༧གོང་ས་མཆོག་གིས་ཆོས་ཁས་ལེན་གྱི་ཡོད་མེད་ལ་མ་ལྟོས་པར་འཛམ་གླིང་ཤར་ནུབ་ལྷོ་བྱང་གང་སར་བྱམས་དང་བརྩེ་བར་དོ་སྣང་ཤུགས་ཆེན་ཡོང་གི་ཡོད་སྐོར་གསུངས།
དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་སོགས་ཀྱིས་ཇི་ལྟར་གསོལ་འདེབས་ཞུས་པ་ལྟར། གདན་ས་གསུམ་དང་བཞུགས་སྒར་ཉེ་འཁྲིས་ཀྱི་དགོན་སྡེ་ཁག་གི་གྲྭ་བཙུན་རྣམས་དང་ཐའེ་ཝན་རྒྱ་རིགས་དད་ལྡན་དོ་གཉེར་བ་དང་ཡུལ་སྐོར་བ། བཞུགས་སྒར་ཁུལ་གྱི་བོད་མི་བཅས་ལ་སྤྱན་རས་གཟིགས་ཕྱག་བཞི་པའི་བཀའ་དབང་བཀའ་དྲིན་བསྩལ་གནང་སོང་།
སྐབས་དེར་༧མགོན་པོ་གང་ཉིད་མཆོག་གིས། རྒྱ་བོད་ཧོར་གསུམ་དེ་འཕགས་པ་སྤྱན་རས་གཟིགས་ཀྱི་འདུལ་བྱ་ཆགས་ཀྱི་ཡོད་དུས། ཆུང་དུས་ནས་མ་ཎི་བགྲང་བའི་གོམས་གཤིས་ཡོད། ལྷག་པར་དུ་དེང་སང་འཛམ་གླིང་ཤར་ནུབ་ལྷོ་བྱང་གང་དུ་ཡིན་ཡང་། འཛམ་གླིང་ཞི་བདེ་གླེང་གི་ཡོད། ཞི་བདེ་ངོ་མ་དེ་གཞན་སུ་གཅིག་ལའང་གནོད་སྐྱེལ་བའི་བསམ་བློ་མེད་པར་སེམས་ནང་བརྩེ་བ་དང་ཕན་བདེ་བསྒྲུབ་པའི་བློ་བསྐྱེད་རྒྱུ་ནི་འཛམ་གླིང་ཞི་བདེ་ཡོང་གཞི་དངོས་གནས་ཡིན།
དེ་རིང་ཁ་སང་སངས་རྒྱས་ཀྱི་ཆོས་ཁས་ལེན་གྱི་ཡོད་མེད་ལ་མ་ལྟོས་པར། དངོས་སུ་མཐོང་ཚུལ་ལ་བརྩེ་བར་དོ་སྣང་ཤུགས་ཆེན་ཡོང་གི་ཡོད། ངོས་རང་ལ་ཆ་བཞག་ན་འཛམ་གླིང་གི་ཤར་ནུབ་ལྷོ་བྱང་མང་པོར་ཕྱིན་པ་ཡིན། བརྩེ་བ་ལ་དགའ་པོ་བྱེད་མཁན་ཤུགས་ཆེན་པོ་འདུག གང་ལྟར། ཆོས་ཀྱི་སྙིང་པོ་བྱང་ཆུབ་ཀྱི་སེམས་ཏེ་སེམས་པ་བཟང་པོ་བྱ་རྒྱུ་དེ་རེད། ང་ཚོ་མི་ཞིག་ཡིན་ཕྱིར་ཆུང་ཆུང་གི་སྐབས་ནས་ཨ་མའི་བརྩེ་བས་བསྐྱངས་ནས་འཚར་ལོངས་བྱུང་བ་རེད། ང་ཚོའི་མི་ཚེ་གང་བོར་ཆུང་དུས་ནས་མ་ཡི་བརྩེ་བས་བསྐྱངས་པའི་ནུས་པ་མུ་མཐུད་སེམས་ནང་དུ་བཞག་སྟེ་ང་ཚོས་སྲོག་ཆགས་ཚང་མར་བརྩེ་བ་བྱེད་དགོས་རེད།
དེ་རིང་ཁ་སང་དངོས་ཡོད་གནས་ཚུལ་ལ་འཛམ་གླིང་ཞི་བདེ་ཟེར་ནས་ཚང་མས་འབོད་སྒྲ་སྒྲོག་གི་ཡོད། ཞི་བདེ་སེམས་ནང་ནས་ཡོང་དགོས་པ་དང་དེ་ལ་བྱམས་བརྩེ་གལ་ཆེན་པོ་རེད། དེར་བརྟེན། དེ་སྔ་འཛམ་གླིང་ནང་སངས་རྒྱས་པའི་ཆོས་མ་དར་སའི་ལུང་པ་ཁག་ཏུ་སེམས་པ་བཟང་པོ་དང་གཅིག་གིས་གཅིག་ལ་བརྩེ་བ་བྱ་རྒྱུ་དར་སྲོལ་ཆེན་པོ་འདུག ང་ཚོ་ཚང་མས་སེམས་པ་བཟང་པོ་དང་ཀུན་ལ་ཕན་སེམས་བཅིང་རྒྱུ་སོགས་ནི་ང་ཚོའི་ཆོས་ཀྱི་སྙིང་པོ་ཆགས་བསྡད་ཡོད།
འདིར་ཆོས་གྲོགས་ཚང་མར་སྐུལ་མ་ཞུ་རྒྱུའི་གཙོ་བོ་ནི་སེམས་པ་བཟང་པོ་བྱ་རྒྱུ་དེ་རེད་འདུག ངོས་ནས་ཀྱང་བྱང་ཆུབ་སེམས་བསྒོམ་རྒྱུ་གལ་ཆེན་དུ་བརྩིས་ནས་སྒོམ་བསྡད་ཡོད། སྒོམ་དེ་ལ་བརྟེན་ནས་སེམས་ཀྱི་ཞི་བདེ་ཡོང་བ་དང་སེམས་ཀྱི་ཞི་བདེ་ལ་བརྟེན་ནས་ལུས་ཀྱི་འབྱུང་བ་ཆ་སྙོམས་པོ་དང་རང་བཞིན་གྱིས་སེམས་ལྷོད་ལྷོད་ཆགས་པར་ཕན་ཐོགས་ཞེ་དྲགས་འདུག ང་ཚོས་རིལ་བུ་བསེད་ནས་ཡག་པོ་རེད་དེ། གཙོ་བོ་བསམ་བློའི་ཐོག་ནས་སེམས་ཀྱི་ཞི་བདེ་ཡག་པོ་ཞིག་བྱུང་བ་ཡིན་ན་ང་ཚོའི་མི་ཚེ་འདིར་སྐྱིད་པ་དང་། ཆོས་གྲོགས་ཚོས་བརྩེ་བར་དོ་སྣང་བྱས་ཏེ་ཡག་པོ་བྱུང་བ་ཡིན་ན་འཛམ་གླིང་ཞི་བདེ་ཡོང་ཐུབ་པ་ཞིག་རེད།
ཁྱེད་ཚོ་ཚང་མས་སེམས་བཟང་པོ་དང་བརྩེ་བ་བྱོས། འཛམ་གླིང་གི་མི་འབོར་དུང་ཕྱུར་བདུན་བརྒྱད་ཅིག་ཡོད་པ་ཚང་མ་མི་ཡིན་པ་གཅིག་པ་དང་ཚང་མས་སྡུག་བསྔལ་མི་འདོད་ཅིང་བདེ་བ་འདོད་པ་ཤ་སྟག་རེད། ཀུན་ལ་བདེ་སྐྱིད་ལྡན་པ་དང་ཕན་བདེ་ཡོང་བའི་སྨོན་ལམ་བརྒྱབ་པའི་ཞོར་དུ། ལག་ལེན་གྱི་ཐོག་ནས་ག་ཚོད་ཐུབ་ཐུབ་ཀྱིས་མི་གཙོ་བོར་གྱུར་བའི་འཛམ་གླིང་འདིའི་སྟེང་གི་སེམས་ཅན་ཚང་མར་ཕན་བདེ་དང་ཞི་བདེ་བསྐྲུན་ཐབས་གནང་རྒྱུ་གལ་ཆེན་པོ་རེད་འདུག
ང་ཚོ་བོད་གངས་ཅན་གྱི་སྐྱེ་འགྲོ་ཚང་མས་ཆུང་ཆུང་གི་སྐབས་ནས་བཟང་མ་ཎི་ཤེས་བསྡད་ཡོད་པས། ང་ཚོ་དམིགས་བསལ་གྱིས་སྤྱན་རན་གཟིགས་ལ་འབྲེལ་བ་ཡོད་པ་ཞིག་ཆགས་བསྡད་ཡོད། དེར་བརྟེན། ང་ཚོ་ཚང་མས་འཕགས་པ་སྤྱན་རན་གཟིགས་ལ་གསོལ་བ་བཏབ་སྟེ། ཐོག་མར་རང་ཉིད་ཀྱི་རྒྱུད་ལ་སྙིང་རྗེའི་བསམ་པ་ཡག་པོ་ཞིག་ཡོང་ཐབས་དང་། ལུས་ཀྱི་འཕྲོད་བསྟེན་དང་སེམས་ཀྱི་ཞི་བདེ་ཚང་མ་དེའི་ཐོག་ནས་ཡོང་གི་ཡོད། རང་གཅེས་འཛིན་གྱི་ཆ་ནས་སྙིང་རྗེའི་བློ་ཡག་པོ་ཞིག་ཡོད་ཚེ་དངོས་གནས་དྲང་གནས་ཞི་བདེ་ཡོད། དེ་ལ་བརྟེན་ནས་རང་ཉིད་གང་དུ་ཡོད་པའི་སེམས་ཅན་ཐམས་ཅད་ལ་བརྩེ་དུང་དང་བྱམས་བརྩེ་སྒོམ་དགོས། བསྟན་པ་རིན་ཆེན་མཆོག་གིས་མ་ཁྱབ་པའམ། ། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། ། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། ། ཕན་བདེའི་གཏེར་དེ་གསལ་བར་བྱེད་པར་ཤོག ། དེང་སང་སེམས་པ་བཟང་པོ་དང་སྙིང་རྗེ་བྱ་རྒྱུར་འཛམ་གླིང་ནང་མི་མང་པོས་དོ་སྣང་བྱེད་ཀྱི་ཡོད། ང་རང་ཚོ་འཕགས་པ་སྤྱན་རས་གཟིགས་ཡིད་དམ་དུ་བྱས་ནས་གསོལ་བ་འདེམས་མཁན་ཞིག་ཆགས་བསྡད་ཡོད། དེར་བརྟེན་ཚང་མས་སེམས་པ་བཟང་པོ་བྱ་རྒྱུ་ནི་མི་ཚེ་གཅིག་གི་དོན་དག་གལ་ཆེ་ཤོས་ཤིག་ཡིན་བསམ་པའི་ཐོག་ནས་སེམས་བཟང་བྱ་རྒྱུ་དཔེ་གལ་ཆེན་པོ་རེད་འདུག ཅེས་གསུངས།
གསར་འགོད་པ། སྐལ་བཟང་སྦྱིན་པ།
