ་ཧན་ཀྲང་ (Han Zheng) ཚོགས་ཆེན་ཐོག་མཉམ་ཞུགས་བྱས་པར་བརྟེན། ནེའུ་ཡོག་ཏུ་ཡོད་པའི་བོད་རང་བཙན་སློབ་ཕྲུག་ཚོགས་པས་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་ཞི་བའི་ངོ་རྒོལ་ལས་འགུལ་སྤེལ་འདུག
ཁ་སང་བོད་རང་བཙན་སློབ་ཕྲུག་ཚོགས་པས་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་ངོ་རྒོལ་ལས་འགུལ་སྤེལ་སྐབས། རྒྱ་ནག་གཞུང་གིས་བོད་དོན་སྐོར་ལ་འཁྱོག་བཤད་བྱེད་ཀྱི་ཡོད་པ་དང་། བོད་ཕྲུག་ས་ཡ་ ༡ ལྷག་ཕ་མ་དང་ཁ་བྲལ་དུ་བཅུག་ནས་བཙན་གྱིས་བཅའ་སྡོད་སློབ་གྲྭར་བཏང་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་སྐོར་དང་། བོད་ཀྱི་སྐད་ཡིག་དང་རིག་གཞུང་སོགས་རྩ་མེད་བཟོ་ཐབས་ཀྱི་སྲིད་ཇུས་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་འཚོག་བཞིན་ཡོད་པ་དང་བསྟུན། ཨ་རིའི་གྲོང་ཁྱེར་ཝ་ཤིང་ཊོན་དུ་རྟེན་གཞི་བྱས་པའི་ (Atlantic council) ཞེས་པའི་སྲིད་བྱུས་ཉམས་ཞིབ་ཁང་དང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ། དེ་བཞིན་རྒྱལ་སྤྱིའི་ཉེས་ཡངས་ཚོགས་པ་གསུམ་མཉམ་འབྲེལ་གྱིས། རྒྱ་ནག་གཞུང་གིས་ཡུ་གུར་མི་རིགས་རྣམས་ལ་སྡུག་སྦྱོང་མནར་གཅོད་ཚབས་ཆེན་གཏོང་བཞིན་པའི་གནད་དོན་དང་འབྲེལ་ཟུར་ཚོགས་ཤིག་སྐོང་ཚོགས་གནང་ཡོད་པ་དང་། རྒྱ་གཞུང་གིས་དེར་སྐྱོན་བརྗོད་དང་འབྲེལ་རྒྱལ་ཚོགས་ཀྱི་ཚོགས་མི་རྣམས་མཉམ་ཞུགས་གནང་རྒྱུ་མེད་པའི་ཉེན་བརྡ་བཏང་འདུག
ཐེངས་འདིའི་ངོ་རྒོལ་ལས་འགུལ་ནང་བོད་མི་དང་བོད་དོན་རྒྱབ་སྐྱོར་བ། རྒྱ་རིགས་དམངས་གཙོ་དོན་གཉེར་བ། ཡུ་གུར་དང་ཧོང་ཀོང་གི་ལས་འགུལ་བ་སོགས་མཉམ་འཛོམས་ཐོག་ངོ་རྒོལ་སྐད་འབོད་བྱས་འདུག
ཡང་། སུད་སི་ཇི་ནི་ཝའི་གྲོང་ཁྱེར་དུ་ཕྱི་ཚེས་ ༡༡ ནས་ཕྱི་ཟླ་ ༡༠ ཚེས་ ༡༣ བར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༤ འཚོག་བཞིན་པ་དང་བསྟུན། ཕྱི་ཚེས་ ༡༨ ཉིན་ཁུལ་དེར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་སྣེ་ཁྲིད་འོག་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པ་གསལ་སྟོན་དང་འབྲེལ་ནས་གཞི་རྒྱ་ཆེ་བའི་ཞི་རྒོལ་གྱི་ལས་འགུལ་ཞིག་ཀྱང་སྤེལ་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། སྐལ་བཟང་སྦྱིན་པ།
