དེ་རིང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་གཞུང་ཁོངས་མ་ཡིན་པའི་ཚོགས་སྐྱིད་ཁག་བདུན་ནས་གཞི་རིམ་མི་མང་གི་ལས་འགུལ་སྤེལ་སར་ཕེབས་ཏེ་ལས་འགུལ་དང་འབྲེལ་བའི་གསུང་བཤད་གནང་འདུག
གསར་འགོད་པས་སྤྱི་འཐུས་སྒེར་པ་ཞིག་གི་གནད་དོན་དང་འབྲེལ་བའི་ཐོག་ནས་ད་ལན་གྲོས་ཚོགས་ཀྱི་ལས་རིམ་རྣམས་འགྲོ་མ་ཐུབ་པ་དེས་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་བྱེད་ཕྱོགས་ཐད་ལ་དོ་ཕོག་ཅི་ཙམ་འགྲོ་ཡི་ཡོད་མེད་དྲིས་པར་ཁོང་མོས། ལས་དོན་ལ་དོ་ཕོག་དེ་ཉིན་གསུམ་ནས་ད་ལྟ་བར་དུ་ལྷན་ཁང་གཅིག་མ་གཏོགས་འགྲོ་མ་ཐུབ་པ་དེ་འགོག་རྐྱེན་འདྲ་བོ་ཞིག་རེད། འོན་ཀྱང་། རང་ས་ལ་མི་བཞག མི་ས་ལ་རང་བཞག་ནས་ལབ་སྟེ། སོ་སོའི་སྒང་ལ་དེ་འདྲའི་གནས་ཚུལ་ཞིག་བྱུང་བ་ཡིན་ན། ག་རེ་ཡོང་གི་རེད། དེ་ཡང་ང་ཚོས་བསམ་བློ་གཏང་དགོས་རྒྱུ་ཞིག་རེད། ཅེས་གསུངས་སོང་།
ད་ལན་གྱི་གནད་དོན་དེའི་ཐད་བདེ་སྲུང་བཀའ་བློན་མཆོག་དང་བཀའ་མོལ་གནང་ཡོད་མེད་དྲིས་པར་ཁོང་མོས། ཁྱོན་ནས་བྱུང་ཡོད་མ་རེད། ང་ཚོ་ཚོགས་གཙོ་སྦྲེལ་པོས་བདེ་སྲུང་ལ་གནད་དོན་འདིའི་ཐོག་ལ་གསལ་ཆ་བྱུང་བ་དང་། ང་ཚོར་ཉིན་མཚན་སྔ་ཕྱི་ག་དུས་ཡིན་རུང་འབྲེལ་བ་གནང་རོགས་གནང་། ང་ཚོས་གྲོས་ཚོགས་ཀྱི་ལས་དོན་བྱ་རྒྱུའི་ཐོག་ལ་གྲ་སྒྲིག་ཞུ་དགོས་ཀྱི་ཡོད་ཟེར་ནས་ཞུས་ཡོད་རེད། ངེད་གཉིས་ཕོ་རོག་ནང་བཞིན་སྒུག་བསྡད་ཡོད་རེད། གནས་ཚུལ་བཟང་ཕྱོགས་ཀྱི་རྣམ་པ་དང་། ཡང་གནས་ཚུལ་ག་རེ་ཡོད་རུང་བསླེབས་རྒྱུའི་ཐོག་ལ་སྒུག་བསྡད་ཡོད་རེད། དེ་མིན་ད་ལྟ་ངས་ཞུས་སོང་ང་། ཁྱེད་རང་ཚོ་ཕེབས་དུས་བཅར་འདྲི་དང་ལེན་མི་བྱེད་པ་དེ་གསར་པ་གང་ཡང་ཞུ་རྒྱུ་མེད་པས་རེད། ཞུ་རྒྱུ་མེད་དུས་ཡང་ཡང་དེ་ག་རང་བསྐྱར་ཟློས་བྱས་ནས་ཕན་ཐོགས་མེད་པ་ཞིག་རེད། དེར་བརྟེན་ད་ལྟ་ངས་སྐད་ཆ་བཤད་པའི་བར་དུ་གནས་ཚུལ་ཁྱོན་ནས་མེད། འོན་ཀྱང་། ང་ཚོས་འདྲི་བརྩད་གནང་གི་ཡོད་རེད། ག་པར་བསླེབས་སོང་ཟེར་གྱི་ཡོད་རེད། ས་གནས་ནས་སིམ་ལ་དང་། སིམ་ལ་ནས་དབུས་བར་རྒྱལ་ཁབ་ཅིག་གི་བདེ་འཇགས་དང་འབྲེལ་བ་ཡོད་དུས། བརྒྱུད་ལམ་མང་པོ་ཞིག་ལ་འགྲོ་དགོས་ཀྱི་ཡོད་རེད། དེར་བརྟེན་བཀའ་འདྲི་ཞུ་ཡི་ཡོད་རེད། འོན་ཀྱང་གསལ་ཆ་གང་ཡང་མེད་ཞུ་རྒྱུ་ཡིན། ཞེས་གསུངས་བྱུང་།
གྲོས་ཚོགས་ཀྱི་ལས་ཡུན་ཉིན་གཉིས་མ་གཏོགས་ལྷག་མེད་དུས་དེའི་རིང་འཚོག་ཐུབ་རྒྱུའི་རེ་བ་ཡོད་མེད་བཀའ་འདྲི་ཞུས་པར་ཁོང་མོས། རེ་བ་ག་དུས་ཡིན་རུང་བརྒྱག་དགོས་རེད། ཚོགས་གཙོ་གཞོན་གཉིས་ཀྱིས་ཆུ་ཚོད་ ༩ པ་ནས་ ༥ པ་བར་དུ་ལས་ཁུངས་ནང་དུ་འཛུལ་ནས་རེ་བ་བརྒྱབ་ནས་ཅིག་བྱེད་བཞིན་ཡོད་པ་རེད། འོན་ཀྱང་། རེ་བ་ག་དུས་འགྲུབ་ཀྱི་ཡོད་མེད་དང་གཟིགས་པ་ལྔ་ལྡན་གྱི་ནང་ནས་དུས་ཚོད་འདི་ག་དུས་འཁེལ་གྱི་ཡོད་མེད་དེ་ངེད་གཉིས་ཀྱིས་ཞུ་ཚོད་ཐིག་གི་ཡོད་པ་མ་རེད། རེ་བ་ཏན་ཏན་བརྒྱག་དགོས་རེད། རྒྱུ་མཚན་ནི་ད་ལྟ་བར་དུ་དམངས་གཙོ་དབུ་བརྙེས་ནས་ལོ་ ༦༤ ཕྱིན་ཡོད་རེད། འདིའི་ནང་ལ་གྲོས་ཚོགས་མཇུག་བསྡུ་མི་ཐུབ་པའི་གནས་བབ་དེ་འདྲ་ཁྱོན་ནས་བྱུང་ཡོད་མ་རེད། དེར་བརྟེན་གང་ཟག་སྒེར་གཅིག་གི་ཐོག་ལ་གནས་ཚུལ་བྱུང་དུས། ང་ཚོས་གྲོས་ཚོགས་འཚོགས་མི་ཐུབ་པ་དེ་སྟབས་མ་ལེགས་པ་ཞིག་རེད། འོན་ཀྱང་། མཇུག་བསྡུ་ཐུབ་པ་ཞིག་གནང་དགོས་པ་དེའང་ཚོགས་གཙོ་དང་ཚོགས་གཞོན་གཉིས་ཀྱི་ལས་འགན་རེད་བསམ་ནས། ད་ལྟ་བར་དུ་ཆུ་ཚོད་ ༩ པ་ནས་ ༥ པ་བར་དུ་སྡོད་པ་གནས་སྟངས་དེ་ག་རང་རེད། ཅེས་གསུངས་བྱུང་།
ད་ལན་གྲོས་ཚོགས་འཚོགས་མ་ཐུབ་པའི་འཐུས་ཤོར་ག་རེ་ཕྱིན་ཡོད་མེད་སྐོར་ལ་ཁོང་མོས། གྲོས་ཚོགས་འཚོགས་མི་ཐུབ་པ་དེ་མིའི་རྣམ་དཔྱོད་དང་རིག་པ་བཀྲ་རུ་བཀྲ་རུ་འགྲོ་དུས། ད་ལྟ་བར་དུ་ང་ཚོ་དེ་འདྲ་ཡོང་མྱོང་ཡོད་མ་རེད། དེར་བརྟེན་ཁྲིམས་སྒྲིག་ནང་ལ་དེ་འདྲ་བྱུང་བའི་གནས་སྐབས་ལ་བྱེད་སྟངས་བྱེད་ལུགས་དེ་འདྲ་གང་ཡང་གསལ་གྱི་ཡོད་མ་རེད། ང་ཚོར་ཡར་ཐོན་ཅན་གྱི་རྒྱལ་ཁབ་ནང་ལོགས་ལ་གཟིགས་རྒྱུ་མང་པོ་ལ་དཔེ་ལེན་ས་ཡོད་རེད། ཡག་ས་ལ་དཔེ་ལེན་གྱི་རེད་དམ། ཡང་ན་སྡུག་ས་ལ་དཔེ་ལེན་གྱི་རེད། འདི་ང་ཚོས་བལྟ་རྒྱུ་ཞིག་རེད། དེ་འདྲ་ཞིག་བྱུང་བ་ཡིན་ན། མ་འོངས་པར་ལྡོག་ཕྱོགས་ནས་ང་ཚོའི་གནས་སྟངས་དེ་འདྲ་ཆགས་པ་ཡིན་ན། གྲོས་ཚོགས་ག་ཚོད་ང་ཚོས་སྟོང་པ་བཞག་ཆོག་གི་རེད། དེ་དག་ཁྲིམས་སྒྲིག་གི་ཐོག་ནས་དགོངས་པ་བཞེས་རྒྱུའི་དུས་ཚོད་བསླེབས་ཡོད་རེད་བསམ་གྱི་འདུག གྲོས་ཚོགས་ནས་ཕྱི་ལ་ཐོན་རྒྱུ་དེ་ཐེངས་དང་པོ་མ་རེད། ཐེངས་གང་འཚམ་བྱུང་ཡོད་རེད། ང་ཚོ་བོད་མི་མང་ཁྲིམས་བཟོ་ལྷན་ཚོགས་ཡིན་ཟེར་གྱི་ཡོད་རེད། ང་རང་ཚོའི་བྱེད་ལུགས་བྱེད་སྟངས་ཐད་བཀུར་འོས་སྤྱི་འཐུས་ཚོ་ལ་ཐོབ་ཐང་ཡོད་རེད་དེ། ཐོབ་ཐང་མཉམ་དུ་འགན་འཁུར་དེ་ཡང་སྤྲད་དགོས་རྒྱུའི་དུས་ཚོད་ཅིག་བསླེབས་ཀྱི་རེད་བསམ་གྱི་འདུག ཅེས་གསུངས་སོང་།
གནས་ཚུལ་གཙང་སེལ་མ་ཆགས་ན་མ་འོངས་པར་མུ་མཐུད་དཀའ་ངལ་འདི་འདྲ་ཡོང་གི་ཡོད་མེད་བཀའ་འདྲི་ཞུས་པར་ཁོང་མོས། འདི་ངས་ཞུ་སྟངས་ཤེས་ཀྱི་མ་རེད། རྒྱུ་མཚན་ནི་ཡོང་ཁུངས་དེ་རྒྱལ་ཁབ་ཀྱི་བདེ་འཇགས་དང་འབྲེལ་བ་ཡོད་དུས། ང་ཚོ་བཙན་བྱོལ་སྤྱི་ཚོགས་ཤིག་གིས་བཀའ་གཏོང་ས་ཁྱོན་ནས་ཡོད་མ་རེད། དེར་བརྟེན་གནས་བབ་ག་པར་བསླེབས་ཀྱི་ཡོད་མེད་ངས་ཞུ་ཚོད་ཁྱོན་ནས་ཐིག་གི་མེད། ངས་བཤད་ཤེས་ས་མ་རེད། ཅེས་གསུངས།
དེ་རིང་དབུས་གཙང་དང་མདོ་སྟོད། མདོ་སྨད་བཅས་ཀྱི་རྒྱུན་ལས་གསུམ་དང་། བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷན་ཚོགས། བོད་ཀྱི་དགུ་བཅུ་གསུམ་ལས་འགུལ་ཚོགས་པ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཚོགས་པ་བཅས་གཞི་རིམ་མི་མང་ལས་འགུལ་ཚོགས་པའི་ལས་འགུལ་སྤེལ་ཡུལ་དུ་བསླེབས་ཏེ། ཞུ་འབོད་ལས་འགུལ་མཚམས་འཇོག་གནང་གལ་ཆེ་བའི་སྐོར་གཏམ་བཤད་གནང་ཡོད་པ་མ་ཟད། ཐུན་མོང་ཐོག་འབོད་སྐུལ་ཞིག་གནང་བའི་ནང་། གཞི་རིམ་མི་མང་ལས་འགུལ་ནང་མཉམ་ཞུགས་གནང་མཁན་གྱི་ཆོལ་གསུམ་བོད་རིགས་སྤུན་ཟླ་ཡོངས་ནས་གཙོ་བོ་བོད་ཀྱི་རྩ་དོན་དང་། ལྷག་པར་དུ་བཙན་བྱོལ་བོད་མིའི་མང་གཙོའི་ཀ་བ་གསུམ་ལྗིད་སྙོམ་སྟངས་འཛིན་དང་སྲ་བརྟན་ཡོང་སླད། ས་ཕྱོགས་གང་ས་ནས་བཞུགས་སྒར་དུ་ཕེབས་ཏེ་ཞུ་འབོད་ལས་འགུལ་སྤེལ་མུས་ཡིན་རུང་། ད་ལྟའི་ཆར་མི་མང་གི་མངོན་འདོད་བཅའ་ཁྲིམས་བསྐྱར་བཅོས་དེ་བཞིན་ཡོང་ཐབས་མེད་པ་ཁ་གསལ་དུ་འགྱུར་བཞིན་འདུག་པ་ལགས་ན། རྣམ་པ་ལྷན་རྒྱས་ནས་དེ་དོན་གཤམ་གསལ་དོན་ཚན་ཁག་ལ་བསམ་གཞིག་དང་ཐུགས་དགོངས་ཆེ་བཞེས་ཀྱིས་ལས་འགུལ་དེ་བཞིན་འཇོག་ཡོང་བའི་རེ་བ་ཞུ་རྒྱུ་ཡིན། རྒྱུ་མཚན་ནི། ༡༽ སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོ
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
