རྒྱ་ནག་གཞུང་ནས་ཁྲིམས་མཐུན་མིན་པའི་དངུལ་བླངས་པའི་དོགས་གཞིའི་འོག་རྒྱ་གར་གྱི་གསར་ཁང་ཞིག་གི་རྩོམ་སྒྲིག་པ་སོགས་འཛིན་བཟུང་བྱས་འདུག
ཁ་སང་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལིའི་ཉེན་རྟོག་པས་རླུང་འཕྲིན་དང་དྲ་ཐོག་གསར་ཁང་ (NewsClick) འཛུགས་མཁན་དང་རྩོམ་སྒྲིག་པ་པ་ར་བྷིར་ (Prabir Purkayastha) དང་། གསར་ཁང་དེའི་འགྲོ་བ་མིའི་ཐོན་ཁུངས་ཀྱི་སྡེ་ཚན་འགན་འཛིན་ཨ་མི་ཏི་ (Amit Chakravarty) གཉིས་གཙོ་བོར་གྱུར་བའི་གསར་འགོད་པ་དང་། གསར་ཁང་དེ་དང་འབྲེལ་བ་ཡོད་པའི་རྩོམ་པ་པོ་ཁག་ཅིག་ལ་འདྲི་བརྩད་དང་ཁྱིམ་དུ་གློ་བུར་སྔོག་བཤེར་བྱས་ཡོད་པ་མ་ཟད། གསར་ཁང་དེས་རྒྱ་ནག་གཞུང་ནས་ཁྲིམས་མཐུན་མིན་པའི་དངུལ་བླངས་པའི་དོགས་གཞིའི་འོག རྩོམ་སྒྲིག་པ་པ་ར་བྷིར་དང་། འགྲོ་བ་མིའི་ཐོན་ཁུངས་ཀྱི་སྡེ་ཚན་འགན་འཛིན་ཨ་མི་ཏི་འཛིན་བཟུང་བྱས་འདུག
དེ་རིང་རླུང་འཕྲིན་དང་དྲ་ཐོག་གསར་ཁང་ (NewsClick) གིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། རྒྱ་གར་གཞུང་གིས་གསར་འགོད་རང་དབང་ལ་བརྩི་བཀུར་མི་བྱེད་པའི་བྱ་སྤྱོད་དེ་ལ་བློ་ཕམ་ཡོད་སྐོར་དང་། རྒྱ་ནག་གི་དཔོན་རིགས་ཁག་གི་བཀའ་བཀོད་འོག་ནས་གསར་ཁང་དེས་གནས་ཚུལ་སྤེལ་གྱི་མེད་ལ། རྒྱ་ནག་དམར་ཤོག་སྲིད་གཞུང་གི་ལངས་ཕྱོགས་དྲིལ་བསྒྲགས་བྱེད་ཀྱི་མེད་སྐོར་དང་། གསར་ཁང་གི་མ་དངུལ་ཆ་ཚང་དངུལ་ཁང་གི་བརྒྱུད་ལམ་ཚད་ལྡན་ཞིག་ནས་འབྱོར་ཡོད་སྐོར་སོགས་བརྗོད་འདུག་ཀྱང་། དེ་རིང་རྒྱ་གར་ཉེན་རྟོག་པའི་ཕྱོགས་ནས་བསྒྲགས་གཏམ་སྤེལ་བའི་ནང་། གསར་ཁང་དེའི་འབྲེལ་ཡོད་ལས་མི་སྐྱེས་པ་ ༣༧ དང་བུད་མེད་ ༩ བཅས་དོགས་ཡོད་ཅན་གྱི་མི་གྲངས་ ༤༦ ལ་འདྲི་བརྩད་བྱས་ཡོད་པ་མ་ཟད། ཞིབ་འཇུག་གི་ཆེད་དུ་ལག་ཐོགས་ཁ་པར་དང་གློག་ཀླད་སོགས་འཕྲུལ་རིགས་ཀྱི་ཡོ་བྱད་དང་། ཡིག་ཆ་ཁག་འཕྲོག་ཡོད་སྐོར་སོགས་བསྒྲགས་འདུག
དེ་རིང་རྒྱ་གར་གྱི་གསར་འགོད་མཐུན་ཚོགས་ཀྱིས། གནད་དོན་དེའི་ཐོག་ལ་སེམས་འཚབ་ཆེན་པོ་ཡོད་པ་དང་། གཞུང་གིས་གནད་དོན་དེར་ཞིབ་འཇུག་མཐིལ་ཕྱིན་པར་བྱས་ནས་ཁ་གསལ་གཏིང་གསལ་བཟོ་དགོས་པའི་རེ་སྐུལ་ཞུས་འདུག་ལ། ཁ་སང་ཕྱི་ཚེས་ ༣ ཉིན་རྒྱ་གར་གྱི་གསར་འགོད་པ་དང་གསར་ཁང་ཁག་ཅིག་གིས་རྒྱ་གར་ཉེན་རྟོག་པས་གློ་བུར་དུ་གང་བྱུང་སྔོག་བཤེར་བྱས་པར་སེམས་འཚབ་ཆེན་པོ་ཡོད་སྐོར་སོགས་བརྗོད་ཡོད་འདུག
ཕྱི་ལོ་ ༢༠༠༩ ལོར་རླུང་འཕྲིན་དང་དྲ་ཐོག་གསར་ཁང་ (NewsClick) གསར་འཛུགས་བྱས་ཡོད་པ་དང་། རྒྱ་གར་ཨེན་ཌི་ཊི་ཝི་ (NDTV) གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༡ ལོར་གསར་ཁང་དེས་རྒྱ་གར་གྱི་ཕྱི་རྒྱལ་མ་འཛུགས་ཀྱི་སྒྲིག་གཞི་ལས་འགལ་བའི་སྐྱོན་འཛུགས་འོག དཔྱ་ཁྲལ་ལས་ཁུངས་ཀྱི་ལས་བྱེད་ཁག་ཅིག་གིས་སྔོག་བཤེར་བྱས་ཡོད་པ་རེད། དེ་བཞིན་རྒྱ་ནག་དམར་ཤོག་སྲིད་གཞུང་གི་ལངས་ཕྱོགས་དྲིལ་བསྒྲགས་སླད་གསར་ཁང་དེ་ལ་དངུལ་འབྱོར་ཡོད་པའི་སྐྱོན་འཛུགས་འོག འདི་ལོའི་ཕྱི་ཟླ་ ༨ པའི་ནང་ལྡི་ལིའི་ཉེན་རྟོག་པས་རླུང་འཕྲིན་དང་དྲ་ཐོག་གསར་ཁང་ (NewsClick) ལ་ཁྲིམས་གཏུགས་བྱས་ཡོད་ཀྱང་། གསར་ཁང་གིས་སྐྱོན་འཛུགས་དེ་དག་ལ་ངོས་ལེན་བྱས་མི་འདུག
ཕྱི་ལོ་ ༢༠༡༤ ནས་རྒྱ་གར་གྱི་སྲིད་བློན་མོ་དྷི་མཆོག་གིས་སྲིད་དབང་བཟུང་བ་ནས་རྒྱ་གར་གྱི་གསར་ཁང་ཁག་ཅིག་གིས་ཁྲིམས་འགལ་གྱིས་དངུལ་བླངས་པའི་ཉེས་མིང་འོག་གསར་ཁང་མང་པོར་ཞིབ་འཇུག་བྱས་ཡོད་པ་སོགས་ཀྱིས་འཛམ་གླིང་ནང་གི་དམངས་གཙོའི་རྒྱལ་ཁབ་ཆེ་ཤོས་རྒྱ་གར་ནང་གི་གསར་འགོད་རང་དབང་ཐོག་ལ་བློ་འཚབ་ཡོང་གི་ཡོད་པ་ལྟར། འདི་ལོའི་ཕྱི་ཟླ་ ༥ ཚེས་ ༣ ཉིན་འཛམ་གླིང་གསར་འགོད་རང་དབང་གི་ཉིན་མོ་དང་བསྟུན། རྒྱལ་མཚམས་མེད་པའི་གསར་འགོད་མཐུན་ཚོགས་ (Reporters Without Borders) ཀྱིས་འཛམ་གླིང་གི་རྒྱལ་ཁབ་དང་རང་སྐྱོང་ས་ཁུལ་ ༡༨༠ ནང་གསར་འགོད་རང་དབང་ཐད་ཞིབ་འཇུག་བྱས་པ་བརྒྱུད། དམངས་གཙོའི་རྒྱལ་ཁབ་ཆེ་ཤོས་སུ་གྲགས་པའི་རྒྱ་གར་ནང་སྲིད་བློན་མུ་དྷི་མཆོག་གི་སྲིད་གཞུང་དང་འབྲེལ་བའི་གནས་ཚུལ་སྤེལ་བར་དམ་དྲག་དང་བཀག་སྡོམ་བྱས་དང་བྱེད་བཞིན་ཡོད་སྟབས། འདས་ལོར་འཛམ་གླིང་རྒྱལ་ཁབ་དང་རང་སྐྱོང་ས་ཁུལ་གྱི་ཁྲོད་ནས་ཨང་རིམ་ ༡༥༠ ཡིན་ཡང་། འདི་ལོར་ཇེ་སྡུག་ཏུ་ཕྱིན་ཏེ་ཨང་རིམ་ ༡༦༡ པར་ཟགས་འདུག བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། འདས་ལོར་དཔྱ་ཁྲལ་ལས་ཁུངས་ཀྱིས་རྒྱ་གར་ནང་གི་བྷི་བྷི་སི་གསར་ཁང་གི་ལས་ཁུངས་སུ་སྔོག་བཤེར་བྱས་ཏེ། གསར་འགོད་པ་དང་འབྲེལ་ཡོད་ལས་བྱེད་ཁག་ཅིག་ལ་འདྲི་བརྩད་བྱས་འདུག
འདི་ལོའི་ཕྱི་ཟླ་ ༩ ཚེས་ ༢༩ ཉིན་ཨ་རིའི་རྒྱལ་སྲིད་ལས་ཁུངས་ཀྱི་རྒྱལ་སྤྱིའི་འབྲེལ་ལམ་བསྟི་གནས་ཁང་ (Global Engagement Center) གིས་སྙན་ཐོ་ཞིག་སྤེལ་བའི་ནང་། འདས་པའི་ལོ་ཤས་རིང་རྒྱ་ནག་གཞུང་གིས་ཨ་སྒོར་ཐེར་འབུམ་མང་པོ་བཏང་ནས་ཕྱི་རྒྱལ་གྱི་གསར་ཁང་མང་པོར་འབྲེལ་བ་བཙུགས་ནས་གནས་ཚུལ་སྦེད་སྐུང་དང་རྫུན་བཟོ་སོགས་བྱས་ཏེ། རྒྱལ་སྤྱིའི་ནང་རྒྱ་ནག་དམར་ཤོག་སྲིད་གཞུང་གི་ཤུགས་རྐྱེན་དང་དབང་ཐང་རྒྱས་ཐབས་བྱེད་ཀྱི་ཡོད་ཅིང་། ལྐོག་ནས་རྒྱལ་སྤྱིའི་ནང་གི་གསར་ལམ་ཁག་ཉོས་པ་མ་ཟད། ས་གནས་ས་ཐོག་གི་གསར་ཁང་སོགས་ལ་གན་རྒྱ་བཞག་པ་དང་སྦྱིན་བདག་སོགས་བྱས་ཏེ། ཐབས་ཇུས་མཁས་པོའི་ཐོག་ནས་གསར་ལམ་ཁག་ལ་གནོན་ཤུགས་སྤྲད་ནས། རྒྱ་ནག་གཞུང་གི་ལྟ་བ་དང་མཐུན་པའི་གནས་ཚུལ་རྫུན་བཟོ་དང་འགྲེམས་སྤེལ་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་ཆེད་དུ་དྲ་ལམ་ཁག་ཏུ་དམར་ཤོག་གི་ལྟ་བ་དྲིལ་བསྒྲགས་བྱེད་པ་དང་། རྒྱ་ནག་གིས་བཏོན་པའི་ཁ་པར་གཙོས་གློག་ཆས་རིགས་མང་པོ་ཞིག་རྒྱལ་ཁབ་གཞན་དུ་བཙོང་ནས། གློག་ཆས་དེ་དག་ལས་རྒྱལ་ཁབ་ཀྱི་གསང་བ་དང་། ཚོགས་པ་སྒྲིག་འཛུགས། ཐ་ན་མི་སྒེར་གྱི་གསང་བ་སོགས་རྐུ་ཁྱེར་བྱེད་ཀྱི་ཡོད་པ་མ་ཟད། གཞུང་སྒེར་མང་པོ་ཞིག་གི་དྲ་རྒྱ་དང་། གློག་འཕྲིན་སོགས་སུ་དྲ་འབུ་མངགས་གཏོང་བྱས་ཏེ། གསང་བའི་ངང་ནས་ལས་དོན་བྱེད་ཕྱོགས་སོགས་ཀྱི་ཐད་ལ་ལྟ་ཞིབ་དང་ཚོད་འཛིན། སོ་ཉུལ་བྱེད་ཀྱིན་ཡོད་སྐོར་སོགས་ཐེར་འདོན་བྱས་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
