ཟླ་འདིའི་ཕྱི་ཚེས་ ༡ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་ངོ་ ༧༤ འཁོར་བའི་དུས་ཆེན་སྲུང་གཙིའི་སྐབས། རྒྱ་གར་དང་ཨ་རི། ཁེ་ན་ཌ། ཡུ་རོབ་སོགས་འཛམ་གླིང་ས་ཕྱོགས་གང་སར་བོད་མི་དང་ཡུ་གུར་བ། རྒྱ་རིགས་དམངས་གཙོ་དོན་གཉེར་བ་རྣམས་ཀྱིས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ། རྒྱ་ནག་གཞུང་གིས་རྒྱལ་ས་ལྷ་སའི་ཕོ་བྲང་པོ་ཏཱ་ལའི་མདུན་ཐང་དུ་གཙོ་བྱས་པའི་བོད་ཀྱི་ས་ཁུལ་མང་པོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དབུ་བརྙེས་པའི་དུས་དྲན་སྲུང་གཙི་ཟེར་བ་འུར་བསྒྲགས་བྱེད་ཀྱི་ཡོད་པའི་ཐད་གཟིགས་ཚུལ་ག་རེ་བྱུང་ཡོད་སྐོར་དྲིས་པར་ཁོང་གིས། སྤྱིར་བཏང་རྒྱ་ནག་གཞུང་གིས་བོད་ལ་དབང་སྒྱུར་བྱས་པའི་རྗེས་སུ། རྒྱ་ནག་གིས་དངོས་གཙོ་སྨྲ་བ་དང་ཆོས་ལུགས་ལ་ཁ་གཏད་གཅག་རྒྱུ་ཡིན་ཁུལ་བྱས་ཏེ་བོད་ཀྱི་དགོན་སྡེ་ཁག་ ༦༠༠༠ ལྷག་གཏོར་བ་རེད། དེ་བཞིན་བོད་ལ་གནའ་སྔ་མོ་ནས་སོ་སོའི་ཆོས་དང་རིག་གཞུང་། དངོས་པོའི་རིག་གཞུང་དཔེར་ན་མཁར་དང་རྫོང་སོགས་དྲན་པ་གསོ་བྱེད་ཀྱི་འཛུགས་སྐྲུན་ཆ་ཚང་གཏོར་བ་རེད། དེ་མིན་ཕོ་བྲང་པོ་ཏཱ་ལ་དང་ཇོ་ཁང་གཅིག་པོ་གཏོར་མེད་པ་རེད། པོ་ཏཱ་ལ་སོགས་མ་གཏོར་བ་དེ་མ་འོངས་པར་མི་རབས་རྗེས་མ་རྣམས་ལ་སོ་སོའི་བྱས་རྗེས་དེ་ངོམ་རྒྱུའི་ཆེད་དུ་རེད་བསམ་གྱི་འདུག ཅེས་དང་། ཨེ་ཤ་ཡའི་ལོ་རྒྱུས་ནང་བོད་ཀྱིས་ཨེ་ཤ་ཡའི་གསུམ་ཆ་གཉིས་དབང་སྒྱུར་བྱས་པ་ཡིན་ཟེར་བ་ལྟ་བུའི་བོད་ཀྱི་ལོ་རྒྱུས་ཐོག་ལ་ཧ་ལས་པའི་གཟི་བརྗིད་དང་སྤོབས་པ་བྱུང་མྱོང་བའི་རྒྱལ་ཁབ་དེ། ད་ལྟ་རྒྱ་ནག་གི་དབང་སྒྱུར་འོག་ཡོད་པའི་རྣམ་པ་སྟོན་ཐབས་བྱེད་ཀྱི་ཡོད་སྐོར་སོགས་བརྗོད་བྱུང་།
གསར་འགོད་པས་རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཏུ་རྒྱལ་སྟོན་དུས་ཆེན་གྱི་དྲིལ་བསྒྲགས་ཚ་ཚ་འུར་འུར་སྒྲོག་གིན་པ་དེར་ཆབ་སྲིད་ཀྱི་རྒྱབ་ལྗོངས་ག་རེ་ཡོད་སྐོར་དྲིས་པར་ཁོང་གིས། བོད་མི་རྣམས་ཀྱིས་བླ་མ་ལ་བརྟེན་ནས་སྐྱེ་བ་འདི་དང་ཕྱི་མའི་སྐྱབས་གནས་ཤིག་ལ་ངོས་འཛིན་དང་རྩ་ཆེན་པོ་རྩི་ཡི་ཡོད། འོན་ཀྱང་། དེང་སང་རྒྱ་ནག་གཞུང་གིས་བོད་པའི་ལྷ་དང་བླ་མ་ལས་ལྷག་གིས་རྒྱ་ནག་དམར་ཤོག་ཚོགས་པའི་དབང་ཆ་ཆེ་བ་ཡོད་པར་ངོས་འཛིན་བྱེད་དུ་བཅུག་པ་དང་། ཆོས་ལུགས་ཉམས་དམས་སུ་བཏང་སྟེ་མི་མང་གི་སེམས་ཤུགས་གཅོག་ཐབས་བྱེད་ཀྱིན་ཡོད་སྐོར་སོགས་འགྲེལ་བརྗོད་གནང་སོང་ལ། ཉེ་ལམ་རྒྱ་ནག་གཞུང་གིས་བོད་ཀྱི་ས་ཁུལ་ཁག་ཅིག་གི་དགོན་སྡེ་ཁག་ཏུ་སྐར་ལྔའི་དར་ཆ་སྒྲེང་འཛུགས་བྱས་ཏེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དབུ་བརྙེས་པའི་དུས་དྲན་སྲུང་གཙི་བྱེད་དུ་བཅུག་ཡོད་པ་རེད།
རྒྱ་ནག་གིས་བོད་ནང་བཙན་འཛུལ་བྱས་ཏེ་ལོ་ངོ་ ༦༤ ཕྱིན་ཡོད་པར་བརྟེན་བོད་མི་ཚོའི་ངོས་ནས་འགན་ག་རེ་འཁྱེར་དགོས་པ་དང་། རྒྱལ་སྤྱིའི་ཐོག་ལ་བོད་ནང་གི་གནས་སྟངས་འགྲེལ་བརྗོད་གང་འདྲ་བྱ་དགོས་སྐོར་ཐད་ཁོང་གིས། སྤྱིར་བཏང་རྒྱ་ནག་གཞུང་གིས་ཕྱི་ཟླ་ ༡༠ ཚེས་ ༡ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ནས་རྒྱལ་སྟོན་དུས་དྲན་བྱས་པ་དང་མཉམ་དུ། བོད་ལ་བཙན་འཛུལ་བྱས་ཡོད་པ་དེ་འཛམ་གླིང་མི་ཚང་མར་དྲན་གསོ་བྱ་རྒྱུ་གལ་ཆེན་པོ་རེད། རྒྱ་ནག་དམར་ཤོག་ཚོགས་པ་བཙུགས་པ་དང་། ང་ཚོ་བོད་ལ་བཙན་འཛུལ་བྱས་པ་རེད། དེ་ནས་བཟུང་ང་ཚོའི་བོད་ཀྱི་རྒྱལ་ཁབ་དང་རང་བཙན་ཤོར་བ་སོགས་རྒྱལ་སྤྱིའི་མི་མང་ལ་དྲན་གསོ་བྱ་དགོས་པ་དང་། ད་ལྟ་འཛམ་གླིང་ཐོག་བཙན་འཛུལ་ལ་ངོ་རྒོལ་བྱེད་དགོས་ཟེར་ནས་དཔེར་ན་ཨུ་རུ་སུ་དང་ཡུ་ཀེ་རེན་གནས་སྟངས་ལྟ་བུ་དང་། དེ་ལས་ལྷག་ང་ཚོར་ལོ་ངོ་ ༧༠ ལྷག་གི་གོང་ནས་སྡུག་རྩུབ་ལ་བརྟེན་ནས་བཙན་འཛུལ་བྱུང་མྱོང་བ་དང་། རྒྱ་ནག་གཞུང་གི་སྲིད་དབང་བཙུགས་པའི་བརྒྱུད་རིམ་དེ་ཚོ་རྒྱལ་སྤྱི་ལ་དྲན་གསོ་བྱེད་དགོས་པ་མ་ཟད། བོད་མི་སྐྱ་སེར་ཕོ་མོ་རྒན་གཞོན་དབྱེ་བ་མེད་པར་ཚང་མས་འགན་འཁུར་དགོས་པ་དེ་དྲན་གསོ་བྱ་དགོས་རེད་བསམ་གྱི་འདུག ཅེས་བརྗོད་བྱུང་།
རྒྱ་ནག་གཞུང་གིས་བོད་ལ་བཙན་འཛུལ་བྱས་རྐྱེན་བོད་རང་བཙན་ཤོར་བ་དང་། བོད་གངས་ཅན་ལྗོངས་སུ་མི་གསོད་ཁྲག་སྦྱོར་དང་གཏོར་བཅོམ་སྣ་ཚོགས་བྱུང་བ་རེད། དེ་ཡང་ཕྱི་ལོ་ ༡༩༤༩ ནས་ཕྱི་ལོ་ ༡༩༧༩ བར་རྒྱ་ནག་གི་དབང་སྒྱུར་འོག་བོད་མི་ས་ཡ་གཅིག་དང་འབུམ་གཉིས་འདས་གྲོངས་སུ་གྱུར་བ་དང་། བོད་ནང་གི་དགོན་པ་ ༦༠༠༠ ཙམ་གཏོར་བཤིག་བཏང་ཡོད་པ་རེད། རྒྱ་ནག་གཞུང་གིས་བོད་ནང་འཛུགས་སྐྲུན་ཡར་རྒྱས་གོང་འཕེལ་གཏོང་བཞིན་ཡོད་ཚུལ་བརྗོད་དེ་ལས་གཞི་འདྲ་མིན་སྤེལ་བཞིན་པ་དེ་དག་དོན་དངོས་སུ་རྒྱ་མི་རིགས་ཕོན་ཆེ་བོད་ནང་གནས་སྤོ་བྱ་རྒྱུ་དང་། ལྷག་པར་དུ་བོད་ཀྱི་རང་བྱུང་ཁོར་ཡུག་ལ་གཏོར་བཅོམ་བྱས་དང་བྱེད་མུས་རེད། རྒྱ་གཞུང་གིས་བོད་རྒྱ་ཡུལ་དུ་བསྒྱུར་རྒྱུའི་སྲིད་ཇུས་འོག་བོད་ཕྲུག་ས་ཡ་ ༡ ལྷག་བཙན་གྱིས་གཏན་འཇགས་སློབ་གྲྭར་བཏང་སྟེ་རྒྱ་སྒྱུར་སློབ་གསོ་སྤྲོད་པ་སོགས་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་སོགས་རྩ་མེད་གཏོང་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
